Xana U Aka Ehenhla Ka Masungulo Ya Njhani?

KU TIYA ka muako swi titshege ngopfu hileswaku wu ni masungulo kumbe xisekelo xa njhani. Minkarhi yin’wana Bibele yi tirhisa masungulo hi ndlela yo fanekisela.

Hi xikombiso, muprofeta Esaya, u vulavula hi Yehovha Xikwembu tanihi ‘loyi a vekaka masungulo ya misava.’ (Esaya 51:13) Masungulo lawa ma sekeriwe eka milawu ya Xikwembu leyi nga hundzukiki leyi lawulaka ku famba-famba ka misava ni ku yi khoma leswaku yi tshama endhawini ya yona. (Pisalema 104:5) Rito ra Xikwembu, ku nga Bibele, ri tlhela ri vulavula hi “masungulo” lawa vanhu va titshegeke ha wona. Masungulo lawa i vululami, nawu ni ku hleleka. Loko ma “hirimuxiwa,” kumbe ma tsanisiwa hi ku kala ka vululami, vukanganyisi ni madzolonga, vanhu a va swi koti ku tshama hi ndlela leyi hlelekeke.—Pisalema 11:2-6; Swivuriso 29:4.

Nsinya lowu wa nawu wa tirha ni le vuton’wini bya munhu ha un’we. Loko a gimeta Dyondzo yakwe leyi dumeke ya le Ntshaveni, Yesu Kreste u te: “Un’wana ni un’wana la twaka leswi ndzi swi vulaka kutani a swi endla u ta fanisiwa ni wanuna wo tlhariha, la akeke yindlu ya yena ehenhla ka ribye lerikulu. Kutani mpfula yi halaka ni tindhambi ti ta ni timheho ti hunga ti ba yindlu yoleyo, kambe yi nga wi, hikuva yi akiwe ehenhla ka ribye lerikulu. Ku tlula kwalaho, un’wana ni un’wana la twaka leswi ndzi swi vulaka kambe a nga swi endli u ta fanisiwa ni wanuna wa xiphukuphuku, la akeke yindlu ya yena ehenhla ka sava. Kutani mpfula yi halaka ni tindhambi ti ta ni timheho ti hunga ti ba yindlu yoleyo, yi wa, naswona ku wa ka yona ku va kukulu.”—Matewu 7:24-27.

Xana u akela vutomi bya wena ehenhla ka masungulo ya njhani? Xana u byi akela ehenhla ka filosofi leyi nga tiyangiki ya vanhu lava nga chaviki Xikwembu, leyi nga ta endla leswaku vutomi bya wena byi hohloka? Kumbe, xana u byi akela ehenhla ka ribye lerikulu leri tiyeke hi ku yingisa marito ya Yesu Kreste, lama nga ta ku pfuna leswaku u hlula swidzedze swo fanekisela leswi hlaselaka vutomi bya wena?