Yehovha U Hi Dyondzisa Ku Hlayela Masiku Ya Hina
“Hi dyondzise ku hlaya masiku ya hina hi ndlela leyi hi nga tisaka mbilu ya vutlhari ha yona.”—PISALEMA 90:12.
1. Ha yini swi fanerile ku kombela Yehovha leswaku a hi dyondzisa “ku hlaya masiku ya hina”?
YEHOVHA XIKWEMBU i Mutumbuluxi wa hina ni Munyiki wa Vutomi. (Pisalema 36:9; Nhlavutelo 4:11) Kutani a ku na un’wana loyi a nga kotaka ku hi dyondzisa ndlela yo hanya vutomi bya hina hi vutlhari. Hikwalaho, mupisalema u kombele Xikwembu a ku: “Hi dyondzise ku hlaya masiku ya hina hi ndlela leyi hi nga tisaka mbilu ya vutlhari ha yona.” (Pisalema 90:12) Kutani swa fanela leswaku hi yi kambisisa kahle Pisalema 90, leyi tameleke xikombelo xexo. Kambe a hi rhangeni hi kuma nkatsakanyo wa risimu rero leri huhuteriweke hi Xikwembu.
2. (a) Mutsari wa Pisalema 90 i mani, naswona yi nga va yi tsariwe rini? (b) Pisalema 90 yi fanele yi ri khumba njhani vonelo leri hi nga na rona hi vutomi?
2 Nhloko-mhaka ya Pisalema 90 yi vula leswaku i “xikhongelo xa Muxe, munhu wa Xikwembu xa ntiyiso.” Leswi pisalema leyi yi kandziyisaka ku koma ka vutomi bya munhu, swi nga endleka yi tsariwe endzhaku ka ku kutsuriwa ka Vaisrayele evuhlongeni le Egipta ni hi nkarhi wa riendzo ra vona ra le mananga leri tekeke malembe ya 40, laha rixaka leri nga tshembekangiki ri loveke kona. (Tinhlayo 32:9-13) Kambe mhaka hileswaku Pisalema 90 yi komba leswaku vutomi bya vanhu lava nga hetisekangiki byi komile swinene. Kutani hi fanele hi hanya masiku ya vutomi bya hina bya risima hi ndlela ya vutlhari.
3. Kahle-kahle Pisalema 90 yi tamele yini?
3 Pisalema 90, eka tindzimana 1 ku ya ka 6 yi hlamusela Yehovha tanihi vutshamo bya hina lebyi nga heriki. Tindzimana 7 ku ya ka 12 ti kombisa leswi hi swi lavaka leswaku hi hanya malembe ya vutomi bya hina byo koma hi ndlela leyi amukelekaka eka yena. Naswona hilaha swi hlamuseriweke hakona eka tindzimana 13 ku ya ka 17, musa wa rirhandzu ni mikateko ya Yehovha i swilo leswi hi tshamaka hi swi langutele hi mahlo-ngati. Ina, pisalema leyi a yi hlamuseli vumundzuku bya malandza ya Yehovha ha un’we-un’we. Ntsena hi fanele hi tswonga marito ya yona ya xikhongelo. Hikwalaho, a hi kambisiseni Pisalema 90 hi ku ya hi vonelo ra lava va tinyiketeleke eka Xikwembu.
Yehovha—“Vutshamo Bya Hina Bya Xiviri”
4-6. Yehovha i “vutshamo bya hina bya xiviri” hi ndlela yihi?
4 Mupisalema u sungula hi marito lama nge: “Oho Yehovha, kunene wena u ve vutshamo bya hina bya xirivi eka xitukulwana xin’wana ku ya eka xitukulwana xin’wana. Tintshava ti nga si velekiwa, kumbexana u humese misava ni tiko leri noneke onge hiloko u swi humesa hi switlhavi swa ku veleka, u Xikwembu ku suka enkarhini lowu nga riki na makumu ku ya enkarhini lowu nga riki na makumu.”—Pisalema 90:1, 2.
5 Eka hina Yehovha, “Xikwembu lexi nga riki na makumu,” i ‘vutshamo bya xiviri’—vutumbelo bya moya. (Varhoma 16:26) Hi titwa hi sirhelelekile hileswi minkarhi hinkwayo a lunghekeleke ku hi pfuna, tanihi leswi a nga “Mutwi wa xikhongelo.” (Pisalema 65:2) Leswi hi tekaka ku karhateka ka hina hi ku lahlela eka Tata wa hina wa le tilweni hi vito ra N’wana wakwe, ‘ku rhula ka Xikwembu loku tlulaka miehleketo hinkwayo ku rindza timbilu ta hina ni matimba ya hina ya mianakanyo.’—Vafilipiya 4:6, 7; Matewu 6:9; Yohane 14:6, 14.
6 Hi titwa hi sirhelelekile hi tlhelo ra moya hikuva Yehovha i “vutshamo bya hina bya xiviri” hi ndlela yo fanekisela. Nakambe u hi lunghiselele ‘makamara ya le mpfungwe’—lawa swi nga ha endlekaka ma fambisana swinene ni mavandlha ya vanhu va yena—tanihi tindhawu ta vutumbelo bya moya, laha varisi lava nga ni rirhandzu va hoxaka xandla swinene eka ku sirheleleka ka hina. (Esaya 26:20; 32:1, 2; Mintirho 20:28, 29) Ku tlula kwalaho, van’wana va hina hi nga ha va hi huma emindyangwini leyi ku nga khale yi tirhela Xikwembu naswona hi kume leswaku i ‘vutshamo bya xiviri eka xitukulwana xin’wana ku ya eka xitukulwana xin’wana.’
7. Tintshava ti lo “velekiwa” ni misava yi humesiwa onge hiloko ku ri “hi switlhavi swa ku veleka” hi ndlela yihi?
7 Yehovha u ve kona tintshava ti nga si “velekiwa” kumbe misava yi nga si vumbiwa onge hiloko yi humesiwe “hi switlhavi swa ku veleka.” Loko swi langutiwa hi vonelo ra munhu, a ku laveka matshalatshala lamakulu loko ku vumbiwa misava ni swilo swa yona hinkwaswo. Naswona loko a vula leswaku tintshava ti lo “velekiwa” ni leswaku misava yi humesiwe onge hiloko ku ri “hi switlhavi swa ku veleka,” mupisalema u kombisa xichavo lexikulu eka ntirho wo tala lowu katsekeke loko Yehovha a vumba swilo leswi. Xana a hi fanelanga hi va ni xichavo lexi fanaka hi tlhela hi tlangela ntirho wa mavoko ya Mutumbuluxi?
Yehovha U Tshama A Lunghekele Ku Hi Pfuna
8. Xi vula yini xiga lexi nge Yehovha i Xikwembu “ku suka enkarhini lowu nga riki na makumu ku ya enkarhini lowu nga riki na makumu”?
8 Mupisalema u yimbelerile: “U Xikwembu ku suka enkarhini lowu nga riki na makumu ku ya enkarhini lowu nga riki na makumu.” ‘Nkarhi lowu nga riki na makumu’ ku nga ha va nkarhi wa swilo leswi nga ta hela, hambiloko wu nga vekiwanga. (Eksoda 31:16, 17; Vaheveru 9:15) Kambe, eka Pisalema 90:2 ni kun’wana eMatsalweni ya Xiheveru, ‘nkarhi lowu nga riki na makumu’ wu vula “nkarhi lowu nga riki na masungulo ni mahetelelo.” (Eklesiasta 1:4) A hi nge swi koti ku twisisa leswaku Xikwembu xi ve kona njhani hi minkarhi hinkwayo. Kambe Yehovha a nga vanga na masungulo naswona a nge vi na makumu. (Habakuku 1:12) U ta va kona hi minkarhi hinkwayo naswona u ta tshama a lunghekele ku hi pfuna.
9. Mupisalema u wu ringanisa na yini nkarhi wa vanhu lava hanyeke malembe ya gidi?
9 Mupisalema u huhuteriwe leswaku a hlamusela ndlela leyi vanhu lava hanyeke malembe ya gidi va heteke nkarhi wutsongo ha yona hi ku ya hi Mutumbuluxi la tshamaka a ri kona hi masiku. Loko a kombetela eka Xikwembu, u tsarile a ku: “U endla leswaku munhu wa nyama a tlhelela [emisaveni leyi fayeleriweke], naswona u ri: ‘Tlhelelani, n’wina vana va vanhu.’ Hikuva malembe ya 1000 ematihlweni ya wena ma fana ni siku ra tolo loko ri hundzile, ku fana ni ku rindza nivusiku.”—Pisalema 90:3, 4.
10. Xana Xikwembu xi n’wi ‘tlherisela njhani munhu emisaveni leyi fayeleriweke’?
10 Munhu wa fa, naswona Xikwembu xi n’wi endla “a tlhelela [emisaveni leyi fayeleriweke].” Sweswo swi vula leswaku, munhu u tlhelela “entshurini,” a ri misava leyi fayeleriweke. Kahle-kahle Yehovha u ri: ‘Tlhelela entshurini wa misava leyi u vumbiweke ha yona.’ (Genesa 2:7; 3:19) Leswi swi tirha eka vanhu hinkwavo—lava tiyeke ni lava tsaneke, van’wankumi ni swisiwana—hikuva munhu la nga hetisekangiki ‘a nge swi koti ku kutsula makwavo hambi ku ri ku nyika Xikwembu nkutsulo wakwe, leswaku u fanele a hanya hi masiku.’ (Pisalema 49:6-9) Kambe ha tlangela swinene leswi ‘Xikwembu xi nyikeleke hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a va ni vutomi lebyi nga heriki’!—Yohane 3:16; Varhoma 6:23.
11. Ha yini hi nga vulaka leswaku nkarhi lowu leheke ngopfu eka hina wu va wu kome ngopfu eka Xikwembu?
11 Hambi ku ri Metusela la hanyeke malembe ya 969, eka Yehovha a nga ri hetanga ni siku. (Genesa 5:27) Eka Xikwembu malembe ya gidi ma ringana ni siku ra tolo ra tiawara ta 24, loko ri hundzile. Nakambe mupisalema u vula leswaku eka Xikwembu malembe ya gidi ma ringana ni nkarhi lowu a wu endla tiawara ta mune wa ku rindza nxaxa nivusiku. (Vaavanyisi 7:19) Kutani, swi le rivaleni leswaku nkarhi lowu leheke ngopfu eka hina, wu va wu kome ngopfu eka Yehovha Xikwembu la hanyaka hi masiku.
12. Vanhu va ‘kukuriwa’ njhani hi Xikwembu?
12 Ku hambana ni vukona bya Xikwembu lebyi nga heriki, vutomi bya vanhu va namuntlha byi komile hakunene. Mupisalema u ri: “U va kukurile; va va vurhongo byinene; nimixo va fana ni byanyi bya rihlaza lebyi cincaka. Bya rhumbuka nimixo naswona bya cinca; nimadyambu bya vuna, kunene byi oma.” (Pisalema 90:5, 6) Muxe u vone Vaisrayele va magidi va fa emananga, ‘va kukuriwa’ hi Xikwembu onge hiloko ku ri hi ndhambhi. Xiyenge lexi xa pisalema leyi xi hundzuluxeriwe hi ndlela leyi: “U kukula vanhu hi vurhongo bya rifu.” (New International Version) Hi hala tlhelo, nkarhi lowu vanhu lava nga hetisekangiki va hanyaka wona i “vurhongo byinene” byo koma—ku fana ni vurhongonyana bya vusiku byin’we ntsena.
13. Hi ‘fana njhani ni byanyi bya rihlaza,’ naswona sweswo swi fanele swi yi khumba njhani miehleketo ya hina?
13 Hi ‘fana ni byanyi bya rihlaza lebyi rhumbukaka nimixo,’ kambe nimadyambu byi va byi vunile hileswi byi vavuriweke hi dyambu leri a ri hisa swinene. Ina, vutomi bya hina byi kome ku fana ni byanyi lebyi vunaka hi siku rin’we. Hikwalaho, hi nga tshuki hi tlanga hi nyiko leyi ya risima. Ku ri na sweswo, hi fanele hi lava nkongomiso wa Xikwembu ehenhleni ka ndlela leyi hi faneleke hi hanya ha yona emalembeni lama seleke ya mafambiselo lawa ya swilo.
Yehovha U Hi Pfuna Ku “Hlaya Masiku Ya Hina”
14, 15. Pisalema 90:7-9 yi hetiseke njhani eka Vaisrayele?
14 Mupisalema u ye emahlweni a vula leswi landzelaka malunghana ni Xikwembu: “Hi herile hi ku hlundzuka ka wena, hi chavisiwe hi vukarhi bya wena. U veke swidyoho swa hina kwalaho mahlweni ka wena, swilo swa hina leswi fihliweke emahlweni ka xikandza xa wena lexi vangamaka. Hikuva masiku ya hina hinkwawo ma hungutekile hikwalaho ka ku hlundzuka ka wena; hi hete malembe ya hina ku fana ni ku hlevetela ntsena.”—Pisalema 90:7-9.
15 Vaisrayele vo pfumala ripfumelo ‘va herile hi ku hlundzuka ka Xikwembu.’ Va ‘chavisiwile hi vukari bya xona,’ kumbe ‘va chavisiwile hi ku hlundzuka ka xona.’ (New International Version) Van’wana va “wisiwile emananga” loko Xikwembu xi va avanyisa. (1 Vakorinto 10:5) Yehovha u ‘veke swidyoho swa vona emahlweni ka yena.’ U va vone nandzu hikwalaho ka swidyoho swa vona leswi va swi endleke erivaleni, kambe hambi ku ri ‘swilo swa vona leswi fihliweke,’ kumbe swidyoho leswi tumbetiweke, a swi ri ‘emahlweni ka xikandza xa yena lexi vangamaka.’ (Swivuriso 15:3) Tanihi leswi va weriweke hi vukari bya Xikwembu, Vaisrayele lava nga hundzukiki va ‘hete malembe ya vona ku fana ni ku hlevetela ntsena.’ Hikwalaho, vutomi bya hina byo koma byi fana ni moya lowu humaka emilon’wini ya hina loko hi hlevetela.
16. I yini lexi faneleke xi endliwa hi lava va endlaka xidyoho exihundleni?
16 Loko un’wana wa hina o endla xidyoho exihundleni, a nga swi kota ku xi tumbetela vanhu van’wana swa xinkarhana. Kambe xidyoho xa hina lexi fihliweke xi ta va ‘emahlweni ka xikandza xa Yehovha lexi vangamaka,’ naswona swiendlo swa hina swi ta onha vuxaka bya hina na yena. Leswaku hi tlhela hi va ni vuxaka lebyinene na Yehovha, hi ta fanela ku khongela hi kombela ku rivaleriwa, hi tshika swidyoho swa hina naswona hi wu amukela hi mandla mambirhi mpfuno wa moya wa vakulu lava nga Vakreste. (Swivuriso 28:13; Yakobo 5:14, 15) Ku endla sweswo swi ta va swi antswa ngopfu ku ri ni ku ‘heta malembe ya hina ku fana ni ku hlevetela ntsena,’ hi veka ntshembo wa hina wa vutomi lebyi nga heriki ekhombyeni!
17. Vanhu hi ntolovelo va hanya malembe mangani, naswona malembe ya hina ma tele hi yini?
17 Mupisalema u vule leswi landzelaka malunghana ni mpimo wa vutomi bya vanhu lava nga hetisekangiki: “Masiku ya malembe ya hina i malembe ya 70; loko ku ri hikwalaho ka matimba yo hlawuleka i malembe ya 80, kambe eka wona ku tshama ku ri ni ku karhateka ni swilo swo biha; hikuva ma hundza hi ku hatlisa, kutani hi haha.” (Pisalema 90:10) Vanhu hi ntolovelo va hanya malembe ya 70 naswona loko Kalebe a ri ni malembe ya 85 u vulavule hi matimba ya yena lama nga tolovelekangiki. Ku ni van’wana lava hanyeke malembe yo hlayanyana, ku fana na Aroni (123), Muxe (120) na Yoxuwa (110). (Tinhlayo 33:39; Deteronoma 34:7; Yoxuwa 14:6, 10, 11; 24:29) Kambe rixaka leri pfumalaka ripfumelo ra vanhu lava humeke aEgipta lava tsariseke ku suka eka malembe ya 20 ku ya ehenhla ri fe ku nga si hela malembe ya 40. (Tinhlayo 14:29-34) Namuntlha, malembe lawa vanhu va ma hanyaka ematikweni yo tala ma ringana ni lawa ma vuriweke hi mupisalema. Malembe ya hina ma tele hi “ku karhateka ni swilo swo biha.” Ma hundza hi ku hatlisa, “kutani hi haha.”—Yobo 14:1, 2.
18, 19. (a) Swi vula yini “ku hlaya masiku ya hina hi ndlela leyi hi nga tisaka mbilu ya vutlhari ha yona”? (b) Loko hi tirhisa vutlhari hi ta susumeteleka ku endla yini?
18 Mupisalema u ye emahlweni a yimbelela a ku: “I mani la tivaka ntamu wa ku hlundzuka ka wena ni ku kariha ka wena hi ku landza ku ku chava? Hi dyondzise ku hlaya masiku ya hina hi ndlela leyi hi nga tisaka mbilu ya vutlhari ha yona.” (Pisalema 90:11, 12) A nga kona ni un’we wa hina la wu twisisaka hi ku helela ntamu wa ku hlundzuka ka Xikwembu kumbe mpimo wa ku kariha ka xona, kutani leswi swi fanele swi kurisa xichavo lexi hi nga na xona eka Yehovha. Kahle-kahle, swi fanele swi hi susumetela ku xi kombela ku hi dyondzisa “[leswi hi nga ma hlayisaka swona] masiku ya hina hi ndlela leyi hi nga tisaka mbilu ya vutlhari ha yona.”
19 Marito ya mupisalema i xikhongelo xa leswaku Yehovha a dyondzisa vanhu va yena ndlela yo kombisa vutlhari eku tirhiseni ka masiku ya vona lama seleke hi ndlela leyi amukelekaka eka Xikwembu. Malembe ya 70 i masiku ya kwalomu ka 25 500. Kambe ku nga khathariseki leswaku hi ni malembe mangani, ‘a hi swi tivi leswaku vutomi bya hina byi ta va byi ri yini mundzuku, hikuva hi hunguva leyi humelelaka nkarhinyana kutani yi nyamalala.’ (Yakobo 4:13-15) Tanihi leswi ‘nkarhi ni xiendlakalo lexi nga languteriwangiki swi hi welaka hinkwerhu,’ a hi nge vuli leswaku hi ta hanya nkarhi wo tanihi kwihi. Hikwalaho a hi khongeleni hi kombela vutlhari byo langutana ni miringo, byo khoma van’wana kahle ni ku tlhela hi endla leswi nga ematimbeni ya hina entirhweni lowu hi wu endlelaka Yehovha sweswi—namuntlha! (Eklesiasta 9:11; Yakobo 1:5-8) Yehovha wa hi kongomisa hi Rito ra yena, moya wa yena ni nhlengeletano ya yena. (Matewu 24:45-47; 1 Vakorinto 2:10; 2 Timotiya 3:16, 17) Loko hi tirhisa vutlhari hi ta susumeteleka ku ‘lava Mfumo wa Xikwembu ku sungula’ ni ku tirhisa masiku ya hina hi ndlela leyi tisaka ku dzuneka eka Yehovha yi tlhela yi tsakisa mbilu ya yena. (Matewu 6:25-33; Swivuriso 27:11) Ina, ku n’wi gandzela hi mbilu hinkwayo a swi nge herisi swiphiqo swa hina hinkwaswo, kambe entiyisweni swi tisa ntsako lowukulu.
Mikateko Ya Yehovha Yi Hi Tisela Ntsako
20. (a) Xikwembu xi ‘tisola’ loko swi te yini? (b) Yehovha u ta endla yini loko hi kombisa ku hundzuka ka xiviri endzhaku ko endla xidyoho lexikulu?
20 A swi ta tsakisa swonghasi loko a swi koteka leswaku hi tshama hi tsakile evuton’wini bya hina hinkwabyo! Emhakeni leyi, Muxe u komberile a ku: “Vuya, Wena Yehovha! Xana swi ta teka nkarhi wo fikela kwihi? Tisole hikwalaho ka malandza ya wena. Hi enerise nimixo hi musa wa wena wa rirhandzu [kumbe “rirhandzu ro tshembeka”], leswaku hi ta huwelela hi ku tsaka, hi ta tsaka emasikwini ya hina hinkwawo.” (Pisalema 90:13, 14; nhlamuselo ya le hansi ya NW) Xikwembu a xi endli swihoxo. Kambe xa ‘tisola’ ni ku ‘hundzuka’ eku hlundzukeni ka xona ni ku tshika ku xupula vadyohi lava hundzuleke langutelo ni mahanyelo ya vona endzhaku ka loko xi va lemukisile leswaku xi ta va tekela goza ro tano. (Deteronoma 13:17) Kutani, hambiloko hi endle xidyoho lexikulu kambe hi kombisa leswaku hi hundzukile hakunene, Yehovha u ta ‘hi enerisa hi musa wakwe wa rirhandzu,’ kutani hi ta va ni xivangelo xa ku “huwelela hi ku tsaka.” (Pisalema 32:1-5) Naswona loko hi famba hi ndlela yo lulama, hi ta vona rirhandzu lerikulu leri Xikwembu xi nga na rona eka hina, naswona hi ta kota ku “tsaka emasikwini ya hina hinkwawo”—ina, evuton’wini bya hina hinkwabyo.
21. Swi nga ha endleka leswaku Muxe a a kombela yini hi ku ya hi marito lama tsariweke eka Pisalema 90:15, 16?
21 Mupisalema u khongele hi mbilu hinkwayo a ku: “Hi tsakise emasikwini lawa u hi xaniseke ha wona, malembe lawa hi voneke khombo ha wona. Onge ntirho wa wena wu nga vonaka eka malandza ya wena ni ku vangama ka wena ehenhla ka vana va vona.” (Pisalema 90:15, 16) Kumbexana Muxe a a kombela Xikwembu leswaku xi nyika Vaisrayele ntsako enkarhini lowu a va xaniseka ha wona. U kombele leswaku “ntirho” wa Xikwembu wa ku katekisa Vaisrayele wu vonaka eka malandza ya xona ni leswaku ku vangama ka xona ku vonaka ehenhla ka vana va vona. I swinene ku khongelela leswaku vanhu lava yingisaka Xikwembu va katekisiwa emisaveni leyintshwa leyi xi yi tshembiseke.—2 Petro 3:13.
22. Hi ku ya hi Pisalema 90:17, i yini leswi swi faneleke leswaku hi swi khongelela?
22 Pisalema 90 yi gimeta hi xikombelo lexi: “Ku tsakisa ka Yehovha Xikwembu xa hina a ku ve ehenhla ka hina, ni ntirho wa mavoko ya hina wu simeke wu tiya ehenhla ka hina. Ina, ntirho wa mavoko ya hina, wu simeke wu tiya.” (Pisalema 90:17) Marito lawa ma kombisa leswaku swi fanerile leswaku hi khongelela leswaku Xikwembu xi katekisa matshalatshala ya hina entirhweni wa xona. Tanihi Vakreste lava totiweke kumbe vanakulobye va vona, ku nga “tinyimpfu tin’wana,” ha tsaka leswi “ku tsakisa ka Yehovha” ku nga ehenhla ka hina. (Yohane 10:16) Ha tsaka swinene leswi Xikwembu xi ‘simekeke ntirho wa mavoko ya hina wu tiya’ tanihi vatwarisi va Mfumo na hi tindlela tin’wana!
A Hi Hambeteni Hi Hlayela Masiku Ya Hina
23, 24. Ku anakanyisisa hi Pisalema 90 swi nga hi pfuna njhani?
23 Ku anakanyisisa hi Pisalema 90 swi fanele swi hi susumetela ku titshega swinene hi Yehovha, “vutshamo bya hina bya xiviri.” Loko hi anakanyisisa hi marito ya yona malunghana ni ku koma ka vutomi, hi ta swi xiya swinene leswaku ha byi lava vukongomisi bya Xikwembu eku hlayeleni ka masiku ya hina. Naswona loko hi phikelela hi lava vutlhari bya Xikwembu hi tlhela hi byi tirhisa, hi ta kuma musa wa rirhandzu ni mikateko ya Yehovha.
24 Yehovha u ta hambeta a hi dyondzisa ndlela yo hlayela masiku ya hina. Naswona loko hi pfumela ku kongomisiwa hi yena, hi ta swi kota ku hambeta hi hlayela masiku ya hina hilaha ku nga heriki. (Yohane 17:3) Kambe loko hi swi lava hakunene ku hanya hi masiku, hi fanele hi endla Yehovha vutumbelo bya hina. (Yudha 20, 21) Hilaha hi nga ta vona hakona eka xihloko lexi landzelaka, yinhla yoleyo yi vekiwa kahle erivaleni hi marito lama khutazaka ya Pisalema 91.
A Wu Ta Hlamurisa Ku Yini?
• Yehovha i “vutshamo bya hina bya xirivi” hi ndlela yihi?
• Ha yini hi nga vulaka leswaku Yehovha u tshama a lunghekele ku hi pfuna?
• Yehovha u hi pfunisa ku yini ku “hlaya masiku ya hina”?
• I yini lexi endlaka leswaku hi kota ku “tsaka emasikwini ya hina hinkwawo”?
[Xifaniso eka tluka 10]
Yehovha a a ri Xikwembu “tintshava ti nga si velekiwa”
[Xifaniso eka tluka 12]
Metusela la hanyeke malembe ya 969, eka Yehovha a nga ri hetanga ni siku
[Swifaniso eka tluka 14]
Yehovha u ‘simeke ntirho wa mavoko ya hina wu tiya’