Tshinela Eka Xikwembu

“Oho Xikwembu Xanga, Ndzi Tsundzuke, Hi Vunene”

“A NDZI ehleketa leswaku Yehovha, loyi a ndzi tivaka kahle a nge pfuki a ndzi rhandzile ni ku ndzi amukela.” Marito lawa ma vuriwe hi wansati un’wana wa Mukreste loyi a a titeka a ri xikangalafula. Xana na wena u tshame u titwa hi ndlela leyi fanaka, u ehleketa leswaku Xikwembu a xi na mhaka na wena naswona a xi ku amukeli? Loko swi ri tano, marito lama nga eka Nehemiya 13:31 ma nga ku khutaza swinene.

Nehemiya loyi a a ri ndhuna-nkulu ya Vayuda hi lembe-xidzana ra vuntlhanu B.C.E., u endle hinkwaswo leswi a nga swi kotaka leswaku a tsakisa Xikwembu. U rhangele ntirho wo pfuxeta makhumbi ya Yerusalema hambileswi a a kanetiwa hi valala. U endle leswaku ku tirhisiwa Nawu wa Xikwembu, a khathalela lava tshikilelekeke a tlhela a tiyisa ripfumelo ra Vaisrayele. Xana Xikwembu xi swi vonile leswi wanuna loyi wo tshembeka a swi endleke? Xana a xi n’wi seketela? Tinhlamulo ta swivutiso leswi hi nga ti kuma eka marito yo hetelela ya buku leyi vitaniwaka hi vito rakwe.

Nehemiya u khongele a ku: “Oho Xikwembu xanga, ndzi tsundzuke, hi vunene.”a Xana Nehemiya a a ehleketa leswaku Xikwembu a xi swi vonanga leswinene leswi a swi endleke naswona xi ta n’wi rivala? A swi tano. A a swi tsundzuka leswi vatsari va khale va Bibele va swi vuleke malunghana ni ndlela leyi Yehovha a va rhandzaka ha yona vagandzeri vakwe ni swilo leswinene leswi va swi endlaka. (Eksoda 32:32, 33; Pisalema 56:8) Kutani i yini leswi a a kombela Xikwembu leswaku xi n’wi endlela swona? Buku yin’wana ya tinhlamuselo ta Bibele yi vula leswaku rito ra Xiheveru leri hundzuluxeriweke ri va ‘tsundzuka,’ ri vula “ku rhandza nchumu wo karhi swinene swin’we ni xiendlo lexi fambisanaka ni ku tsundzuka.” Leswi Nehemiya a a tshemba leswaku xikhongelo xi ni matimba, u kombele Xikwembu leswaku xi n’wi tsundzuka hi leswinene naswona xi n’wi katekisa.—Nehemiya 2:4.

Xana Yehovha a a ta xi hlamula xikhongelo xa Nehemiya? Entiyisweni, se a a xi hlamurile. Ku va Yehovha a endle leswaku ku va ni rungula leri vulavulaka hi xikhongelo xakwe naswona a endla leswaku xi tsariwa eMatsalweni lama huhuteriweke, swi hi tiyisekisa leswaku u n’wi tsundzuke hi leswinene naswona u n’wi katekisile. Kambe ka ha ri ni swo tala leswi “Mutwi wa xikhongelo” a nga ta swi endla leswaku a hlamula xikhongelo xa Nehemiya lexi humaka embilwini.—Pisalema 65:2.

Xikwembu xa ha ta yi katekisa mintirho leyinene leyi Nehemiya a yi endleke malunghana ni vugandzeri bya ntiyiso. (Vaheveru 11:6) Emisaveni leyintshwa yo lulama leyi Yehovha a yi tshembiseke, u ta katekisa Nehemiya hi ku n’wi pfuxa eka lava feke.b (2 Petro 3:13; Nhlavutelo 21:3, 4) Leswi Nehemiya a nga ta va a ri ni ntshembo wo hanya eparadeyisini leyi nga ta va laha misaveni hilaha ku nga heriki, u ta swi vona leswaku Yehovha u n’wi tsundzuke hi leswinene leswi a swi endleke.

Xikhongelo xa Nehemiya xi tiyisekisa marito ya Hosi Davhida lama nge: “Wena u ta katekisa un’wana ni un’wana la lulameke, wena Yehovha; ku fana ni xitlhangu lexikulu, u ta va rhendzela hi tintswalo.” (Pisalema 5:12) Xikwembu xa ma vona matshalatshala ya hina lawa hi ma endlaka hi timbilu ta hina hinkwato leswaku hi xi tsakisa. Loko u endla hinkwaswo leswi u nga swi kotaka leswaku u xi tirhela, u nga tiyiseka leswaku xi ta ku tsundzuka hi leswinene naswona xi ta ku katekisa swinene.

Tindzimana ta Bibele leti u nga ti hlayaka hi February:

◼ Nehemiya 1-13

[Tinhlamuselo ta le hansi]