Ku Vangama Ka Yehovha Ku Voningela Vanhu Va Yena
“Yehovha u ta va ku vonakala ka wena loku tshamaka hilaha ku nga heriki.”—Esaya 60:20.
1. Xana Yehovha u va katekisa njhani vanhu vakwe vo tshembeka?
“YEHOVHA u tsakela vanhu vakwe. U sasekisa lavo rhula hi ku va ponisa.” (Pisalema 149:4) Sweswo swi vuriwe hi mupisalema wa khale naswona matimu ya tiyisekise ntiyiso wa marito ya yena. Loko vanhu va Yehovha va tshembeka, wa va khathalela, a endla leswaku swi va fambela kahle ni ku va sirhelela. Eminkarhini ya khale, u va pfune leswaku va hlula valala va vona. Namuntlha, u hambeta a va tiyisa hi tlhelo ra moya ni ku va tiyisekisa leswaku va ta ponisiwa exisekelweni xa gandzelo ra Yesu. (Varhoma 5:9) U va endlela leswi hikuva va sasekile emahlweni ka yena.
2. Hambiloko va kanetiwa, xana vanhu va Xikwembu va ni ntshembo wihi?
2 Ina, emisaveni leyi funengetiweke hi munyama, lava “hanya[ka] hi ku tinyiketela loku nga ni vukwembu” va ta kanetiwa. (2 Timotiya 3:12) Kambe, Yehovha wa va vona vakaneti lava naswona u va tshinya a ku: “Tiko rihi ni rihi ni mfumo wihi ni wihi leswi nga ta ka swi nga ku tirheli swi ta lova; kunene ni matiko ma ta herisiwa.” (Esaya 60:12) Namuntlha hi kanetiwa hi tindlela to tala. Ematikweni man’wana, vakaneti va ringeta ku sivela kumbe ku yirisa vugandzeri lebyi Vakreste va xiviri va byi endlelaka Yehovha. Eka man’wana, vanhu lava hisekelaka etlhelo va ba vagandzeri va Yehovha va tlhela va hisa nhundzu ya vona. Kambe, tsundzuka leswaku Yehovha se wa byi tiva vuyelo lebyi nga ta va kona eka lava va lwisanaka ni ku hetisisiwa ka ku rhandza ka yena. Vakaneti va ta tsandzeka. Lava va lwaka na Siyoni loyi a yimeriwaka hi vana va yena va laha misaveni, a va nge hluli. Xana xexo a hi xitiyisekiso lexi khutazaka lexi humaka eka Xikwembu xa hina lexikulu, ku nga Yehovha?
Ku Katekisiwa Ku Tlula Hilaha A Va Langutele Hakona
3. Vuxongi ni mihandzu leyi vekiwaka hi vagandzeri va Yehovha swi fanekiseriwa hi yini?
3 Ntiyiso hi leswaku emasikwini ya makumu ya mafambiselo lawa ya swilo, Yehovha u katekise vanhu vakwe ku tlula hilaha a va langutele hakona. U sasekise ndhawu ya yena ya vugandzeri swin’we ni lava byarhaka vito rakwe. Hi ku ya hi vuprofeta bya Esaya, u byela Siyoni a ku: “Ku vangama ka Lebanoni ku ta ta eka wena, murhi wa yunipa, murhi wa nyamarhi ni kipresi hi nkarhi lowu fanaka, leswaku ku sasekisiwa ndhawu ya vukwetsimelo bya mina; ndzi ta vangamisa ndhawu ya milenge ya mina.” (Esaya 60:13) Tintshava leti funengetiweke hi makhwati ti sasekisa ndhawu. Hikwalaho mirhi leyi tsakeke yi ku fanekisela kahle ku saseka ni mihandzu leyi vekiwaka hi vagandzeri va Yehovha.—Esaya 41:19; 55:13.
4. I yini “vukwetsimelo” ni “ndhawu ya milenge ya [Yehovha],” naswona yi sasekisiwe hi ndlela yihi?
4 I yini “vukwetsimelo” ni “ndhawu ya milenge ya [Yehovha]” leyi boxiwaka eka Esaya 60:13? Marito lawa ma vula swivava swa tempele ya Yehovha leyikulu ya moya, leyi nga lunghiselelo ra ku n’wi gandzela ha Yesu Kreste. (Vaheveru 8:1-5; 9:2-10, 23) Xikongomelo xa Yehovha i ku kwetsimisa tempele yoleyo ya moya hi ku hlengeleta vanhu lava humaka ematikweni hinkwawo leswaku va ta gandzela eka yona. (Hagayi 2:7) Eku sunguleni Esaya u vone mintshungu leyi humaka ematikweni hinkwawo yi ri karhi yi khitikanela entshaveni ya Yehovha leyi tlakukeke yo gandzela eka yona. (Esaya 2:1-4) Endzhaku ka madzana ya malembe, muapostola Yohane exivonweni u vone “ntshungu lowukulu, lowu a ku nga ri na munhu la kotaka ku wu hlaya, wu huma eka matiko hinkwawo ni tinyimba hinkwato ni vanhu hinkwavo ni tindzimi hinkwato.” Wu yime “emahlweni ka xiluvelo xa Xikwembu [wu] xi endlela ntirho wo kwetsima nhlikanhi ni vusiku etempeleni ya xona.” (Nhlavutelo 7:9, 15) Leswi vuprofeta lebyi byi hetisekeke esikwini ra hina, na hina ha swi vona leswaku yindlu ya Yehovha yi sasekisiwile.
5. I nhluvuko wihi lowukulu lowu vana va Siyoni va veke na wona?
5 Mawaku nhluvuko wonghasi eka Siyoni! Yehovha u ri: “Ematshan’weni ya ku va loyi a siyiweke hi ku helela, la vengiwaka, ku ri hava loyi a hundzaka, ndzi ta ku veka u va nchumu wa ku tinyungubyisa hilaha ku nga riki na makumu, ku khana eka xitukulwana xin’wana ku ya eka xitukulwana xin’wana.” (Esaya 60:15) Loko nyimpi yo sungula ya misava yi ya eku heleni, “Israyele wa Xikwembu” u ve ni gome. (Vagalatiya 6:16) U titwe a ‘siyiwe hi ku helela,’ hikuva vana vakwe va laha misaveni a va nga swi tivi kahle leswaku Xikwembu a xi ta endla yini ha vona. Kutani hi 1919, Yehovha u tlhele a ma nyika matimba malandza yakwe lama totiweke, naswona ku sukela kwalaho u ma katekise swinene hi tlhelo ra moya. Tlhandlakambirhi, xana a xi tsakisi xitshembiso lexi nga eka ndzimana leyi? Yehovha u ta languta Siyoni wu ri “nchumu wa ku tinyungubyisa.” Ina, vana va Siyoni, na Yehovha hi byakwe va ta tinyungubyisa hi Siyoni. U ta “khana,” hikwalaho ka ntsako. Naswona a nge khani swa xinkarhana. Ntsako wa Siyoni, tanihi leswi a yimeriwaka hi vana va yena laha misaveni, wu ta suka eka “xitukulwana xin’wana ku ya eka xitukulwana xin’wana.” A wu nge heli.
6. Vakreste va ntiyiso va ri tirhisa njhani rifuwo leri humaka eka matiko?
6 Tlhela u yingisa xitshembiso xin’wana xa Xikwembu. Loko a vulavula na Siyoni Yehovha u te: “Entiyisweni u ta an’wa ntswamba wa matiko, naswona u ta an’wa mavele ya tihosi; hakunene u ta tiva leswaku mina, Yehovha, ndzi Muponisi wa wena, Lowa Matimba wa Yakobe i Mukutsuri wa wena.” (Esaya 60:16) Xana Siyoni u “an’wa ntswamba wa matiko” a tlhela a an’wa “mavele ya tihosi” hi ndlela yihi? Hileswi Vakreste lava totiweke ni vanghana va vona va “tinyimpfu tin’wana” va tirhisaka rifuwo ra nkoka ra vanhu va matiko leswaku va yisa vugandzeri lebyi tengeke emahlweni. (Yohane 10:16) Va nyikela mali hi ku tirhandzela leswaku va pfuneta entirhweni lowukulu wa ku chumayela ni wa ku dyondzisa emisaveni hinkwayo. Hi ku tirhisa thekinoloji ya manguva lawa hi vutlhari va kandziyisa Tibibele ni tibuku leti sekeriweke eBibeleni hi madzana ya tindzimi. Namuntlha, ku ni vanhu vo tala ku tlula eku sunguleni lava tivaka ntiyiso wa Bibele. Vanhu va le matikweni yo tala va dyondza leswaku Yehovha, loyi a kutsuleke malandza yakwe lama totiweke evuhlongeni bya moya, kunene hi yena Muponisi.
Nhluvuko Wa Nhlengeletano
7. Hi wihi nhluvuko lowukulu lowu vana va Siyoni va wu voneke?
7 Yehovha u sasekise vanhu vakwe hi ndlela yin’wana. U va katekise hi nhluvuko lowu endliweke enhlengeletanweni yakwe. Eka Esaya 60:17 ha hlaya: “Ematshan’weni ya koporo ndzi ta tisa nsuku, ematshan’weni ya nsimbi ndzi ta tisa silivhere, kasi ematshan’weni ya ntsandza, koporo, ematshan’weni ya maribye, nsimbi; naswona ndzi ta veka ku rhula ku va valanguteri va wena ni ku lulama ku va vaaveri va ntirho wa wena.” Ku siva koporo hi nsuku swi komba nhluvuko, naswona swi tano ni hi swilo leswin’wana leswi boxiweke. Hi ku pfumelelana ni leswi, Israyele wa Xikwembu u vone nhluvuko lowu hambetaka wa nhlengeletano emasikwini lawa yo hetelela. Xiya swikombiso swi nga ri swingani.
8-10. Hlamusela nhluvuko wun’wana wa nhlengeletano lowu veke kona ku sukela hi 1919.
8 Emahlweni ka 1919, mavandlha ya vanhu va Xikwembu a ma fambisiwa hi vakulu ni vadiyakoni, lava a va hlawuriwa hi vandlha. Ku sukela lembe rero, “hlonga ro tshembeka ni ro tlhariha,” ri sungule ku veka mukongomisi wa ntirho evandlheni rin’wana ni rin’wana leswaku a langutela ntirho wa nsimu. (Matewu 24:45-47) Hambiswiritano, emavandlheni yo tala lunghiselelo rero a ri tirhanga hikuva vakulu van’wana lava vhoteriweke a va nga wu seketeli ntirho wo chumayela. Hikwalaho, hi 1932, mavandlha ma lerisiwe leswaku ma tshika ku vhotela vakulu ni vadiyakoni. Ematshan’weni ya sweswo, a ma fanele ma vhotela vavanuna lava nga ta vumba komiti ya ntirho leyi nga ta khomisana ni mukongomisi wa ntirho. Sweswo a swi fana ni ku siva “ntsandza” hi “koporo”—a ku ri nhluvuko lowukulu hakunene!
9 Hi 1938, mavandlha ya le misaveni hinkwayo ma sungule ku tirhisa lunghiselelo rero leri antswisiweke, leri a ri pfumelelana ni nkongomiso wa le Matsalweni. Vandlha a ri fambisiwa hi nandza wa ntlawa ni malandza man’wana, hinkwavo a va hlawuriwa ehansi ka vulanguteri bya hlonga ro tshembeka ni ro tlhariha. A va nga ha vhoteriwi! Hikwalaho valanguteri va vandlha a va vekiwa hi ndlela ya vulawuri bya le tilweni. Sweswo a swi fana ni ku siva “maribye” hi “nsimbi” kumbe ku siva “koporo” hi “nsuku.”
10 Ku sukela kwalaho nhluvuko wu hambetile. Hi xikombiso, hi 1972 ku xiyiwe leswaku ndlela ya ku langutela vandlha hi ku tirhisa huvo ya vakulu lava hlawuriweke hi ndlela ya tilweni, ku nga ri nkulu un’we loyi a lawulaka lavan’wana, a yi fana swinene ni leyi a yi tirhisiwa emavandlheni ya Vakreste hi lembe-xidzana ro sungula. Ku tlula kwalaho, kwalomu ka malembe mambirhi lama hundzeke, ku ve na nhluvuko wun’wana. Ku ve ni ndzulamiso eka vukongomisi bya mavandla man’wana ya nawu, leswi ntshunxeke Huvo leyi Fumaka leswaku yi ta khathalela ngopfu timhaka ta moya ta vanhu va Xikwembu, ematshan’weni yo kavanyetiwa hi timhaka ta nawu ta siku na siku.
11. I mani la endleke leswaku ku va ni nhluvuko exikarhi ka vanhu va Yehovha, naswona ku ve ni vuyelo byihi?
11 Xana i mani loyi a endlaka leswaku ku va ni nhluvuko lowu? A ku na un’wana handle ka Yehovha Xikwembu. Hi yena loyi a nga te: “Ndzi ta tisa nsuku.” Naswona hi yena la tlhelaka a ku: “Ndzi ta veka ku rhula ku va valanguteri va wena ni ku lulama ku va vaaveri va ntirho wa wena.” Ina, Yehovha hi yena a nga ni vutihlamuleri byo langutela vanhu vakwe. Nhluvuko wa nhlengeletano lowu vuriweke ka ha ri emahlweni i ndlela yin’wana leyi a sasekisaka vanhu vakwe ha yona. Kutani Timbhoni ta Yehovha ti katekisiwile hi tindlela to tala hikwalaho ka sweswo. Hi hlaya leswi eka Esaya 60:18: “Madzolonga a ma nge he pfuki ma twiwile etikweni ra wena, ku phanga kumbe ku tshovelela emindzilakaneni ya wena. Kunene marhangu ya wena u ta ma vitana ku Ponisiwa kasi tinyangwa ta wena u ta ti vitana ku Dzunisa.” A hi ku tsakisa ka swona! Kambe xana ma hetiseke njhani?
12. Xana ku rhula ku va lawula njhani Vakreste va ntiyiso?
12 Vakreste va ntiyiso va lava ndzetelo ni nkongomiso eka Yehovha, naswona vuyelo bya kona byi hilaha Esaya a profeteke hakona loko a ku: “Vana va wena hinkwavo va ta va vanhu lava dyondzisiwaka hi Yehovha, ku rhula ka vana va wena ku ta tala.” (Esaya 54:13) Ku tlula kwalaho, moya wa Yehovha wa tirha eka vanhu va yena, naswona mbhandzu wun’wana wa moya wolowo i ku rhula. (Vagalatiya 5:22, 23) Ku rhula loku vanhu va Yehovha va vaka na kona ku va endla leswaku va va vuchavelo lebyi khongotelaka emisaveni leyi nga ni madzolonga. Ku rhula ka vona, loku sekeriweke erirhandzwini leri Vakreste va ntiyiso va rhandzanaka ha rona, i xikombiso xa rirhandzu ra le misaveni leyintshwa. (Yohane 15:17; Vakolosa 3:14) Hakunene un’wana ni un’wana wa hina u tsakela ku rhula koloko ni ku ku kondletela, naswona sweswo swi tisa ku dzuneka ni xichavo eka Xikwembu xa hina ku nga xihlovo xa paradeyisi ya hina ya moya!—Esaya 11:9.
Ku Vonakala Ka Yehovha Ku Ta Hambeta Ku Voninga
13. Ha yini hi nga tiyisekaka leswaku ku vonakala ka Yehovha a ku nge tshiki ku voningela vanhu va yena?
13 Xana ku vonakala ka Yehovha ku ta hambeta ku voningela vanhu va yena? Ina! Eka Esaya 60:19, 20 hi hlaya leswi: “Eka wena dyambu a ri nge he vi ku vonakala ninhlikanhi, ni ku vangama ka n’weti a ku nge he ku nyiki ku vonakala. Eka wena Yehovha u ta va ku vonakala loku tshamaka hilaha ku nga heriki, Xikwembu xa wena xi va ku saseka ka wena. Dyambu ra wena a ri nge he peli, ni n’weti wa wena a wu nge he nyamalali; hikuva Yehovha u ta va ku vonakala ka wena loku tshamaka hilaha ku nga heriki, kutani masiku ya ku rila ka wena ma ta hela.” Loko “ku rila” ka mahlonga ya moya ku hela hi 1919, ku vonakala ka Yehovha ku sungule ku ma voningela. Endzhaku ka malembe yo tlula 80, ku vonakala ka Yehovha ka ha hambeta ku ma voningela. Naswona a ku nge heli. Xikwembu xa hina a xi nge “peli” ku fana ni dyambu kumbe ‘ku nyamalala’ ku fana ni n’weti eka vagandzeri va xona. Ematshan’weni ya sweswo, xi ta va voningela hilaha ku nga heriki. Xexo i xitiyisekiso lexinene ngopfu eka hina tanihi leswi hi hanyaka emasikwini yo hetelela emisaveni leyi mphimpheriweke hi munyama!
14, 15. (a) Vanhu va Xikwembu hinkwavo va ‘lulamile’ hi ndlela yihi? (b) Malunghana na Esaya 60:21, i ku hetiseka kwihi ka nkoka loku tinyimpfu tin’wana ti ku languteleke?
14 Twana leswi Yehovha a swi tshembisaka muyimeri wa Siyoni wa laha misaveni, ku nga Israyele wa Xikwembu. Esaya 60:21 yi ri: “Loko ku ri vanhu va wena, hinkwavo va ta va vo lulama; va ta dya ndzhaka ya tiko hilaha ku nga riki na makumu, ku hluka ka leswi ndzi swi byaleke, ntirho wa mavoko ya mina, leswaku ndzi sasekisiwa.” Hi 1919 loko Vakreste lava totiweke va tlhela va sungula ntirho wo chumayela, a va ri ntlawa wa vanhu lava nga tolovelekangiki. Emisaveni ya vanhu lava dyohaka hi vomu, va ‘vuriwe lava lulameke’ hikwalaho ka ripfumelo ra vona leri tiyeke egandzelweni ra nkutsulo ra Kreste Yesu. (Varhoma 3:24; 5:1) Kutani, ku fana ni Vaisrayele lava ntshunxiweke evuhlongeni bya le Babilona, va lawula “tiko,” tiko ra moya kumbe xivandla xa ntirho laha va tiphinaka hi paradeyisi ya moya. (Esaya 66:8) Ku saseka ka paradeyisi ya tiko rero a ku nge dzudzeki hikuva, ku hambana na Israyele wa khale, tiko ra Israyele wa Xikwembu ri ta tshama ri tshembekile. Ripfumelo ra vona, ku tiyisela ka vona ni ku hiseka ka vona swi ta hambeta swi dzunisa vito ra Xikwembu.
15 Swirho hinkwaswo swa tiko rero ra moya swi le ka ntwanano lowuntshwa. Hinkwaswo swi ni nawu wa Yehovha lowu tsariweke etimbilwini ta swona, naswona Yehovha u swi rivalele swidyoho swa swona exisekelweni xa gandzelo ra nkutsulo ra Yesu. (Yeremiya 31:31-34) U va vula lava lulameke tanihi “vana” va yena naswona u tirhisana na vona ku fana ni vanhu lava hetisekeke. (Varhoma 8:15, 16, 29, 30) Vanakulobye va vona va tinyimpfu tin’wana va rivaleriwe swidyoho swa vona exisekelweni xa gandzelo ra Yesu, naswona ku fana na Abrahama va vuriwe lava lulameke tanihi vanghana va Xikwembu hikwalaho ka ripfumelo ra vona. “Va hlantswe tinguvu ta vona to leha va ti endla to basa hi ngati ya Xinyimpfana.” Naswona vanakulobye lava va tinyimpfu tin’wana va langutele nkateko wun’wana wo hlamarisa. Endzhaku ka loko va pone ‘nhlomulo lowukulu’ kumbe loko va pfuxiwile eku feni, va ta vona ku hetiseka ka xiviri ka marito ya Esaya 60:21 loko misava hinkwayo yi hundzuka paradeyisi. (Nhlavutelo 7:14; Varhoma 4:1-3) Enkarhini wa kona, “lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”—Pisalema 37:11, 29.
Ku Andza Ku Ya Emahlweni
16. Hi xihi xitshembiso lexi xiyekaka lexi Yehovha a xi endleke, naswona xi hetiseke njhani?
16 Eka ndzimana yo hetelela ya Esaya 60, hi hlaya hi xitshembiso xo hetelela xa Yehovha eka ndzima leyi. U byele Siyoni a ku: “Lontsongo u ta va gidi, kasi lontsongo ngopfu u ta va tiko ra matimba. Mina Yehovha, ndzi ta swi hatlisisa hi nkarhi wa swona.” (Esaya 60:22) Esikwini ra hina, Yehovha u hetisise marito ya yena. Loko Vakreste lava totiweke va tlhela va sungula ntirho wo chumayela hi 1919, nhlayo ya vona a yi nga nyawuli—a va ri “lontsongo” hakunene. Nhlayo ya vona yi engetelekile loko ku tisiwa Vaisrayele van’wana va moya. Hiloko tinyimpfu tin’wana ti sungula ku khitikanela eka vona hi xitalo. Ku rhula ka vanhu va Xikwembu, ku nga paradeyisi ya moya leyi nga ‘etikweni’ ra vona, ku koke vanhu vo tala swinene va timbilu letinene lerova “lontsongo ngopfu” u ve “tiko ra matimba” hakunene. Namuntlha “tiko” leri—ku nga Israyele wa Xikwembu ni “vanhu vambe” lava tinyiketeleke vo tlula timiliyoni ta tsevu—ri ni vaaki vo tala ku tlula matiko yo tala ya misava lama tifumaka. (Esaya 60:10) Vaaki va rona hinkwavo va hlanganyela eku hundziseni ka ku vonakala ka Yehovha, naswona sweswo swi endla leswaku va va lava vangamaka swinene emahlweni ka yena.
17. Esaya ndzima 60 leyi hi buleke ha yona yi ku khumbe njhani?
17 Hakunene, swi tiyisa ripfumelo ku xiya tinhla-nkulu ta Esaya ndzima 60. Swa chavelela ku vona leswaku Yehovha u swi tive khale leswaku vanhu vakwe a va ta va evuhlongeni hi tlhelo ra moya kutani va tlhela va kutsuriwa. Swa hi tsakisa ku tiva leswaku Yehovha u swi vone khale leswaku nhlayo ya vagandzeri va ntiyiso yi ta engeteleka swinene esikwini ra hina. Ku tlula kwalaho, vona ndlela leyi swi chavelelaka ha yona ku tiva leswaku Yehovha a nge hi fularheli! Wa nga vona rirhandzu ra yena ku va a hi tiyisekisa leswaku tinyangwa ta “muti” ti ta tshama ti pfulekile, leswaku lava nga ni “mboyamelo lowunene eka vutomi lebyi nga heriki” va ta amukeriwa hi malwandla! (Mintirho 13:48) Yehovha u ta hambeta a voningela vanhu va yena. Siyoni u ta hambeta a tinyungubyisa loko vana va yena va ya va voninga swinene. (Matewu 5:16) Hakunene, hi tiyimisele swinene ku tshama ekusuhi na Israyele wa Xikwembu ni ku tlangela lunghelo ra hina ro kombisa ku vonakala ka Yehovha!
Xana U Nga Hlamusela?
• I yini lexi hi nga tiyisekaka ha xona hambiloko hi kanetiwa?
• Vana va Siyoni va ‘an’we ntswamba wa matiko’ hi ndlela yihi?
• Yehovha u ‘tise koporo ematshan’weni ya ntsandza’ hi tindlela tihi?
• I timfanelo tihi timbirhi leti kandziyisiwaka eka Esaya 60:17, 21?
• “Lontsongo ngopfu” u ve “tiko ra matimba” hi ndlela yihi?
[Bokisi/Swifaniso leswi nga eka tluka 18]
VUPROFETA BYA ESAYA I—Rivoningo Eka Vanhu Hinkwavo
Rungula leri nga eka swihloko leswi ku vulavuriwe ha rona eka nkulumo yin’wana ya Mintsombano ya Muganga ya “Vadyondzisi Va Rito Ra Xikwembu” ya 2001/02. Loko nkulumo yi hela, etindhawini to tala xivulavuri xi tivise ku humesiwa ka buku leyintshwa leyi nge Vuprofeta Bya Esaya—I Rivoningo Eka Vanhu Hinkwavo, Vholumo ya Vumbirhi. Hi lembe ra le mahlweni ka rero ku humesiwe Vholumo yo Sungula ya Vuprofeta Bya Esaya—I Rivoningo Eka Vanhu Hinkwavo. Leswi ku humesiweke buku leyi leyintshwa, se ku ni nhlamuselo leyi nga enkarhini ya ndzimana yin’wana ni yin’wana ya buku ya Esaya. Tibuku leti ti ta hi pfuna swinene leswaku hi ya hi yi twisisa swinene buku ya vuprofeta bya Esaya leyi tiyisaka ripfumelo, hi tlhela hi yi tlangela.
[Swifaniso leswi nga eka tluka 15]
‘Yehovha u sasekisa vanhu vakwe hi ku va ponisa,’ hambiloko va langutane ni nkaneto wa tihanyi
[Swifaniso leswi nga eka tluka 16]
Vanhu va Xikwembu va tirhisa rifuwo ra nkoka ra vanhu va matiko leswaku va yisa vugandzeri lebyi tengeke emahlweni
[Xifaniso lexi nga eka tluka 16]
Yehovha u katekise vanhu va yena hi nhluvuko lowu endliweke enhlengeletanweni yakwe a tlhela a va nyika ku rhula