Hi Ta Famba Hi Vutshembeki Bya Hina!

“Loko ku ri mina, ndzi ta famba hi vutshembeki bya mina.”—PS. 26:11.

1, 2. I yini leswi Yobo a swi vuleke malunghana ni ku tshembeka kakwe naswona i yini leswi kombisiwaka malunghana na yena eka Yobo ndzima 31?

EMINKARHINI ya khale, hakanyingi a ku tirhisiwa xikalo leswaku ku pimiwa swilo. Hi ntolovelo a xi ri ni mhandzi leyi hingakanyaka hi le xikarhi. Ematlhelo ka mhandzi yoleyo a ku lengalengisiwa swibye. Nchumu lowu pimiwaka a wu hoxiwa eka xibye lexin’wana kutani eka xibye lexin’wana ku hoxiwa xipimo. Vanhu va Xikwembu a va fanele va tirhisa swikalo ni swipimo leswi tshembekaka.—Swiv. 11:1.

² Loko Yobo wanuna wo lulama a ri karhi a hlaseriwa hi Sathana, u te: “[Yehovha u] ta ndzi kala eswikalweni leswi pakanisaka kutani Xikwembu xi ta tiva ku tshembeka ka mina.” (Yobo 31:6) Emhakeni leyi Yobo u boxe swiyimo swo hambana-hambana leswi nga ringaka munhu la tshembekaka. Kambe Yobo u yi hlurile miringo yoleyo, hilaha swi hlamuseriweke hakona eka marito yakwe lama kumekaka eka Yobo ndzima 31. Xikombiso xakwe lexinene xi nga hi susumetela ku endla swilo hi ndlela leyi fanaka, ivi hi vula hi ku tiyiseka hilaha mupisalema Davhida a vuleke hakona a ku: “Loko ku ri mina, ndzi ta famba hi vutshembeki bya mina.”—Ps. 26:11.

 3. Ha yini swi ri swa nkoka ku tshembeka eka Xikwembu etimhakeni letikulu ni letitsongo?

³ Hambileswi Yobo a ringiweke swinene, u tshame a tshembekile eka Xikwembu. Van’wana va nga ha vula leswaku Yobo a a ri xikombiso lexinene xa munhu la tshameke a tshembekile hambiloko a langutane ni miringo leyikulu. Hina a hi xaniseki hilaha Yobo a xanisekeke hakona. Hambiswiritano, hi fanele hi tshembeka eka Xikwembu etimhakeni letikulu ni letitsongo, ku kombisa leswaku hi famba hi vutshembeki nileswaku hi seketela vuhosi bya xona.—Hlaya Luka 16:10.

I Swa Nkoka Ku Kombisa Ku Tshembeka eMahanyelweni Ya Hina

4, 5. Hi wahi mahanyelo lawa Yobo a ma papalateke tanihi leswi a a ri munhu loyi a a tshama a tshembekile?

⁴ Leswaku hi tshama hi tshembekile eka Yehovha, hi fanele hi namarhela milawu yakwe ya mahanyelo ku fana na Yobo. U te: “Ndzi endle ntwanano ni mahlo ya mina. Xana ndzi nga n’wi langutisisa ku yini nhwana? . . . Loko mbilu ya mina yi yengiwe hi wansati, naswona ndzi tshama ndzi tumbelerile endleleni yo nghena ya nakulorhi, nsati wa mina a a silele nuna un’wana, naswona vavanuna van’wana a va nkhinsame ehenhla ka yena.”—Yobo 31:1, 9, 10.

⁵ Leswi Yobo a a tiyimisele ku tshama a tshembekile eka Xikwembu, u papalate ku languta wansati hi ndlela yo n’wi navela leswaku a va ni vuxaka bya rimbewu na yena. Tanihi wanuna la tekeke, a a nga endli onge u rhandza wansati la nga tekiwangiki kumbe a lava ku rhandzana ni nsati wa nuna un’wana. EDyondzweni ya le Ntshaveni Yesu u vule mhaka ya ntikelo swinene mayelana ni ku tikhoma lokunene hi tlhelo ra rimbewu—leyi entiyisweni yi nga ndzayo leyi lava va lavaka ku tshama va tshembekile va faneleke va yi tsundzuka.—Hlaya Matewu 5:27, 28.

U Nga Tshuki U Tirhisa Tindlela Ta Vukanganyisi

6, 7. (a) Hilaha a swi ri hakona emhakeni ya Yobo, Xikwembu xi tirhisa yini leswaku xi pima vutshembeki bya hina? (b) Ha yini hi nga fanelanga hi va ni vukanganyisi kumbe vuxisi?

⁶ Loko hi lava ku va vanhu lava tshamaka va tshembekile hi fanele hi papalata ku endla swilo hi vukanganyisi. (Hlaya Swivuriso 3:31-33.) Yobo u te: “Loko ndzi fambe ni vanhu lava nga riki na ntiyiso, ni milenge ya mina yi anghwetlela evuxisini, [Yehovha u] ta ndzi kala eswikalweni leswi pakanisaka kutani Xikwembu xi ta tiva ku tshembeka ka mina.” (Yobo 31:5, 6) Yehovha u pima vanhu hinkwavo “eswikalweni leswi pakanisaka.” Hilaha a swi ri hakona emhakeni ya Yobo, Xikwembu xi tirhisa milawu ya xona ya vululami leyi hetisekeke ku vona loko hi ri vanhu lava tshamaka va tshembekile, tanihi leswi hi nga malandza ya xona lama tinyiketeleke.

⁷ Loko hi ri na vukanganyisi, hi ta va hi nga tshembekanga eka Xikwembu. Vanhu lava tshamaka va tshembekile va “fularhele swilo leswi ngungumerisiwaka leswi khomisaka tingana” naswona a va “fambi hi vukanganyisi.” (2 Kor. 4:1, 2) Kambe ku vuriwa yini loko hi vulavula marito ya vukanganyisi kumbe hi endla swiendlo swa vukanganyisi, xisweswo hi endla leswaku mupfumeri-kulorhi a kombela mpfuno eka Xikwembu? Loko hi endla tano a hi nge vi ni vuyelo lebyinene! Mupisalema u yimbelerile a ku: “Ndzi vitane Yehovha loko ndzi ri emaxangwini, naswona u ndzi hlamurile. Oho Yehovha, kutsula moya-xiviri wa mina emilon’wini ya mavunwa, eririmini ra mano.” (Ps. 120:1, 2) I swinene ku tsundzuka leswaku Xikwembu xi nga kambela leswi hi nga swona endzeni, “xi kambela mbilu ni tinso” ku vona loko hi ri vanhu lava tshamaka va tshembekile hakunene.—Ps. 7:8, 9.

Vana Xikombiso Lexinene Loko U Tirhisana Ni Van’wana

 8. Yobo u va khome njhani vanhu van’wana?

⁸ Leswaku hi tshama hi tshembekile, hi fanele hi fana na Yobo loyi a a lulamile, a titsongahata naswona a anakanyela van’wana. U te: “Loko ndzi tolovele ku ala ku avanyisiwa hi hlonga ra mina ra xinuna kumbe hi hlonga ra mina ra xisati loko va ri ni mhaka na mina enawini, xana ndzi nga endla yini loko Xikwembu xi ndzi pfukela? Loko xi lava nhlamuselo, xana ndzi ta xi hlamula ndzi ku yini? Xana xona lexi xi ndzi endleke ekhwirini a hi xona xi n’wi endleke, xana a hi xona xi hi lunghiseleleke embelekweni?”—Yobo 31:13-15.

 9. Hi tihi timfanelo leti Yobo a ti kombiseke loko a tirhisana ni malandza yakwe naswona hi fanele hi endlisa ku yini emhakeni leyi?

⁹ Entiyisweni, enkarhini wa Yobo a ku nga ri na endlelo leri rharhanganeke ro tenga milandzu. Milandzu a yi tengiwa hi ndlela yo hleleka naswona tihuvo a ti tamela ni milandzu ya mahlonga. Yobo a a khoma malandza yakwe hi ndlela yo lulama ni hi tintswalo. Loko hi lava ku famba hi vutshembeki hi fanele hi kombisa timfanelo to tano, ngopfu-ngopfu loko hi ri vakulu evandlheni ra Vukreste.

Vana Ni Malwandla, U Nga Vi Ni Makwanga

10, 11. (a) Hi swi tivisa ku yini leswaku Yobo a a ri ni malwandla naswona a a pfuna van’wana? (b) Yobo 31:16-25 yi nga hi tsundzuxa hi ndzayo yihi ya le Matsalweni leyi nyikeriweke endzhakunyana?

¹⁰ Yobo a a ri ni malwandla naswona a a pfuna van’wana, a a nga ri na vutianakanyi ni makwanga. U te: “Loko . . . mahlo ya noni a ndzi ta ma endla ma nga ha voni, naswona a ndzi dya xiphemu xa mina ndzi ri ndzexe, kasi n’wana la nga riki na tatana a a nga xi dyi . . . Loko ndzi tshamele ku vona munhu a lova hikwalaho ko pfumala nguvu . . . Loko ndzi ndziwite voko ra mina eka loyi a nga riki na tatana, loko ndzi vona xilaveko xa leswaku ndzi pfuniwa enyangweni, xiphanga xa katla ra mina a xi we ekatleni ra mina, ni voko ra mina a ri tshoveke erhambyini ra rona.” Naswona Yobo a a ta va a nga tshamanga a tshembekile loko a a vule marito lawa eka nsuku: “U ntshembo wa mina!”—Yobo 31:16-25.

¹¹ Marito wolawo yo tlhokovetsela ma nga ha hi tsundzuxa marito lawa ya mudyondzisiwa Yakobo: “Muxaka wa vugandzeri lebyi baseke ni lebyi nga nyamangiki hi ku ya hi langutelo ra Xikwembu tlhelo Tata wa hina hi lowu: ku khathalela lava nga riki na vatswari ni tinoni enhlomulweni wa tona, ni ku va munhu a tihlayisa a nga ri na xivati xa misava.” (Yak. 1:27) Hi nga ha tlhela hi tsundzuka xitsundzuxo xa Yesu lexi nge: “Tshamani mi pfule mahlo ya n’wina naswona mi tivonela eka muxaka wun’wana ni wun’wana wa ku navela, hikuva hambiloko munhu a ri ni swo tala, vutomi byakwe a byi humi eka swilo leswi a nga na swona.” Endzhaku ka sweswo, Yesu u vule xifaniso xa munhu wa makwanga loyi a feke “a nga fuwanga eka Xikwembu.” (Luka 12:15-21) Leswaku hi tshama hi tshembekile, a hi fanelanga hi pfumela ku phasiwa hi makwanga. Makwanga i ku gandzela swifaniso hikuva nchumu lowu munhu wa makwanga a wu navelaka wu endla leswaku munhu a nga ha vi na mhaka na Yehovha kutani makwanga ma va xikwembu xakwe. (Kol. 3:5) Ku tshembeka ni makwanga a swi fambisani!

U Nga Hambuki eVugandzerini Bya Ntiyiso

12, 13. Yobo u veke xikombiso xihi hi ku papalata ku gandzela swifaniso?

¹² Vanhu lava tshamaka va tshembekile a va hambuki evugandzerini lebyi tengeke. Yobo a nga hambukanga, hikuva u te: “Loko ndzi tshame ndzi vona ku vonakala loko ku voninga, kumbe n’weti wa risima wu famba, ni mbilu ya mina yi yengiwa exihundleni ni voko ra mina ri ntswontswa nomu wa mina, xexo na xona a ku ta va ku ri xidyoho lexi lavaka nyingiso wa vululami, hikuva a ndzi ta va ndzi landzule Xikwembu xa ntiyiso lexi nga le henhla.”—Yobo 31:26-28.

¹³ Yobo a nga swi gandzelanga swilo leswi nga hanyiki. Loko mbilu yakwe a yi tshame yi yengiwa loko yi vona swilo leswi nga etilweni, swo tanihi n’weti, ni loko ‘voko rakwe ri ntswontswe nomu wakwe,’ kumbexana a rhanga a ntswontswa voko rakwe ivi a ri kongomisa eka vugandzeri bya swifaniso swa hava, a a ta va mugandzeri wa swifaniso loyi a landzuleke Xikwembu. (Det. 4:15, 19) Leswaku hi tshama hi tshembekile eka Xikwembu, hi fanele hi papalata vugandzeri hinkwabyo bya swifaniso.—Hlaya 1 Yohane 5:21.

U Nga Rihiseli Kumbe U Kanganyisa

14. Ha yini hi nga vulaka leswaku Yobo a a nga ri na mona?

¹⁴ Yobo a a nga ri na mona kumbe tihanyi. A a swi tiva leswaku sweswo a swi ta endla leswaku a nga vi munhu la tshamaka a tshembekile, hikuva u te: “Loko a ndzi tsakisiwa hi ku herisiwa ka munhu la ndzi vengaka swinene, kumbe ndzi tsakisiwa hileswi a kumiweke hi vubihi . . . , a ndzi ma pfumelelanga malaka ya mina leswaku ma dyoha hi ku kombela xihlambanyo lexi lwisanaka ni moya-xiviri wakwe.”—Yobo 31:29, 30.

15. Ha yini swi hoxile ku tsaka loko munhu la hi vengaka a weriwa hi khombo?

¹⁵ Yobo wo lulama a a nga tsaki loko munhu loyi a n’wi vengaka a weriwa hi khombo. Xivuriso xin’wana xi lemukisile endzhakunyana xi ku: “Loko nala wa wena a wa, u nga tsaki; naswona loko a khunguvanyeka, mbilu ya wena yi nga tsaki, leswaku Yehovha a nga swi voni kutani swi va swo biha ematihlweni yakwe kutani a susa ku hlundzuka kakwe eka yena.” (Swiv. 24:17, 18) Leswi Yehovha a tivaka leswi nga le mbilwini, wa swi tiva loko hi tsaka embilwini loko munhu un’wana a weriwe hi khombo naswona wa ri venga langutelo ro tano. (Swiv. 17:5) Xikwembu xi nga ha hi avanyisa hi ndlela leyi faneleke, hikuva xi ri: “Ku rihisela ni ndzihiso i swa mina.”—Det. 32:35.

16. Hi nga va ni malwandla hi ndlela yihi hambiloko hi nga ri na mali yo tala?

¹⁶ Yobo a a ri ni malwandla. (Yobo 31:31, 32) Hambileswi hi nga ha vaka hi nga ri na mali yo tala, hi nga “landzela ndlela ya malwandla.” (Rhom. 12:13) Hi nga avelana ni van’wana swakudya swo olova, hi ri karhi hi tsundzuka leswaku “matsavu ma antswa laha ku nga ni rirhandzu ematshan’weni ya nkunzi leyi wundleriweke exidyelweni kambe ku ri ni rivengo.” (Swiv. 15:17) Ku dya swakudya swo olova ni munhu loyi na yena a tshamaka a tshembekile, laha ku nga ni moya wa rirhandzu ku nga va nchumu lowu tsakisaka ni lowu akaka.

17. Ha yini hi nga fanelanga hi ringeta ku tumbeta swidyoho leswikulu?

¹⁷ Swi fanele swi ve leswi akaka hi tlhelo ra moya ku kombiwa malwandla hi Yobo hikuva a a nga ri mukanganyisi. A a nga fani ni vavanuna lava nga chaviki Xikwembu, lava ngungumeleke va nghena evandlheni ra lembe-xidzana ro sungula naswona a va “ndhundhuzela vanhu leswaku vona vini va ta pfuneka.” (Yudha 3, 4, 16) Yobo a nga ku tumbetanga ku tlula nawu kakwe kumbe ‘ku fihla xidyoho xakwe exikhwameni xa hembe ra yena,’ hi ku chava leswaku loko vanhu van’wana vo swi twa a va nga ha ta n’wi xixima. A a tiyimiserile ku kamberiwa hi Xikwembu laha a ta tiphofula eka xona hi ndlela leyi faneleke. (Yobo 31:33-37) Loko hi endle xidyoho lexikulu, hi nga ringeti ku xi tumbeta hi ku chava leswaku hi ta tionha vito. Hi nga swi kombisa njhani leswaku hi ringeta ku tshama hi tshembekile? Hi ku amukela swihoxo swa hina, hi hundzuka, hi lava mpfuno hi tlhelo ra moya naswona hi endla hinkwaswo leswi hi nga swi kotaka leswaku hi kombela ku rivaleriwa.—Swiv. 28:13; Yak. 5:13-15.

Munhu La Tshamaka A Tshembekile A Tengisiwa

18, 19. (a) Ha yini ku nga vuriwaka leswaku Yobo a nga kalanga a tshikilela munhu? (b) Yobo a a tiyimisele ku endla yini loko a a lo kumeka a ri ni nandzu?

¹⁸ Yobo a a tshembekile naswona a a lulamile. Hikwalaho u te: “Loko misava ya mina yo ndzi rilela yi lava mpfuno, ni migerho ya kona yo rila; loko ndzi dye mihandzu ya kona ndzi nga ri na mali, naswona ndzi endle leswaku moya-xiviri wa vini va swona wu hefemulela ehenhla, ematshan’weni ya koroni a ku mile mfava wa mitwa, ematshan’weni ya maxalana a ku mile mfava wo nun’hwa.” (Yobo 31:38-40) Yobo a a nga si tshama a tekela vanhu masimu ya vona naswona a a nga va dyeleri vatirhi vakwe. Ku fana na yena, hi fanele hi tshembeka eka Yehovha eka timhaka letikulu ni letitsongo.

¹⁹ Yobo u vulavule hi mahanyelo ya yena emahlweni ka vanghana vakwe vanharhu swin’we na Elihu. Yobo u rhambe munhu wihi ni wihi loyi a n’wi voneke nandzu leswaku a ya n’wi mangalela leswaku a a ri munhu wa njhani, laha a ku ta va ni “ku tiyisekisa” ka yena. Loko a ko va ni vumbhoni bya leswaku Yobo u ni nandzu, a a tiyimiserile ku xupuriwa. Hikwalaho nandzu wa yena u wu tshikele Xikwembu kutani a rindzela leswaku xi avanyisa. Hikwalaho “marito ya Yobo ma herile.”—Yobo 31:35, 40.

U Nga Swi Kota Ku Tshama U Tshembekile

20, 21. (a) Ha yini Yobo a swi kotile ku tshama a tshembekile? (b) Hi nga ku hlakulela njhani ku rhandza Xikwembu?

²⁰ Yobo u swi kotile ku tshama a tshembekile hikuva a a rhandza Xikwembu, naswona Yehovha na yena a a n’wi rhandza naswona u n’wi pfunile. Yobo u te: “[Yehovha] u ndzi endle ndzi va ni vutomi ni musa wa rirhandzu [“rirhandzu ro tshembeka”]; naswona nkhathalelo wa [yena] wu rindze moya wa mina.” (Yobo 10:12) Ku tlula kwalaho, Yobo u kombise van’wana rirhandzu, a swi xiya leswaku un’wana ni un’wana loyi a nga kombisiki rirhandzu ro tshembeka eka vanhu van’wana a nge n’wi chavi Lowa Matimba Hinkwawo. (Yobo 6:14) Vanhu lava tshamaka va tshembekile va rhandza Xikwembu ni vanhu-kulobye.—Mat. 22:37-40.

²¹ Hi nga hlakulela ku rhandza Xikwembu hi ku hlaya Rito ra xona siku ni siku ni ku anakanyisisa hi leswi ri swi paluxaka malunghana na xona. Hi xikhongelo lexi humaka embilwini, hi nga dzunisa Yehovha hi tlhela hi n’wi nkhensa hikwalaho ka vunene lebyi a hi kombisaka byona. (Filp. 4:6, 7) Hi nga yimbelelela Yehovha hi tlhela hi vuyeriwa hi ku tihlanganisa ni vanhu vakwe nkarhi ni nkarhi. (Hev. 10:23-25) Kutani ku rhandza ka hina Xikwembu na kona ku ta kula loko hi ya ensin’wini hi tlhela hi twarisa “mahungu lamanene ya ku ponisiwa ha yena.” (Ps. 96:1-3) Loko hi endla tano, hi nga tshama hi tshembekile ku fana na mupisalema loyi a yimbeleleke a ku: “Ku tshinela eka Xikwembu i swinene eka mina. Ndzi veke vutumbelo bya mina eka Yehovha, Hosi leyi Lawulaka.”—Ps. 73:28.

22, 23. Tanihi vaseketeri va vuhosi bya Yehovha, mintirho leyi hi yi endlaka yi fana njhani ni ya vanhu va le nkarhini lowu nga hundza lava tshameke va tshembekile?

²² Eka malembe-xidzana lama hundzeke, Yehovha u nyike lava tshamaka va tshembekile mintirho yo tala yo hambana-hambana. Nowa u ake ngalava naswona a a ri “muchumayeri wa leswo lulama.” (2 Pet. 2:5) Yoxuwa u rhangele Vaisrayele a va nghenisa eTikweni leri Tshembisiweke, kambe sweswo u swi kote ntsena hikwalaho ka leswi a a hlaya ‘buku ya nawu nhlikanhi ni vusiku’ naswona a endla hi ku pfumelelana na yona. (Yox. 1:7, 8) Vakreste va lembe-xidzana ro sungula va endle vadyondzisiwa naswona a va hlangana nkarhi ni nkarhi leswaku va dyondza Matsalwa.—Mat. 28:19, 20.

²³ Hi seketela vuhosi bya Yehovha ni ku tshama hi tshembekile hi ku chumayela leswo lulama, hi ku endla vadyondzisiwa, hi ku tirhisa ndzayo ya le Matsalweni ni ku hlengeletana ni vagandzeri-kulorhi eminhlanganweni, etinhlengeletanweni ni le mintsombanweni. Sweswo swi hi pfuna leswaku hi va ni xivindzi, hi va lava tiyeke hi tlhelo ra moya naswona hi swi kota ku endla ku rhandza ka Xikwembu. Leswi a swi hi tikeli ngopfu hikuva hi seketeriwa hi Tata wa hina wa le tilweni ni N’wana wa yena. (Det. 30:11-14; 1 Tih. 8:57) Ku tlula kwalaho, hi pfuniwa hi “nhlengeletano ya [vamakwerhu] hinkwayo,” lava na vona va fambaka hi ku tshembeka naswona va xiximaka Yehovha tanihi Hosi ya vona leyi Lawulaka.—1 Pet. 2:17.

U Nga Hlamula Njhani?

• Hi fanele hi yi teka njhani milawu ya Yehovha ya mahanyelo?

• Hi tihi timfanelo leti Yobo a a ri na tona leti ku tsakisaka?

• Hilaha swi kombisiweke hakona eka Yobo 31:29-37, Yobo a a ri ni mahanyelo ya njhani?

• Ha yini hi nga swi kotaka ku tshama hi tshembekile eka Xikwembu?

[Xifaniso lexi nga eka tluka 29]

Yobo u tshame a tshembekile eka Yehovha. Na hina hi nga swi kota!

[Xifaniso lexi nga eka tluka 32]

Hi nga hlayisa vutshembeki bya hina!