Swivutiso Swa Vahlayi

Ha yini Muxe a hlundzukele Eliyazara na Ithamara vana va Aroni endzhaku ka ku fa ka vamakwavo va vona Nadabu na Abihu, naswona ku hlundzuka kakwe ku vohle hi ndlela yihi?—Lev. 10:16-20.

Endzhakunyana ka loko Aroni a vekiwe ku va muprista wa le tabernakeleni, Yehovha u dlaye vana vakwe Nadabu na Abihu hileswi va endleke gandzelo ra murhi wa risuna lowu nga riki enawini emahlweni Kakwe. (Lev. 10:1, 2) Muxe u lerise vana va Aroni lava poneke leswaku va nga va rileli vamakwavo lava feke. Endzhaku ka sweswo, Muxe u hlundzukele Eliyazara na Ithamara hileswi va nga dyangiki mbuti ya gandzelo ra xidyoho. (Lev. 9:3) Ha yini Muxe a va hlundzukerile?

Milawu leyi Yehovha a yi nyikeke Muxe yi vule hi ku kongoma leswaku muprista loyi a nyikelaka gandzelo ra xidyoho a a fanele a dya xiphemu xa rona exivaveni xa ntsonga wa nhlangano. Ku endla tano a swi tekiwa tanihi ndlela yo hlamulela swidyoho swa lava endleke gandzelo rero. Hambiswiritano, loko ngati yin’wana ya gandzelo rero yi yisiwe eNdhawini yo Kwetsima, ku nga xivava xo sungula xa xikwetsimisiso, a ri nga fanelanga ri dyiwa. Ematshan’weni ya sweswo, a ri fanele ri hisiwa.—Lev. 6:24-26, 30.

Swi tikomba onge endzhaku ka swiendlakalo swo vava swa siku rero, Muxe u vone xilaveko xo va a tiyisekisa leswaku swileriso swa Yehovha swa landzeriwa. Loko a kume leswaku mbuti ya gandzelo ra xidyoho yi hisiwile, u vutise Eliyazara na Ithamara hi ku hlundzuka leswaku ha yini va nga yi dyanga hilaha nawu wu lerisaka hakona, tanihi leswi ngati ya rona yi nga yisiwangiki emahlweni ka Yehovha eNdhawini yo Kwetsima.—Lev. 10:17, 18.

Aroni u hlamule xivutiso xa Muxe, tanihi leswi Eliyazara na Ithamara lava poneke swi nga erivaleni leswaku va endle leswi a a va lerise swona. Kumbexana Aroni u tivutisile loko mapfalo ya vona a ma ta va ntshunxa ku dya gandzelo ra xidyoho hi siku rero tanihi leswi ku dlayiweke vana vakwe vambirhi. Kumbexana u ehlekete leswaku loko vo dya gandzelo rero a swi nga ta n’wi tsakisa Yehovha hambileswi vona a va nga ri na nandzu eka xidyoho lexi endliweke hi Nadabu na Abihu.—Lev. 10:19.

Ngopfu-ngopfu Aroni a nga ha va a ehlekete leswaku hi siku ro sungula leri vana vakwe va endleke mintirho ya vona ya vuprista, a va fanele va tikarhatele ku tsakisa Xikwembu hambi ku ri eka swilo leswitsongo. Hambiswiritano, Nadabu na Abihu va nyamise vito ra Yehovha naswona ku hlundzuka ka yena ku ve ehenhla ka vona. Hikwalaho Aroni a nga ha va a ehlekete leswaku swirho swa ndyangu wa vaprista leswi dyoheke a swi nga fanelanga swi dya gandzelo ro kwetsima.

Swi tikomba onge Muxe u amukele nhlamulo ya makwavo, hikuva ndzimana leyi yi gimeta yi ku: “Loko Muxe a twa sweswo, swi n’wi enerisile ematihlweni yakwe.” (Lev. 10:20) Swi tikomba onge na Yehovha yi n’wi tsakisile nhlamulo ya Aroni.