Ndzima Ya Vukhume-nhungu
Yehovha U Pfuxa Moya Wa Lava Titsongahataka
1. I xitiyisekiso xihi lexi Yehovha a xi nyikeke, naswona marito yakwe ma pfuxa swivutiso swihi?
“LOYI a Tlakukeke, La nga le Henhla, loyi a tshamaka hi masiku ni loyi vito rakwe ri kwetsimaka, u te: ‘Ndzi tshama eku tlakukeni ni le ndhawini yo kwetsima, swin’we ni loyi a pfotlokeke ni lava va moya wo titsongahata, leswaku ndzi hanyanyisa moya wa lava va titsongahataka ni ku hanyanyisa mbilu ya lava va pfotlosiwaka.’” (Esaya 57:15) Marito wolawo ma tsariwe hi muprofeta Esaya eka lembe-xidzana ra vunhungu B.C.E. A ku humelela yini eYuda lexi endleke leswaku rungula leri ri va leri khutazaka swonghasi? Xana marito lawa ma huhuteriweke ma va pfuna njhani Vakreste namuntlha? Ku kambisisa Esaya ndzima 57 swi ta hi pfuna ku hlamula swivutiso sweswo.
“N’wina, Tshinelani Laha”
2. (a) Marito ya Esaya ndzima 57 ma vonaka ma tirhe rini? (b) A xi ri xihi xiyimo xa lavo lulama enkarhini wa Esaya?
2 Xiyenge lexi xa vuprofeta bya Esaya xi vonaka xi tirhe enkarhini wa Esaya. Xiya ndlela leyi vuhomboloki se a byi dzike ha yona: “Lowo lulama u lovile, kambe a nga kona loyi a swi tekelaka enhlokweni. Naswona vanhu va musa wa rirhandzu va lahliwa eka lava feke, kasi a nga kona loyi a xiyaka leswaku lowo lulama u susiwe hikwalaho ka khombo. U nghena eku rhuleni; va wisa emasangwini ya vona, un’wana ni un’wana loyi a fambaka hi ku kongoma.” (Esaya 57:1, 2) Loko ku wa la lulameke, vanhu ni ku va ya a swi nga va yi. Ku fa ka yena ka xitshuketa a ku nga va tovi helo. Ku etlela vurhongo bya rifu a swi n’wi tisela ku rhula, swi n’wi panulula emaxangwini lawa a a vangeriwa wona hi vanhu lava nga chaviki Xikwembu, ni ku balekela khombo. Tiko ra Xikwembu a ri mbombomele ri twelela emanyaleni. Kambe lava tshamaka va tshembekile a va fanele va tiyisiwa hi ku tiva leswaku Yehovha a a swi vona leswi humelelaka naswona a a ta va seketela!
3. Xana Yehovha u xi vitana yini xitukulwana xo homboloka xa Yuda, naswona ha yini?
3 Yehovha u vitane xitukulwana xo homboloka xa Yuda, a ku: “Loko ku ri n’wina, tshinelani laha, n’wina vana va wansati la nga muvhumbhi, mbewu ya munhu wa vuoswi ni ya wansati la endlaka vunghwavava.” (Esaya 57:3) Ku va va vuriwa vana va muvhumbhi ni muoswi ni nghwavava a swi va fanela kahle. Vugandzeri bya mavunwa lebyi va tipeteke hi nhloko eka byona a byi katsa swiendlo leswi nyenyetsaka swa ku gandzela swikwembu swa hava, vungoma ni vudlakuta. Hikwalaho, Yehovha u vutise vadyohi lava a ku: “Xana i mani loyi mi n’wi tsakeleke? I mani loyi mi tshamelaka ku n’wi ahlamisela nomu, mi tshamela ku humesa ririmi? Xana a mi vona vana va ku tlula nawu, mbewu ya mavunwa, lava pfukiwaka hi ku navela exikarhi ka mirhi leyikulu, ehansi ka murhi wun’wana ni wun’wana lowu vekaka mihandzu, mi dlayetela vana eminkoveni ehansi ka maribye ya mabako?”—Esaya 57:4, 5.
4. Xana vanhu vo homboloka va le Yuda a va ri ni nandzu wa yini?
4 Vanhu vo homboloka va le Yuda a va endla mihivahivani leyi tsuvulaka misisi ya vugandzeri bya vona bya vuhedeni erivaleni, va ‘titsakisa.’ Vaprofeta va Xikwembu lava rhumiweke eka vona leswaku va ta va ololoxa, va va endle xihlekiso, va tlanga hi vona ni ku nyuma va nga nyumi. Hambileswi a va ri vana va Abrahama, ku xandzuka ka vona ku va endle vana lava hungukiweke ni mbewu ya mavunwa. (Esaya 1:4; 30:9; Yohane 8:39, 44) Exikarhi ka mirhi leyikulu ya le nhoveni, va pfindluse moya wa ku hisekela vukhongeri hi ku tirhisa vugandzeri bya vona bya swifaniso. Naswona a hi nsele wutsongo lowu a wu fundziwe hi vugandzeri bya kona! Phela a va dlayetela ni vana va vona lava nga lo va twela ku vava, ku fana ni vanhu lava mikhuva ya vona leyi nyenyetsaka yi vangeke leswaku Yehovha a va hlongola etikweni!—1 Tihosi 14:23; 2 Tihosi 16:3, 4; Esaya 1:29.
Ku Phahla Hi Gandzelo Ra Swakunwa eHenhla Ka Maribye
5, 6. (a) Xana vaaki va Yuda va hlawule ku endla yini ematshan’weni ya ku gandzela Yehovha? (b) Xana vugandzeri bya Vayuda bya swikwembu swa hava a byi nyenyetsa ku fikela kwihi naswona a byi hangalake ku fikela kwihi?
5 Vona ndlela leyi vaaki va Yuda a va mbombomele va twelela ha yona evugandzerini bya swikwembu swa hava: “Xiphemu xa wena xi ve emaribyeni yo rhetela ya nkova. Wona—a ma ri xiavelo xa wena. Ku tlula kwalaho, u ma chululele gandzelo ra swakunwa, u humese nyiko. Xana ndzi ta tichavelela hi swilo leswi?” (Esaya 57:6) Vayuda i vanhu lava Xikwembu xi endleke ntwanano na vona, kambe ematshan’weni ya ku gandzela xona, va ye va ya rholela maribye enambyeni, va endla swikwembu ha wona. Davhida u vule leswaku Yehovha a a ri xiphemu xa yena, kambe vadyohi lava a va hlawule swikwembu swa maribye leswi ni ku hanya swi nga hanyiki swi va xiphemu xa vona, va swi phahla hi gandzelo ra swakunwa. (Pisalema 16:5; Habakuku 2:19) Xana Yehovha a byi ta n’wi chavelela njhani vugandzeri byebyo lebyi hambukeke bya vanhu va yena?
6 Hinkwako-nkwako—lomuya hansi ka mirhi, eminkoveni, eswintshabyanini, emitini ya vona—Vayuda a va gandzela swikwembu swa hava. Kambe Yehovha a a lo swi nhwii, hinkwaswo ka swona, kutani U tirhise Esaya ku paluxa manyala ya vona: “Ehenhla ka ntshava yo tlakuka, yo leha, u veka sangu ra wena. U tlhele u tlhandlukela kona u ya humesa xitlhavelo. Endzhaku ka nyangwa ni rimba u veka xitsundzuxo xa wena.” (Esaya 57:7, 8a) Ehenhla ka switsunga, Vayuda a va andlala sangu ra vona ra manyala ya moya, va phahla swikwembu swimbe.a Hambi ti ri tindlu ta vona a ti lemiwe hi swifaniso swa swikwembu swa hava endzhaku ka tinyangwa ni le marimbeni.
7. Xana Vayuda a va hlanganyela evugandzerini bya manyala hi moya wihi?
7 Van’wana va nga ha tivutisa leswaku ha yini Vayuda va dzike va twelela evugandzerini lebyi nga tengangiki. Xana va ve ni nsusumeto wa matimba lowu va dlidlimbeteleke ku fularhela Yehovha? A swi tano. Va endle sweswo hi ku tirhandzela, va tlhela va swi hisekela. Yehovha u te: “U tifunungurile u tlhandluka mina ndzi nga ri kona; u kurise sangu ra wena. Naswona wena u tiendlele ntwanano na vona. U rhandze sangu swin’we na vona. U vone xirho xa xinuna.” (Esaya 57:8b) Vayuda va endle ntwanano ni swikwembu swa vona swa mavunwa, naswona a va xi tsakela xikwelekwele lexi a va ri na xona na swona. Ngopfu-ngopfu a va rhandza mikhuva ya vudlakuta—kumbexana va tirhisa ni swifanekiselo swa xirho xa xinuna—leswi a swi leme vugandzeri bya swikwembu leswi!
8. Vugandzeri bya swikwembu swa hava byi tinyike matimba ngopfu ehansi ka hosi yihi eYuda?
8 Nhlamuselo leyi ya vugandzeri bya swifaniso lebyi fundzeke vudlakuta lebyi tsuvulaka misisi ni bya nsele yi pfumelelana ni leswi hi swi tivaka hi tihosi to hlayanyana leti a ti bihe mbilu ta le Yuda. Hi xikombiso, Manase u ake switsunga, a simeka tialitari ta Bali ni ku veka tialitari ta vukhongeri bya mavunwa eswivaveni swimbirhi swa tempele. U endle leswaku vana vakwe va xinuna va hundza hi le xikarhi ka ndzilo, a gila migilo, a hlahluva ni ku hlanganyeta vungoma. Hosi Manase u tlhele a teka xifaniso lexi a xi vatleke xa mhandzi yo kwetsima, a xi tikirheta etempeleni ya Yehovha.b U kucetele Vayuda leswaku va endla “swo biha ku tlula swa matiko lawa Yehovha a ma loviseke.” (2 Tihosi 21:2-9) Van’wana va anakanya leswaku Manase hi yena a nga lerisa leswaku ku dlayiwa Esaya, hambileswi vito ra Manase ri nga riki kona eka Esaya 1:1.
“U Hambete U Rhumela Vayimeri Va Wena”
9. Ha yini Vayuda va rhumele vayimeri “ekule”?
9 Vayuda a va kolwanga hi ku tlula nawu va tirhela swikwembu swa mavunwa. Hi ku tirhisa nomu wa Esaya, Yehovha u te: “U rhelele hi tlhelo ra Meleki u ri ni mafurha, u hambeta u endla mafurha ya wena yo nun’hwela ma tala. U hambeta u rhuma vayimeri va wena ekule, u kala u ehlisela swilo eSheol.” (Esaya 57:9) Mfumo lowu nga tshembekangiki wa Yuda wu rhelele le ka “Meleki,” ku nga “hosi” hi Xiheveru—kumbexana hosi ya mfumo wumbe—wu n’wi nyika tinyiko to durha leti kokaka rinoko, leti fanekiseriwaka hi mafurha ni switolwa swo nun’hwela. Vayuda va rhumele vanhu etindhawini ta le kule. Ha yini? Ku ya hlohlotela Vamatiko leswaku va gangana na vona hi tlhelo ra politiki. Va kombe Yehovha xikosi, va tshemba tihosi timbe.
10. (a) Xana Hosi Akazi u xi endlise ku yini xinakulobye na hosi ya le Asiriya? (b) Vayuda va ‘ehlisele swilo eSheol’ hi ndlela yihi?
10 Xikombiso xin’wana xa leswi xi ve enkarhini wa Hosi Akazi. Hi ku nyunganyungeka hikwalaho ka ku chava ku gangana ka Israyele na Siriya, hosi leyi yi nga tshembekangiki ya le Yuda yi rhumele vanhu eka Tiglata-pilizere wa Vunharhu wa le Asiriya, yi ku: “Ndzi nandza wa wena ni n’wana wa wena. Tlhandluka u ndzi ponisa exandleni xa hosi ya Siriya ni le xandleni xa hosi ya Israyele, leti ti ndzi pfukelaka.” Akazi u rhumele silivhere ni nsuku a ya fumbarherisa hosi ya le Asiriya, hiloko hosi leyi yi angula hi ku hlasela tiko ra Siriya. (2 Tihosi 16:7-9) Hi ndlela leyi Vayuda a va tirhisana ni Vamatiko ha yona, a va korhamela “evuentweni bya Sheol.” (An American Translation) Hikwalaho a va ta nghena endzhongweni, kumbe va nga ha vi kona tanihi tiko leri nga ni hosi leri tifumaka.
11. Xana Vayuda va kombise ntshembo lowu hoxeke wa ku sirheleleka hi ndlela yihi?
11 Yehovha u ye emahlweni a vulavula na Yuda a ku: “U tirhe hi matimba hikwalaho ka tindlela ta wena to tala. A wu vulanga u ku, ‘A swi tshembisi!’ Matimba ya wena ma pfuxetiwile. Hi yona mhaka leyi u nga vabyangiki.” (Esaya 57:10) Ina, vanhu lava va kulule va n’watseka etindleleni ta vona ta vugwinehi, naswona a va nga swi voni leswaku leswi va swi endlaka a swi fana ni ku hala ribye va lava mati. Ku hambana na sweswo, a va tihumba mano hi ku tibyela leswaku va humelela hikwalaho ka matimba ya vona. A va titwa va ri ni matimba naswona va hanye kahle. Vona vuhunguki lebyonghasi!
12. Hi swihi swiyimo swa Vujagana leswi fanaka ni swa Vayuda?
12 Namuntlha ku ni nhlengeletano leyi ku tikhoma ka yona ku fanaka ni ka Vayuda enkarhini wa Esaya. Vujagana byi tirhisa vito ra Yesu, kambe byi endla xikwelekwele ni matiko, naswona tindhawu ta vugandzeri bya byona ti lemiwe hi swifaniso swa swikwembu swa hava. Swirho swa byona swi tlhela swi vehela swifaniso swa swikwembu swa hava emakaya ya swona. Vujagana byi nyikele vantshwa va byona etinyimpini ta matiko. Leswi i manyala ntsena eka Xikwembu xa ntiyiso, lexi lerisaka Vakreste xi ku: “Balekelani ku gandzela swifaniso swa hava”! (1 Vakorinto 10:14) Leswi Vujagana byi tipfuvaka ni tipolitiki, byi ‘endle vumbhisa ni tihosi ta misava.’ (Nhlavutelo 17:1, 2) Ku vula mhaka ya xiheri, hi byona museketeri lonkulu wa Nhlangano wa Matiko. Xana hi byihi vumundzuku bya nghwavava leyi ya vukhongeri? Xana Yehovha u ri yini hi xikombiso xa byona, ku nga Vayuda lava nga tshembekangiki, lava ngopfu-ngopfu va yimeriwaka hi ntsindza wa vona, Yerusalema?
‘Swilo Leswi U Swi Hlengeleteke A Swi Nge Ku Kutsuli’
13. I ku “hemba” kwihi loku Vayuda va ku sunguleke, naswona va angurise ku yini loko Yehovha a va lehisela mbilu?
13 “I mani loyi a ku tshukiseke u sungula ku chava, lerova u hemba?” ku vutisa Yehovha. Xexo i xivutiso lexinene! Entiyisweni Vayuda a va nga ri na xichavo lexinene eka Yehovha. Loko a va ri na xona, ingi va nga vanga tiko ra vahembi, vagandzeri va swikwembu swa mavunwa. Yehovha u ye emahlweni a ku: “A ku nga ri mina loyi u n’wi tsundzukeke. A wu vekanga nchumu embilwini. Xana a ndzi nga miyelanga, ndzi fihla timhaka? Hikwalaho a wu ndzi chavanga.” (Esaya 57:11) Yehovha u miyerile, a nga va xupulanga hi nkarhi wolowo Vayuda. Xana Vayuda a va swi tlangela leswi ke? Doo, ku ri na sweswo, a va hlaneka ku lehisa ka Xikwembu mbilu va ku teka ku ri ku honisa swilo. A va xi endla nkuwa wo khandziyeka.
14, 15. Yehovha u te yini hi mintirho ya Vayuda ni ‘swilo leswi va swi hlengeleteke’?
14 Hambiswiritano, nkarhi wa ku lehisa ka Xikwembu mbilu a wu ta hela. Loko Yehovha a vulavula hi nkarhi wolowo, u te: “Mina ndzi ta twarisa ku lulama ka wena ni mintirho ya wena, leswaku a yi nge ku pfuni. Loko u huwelela u kombela mpfuno, swilo swa wena leswi hlengeletiweke a swi nge ku kutsuli, kambe mheho yi ta swi teka hinkwaswo. Moya wu ta swi susa.” (Esaya 57:12, 13a) Yehovha a a ta aneka vululami byo kanganyisa bya Vayuda erivaleni. Mintirho ya vona ya vukanganyisi a yi ta fana ni ku fukamela mandza yo bola. ‘Swilo leswi va swi hlengeleteke,’ nhulu ya swifaniso swa vona swa swikwembu swa hava a swi nga ta va kutsula. Loko khombo ri fika, swikwembu leswi a va swi tshemba a swi ta hungiwa hi moya lowu ni ku nyawula wu nga nyawuliki, swi ya ku nhavalala, le ko taniya.
15 Marito ya Yehovha ma hetiseke hi 607 B.C.E. Ma hetiseke loko Hosi Nebukadnetsara wa le Babilona a lovisa Yerusalema, a hisa tempele ya kona a tlhela a khoma vanhu vo tala a famba na vona. “Xisweswo Yuda a ya evukhumbini a suka endhawini ya yena.”—2 Tihosi 25:1-21.
16. Vujagana na “Babilona Lonkulu” hi ku angarhela swi rindzeriwe hi yini?
16 Hi ku fanana, swifaniso swo tala leswi fumbiweke eVujaganini a swi nge swi koti ku byi ponisa esikwini ra vukari bya Yehovha. (Esaya 2:19-22; 2 Vatesalonika 1:6-10) Vujagana byi ta yimberiwa swin’we ni swirho hinkwaswo swa “Babilona Lonkulu”—ku nga mpfangampfangano wa vukhongeri bya mavunwa bya misava. Xivandzana xo fanekisela xa muvala wa ribungu kun’we ni timhondzo ta xona ta khume, ‘swi ta hlakata Babilona Lonkulu a sala ntsena, swi dya tinyama ta yena hinkwato, kutani swi n’wi hisa hi ndzilo a nga ha vi kona.’ (Nhlavutelo 17:3, 16, 17) Ha tsaka swinene leswi hi yingiseke xileriso lexi nge: “Humani eka yena, vanhu va mina, loko mi nga lavi ku hlanganyela na yena eswidyohweni swa yena, ni loko mi nga lavi ku amukela xiphemu xa makhombo ya yena”! (Nhlavutelo 18:4, 5) A hi nambeni hi chuveka rihlampfu etindleleni ta yena.
“Loyi A Tumbelaka Eka Mina U Ta Dya Ndzhaka Ya Tiko”
17. Hi xihi xitshembiso lexi tshembisiweke ‘loyi a a ta tumbela eka Yehovha,’ naswona xi hetiseke rini?
17 Kambe ku vuriwa yini hi marito lama landzelaka ya vuprofeta bya Esaya? “Loyi a tumbelaka eka mina u ta dya ndzhaka ya tiko, a dya ni ndzhaka ya ntshava ya mina yo kwetsima.” (Esaya 57:13b) Xana Yehovha a a vulavula na vamani? A a vulavula hi leswi a swi ta endleka endzhaku ka mangatsila, a profeta hi ta ku ntshunxiwa ka vanhu vakwe eBabilona ni ku kondleteriwa ka vugandzeri lebyi tengeke entshaveni yakwe yo kwetsima, ku nga Yerusalema. (Esaya 66:20; Daniyele 9:16) Lexi xi fanele xi ve xikhutazo lexikulu eka Vayuda hinkwavo lava tshameke va tshembekile! Ku tlula kwalaho, Yehovha u te: “Kunene un’wana u ta ku, ‘Fumbani, fumbani! Basisani ndlela. Susani xihinga xihi ni xihi endleleni ya vanhu va mina.’” (Esaya 57:14) Loko ku fika nkarhi wa ku va Xikwembu xi kutsula vanhu va xona, ndlela a yi ta va yi tshetshiwile, swikundzu hinkwaswo swi ceriwile swi suka.—2 Tikronika 36:22, 23.
18. Xana vukulukumba bya Yehovha byi hlamuseriwa njhani, kambe i nkhathalelo wihi wa rirhandzu lowu a wu kombisaka?
18 Sweswi muprofeta Esaya u sungula ku hlamusela marito lama tshahiweke eku sunguleni: “Loyi a Tlakukeke, La nga le Henhla, loyi a tshamaka hi masiku ni loyi vito rakwe ri kwetsimaka, u te: ‘Ndzi tshama eku tlakukeni ni le ndhawini yo kwetsima, swin’we ni loyi a pfotlokeke ni lava va moya wo titsongahata, leswaku ndzi hanyanyisa moya wa lava va titsongahataka ni ku hanyanyisa mbilu ya lava va pfotlosiwaka.’” (Esaya 57:15) Xiluvelo xa Yehovha xi le henhla-henhla etilweni. A ku na xivandla xin’wana lexi tlakukeke ku tlula matilo. Swa chavelela swinene ku tiva leswaku kwalaho u kota ku vona swilo hinkwaswo—ku nga ri swidyoho swa lavo homboloka ntsena, kambe ni swiendlo swo lulama swa lava ringetaka ku n’wi tirhela! (Pisalema 102:19; 103:6) Ku tlula kwalaho, u twa ku konya ka lava tshamiweke ehenhla, a pfuxa timbilu ta lava rhikinyiwaka. Marito lawa ma fanele ma khumbe timbilu ta Vayuda lava hundzukeke va le minkarhini ya khale. Ku vula mhaka ya xiheri, ma khumba ni timbilu ta hina namuntlha.
19. Xana ku hlundzuka ka Yehovha ku khawuka loko swi te yini?
19 Nakambe ma chavelela marito ya Yehovha lama landzelaka: “A ndzi nge lwi hilaha ku nga riki na makumu, kumbe ku hlundzuka hilaha ku nga heriki; hikuva moya wu ta tsana hikwalaho ka mina, ni swivumbiwa leswi hefemulaka leswi ndzi swi endleke.” (Esaya 57:16) A xi kona xivumbiwa xa Xikwembu lexi a xi ta pona loko vukari bya Yehovha a byi ya emahlweni, byi nga khawuki. Kambe, lexi tsakisaka, ku hlundzuka ka Xikwembu i ka nkarhinyana ntsena. Loko ku fikelele xikongomelo xa kona, ka khawuka. Mhaka leyi yi huhuteriweke yi hi pfuna ku ri tlangela swinene rirhandzu leri Yehovha a nga na rona eka ntumbuluko wakwe.
20. (a) Xana Yehovha u va khoma njhani vadyohi lava nga hundzukiki? (b) Yehovha u n’wi chavelela njhani munhu la nga ni gome?
20 Hi kuma ku voningeriwa loku engetelekeke loko Yehovha a ya emahlweni. Xo sungula, u ri: “Ndzi hlundzukisiwe hi xihoxo xa mpindzulo wakwe wo biha, naswona ndzi n’wi bile, ndzi tumbeta xikandza xa mina, loko ndza ha hlundzukile. Kambe u hambete a famba endleleni ya mbilu yakwe kukota la xandzukeke.” (Esaya 57:17) Swidyoho leswi endliwaka hikwalaho ka makwanga swi pfuxa vukari bya Xikwembu. Ntsendze loko munhu a tshama a ri ni mbilu yo soholoka, Yehovha na yena u ta tshama a n’wi hlundzukerile. Kambe ku vuriwa yini loko muxandzuki a yingisa loko a tshinyiwa? Kutani Yehovha u n’wi komba ndlela leyi rirhandzu ni ntwela-vusiwana wakwe swi n’wi susumetelaka ku teka goza ha yona: “Tindlela takwe ndzi ti vonile; hiloko ndzi sungula ku n’wi tshungula, ndzi n’wi kongomisa, ndzi n’wi riha hi ku n’wi chavelela ni vanhu va yena lava rilaka.” (Esaya 57:18) Endzhaku ko tshinya, Yehovha u tshungula munhu la weriweke hi gome a n’wi sula mihloti a tlhela a chavelela lava va rilaka na yena. Hikwalaho, Vayuda va kote ku tlhelela eka rikwavo hi 537 B.C.E. Kunene, Yuda a ra ha vanga tiko leri tifumaka ehansi ka hosi ya rixaka ra Davhida. Hambiswiritano, tempele ya le Yerusalema yi pfuxiwile, ku kondleteriwa ni vugandzeri bya ntiyiso.
21. (a) Yehovha u wu pfuxe njhani moya wa Vakreste lava totiweke, hi 1919? (b) Hi yihi mfanelo leyi un’wana ni un’wana wa hina a khutaziwaka ku yi hlakulela?
21 “Loyi a Tlakukeke, La nga le Henhla,” ku nga Yehovha, u tlhele a kombisa ku khathala kakwe hi vuhlayiseki bya masalela lama totiweke, hi 1919. Hikwalaho ka gome ni moya wa vona wa ku titsongahata, Yehovha Xikwembu lexikulu u vone nhlomulo wa vona, kutani a va kutsula evuhlongeni bya Babilona. U tlhenguse swikarhato hinkwaswo, a va ntshunxa leswaku va n’wi gandzela hi ndlela leyi tengeke. Kutani marito ya Yehovha hi nomu wa Esaya ma hetisekile hi nkarhi wolowo. Naswona marito wolawo ma ni misinya ya milawu leyi nga ta ka yi nga nyamalali, leyi tirhaka eka hina hinkwerhu. Yehovha u amukela vugandzeri bya lava titsongahataka ntsena. Naswona loko un’wana wa malandza ya Xikwembu a tshuka a dyoha, u fanele a hatlisa a pfumela xidyoho xakwe, a yingisa loko a tshinyiwa, ivi a ololoxa tindlela ta yena. Onge hinkwerhu hi nga tshama hi ri karhi hi tsundzuka leswaku Yehovha u tshungula ni ku chavelela lava titsongahataka, kambe u “kaneta lava titlakusaka.”—Yakobo 4:6.
‘Ku Rhula Eka Lava Nga eKule Ni Lava Nga Kusuhi’
22. Yehovha u vula leswaku byi ta va byihi vumundzuku bya (a) lava hundzukaka? (b) lavo homboloka?
22 Loko a kombisa ku hambana ka vumundzuku bya lava va hundzukaka ni bya lava va alaka ku twa etindleleni ta vona to homboloka, Yehovha u ri: “Ndzi tumbuluxa mbhandzu wa milomu. Ku ta va ni ku rhula loku tshamaka ku ri kona eka loyi a nga ekule ni loyi a nga ekusuhi, . . . ndzi ta n’wi horisa. Kambe lavo homboloka va fana ni lwandle leri yisiwaka hala ni hala, loko ri nga swi koti ku rhula mati ya rona ma tshamela ku humesa leswi milaka elwandle ni ndzhope. Ku rhula a ku kona eka lavo homboloka.”—Esaya 57:19-21.
23. I yini mbhandzu wa milomu, naswona Yehovha u wu “tumbuluxa” njhani mbhandzu lowu?
23 Mihandzu ya milomu i xitlhavelo xa ku dzunisa lexi nyikeriwaka eka Xikwembu—ku tivisa vito ra xona erivaleni. (Vaheveru 13:15) Xana Yehovha u “tumbuluxa” xitiviso xexo xa le rivaleni hi ndlela yihi? Leswaku munhu a nyikela xitlhavelo xa ku dzunisa, u fanele ku rhanga a dyondza hi Xikwembu kutani a va ni ripfumelo eka xona. Ripfumelo—ku nga mbhandzu wa moya wa Xikwembu—ri susumetela munhu yoloye ku byela van’wana leswi a swi tweke. Hi marito man’wana, u endla xitiviso xa le rivaleni. (Varhoma 10:13-15; Vagalatiya 5:22) Nakambe hi fanele hi tsundzuka leswaku kahle-kahle Yehovha hi yena a lerisaka malandza yakwe leswaku ma twarisa ku dzuneka ka yena. Naswona Yehovha hi yena loyi a ntshunxaka vanhu vakwe, a endla leswaku va kota ku nyikela switlhavelo swo tano swa ku dzunisa. (1 Petro 2:9) Kutani swi nga fanela ku vula leswaku i Yehovha loyi a tumbuluxaka mbhandzu lowu wa milomu.
24. (a) I vamani lava kumeke ku rhula ka Xikwembu, naswona vuyelo byi ve byihi? (b) I vamani lava nga ku nantswangiki ku rhula, naswona vuyelo bya vona byi ve byihi?
24 Vayuda va fanele va nyikele mbhandzu lowu tsakisaka wa milomu loko va tlhelela eka rikwavo, va ri karhi va yimbelela tinsimu ta ku dzunisa Yehovha! Va fanele va tsakisiwe hileswi va kumeke ku rhula ka Xikwembu, hambi va ri “ekule”—mpfhuka wo leha ku suka eYuda, loko va ha rindzele ku muka—kumbe “ekusuhi”—loko se va ri eka rikwavo. Kambe lavo homboloka a swi va yimele hi nhloko! Mani na mani loyi a a nga lavi ku yingisa loko a tshinyiwa hi Yehovha, hi ku kongoma, lavo homboloka, hambi i vamani kumbe va le kwihi, a va nga ta ku nantswa ku rhula. Hi ku kariha bya lwandle leri hobomulanaka, ematshan’weni yo humesa mbhandzu wa milomu, va hambete va humesa “leswi milaka elwandle ni ndzhope,” hinkwaswo leswi nga tengangiki.
25. Xana vo tala ekule ni le kusuhi va ku kumisa ku yini ku rhula?
25 Ni namuntlha vagandzeri va Yehovha hinkwako-nkwako va twarisa mahungu lamanene ya Mfumo wa Xikwembu. Ekule ni le kusuhi, ematikweni yo tlula 230, Vakreste va nyikela mbhandzu wa milomu ya vona, va twarisa ku dzuneka ka Xikwembu xin’we ntsena xa ntiyiso. Ku dzuneka loku va ku twarisaka ku twiwa “ku ya fika emakumu ya misava.” (Esaya 42:10-12) Lava va twaka marito ya vona kutani va endla leswi ma vulaka swona, va amukela ntiyiso wa Rito ra Xikwembu, ku nga Bibele. Vanhu vo tano va kuma ku rhula, hi ku tirhela “Xikwembu lexi nyikaka ku rhula.”—Varhoma 16:20.
26. (a) Lavo homboloka va rindzeriwe hi yini? (b) Lavo rhula va tshembisiwa mikateko yihi, naswona hina hi fanele hi tiyimisela yini?
26 Ina, lavo homboloka a va ri yingisi rungula ra Mfumo. Kambe ku nga ri khale, a va nge he pfumeleriwi ku kavanyeta ku rhula ka lavo lulama. Yehovha wa tshembisa: “Hi nkarhinyana, lowo homboloka a nge he vi kona.” Lava va tshembaka Yehovha va ta dya ndzhaka ya misava hi ndlela yo hlamarisa. “Lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.” (Pisalema 37:10, 11, 29) Hi nkarhi wolowo misava ya hina yi ta va ndhawu leyinene! Onge hinkwerhu ka hina hi nga tiyimisela ku ka hi nga lahlekeriwi hi ku rhula ka Xikwembu, leswaku hi ta twarisa ku dzuneka ka Xikwembu hilaha ku nga heriki.
[Tinhlamuselo ta le hansi]
a Swi nga endleka rito leri nge “sangu” ri vula alitari kumbe ndhawu ya vugandzeri bya vuhedeni. Ku va vugandzeri byo tano byi vuriwa sangu i xitsundzuxo xa leswaku i vunghwavava bya moya.
b Timhandzi to kwetsima swi nga endleka a ti yimela xirho xa xisati kasi tinsika to kwetsima swi nga endleka a ti fanekisela swirho swa xinuna. Haswimbirhi a swi tirhisiwa hi vaaki va Yuda lava nga tshembekiki.—2 Tihosi 18:4; 23:14.
[Xifaniso lexi nga eka tluka 263]
Vayuda a va endla vugandzeri bya manyala ehansi ka murhi wun’wana ni wun’wana lowu vekaka mihandzu
[Xifaniso lexi nga eka tluka 267]
Vayuda a va ake tialitari ti lema tiko hinkwaro
[Xifaniso lexi nga eka tluka 275]
“Ndzi tumbuluxa mbhandzu wa milomu”