Ndzima Ya Vumakumembirhi-ntlhanu
Hosi Ni Tihosana Ta Yona
1, 2. Xana ku nga vuriwa yini hi rungula ra Tsalwa-nsongwa ra Esaya ra Lwandle leri Feke?
EKUSUHI ni ku hela ka va-1940, ku kumeke nhlengeleto wo hlamarisa wa matsalwa-nsongwa emabakweni ya le kusuhi ni Lwandle leri Feke, le Palestina. Ma vitaniwe Matsalwa-nsonga ya Lwandle leri Feke naswona ku vuriwa leswaku ma tsariwe exikarhi ka 200 B.C.E. na 70 C.E. Leri dumeke ngopfu eka wona i tsalwa-nsongwa ra Esaya leyi tsariweke hi Xiheveru edzobyeni ra nkoka. Tsalwa-nsongwa leri ri tamele rungula ro tala, naswona a ri hambananga ngopfu ni matsalwa ya rungula ra Masorete lama tsariweke endzhaku ka malembe ya kwalomu ka 1 000. Hikwalaho, tsalwa-nsongwa leri ri kombisa leswaku rungula ra Bibele ri kopiwe hi ndlela leyi kongomeke.
2 Lexi xiyekaka malunghana ni Tsalwa-nsongwa ra Esaya ra Lwandle leri Feke hileswaku xiyenge xin’wana lexi namuntlha xi nga Esaya ndzima 32 xi funghiwe hi “X” etlhelweni hi mutsari un’wana. A hi swi tivi leswi endleke leswaku mutsari a nghenisa mfungho wolowo, kambe ha swi tiva leswaku ku ni nchumu wo hlawuleka malunghana ni xiyenge lexi xa Bibele yo Kwetsima.
Ku Fuma Hi Ku Tshembeka Ni Vululami
3. Hi byihi vulawuri lebyi ku profetiweke ha byona ebukwini ya Esaya ni ya Nhlavutelo?
3 Esaya ndzima 32 yi pfula hi vuprofeta lebyi nyanyulaka lebyi hetisekaka hi ndlela yo hlamarisa esikwini ra hina: “Waswivo! Hosi yi ta fuma hi ku tshembeka; kasi tihosana, ti ta va tihosana hi vululami.” (Esaya 32:1) Ina, “Waswivo!” Rihlamari leri ri hi tsundzuxa rihlamari leri fanaka na rona leri kumekaka ebukwini yo hetelela ya vuprofeta ya Bibele: “Loyi a tshameke exiluvelweni a ku: ‘Waswivo, ndzi endla swilo hinkwaswo swi va leswintshwa.’” (Nhlavutelo 21:5) Buku ya Bibele ya Esaya ni ya Nhlavutelo, leti tsariweke hi nkarhi lowu siyanaka hi malembe ya kwalomu ka 900, hatimbirhi ti tamele nhlamuselo leyi tiyisaka nhlana ya vulawuri lebyintshwa—“matilo lamantshwa,” laha ku nga ni Hosi, Yesu Kreste, loyi a vekiweke exiluvelweni ematilweni hi 1914, ni vafumi-kulobye va 144 000 lava “va xaviwe[ke] evanhwini”—swin’we ni “misava leyintshwa,” ku nga vandla ra vanhu va misava hinkwayo, lava nga ni vun’we.a (Nhlavutelo 14:1-4; 21:1-4; Esaya 65:17-25) Lunghiselelo leri hinkwaro ri ve kona hikwalaho ka gandzelo ra nkutsulo ra Kreste.
4. Hi xihi xisekelo xa misava leyintshwa lexi nga kona sweswi?
4 Endzhaku ko vona ku funghiwa ko hetelela ka vafumi-kulobye lava va 144 000 exivonweni, muapostola Yohane wa vika: “Ndzi languta, kutani waswivo, a ku ri ni ntshungu lowukulu, lowu a ku nga ri na munhu la kotaka ku wu hlaya, wu huma eka matiko hinkwawo ni tinyimba hinkwato ni vanhu hinkwavo ni tindzimi hinkwato, wu yime emahlweni ka xiluvelo ni le mahlweni ka Xinyimpfana.” Lexi i xisekelo xa misava leyintshwa—ntshungu lowukulu lowu sweswi wu endlaka timiliyoni, lowu wu hlanganisiweke ni nhlayo ya vanhu lava nga nyawuriki, lava vunyingi bya vona ku nga vadyuhari lava seleke emisaveni eka lava va 144 000. Ntshungu lowu lowukulu wu ta pona nhlomulo lowukulu, lowu tshinelaka hi rivilo lerikulu, kutani emisaveni ya Paradeyisi, wu ta va swin’we ni vanhu vo tshembeka lava pfuxiweke ni tibiliyoni tin’wana leti nga ta kuma nkarhi wo kombisa ripfumelo ra tona. Hinkwavo lava nga ta ri kombisa va ta kuma mikateko ya vutomi lebyi nga heriki.—Nhlavutelo 7:4, 9-17.
5-7. Xana “tihosana” leti ku profetiweke ha tona ti hetisisa xiphemu xihi entlhambini wa Xikwembu?
5 Hambiswiritano, loko misava leyi ya sweswi leyi teleke rivengo ya ha ri kona, swirho swa ntshungu lowukulu swi lava nsirhelelo. Lava endlaka ntirho lowukulu wa ku sirhelela i “tihosana” leti ‘fumaka . . . hi vululami.’ Mawaku lunghiselelo lerinene swonghasi! “Tihosana” leti ti tlhela ti hlamuseriwa hi marito lama tsakisaka ya vuprofeta bya Esaya: “Un’wana ni un’wana u ta va ndhawu ya ku tifihla emhehweni ni vutumbelo exidzedzeni, ku fana ni swinambyana swa mati etikweni leri nga riki na mati, ku fana ni ndzhuti wa ribye lerikulu etikweni leri omeke.”—Esaya 32:2.
6 Sweswi enkarhini lowu wa ku tshikileleka emisaveni hinkwayo, ku ni xilaveko xa “tihosana,” ina, vakulu lava nga ta ‘nyikela nyingiso eka . . . ntlhambi hinkwawo,’ va khathalela tinyimpfu ta Yehovha ni ku tirhisa vululami hi ku pfumelelana ni misinya ya milawu yo lulama ya Yehovha. (Mintirho 20:28) “Tihosana” teto ti fanele ti fikelela timfanelo leti andlariweke eka 1 Timotiya 3:2-7 na Tito 1:6-9.
7 Evuprofeteni byakwe lebyikulu lebyi hlamuselaka “makumu ya mafambiselo ya swilo,” Yesu u te: “Vonani leswaku mi nga chavisiwi.” (Matewu 24:3-8) Ha yini valandzeri va Yesu va nga chavisiwi hi makhombo ya namuntlha ya swilo swa misava? Xivangelo xin’wana hileswaku “tihosana”—ku nga khathariseki leswaku i vatotiwa kumbe i “tinyimpfu tin’wana”—ti sirhelela ntlhambi hi ku tshembeka. (Yohane 10:16) Handle ko chava ti khathalela vamakwavo, hambiloko ti langutana ni timhangu to tanihi hi tinyimpi ta tinxaka ni ku dlayeteriwa ka vanhu. Emisaveni leyi hlakaleke hi tlhelo ra moya, ti tikarhatela ku phyuphyisa mimoya-xiviri leyi tshikileriwaka, hi ku tirhisa ntiyiso lowu akaka wa Rito ra Xikwembu, ku nga Bibele.
8. Xana Yehovha u ti letela njhani “tihosana” leti nga ta tinyimpfu tin’wana naswona u ti tirhisa hi ndlela yihi?
8 Emalembeni ya 50 lama hundzeke, “tihosana” ti ve erivaleni. “Tihosana” leti nga ta tinyimpfu tin’wana ta leteriwa tanihi ntlawa lowu kulaka wa “ndhuna” leswaku endzhaku ka nhlomulo lowukulu, lava fanelekaka exikarhi ka vona va lunghekela ku vekiwa ku va vakongomisi “emisaveni leyintshwa.” (Ezekiyele 44:2, 3; 2 Petro 3:13) Hi ku nyika nkongomiso wa moya ni ku phyuphyisa van’wana loko va ri karhi va rhangela entirhweni wa Mfumo, va tikombisa va “fana ni ndzhuti wa ribye lerikulu,” va wisisa ntlhambi exivandleni xa wona xa vugandzeri.b
9. Hi swihi swiyimo leswi kombisaka xilaveko xa “tihosana” namuntlha?
9 Emasikwini lawa yo nonon’hwa ya makumu, ya misava yo biha ya Sathana, Vakreste lava tinyiketeleke va wu lava hi mahlo-ngati nsirhelelo wo tano. (2 Timotiya 3:1-5, 13) Ku hunga mimoya ya matimba ya mavunwa ya rihlaza. Ku pfuka swidzedze swa tinyimpi exikarhi ka matiko swin’we ni ku hlaseriwa ka vagandzeri vo tshembeka va Yehovha Xikwembu. Emisaveni leyi weriweke hi dyandza ra moya, Vakreste va ni torha lerikulu ra mati lama khulukaka ya ntiyiso lowu tengeke, lowu nga lungiwangiki hi nchumu, lowu nga ta timula torha ra vona ra moya. Lexi tsakisaka, Yehovha u tshembise leswaku Hosi yakwe leyi fumaka, hi ku tirhisa vamakwavo va yona lava totiweke ni “tihosana” leti ti yi seketelaka ta tinyimpfu tin’wana, yi ta khutaza ni ku kongomisa lava tshikileriwaka ni lava heleke matimba enkarhini lowu wo tika. Xisweswo Yehovha u tiyisekisa leswaku ku endleka leswi lulameke.
Ku Nyikela Nyingiso Hi Mahlo, Tindleve Ni Timbilu
10. Hi wahi malunghiselelo lawa Yehovha a ma endleke leswaku vanhu vakwe va kota ku ‘vona’ ni ku ‘twa’ swilo swa moya?
10 Xana ntshungu lowukulu wu angurise ku yini elunghiselelweni ra Yehovha ra swa le tilweni? Vuprofeta byi ya emahlweni byi ku: “Mahlo ya lava vonaka a ma nge namarhelani, ni tindleve ta lava twaka ti ta nyikela nyingiso.” (Esaya 32:3) Emalembeni yo tala, Yehovha u lunghiselele leswaku malandza yakwe ya risima ma leteriwa ni ku pfuniwa leswaku ma wupfa. Xikolo xa Vutirheli bya le Tilweni ni minhlangano yin’wana leyi nga kona emavandlheni ya Timbhoni ta Yehovha emisaveni hinkwayo; mintsombano ya muganga, ya matiko hinkwawo; swin’we ni vuleteri byo hlawuleka bya “tihosana” bya ku khoma ntlhambi hi nkhathalelo wa rirhandzu, hinkwaswo swi hoxe xandla eku akiweni ka vumakwerhu bya misava hinkwayo bya timiliyoni ta vanhu. Hinkwako lomu varisi lava va nga kona emisaveni, tindleve ta vona ti tshama ti pfulekele ku amukela mindzulamiso malunghana ni matwisiselo ya rito ra ntiyiso. Hi mapfalo lama leteriweke hi Bibele, va tshama va lunghekele ku yingisa ni ku endla.—Pisalema 25:10.
11. Ha yini vanhu va Xikwembu sweswi va vulavula hi ku khorwiseka, va nga nghanghameli hikwalaho ko ka va nga tiyiseki?
11 Kutani vuprofeta byi nyika switsundzuxo: “Mbilu ya lava matlotlo yi ta ehleketisisa vutivi, ni ririmi ra lava nghanghamelaka ri ta hatlisa ku vulavula leswi twalaka.” (Esaya 32:4) Ku nga tshuki ku va ni munhu loyi a nga ni matlotlo eku endleni ka swiboho malunghana ni leswi lulameke ni leswi hoxeke. Bibele yi ri: “Xana u vone munhu la hatlisaka ku vula xo karhi? Ku ni ntshembo hi xihunguki ku tlula yena.” (Swivuriso 29:20; Eklesiasta 5:2) Emahlweni ka 1919, vanhu va Yehovha na vona a va ha landzelela tidyondzo ta le Babilona. Kambe ku sukela elembeni rero, Yehovha u va pfune ku twisisa khwatsi swikongomelo swa yena. Va kume leswaku ntiyiso lowu a wu paluxeke, a hi wa matlotlo, kambe wu anakanyisisiwe kahle, naswona sweswi va vulavula hi ku khorwiseka loku tiyeke, a va nghanghameli hikwalaho ko ka va nga tiyiseki.
“Lowo Hunguka”
12. ‘Lavo hunguka’ i vamani namuntlha, naswona va pfumala ku hanana hi ndlela yihi?
12 Vuprofeta bya Esaya sweswi byi vula swin’wana leswi hambaneke: “Lowo hunguka a nge he vitaniwi leswaku wa hanana; kasi munhu wo kala nawu a ku nge vuriwi leswaku i wa xiyimo xa le henhla; hikuva lowo hunguka u ta vulavula vuhunguki ntsena.” (Esaya 32:5, 6a) “Lowo hunguka” i mani? Hosi Davhida u nyika nhlamulo leyi kambirhi, onge hiloko a lava ku kandziyisa mhaka leyi: “Xihunguki xi vule embilwini ya xona xi ku: ‘Yehovha a nga kona.’ Va endle hi ndlela leyi onhakeke, va endle hi ndlela leyi nyenyetsaka eswiendlweni swa vona. A nga kona la endlaka leswinene.” (Pisalema 14:1; 53:1) Ina, lava nge Xikwembu a xi kona va vula leswaku Yehovha a nga kona. Kahle-kahle, hambi ku ri lava vuriwaka “tintlhari” ni van’wana lava endlaka onge Xikwembu a xi kona, va tibyela leswaku ku hava loyi va tihlamulelaka eka yena. Ntiyiso a wu kona eka vona. Ku hanana a ku kona etimbilwini ta vona. A va na yona evhangeli ya rirhandzu. Ku hambana ni Vakreste va ntiyiso, va hlwela ku pfuna swisiwana leswi tshikileriwaka kumbe va tsandzeka ku swi pfuna hi ku helela.
13, 14. (a) Xana vagwinehi va manguva lawa va tirha leswo biha hi ndlela yihi? (b) Xana vagwinehi va va tsona yini lava nga ni ndlala ni torha, kambe vuyelo byo hetelela byi ta va byihi?
13 Vunyingi bya lavo hunguka byi venga vanhu lava yimelaka ntiyiso wa Xikwembu. “Mbilu yakwe yi ta tirhela leswo biha, yi tirhela vugwinehi ni ku vulavula leswi hambukeke hi Yehovha.” (Esaya 32:6b) Kunene sweswo swi tano hi vagwinehi va manguva lawa! Ematikweni yo tala ya le Yuropa ni le Asiya, vagwinehi va tihlanganise ni vakaneti van’wana va ntiyiso, va hemba mavunwa eka valawuri, hi xikongomelo xa leswaku Timbhoni ta Yehovha ti yirisiwa kumbe ti siveriwa. Va kombisa moya wa “hlonga lero biha,” leri Yesu a profeteke ha rona a ku: “Loko hlonga lero biha ro tshuka ri tibyela embilwini ri ku, ‘N’wini wa mina wa hlwela,’ ivi ri sungula ku ba mahlonga-kulobye ri tlhela ri dya ni ku nwa ni swidakwa leswikulu, n’wini wa hlonga rero u ta ta hi siku leri ri nga ri langutelangiki ni hi nkarhi lowu ri nga wu tiviki, kutani u ta ri xupula hi ndlela leyi vavaka swinene naswona u ta ri avela endhawini yin’we ni vakanganyisi. Kwalaho hi laha ku rila ni ku getsela ka meno ya rona ku nga ta va kona.”—Matewu 24:48-51.
14 Hi nkarhi wolowo, vagwinehi va endla leswaku “moya-xiviri wa la nga ni ndlala wu pfumala, naswona loyi a nga ni torha u n’wi pfumata xakunwa.” (Esaya 32:6c) Valala va ntiyiso va ringeta ku va tsona swakudya swa moya vanhu lava nga ni ndlala ya ntiyiso, naswona va ringeta ku sivela lava nga ni torha leswaku va nga nwi mati yo phyuphya ya rungula ra Mfumo. Kambe vuyelo byo hetelela byi ta va leswi Yehovha a swi byelaka vanhu vakwe hi ku tirhisa un’wana wa vaprofeta vakwe: “Kunene va ta lwa na wena, kambe a va nge ku hluli, hikuva ‘mina ndzi na wena,’ ku vula Yehovha, ‘leswaku ndzi ku kutsula.’”—Yeremiya 1:19; Esaya 54:17.
15. Namuntlha, i vamani lava ngopfu-ngopfu va ‘kalaka nawu,’ hi wahi “marito ya mavunwa” lawa va ma seketeleke, naswona vuyelo byi ve byihi?
15 Ku sukela emalembeni ya le xikarhi ka lembe-xidzana ra vu-20, ku tikhoma ko biha a ku ya ku nyanya ematikweni ya Vujagana. Ha yini? Vuprofeta byi vule xivangelo xin’wana ka ha ri emahlweni byi ku: “Loko ku ri munhu wo kala nawu, switirho swakwe swi bihile; u bohe makungu ya ku tikhoma ko biha, ku lovisa lava xanisekaka hi marito ya mavunwa, hambiloko xisiwana xi vulavula leswi lulameke.” (Esaya 32:7) Eku hetisekeni ka marito lawa, vafundhisi vo tala va sungule ku honisa mhaka ya rimbewu emahlweni ka vukati, ku tshama swin’we ka vanhu lava nga tekanangiki, vusodoma—kunene, “vumbhisa ni thyaka ra muxaka wun’wana ni wun’wana.” (Vaefesa 5:3) Xisweswo, va “lovisa” mintlhambi ya vona hi marito ya mavunwa.
16. I yini lexi endlaka leswaku Vakreste va ntiyiso va tsaka?
16 Ku hambana ni sweswo, ku hetiseka ka marito lama landzelaka ya muprofeta ka phyuphyisa swinene! “Loko ku ri lonene, u bohe makungu ya leswinene; naswona u ta yimelela swilo leswinene.” (Esaya 32:8) Yesu hi byakwe u khutaze ku hanana loko a te: “Hanyani hi ku nyika, kutani vanhu va ta mi nyika. Va ta chela eswifuveni swa n’wina mpimo lowunene, lowu gandliweke, lowu hlunguhliweke ni lowu khapakhapaka. Hikuva xipimo lexi mi pimaka ha xona, va ta mi pimela ha xona na n’wina.” (Luka 6:38) Muapostola Pawulo na yena u vulavule hi mikateko leyi kumiwaka hi lava hananaka loko a te: “Mi fanele ku tsundzuka marito ya Hosi Yesu, loko yena a te, ‘Ku nyika swi tisa ntsako lowukulu ku tlula ku amukela.’” (Mintirho 20:35) Vakreste va ntiyiso a va tsakisiwi hi ku kuma rifuwo ra leswi vonakaka kumbe hi ku va ni ndhuma, kambe va tsakisiwa hi ku hanana—hi ndlela leyi Xikwembu xa vona, Yehovha, xi hananaka ha yona. (Matewu 5:44, 45) Ntsako wa vona lowukulu va wu kuma hi ku endla ku rhandza ka Xikwembu, hi ku tinyikela hi ku swi rhandza leswaku va byela van’wana “mahungu lamanene lama vangamaka ya Xikwembu lexi tsakeke.”—1 Timotiya 1:11.
17. I vamani namuntlha lava fanaka ni “vanhwanyana lava nga khathaliki” lava ku vulavuriwaka ha vona eka Esaya?
17 Vuprofeta bya Esaya byi ya emahlweni byi ku: “N’wina vavasati lava tshamisekeke, pfukani, yingisani rito ra mina! N’wina vanhwanyana lava nga khathaliki, yingisani marito ya mina! Ku nga si hela lembe ni masikunyana n’wina lava nga khathaliki mi ta rhurhumela, hikuva ku khiwa ka madiriva ku ta va ku herile kambe a ku nge hlengeletiwi mbhandzu. Rhurhumelani, n’wina vavasati lava tshamisekeke! Rhurhumelani, n’wina lava nga khathaliki!” (Esaya 32:9-11a) Langutelo ra vavasati lava ri nga ha hi tsundzuxa lava namuntlha va vulaka leswaku va tirhela Xikwembu kambe va nga wu hisekeliki ntirho wa xona. Vanhu volavo va kumeka eka vukhongeri bya “Babilona Lonkulu, mana wa tinghwavava.” (Nhlavutelo 17:5) Hi xikombiso, swirho swa vukhongeri bya Vujagana swi fana ni leswi Esaya a va hlamuserisaka xiswona “vavasati” lava. Swi ‘tshamisekile,’ a swi na mhaka ngopfu ni ku avanyisa ni ku rhurhumela loku ku nga ta swi wela ku nga ri khale.
18. I mani loyi a byeriwaka ku “tikhama hi nguvu yo khwaxa eswisutini,” naswona ha yini?
18 Kutani, ku rhumeriwa rito eka vukhongeri bya mavunwa: “Hluvulani, mi nga ambali nchumu, kutani mi tikhama hi nguvu yo khwaxa eswisutini. Tibeneni swifuva mi rilela masimu lama navelekaka, mi rilela murhi wa vhinya lowu vekaka mbhandzu. Ehenhla ka misava ya vanhu va mina ku huma mitwa yinene, swihlahla swa swihlonhlwana, hikuva swi le henhla ka tindlu hinkwato ta ku khana, ina, muti lowu teleke ntsako.” (Esaya 32:11b-13) Marito lama nge “Hluvulani, mi nga ambali nchumu,” swi tikomba ma nga vuli ku hluvula swiambalo hinkwaswo. Hi ku ya hi mukhuva wa khale a ku ambariwa nguvu ya le handle ehenhla ka nguvu ya le ndzeni. Hakanyingi nguvu ya le handle hi leyi munhu a a tiviwa ha yona. (2 Tihosi 10:22, 23; Nhlavutelo 7:13, 14) Xisweswo vuprofeta lebyi byi lerisa swirho swa vukhongeri bya mavunwa leswaku swi hluvula tinguvu ta swona ta le handle—mfungho wa swona lowu wu swi endlaka swi languteka onge i malandza ya Xikwembu—ematshan’weni ya sweswo swi ambala tinguvu to khwaxa, leti kombisaka ku rilela ku avanyisiwa ka swona loku tshinelaka. (Nhlavutelo 17:16) Ku hava mihandzu ya vukwembu leyi nga ta kumeka exikarhi ka minhlangano ya vukhongeri ya Vujagana, leyi tivulaka “muti lowu teleke ntsako” wa Xikwembu, kumbe exikarhi ka swirho leswin’wana swa mfumo wa misava swa vukhongeri bya mavunwa. Xivandla lexi yi tirhaka eka xona xi humesa “mitwa yinene, swihlahla swa swihlonhlwana,” ku nga ku honisiwa ni ku fularheriwa.
19. Hi xihi xiyimo xa muti wa “Yerusalema” lowu gwineheke lexi paluxiweke hi Esaya?
19 Nhlamuselo leyi ya khombo yi hlanganise swiyenge hinkwaswo swa muti wa “Yerusalema” lowu gwineheke: “Xihondzo xo tshama eka xona xi fularheliwile, mpfilumpfilu lowu a wu ri emutini a wa ha ri kona; Ofeli ni xihondzo xo rindza swi hundzuke masimu lama nga riki na nchumu, timangwa ti khana eka swona, swi va madyelo ya mintlhambi hilaha ku nga riki na makumu.” (Esaya 32:14) Ina, hambi ku ri ndhawu ya Ofeli yi katsekile. Ofeli i ndhawu leyi tlakukeke ya muti wa Yerusalema, leyi a yi ri xivandla lexi tiyeke xo lwela eka xona. Ku vula leswaku ndhawu ya Ofeli yi hundzuke masimu lama nga riki na nchumu swi kombisa ku lovisiwa ka muti lowu hi ku helela. Marito ya Esaya ma kombisa leswaku muti wa “Yerusalema” lowu gwineheke—ku nga Vujagana—a wu na mhaka ni ku endla ku rhandza ka Xikwembu. A wu na nchumu hi tlhelo ra moya, wu le kule ni ntiyiso ni vululami—wu kotisa xivandzana wu tlhela wu hundzeleta.
Ku Hambana Loku Vangamaka!
20. Hi byihi vuyelo bya moya wa Xikwembu lowu chuluriwaka eka vanhu vakwe?
20 Sweswi Esaya u boxa ntshembo lowu tiyisaka eka lava va endlaka ku rhandza ka Yehovha. Ku lovisiwa kwihi ni kwihi ka vanhu va Xikwembu ku ta ya emahlweni “kukondza moya wu chuluriwa eka hina wu huma ehenhla, niloko mananga se ma hundzuke ntanga wa mihandzu, ni ntanga wa mihandzu wu tekiwa wu ri khwati ra xiviri.” (Esaya 32:15) Lexi tsakisaka, ku sukela hi 1919, moya wa Yehovha wu chuluriwe hi xitalo ehenhla ka vanhu vakwe, hi ndlela yo fanekisela wu pfuxete ntanga lowu vekaka mihandzu wa Timbhoni leti totiweke, lowu a wu ta landzeriwa hi khwati leri kulaka ra tinyimpfu tin’wana. Ku veka mihandzu ni ku andza i tinhla-nkulu ta nhlengeletano ya yena emisaveni namuntlha. Eparadeyisini ya moya leyi pfuxetiweke, “ku vangama ka Yehovha, ku tlakuka ka Xikwembu xa hina,” ku kombisiwa hi vanhu va yena loko va ri karhi va twarisa Mfumo wakwe lowu taka emisaveni hinkwayo.—Esaya 35:1, 2.
21. Xana ku lulama, ku rhula ni nsirhelelo swi kumeka kwihi namuntlha?
21 Sweswi, yingisa xitshembiso xa Yehovha lexi vangamaka: “Kunene vululami byi ta tshama emananga, kasi ku tshembeka ku ta tshama entangeni wa mihandzu. Kutani ntirho wa ku lulama ka ntiyiso wu ta va ku rhula; kasi vutirheli bya ku lulama ka ntiyiso, byi ta va ku miyela ni nsirhelelo hilaha ku nga riki na makumu.” (Esaya 32:16, 17) Sweswo swi xi hlamusela khwatsi xiyimo xa moya xa vanhu va Yehovha namuntlha! Ku hambana ni vunyingi bya vanhu namuntlha, lava hambanisiwaka hi rivengo, madzolonga ni vusweti lebyikulu bya moya, Vakreste va ntiyiso va ni vun’we emisaveni hinkwayo, hambileswi va “huma[ka] eka matiko hinkwawo ni tinyimba hinkwato ni vanhu hinkwavo ni tindzimi hinkwato.” Va tshama, va tirha hi vun’we, hi ku pfumelelana ni vunene bya Xikwembu, va endla sweswo va ri karhi va ri ni ntshembo wa ku kuma ku rhula ka ntiyiso ni nsirhelelo eku heteleleni, hilaha ku nga riki na makumu.—Nhlavutelo 7:9, 17.
22. Hi kwihi ku hambana loku nga kona exikarhi ka vanhu va Xikwembu ni va vukhongeri bya mavunwa?
22 Eparadeyisini ya moya, tsalwa ra Esaya 32:18 ana ra hetiseka. Ri ri: “Vanhu va mina va ta tshama endhawini yo rhula ni le ka vutshamo lebyi tshembiwaka hi ku helela ni le tindhawini to wisela leti nga kavanyetiwiki.” Kambe eka lava va tivulaka Vakreste, “kunene ku ta na xihangu loko khwati ri wa ni muti wu tsongahatiwa wu va exiyin’weni xa le hansi.” (Esaya 32:19) Ina, ku fana ni xidzedze lexikulu, ku avanyisa ka Yehovha ku le kusuhi ni ku wela muti wa mavunwa wa vukhongeri bya mavunwa, ku herisa vaseketeri va wona lava fanaka ni “khwati,” va loviseriwa makumu!
23. Hi wihi ntirho wa misava hinkwayo lowu nga ekusuhi ni ku hela, naswona lava hlanganyelaka eka wona va fanele va tekiwa njhani?
23 Xiyenge lexi xa vuprofeta xi gimeta hi ku: “Ma tsaka n’wina lava byalaka mbewu etlhelo ka mati, lava ntshuxaka milenge ya nkunzi ni mbhongolo.” (Esaya 32:20) Nkunzi ni mbhongolo a ku ri swifuwo leswi rhwalaka ndzhwalo leswi a swi tirhisiwa hi vanhu va Xikwembu va khale loko va rima masimu ni ku byala mbewu. Namuntlha, vanhu va Yehovha va tirhisa michini yo kandziyisa, switirho swa elektroniki, miako ya manguva lawa ni swo tleketla, kasi ku tlula hinkwaswo, va tirhisa nhlengeletano leyi nga ni vun’we ya swa le tilweni leswaku va kandziyisa ni ku hangalasa tibiliyoni ta tibuku ta Bibele. Vatirhi va ku tirhandzela va tirhisa switirho leswi leswaku va byala mbewu ya Mfumo emisaveni hinkwayo, kahle-kahle hi nga ku “etlhelo ka mati.” Timiliyoni ta vavanuna ni vavasati lava chavaka Xikwembu ana se ti tshoveriwile, naswona vunyingi byin’wana byi hlanganyela na vona entirhweni lowu. (Nhlavutelo 14:15, 16) Kunene hinkwavo va tekiwa va ri lava ‘tsakeke’!
[Tinhlamuselo ta le hansi]
a Swi nga ha endleka leswaku “hosi” leyi ku vulavuriwaka ha yona eka Esaya 32:1, eku sunguleni a ku kombeteriwa eka Hosi Hezekiya. Kambe Esaya ndzima 32 yi ta hetiseka hi ku helela eka Hosi, Kreste Yesu.
b Vona Xihondzo xo Rindza xa March 1, 1999, matluka 13-18, lexi kandziyisiweke hi Watch Tower Bible and Tract Society of Pennsylvania.
[Xifaniso lexi nga eka tluka 330]
Eka Matsalwa-nsongwa ya Lwandle leri Feke, Esaya ndzima 32 yi funghiwe hi “X”
[Xifaniso lexi nga eka tluka 333]
‘Hosana’ yin’wana ni yin’wana yi kotisa ndhawu yo tumbela eka yona loko ku ri ni mheho, xisirhelelo empfuleni, mati ekwandzasini ni ndzhuti edyambyini
[Xifaniso lexi nga eka tluka 338]
Mukreste u kuma ntsako lowukulu loko a byela van’wana mahungu lamanene