Vutlhari Lebyi Sirhelelaka

HAMBILOKO ku va xigwili swi pfuna, kambe rifuwo ri nga ha tlhela ri vanga swiphiqo ngopfungopfu eminkarhini leyi, leyi swi tikaka ku hanya eka yona. (2 Timotiya 3:1-5) Ematikweni man’wana vanhu lava fuweke swin’we ni vaendzi lava vonakaka va ri ni mali yo tala, va hlaseriwa hi makhamba ni vatlhakisi lava lavaka mali.

Xiviko xa mahungu xi vulavule hi tiko rin’wana lera ha hluvukaka, xi ku: “Swigevenga leswi nga ni tihanyi, vukanganyisi ni ku tlhakisa, swi endla leswaku swigwili ni swisiwana va va valala. Tirhesiturente ti ni varindzi lava hlomeke, tindlu ta swigwili ti ni makhumbi lama nga ni darata leyi tsemaka, mavoni lama voningaka ngopfu ehandle ni vusiku, tikhamera ni varindzi.” Swilo swo fana ni leswi swa endleka ematikweni yo tala.

Kambe Bibele yi vula leswaku, “swisiwana a swi na mhaka ni ku chavisiwa.” Marito lawa ya vutlhari ma nga ku pfuna njhani? Loko u tshama endhawini leyi tivekaka hi madzolonga kumbe loko u fanele u endzela ndhawu yo tano, u nga tikokeli mahlo hi ku kombisa leswaku u ni mali. Anakanya hi swilo leswi u swi ambalaka ni leswi u swi khomaka loko u ta famba laha ku nga ni vanhu, ngopfungopfu loko swilo swa wena swa nkoka swi ta vonaka. Swivuriso 22:3 yi ri: “U tlharihile la voneke khombo kutani a tumbela, kambe la nga riki na ntokoto u ye emahlweni kutani u fanele a xupuriwa.”

Vutlhari lebyi tsariweke eBibeleni byi kombisa ndlela leyi Muvumbi wa hina a hi khathalelaka ha yona. U lava leswaku hi sirheleleka. Eklesiasta 7:12 yi vula leswaku “vutlhari [byolebyo] i xisirhelelo” hikuva “byi londzovota vini va byona va hanya.”