“Xikwembu I Rirhandzu”

“Loyi a nga riki na rirhandzu a nga tivi Xikwembu, hikuva Xikwembu i rirhandzu.”—1 YOHANE 4:8.

1-3. (a) Bibele yi ri yini malunghana ni mfanelo ya Yehovha ya rirhandzu, naswona leswi yi swi vulaka swi hlawuleke hi ndlela yihi? (b) Ha yini Bibele yi vula leswaku “Xikwembu i rirhandzu”?

TIMFANELO hinkwato ta Yehovha ti tlakukile, ti hetisekile naswona ta rhandzeka. Kambe mfanelo leyi rhandzekaka swinene eka timfanelo hinkwato ta Yehovha i rirhandzu. A ku na xin’wana lexi hi tshinetaka swinene eka Yehovha ku tlula rirhandzu ra yena. Lexi tsakisaka, nakambe rirhandzu i mfanelo ya yena leyikulu ku tlula letin’wana. Hi swi tivisa ku yini sweswo?

² Bibele yi vula swin’wana hi rirhandzu, leswi yi nga swi vuliki hi timfanelo tin’wana letikulu ta Yehovha. Matsalwa a ma vuli leswaku Xikwembu i matimba kumbe leswaku Xikwembu i vululami kumbe leswaku Xikwembu i vutlhari. Xi na tona timfanelo teto, naswona hi xona xi nga xihlovo xa timfanelo teto tinharhu. Kambe, malunghana ni rirhandzu ku vuriwa nchumu wun’wana wo hlawuleka eka 1 Yohane 4:8: “Xikwembu i rirhandzu.” Ina, Yehovha u na rirhandzu leri enteke swinene. Yena hi yexe i rirhandzu. Hi ntolovelo hi nga ha swi veka hi ndlela leyi: Matimba ya Yehovha ma n’wi endla leswaku a teka goza. Vululami byakwe ni vutlhari byakwe byi lawula ndlela leyi a endlaka swilo ha yona. Kambe rirhandzu ra Yehovha ri n’wi susumetela ku teka goza. Naswona rirhandzu ra yena minkarhi hinkwayo ri lawula ndlela leyi a ti tirhisaka ha yona timfanelo ta yena letin’wana.

³ Hakanyingi ku vuriwa leswaku Yehovha i rirhandzu. Hikwalaho, loko hi lava ku dyondza hi rirhandzu, hi fanele hi dyondza hi Yehovha. Kutani a hi kambisiseni timhaka tin’wana leti fambisanaka ni rirhandzu ra Yehovha leri hlawulekeke swinene.

Xiendlo Lexikulu Ngopfu Xa Rirhandzu

4, 5. (a) Hi xihi xiendlo xa rirhandzu lexikulu ku tlula hinkwaswo ematin’wini? (b) Ha yini hi nga vulaka leswaku Yehovha ni N’wana wakwe va hlanganisiwe hi xiboho xa rirhandzu xo tiya swinene ku tlula hinkwaswo leswi tshameke swi va kona?

⁴ Yehovha u kombise rirhandzu hi tindlela to tala, kambe ku ni ndlela yin’we yo hlawuleka ku tlula hinkwato. Hi yihi ndlela ya kona? I ku va a rhumele N’wana wa yena a ta xaniseka hikwalaho ka hina a tlhela a hi fela. Hi nga vula hi ku tiyiseka leswaku xexo i xikombiso xa rirhandzu lexikulu ku tlula hinkwaswo ematin’wini. Ha yini hi vula sweswo?

⁵ Bibele yi vula leswaku Yesu i “mativula ya ntumbuluko hinkwawo.” (Vakolosa 1:15) Sweswo swi vula leswaku N’wana wa Yehovha a a ri kona loko vuako byi nga si va kona. Xana Tatana ni N’wana va hanye swin’we nkarhi wo tanihi kwihi? Vativi van’wana va sayense va ringanyeta leswaku vuako byi ni malembe ya 13 wa tibiliyoni byi ri kona. Kambe, hambiloko xiringanyeto lexi xi ri ntiyiso, malembe wolawo i matsongo swinene loko ma ringanisiwa ni nkarhi lowu N’wana wa Yehovha wa mativula a hanyeke wona! Xana nkarhi lowu hinkwawo a a endla yini? N’wana a a tirha hi ku tsaka a ri “mutirhi la nga ni vuswikoti” wa Tata wa yena. (Swivuriso 8:30; Yohane 1:3) Yehovha ni N’wana wakwe va tirhe swin’we va endla swilo leswin’wana hinkwaswo. Va tiphinile swinene hi ku va swin’we! Kutani ke, i mani exikarhi ka hina loyi a nga twisisaka muxaka wa rirhandzu leri veke kona exikarhi ka vona hi nkarhi wo leha swonghasi? Swi le rivaleni leswaku Yehovha Xikwembu ni N’wana wakwe va hlanganisiwe hi xiboho xa rirhandzu xo tiya swinene ku tlula hinkwaswo leswi tshameke swi va kona.

 6. Loko Yesu a khuvuriwa, Yehovha u yi phofule njhani ndlela leyi a titwaka ha yona hi N’wana wa Yena?

⁶ Hambiswiritano, Yehovha u rhume N’wana wa yena emisaveni laha a nga fika a tswariwa a ri munhu wa nyama. Leswi swi vula leswaku Yehovha a a ta tshama makume ya malembe a nga ri na yena N’wana wa yena la rhandzekaka etilweni. Loko a ri etilweni, a a tshama A langute Yesu loko a ri karhi a kula a ri munhu la hetisekeke. Loko a ri ni malembe ya kwalomu ka 30, Yesu u khuvuriwile. Hi nkarhi wolowo Tatana hi byakwe u vulavule a ri etilweni a ku: “Loyi i N’wananga, la rhandzekaka, loyi ndzi n’wi amukeleke.” (Matewu 3:17) Tata wa Yesu u fanele a tsakile swinene loko a vona n’wana wakwe a endla hinkwaswo leswi profetiweke, hinkwaswo leswi a komberiweke swona!—Yohane 5:36; 17:4.

7, 8. (a) Yesu u langutane na yini hi Nisan 14, 33 C.E., naswona Tata wakwe wa le tilweni u titwise ku yini hi swona? (b) Ha yini Yehovha a pfumelele leswaku N’wana wakwe a xaniseka ni ku fa?

⁷ Kambe, xana Yehovha u titwise ku yini hi Nisan 14, 33 C.E., loko Yesu a xengiwa ivi a khomiwa hi swifamona leswi kariheke? U titwe njhani loko Yesu a hlekuriwa, a tshwuteriwa hi marha ni ku himeteriwa hi swibakele? Xana u titwise ku yini loko a ri karhi a biwa, nhlana wakwe wu handzuleleka? Loko a beleriwa mavoko ni milenge emhandzini kutani a tshikiwa kwalaho, vanhu va ri karhi va n’wi tseketsela? Xana Tatana u titwe njhani loko N’wana wakwe la rhandzekaka a huwelela eka yena hi gome? Xana Yehovha u titwe njhani loko Yesu a fa, N’wana wa Yena la rhandzekaka a nga ha vi kona ro sungula hi mpfhuka ka loko a sungule ntirho wakwe wo tumbuluxa?—Matewu 26:14-16, 46, 47, 56, 59, 67; 27:26, 38-44, 46; Yohane 19:1.

⁸ Leswi Yehovha a nga ni mintlhaveko, ku karhateka loku a faneleke a ve na kona hikwalaho ka rifu ra N’wana wakwe a hi nge swi koti ku ku hlamusela. Leswi hi nga kotaka ku swi hlamusela hi leswi swi susumeteleke Yehovha ku pfumelela nchumu wo tano leswaku wu humelela. Hikwalaho ka yini Tatana a titwise ku vava hi ndlela leyi? Yehovha u hi hlavutela nchumu wo hlamarisa eka Yohane 3:16—ndzimana ya Bibele leyi nga ya nkoka swinene lerova yi vuriwa nkatsakanyo wa Tievhangeli hinkwato. Yi ri: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” Kutani nsusumeto wa Xikwembu a ku ri rirhandzu. Ku hava rirhandzu lerikulu leri fanaka ni leri, leri tshameke ri kombisiwa.

Ndlela Leyi Yehovha A Hi Tiyisekisaka Ha Yona Leswaku Wa Hi Rhandza

 9. Sathana u lava hi pfumela leswaku Yehovha u titwisa ku yini hi hina, kambe i yini lexi Yehovha a hi tiyisekisaka ha xona?

⁹ Kambe ku tlakuka xivutiso xa nkoka: Xana Xikwembu xi rhandza un’wana ni un’wana wa hina? Van’wana va nga pfumela leswaku Xikwembu xi rhandza vanhu hinkwavo, hilaha Yohane 3:16 yi vulaka hakona. Kambe hi hala tlhelo va tibyela va ku, ‘Mina, Xikwembu a xi ndzi rhandzi.’ Ntiyiso hi leswaku Sathana Diyavulosi u lava hi pfumela leswaku Yehovha a nga hi rhandzi naswona a nga hi teki hi ri nchumu. Hi tlhelo rin’wana, hambiloko hi ehleketa leswaku a hi rhandziwi kumbe a hi va nkoka, Yehovha wa hi tiyisekisa leswaku malandza ya yena hinkwawo lama tshembekaka i ya nkoka eka yena.

10, 11. Xifaniso xa Yesu xa swindzingiri xi swi kombisa njhani leswaku hi va nkoka emahlweni ka Yehovha?

¹⁰ Hi xikombiso, anakanya hi marito ya Yesu lama tsariweke eka Matewu 10:29-31. Loko a kombisa ndlela leyi vadyondzisiwa va yena va nga va nkoka ha yona, Yesu u te: “Xana swindzingiri swimbirhi a swi xavisiwi hi mali ya nsimbi ya risima leritsongo ke? Kambe ku hava ni xin’we xa swona lexi nga waka ehansi Tata wa n’wina a nga swi tivi. Hambi ku ri misisi ya tinhloko ta n’wina yi hlayiwile hinkwayo. Hikokwalaho mi nga chavi: mi ni risima ku tlula swindzingiri swo tala.” Xiya leswi marito wolawo a ma vula swona eka vayingiseri va Yesu va le ka lembe-xidzana ro sungula.

¹¹ Enkarhini wa Yesu, xindzingiri a xi ri xona xo chipa ngopfu eka tinyenyana hinkwato leti dyiwaka. Hi mali yin’we ya nsimbi leyi nga riki ya nkoka ngopfu, muxavi a a kuma swindzingiri swimbirhi. Kambe hi ku ya hi Luka 12:6, 7 endzhakunyana Yesu u vule leswaku loko munhu a xava hi timali timbirhi ta nsimbi, a a kuma swindzingiri swa ntlhanu, ku nga ri mune. Xinyenyana lexa vuntlhanu a wu bazeriwa hi xona onge hi loko xi nga ri xa risima. Kumbexana swinyenyana sweswo a swi nga ri swa risima ematihlweni ya vanhu, kambe xana Muvumbi yena a a swi languta njhani? Yesu u te: “Ku hava ni xin’we xa swona [hambi xi ri lexo bazela hi xona] lexi rivalekaka emahlweni ka Xikwembu.” Kumbexana se hi sungula ku twisisa yinhla ya Yesu. Tanihi leswi Yehovha a tekaka xindzingiri xin’wana ni xin’wana xi ri xa nkoka swonghasi, munhu yena i wa risima swinene! Hilaha Yesu a vuleke hakona, Yehovha u tiva swilo hinkwaswo malunghana na hina. Phela, ni misisi ya tinhloko ta hina yi hlayiwile!

12. Ha yini hi nga tiyisekaka leswaku Yesu a a nga hundzeleti swilo loko a vula leswaku misisi ya tinhloko ta hina yi hlayiwile?

¹² Van’wana va nga ha ehleketa leswaku Yesu a a hundzeleta swilo emhakeni leyi. Kambe ehleketa hi mhaka ya ku pfuxiwa ka vafi. Yehovha u fanele a hi tiva swinene leswaku a ta kota ku tlhela a hi vumba! U hi teka hi ri va nkoka swinene lerova u tsundzuka xin’wana ni xin’wana, ku katsa ni xitekela xa hina lexi rharhanganeke ni swilo hinkwaswo leswi hi swi tivaka ni leswi hi swi tokoteke evuton’wini bya hina hinkwabyo. Ku hlayela misisi ya hina—laha nhloko hi ntolovelo yi nga ni misisi ya 100-000—a hi ntirho eka yena. Ya tsakisa swinene ndlela leyi marito ya Yesu ma hi tiyisekisaka ha yona leswaku Yehovha wa khathala hi un’wana ni un’wana wa hina!

13. Mhaka ya Hosi Yehoxafati yi swi kombisa njhani leswaku Yehovha u languta leswinene eka hina hambiloko hi nga hetisekanga?

¹³ Bibele yi paluxa mhaka yin’wana leyi kombisaka leswaku Yehovha wa hi rhandza hakunene. U languta leswinene eka hina naswona u swi teka swi ri swa nkoka. Hi xikombiso, anakanya hi Hosi Yehoxafati wo lulama. Loko hosi leyi yi teke goza ra vuhunguki, muprofeta wa Yehovha u yi byele leswi: “Hikwalaho ka leswi Yehovha u ku hlundzukerile.” Leyi a ku ri mhaka yo chavisa swinene! Kambe rungula ra Yehovha a ri helelanga kwalaho. Ri ye emahlweni ri ku: “Nilokoswiritano, ku ni swilo leswinene leswi kumiweke eka wena.” (2 Tikronika 19:1-3) Kutani ku hlundzuka ka Yehovha loku faneleke a ku endlanga leswaku a nga swi voni ni “swilo leswinene” eka Yehoxafati. Xana a swi hi khutazi ku tiva leswaku Xikwembu xa hina xi languta leswinene eka hina hambiloko hi nga hetisekanga?

Xikwembu Lexi ‘Lunghekeleke Ku Rivalela’

14. Loko hi endle xidyoho, i mintlhaveko yihi leyi nga hi karhataka, kambe hi nga vuyeriwa njhani hi ndlela leyi Yehovha a rivalelaka ha yona?

¹⁴ Loko hi endle xidyoho, hi nga hela matimba, hi va ni tingana hi tlhela hi tivona nandzu lerova hi anakanya leswaku a hi nge he faneleki nikatsongo ku tirhela Yehovha. Kambe tsundzuka leswaku Yehovha “u lunghekele ku rivalela.” (Pisalema 86:5) Ina, loko hi hundzuka eswidyohweni swa hina kutani hi lwa hi matimba leswaku hi nga ha tlheli hi swi endla, hi nga vuyeriwa hi ndlela leyi Yehovha a rivalelaka ha yona. Xiya ndlela leyi Bibele yi xi hlamuselaka ha yona xikombiso lexi xo hlamarisa xa rirhandzu ra Yehovha.

15. Yehovha u veka swidyoho swa hina empfhukeni wo tanihi kwihi?

¹⁵ Mupisalema Davhida u tirhise marito lama twisisekaka loko a hlamusela ndlela leyi Yehovha a rivalelaka ha yona: “Kukota leswi vuhuma-dyambu byi nga ekule ni vupela-dyambu, hi ndlela leyi fanaka, ku tlula ka hina milawu u ku veke ekule na hina.” (Pisalema 103:12) Xana ku ni mpfhuka wo tanihi kwihi exikarhi ka vuhuma-dyambu ni vupela-dyambu? Kahle-kahle, ku ni mpfhuka lowukulu swinene exikarhi ka vuhuma-dyambu ni vupela-dyambu; leswimbirhi a swi nge pfuki swi hlanganile. Xidyondzi xin’wana xi hlamusela leswaku xiga lexi xi vula leswaku “ekule swinene; empfhukeni wa le kule swinene lowu hi nga wu ehleketaka.” Marito ya Davhida lama huhuteriweke ma hi byela leswaku loko Yehovha a rivalela, u veka swidyoho swa hina ekule swinene na hina.

16. Loko Yehovha a hi rivalele swidyoho, ha yini hi fanele hi tiyiseka leswaku u hi teka hi ri lava baseke?

¹⁶ Xana u tshame u ringeta ku susa xivati eka nguvu ya muhlovo wo vonikela? Swi nga ha endleka u tikarhatile swinene kambe xivati xi sala xa ha vonaka. Xiya ndlela leyi Yehovha a byi hlamuselaka ha yona vuswikoti bya yena byo rivalela: “Hambiloko swidyoho swa n’wina swo va swa ribungu, swi ta endliwa swi basa ku fana ni gamboko; hambiloko swi tshwuke ku fana ni nguvu ya xivunguvungu, swi ta fana ni voya.” (Esaya 1:18) Rito “ribungu” ri vula muhlovo wo tshwuka lowu vonikelaka.a “Xivunguvungu” a ku ri wun’wana wa mihlovo yo tshwuka leyi dzwihaleke. A hi nge swi koti ku susa xivati xa xidyoho hi matimba ya hina vini. Kambe Yehovha a nga swi kota ku teka swidyoho leswi fanaka ni muhlovo wa ribungu ni wa xivunguvungu a swi basisa swi sala swi fana ni gamboko kumbe voya lebyi nga dayiwangiki. Kutani loko Yehovha a hi rivalele swidyoho swa hina, a hi fanelanga hi titwa onge hi ta tshama hi ri ni xivati xa swidyoho sweswo vutomi bya hina hinkwabyo.

17. Yehovha u cukumeta swidyoho swa hina endzhaku ka yena hi ndlela yihi?

¹⁷ Eka risimu leri terisaka vusiwana ro nkhensa leri Hezekiya a ri qambheke endzhaku ka loko a ponisiwile eka vuvabyi lebyi dlayaka, u byele Yehovha a ku: “Swidyoho swa mina hinkwaswo u swi lahlele enhlaneni wa wena.” (Esaya 38:17) Laha Yehovha u kombisiwa a ri loyi a tekaka swidyoho swa munhu la hundzukeke a swi lahlela endzhaku ka Yena, kutani A nga ha swi voni hambi ku ri ku anakanya ha swona. Hi ku ya hi buku yin’wana, leswi hlamuseriwaka swi nga ha vula leswi: “U suse [swidyoho swa mina] onge a swi kalanga swi va kona.” Xana sweswo a swi hi chaveleli?

18. Muprofeta Mikiya u swi kombisa njhani leswaku loko Yehovha a rivalela, U susa swidyoho swa hina hi ku helela?

¹⁸ Eka xitshembiso xa ku vuyetela swilo, muprofeta Mikiya u phofule ndlela leyi a a khorwiseka ha yona leswaku Yehovha u ta va rivalela vanhu va yena lava hundzukeke: “Hi xihi Xikwembu lexi fanaka na wena, . . . lexi honisaka ku tlula nawu ka masalela ya ndzhaka ya xona? . . . Kutani swidyoho swa wona hinkwaswo u ta swi lahlela evuentweni bya lwandle.” (Mikiya 7:18, 19) Anakanya leswi marito wolawo a ma vula swona eka lava a va hanya eminkarhini ya ku tsariwa ka Bibele. Xana a swi ta koteka ku tsavula nchumu lowu nga lahleriwa “evuentweni bya lwandle”? Xisweswo marito ya Mikiya ma kombisa leswaku loko Yehovha a hi rivalela, u susa swidyoho swa hina hilaha ku heleleke.

‘Ntwela-vusiwana Lowukulu Wa Xikwembu Xa Hina’

19, 20. (a) Ri vula yini riendli ra Xiheveru leri hundzuluxeriweke ri va “ku kombisa tintswalo” kumbe “ku twela”? (b) Bibele yi hi dyondzisa njhani hi ta ntwela-vusiwana wa Yehovha hi ku tirhisa mintlhaveko leyi manana a nga na yona eka n’wana wakwe?

¹⁹ Ntwela-vusiwana i xikombiso xin’wana xa rirhandzu ra Yehovha. Xana ntwela-vusiwana i yini? EBibeleni, rito leri nge ntwela-vusiwana ri yelana swinene ni tintswalo. Ku ni marito yo hlayanyana ya Xiheveru ni ya Xigriki lawa nhlamuselo ya wona yi yelanaka swinene ni ntwela-vusiwana. Hi xikombiso, riendli ra Xiheveru leri nge ra·chamʹ, hakanyingi ri vula “ku kombisa tintswalo” kumbe “ku twela.” Rito leri ra Xiheveru, leri Yehovha a ri tirhisaka eka yena, ri fambelana ni rito leri vulaka “mbeleko” naswona ri nga hlamuseriwa tanihi “ntwela-vusiwana wa manana.”

²⁰ Bibele yi hi dyondzisa hi ta ntwela-vusiwana wa Yehovha hi ku tirhisa mintlhaveko leyi manana a nga na yona eka n’wana wa yena. Esaya 49:15 yi ri: “Xana wansati a nga rivala n’wana loyi a n’wi an’wisaka lerova a nga vi na ntwela-vusiwana [ra·chamʹ] eka n’wana la humaka embelekweni wakwe? Ina, va nga ha rivala, kambe mina a ndzi nge ku rivali.” (The Amplified Bible) Swa tika ku anakanya leswaku manana a nga rivala ku an’wisa ni ku khathalela n’wana wakwe. Phela ricece a ri koti ku tiendlela nchumu; ri lava nkhathalelo wa mana wa rona vusiku ni nhlikanhi. Khombo ra kona, swi tolovelekile ku twa leswaku ku ni vamanana lava honisaka vana va vona, ngopfu-ngopfu ‘eminkarhini leyi ya mangava.’ (2 Timotiya 3:1, 3) “Kambe,” ku vula Yehovha, “mina a ndzi nge ku rivali.” Ntwela-vusiwana lowukulu lowu Yehovha a nga na wona eka malandza ya yena wu ni matimba swinene ku tlula ntlhaveko wa ntumbuluko lowu hi wu tivaka—ku nga ntwela-vusiwana lowu hi ntolovelo manana a nga na wona eka n’wana wa yena.

21, 22. Vaisrayele va langutane na yini loko va ri etikweni ra khale ra Egipta, naswona Yehovha u angurise ku yini loko va huwelela eka yena leswaku a va pfuna?

²¹ Yehovha u wu kombisa njhani ntwela-vusiwana wo fana ni wa mutswari la nga ni rirhandzu? Mfanelo leyi yi kombisiwa kahle hi mukhuva lowu a ri khomeke ha wona tiko ra khale ra Israyele. Eku heleni ka lembe-xidzana ra vu-16 B.C.E., Vaisrayele va timiliyoni a va ri mahlonga aEgipta, laha a va tshikileriwa swinene. (Eksoda 1:11, 14) Hikwalaho ka gome ra vona, Vaisrayele va huwelele eka Yehovha leswaku a va pfuna. Xana Xikwembu xa ntwela-vusiwana xi angurise ku yini?

²² Mbilu ya Yehovha yi khumbekile. U te: “Ndzi vone ku xaniseka ka vanhu va mina lava nga aEgipta, naswona ndzi twe xirilo xa vona . . . Ndza ku tiva swinene ku vava loku va ku twaka.” (Eksoda 3:7) A swi nga ta koteka leswaku Yehovha a vona ku xaniseka ka vanhu va yena kumbe a twa xirilo xa vona kambe a nga va tweli vusiwana. Yehovha i Xikwembu xa ntwela-vusiwana. Ntwela-vusiwana i ku kota ku twelana ni lava twaka ku vava. Kambe Yehovha a nga lo twela vanhu va yena swi helela kwalaho; u endle swo karhi leswaku a va pfuna. Esaya 63:9 yi ri: “Erirhandzwini ni le ka [ntwela-vusiwana] wa yena u va xavile.” U kutsule Vaisrayele aEgipta “hi voko ra matimba.” (Deteronoma 4:34) Endzhaku ka sweswo u va nyike swakudya hi singita kutani a va yisa etikweni ra mihandzu, leri nga ra vona.

23. (a) Marito ya mupisalema ma hi tiyisekisa njhani leswaku Yehovha wa khathala swinene hi un’wana ni un’wana wa hina? (b) Yehovha u hi pfuna hi tindlela tihi?

²³ Yehovha a nga kombisi ntwela-vusiwana eka vanhu vakwe tanihi ntlawa ntsena. Xikwembu xa hina xa rirhandzu xa khumbeka swinene hi hina ha un’we-un’we. Xi ku vona kahle ku xaniseka kun’wana ni kun’wana loku hi langutanaka na kona. Mupisalema u te: “Mahlo ya Yehovha ma le henhla ka lavo lulama, ni tindleve takwe ti yingisa xirilo xa vona xo kombela mpfuno. Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.” (Pisalema 34:15, 18) Xana Yehovha u n’wi pfunisa ku yini un’wana ni un’wana wa hina? A nga endli sweswo hi ku susa leswi hi vangelaka ku xaniseka. Kambe u endle malunghiselelo yo tala yo pfuna lava va lavaka mpfuno eka yena. Rito ya yena ri nyikela ndzayo leyinene leyi pfunaka swinene. Evandlheni u veke valanguteri lava fanelekaka hi tlhelo ra moya, lava lwelaka ku kombisa ntwela-vusiwana wo fana ni wa yena loko va pfuna van’wana. (Yakobo 5:14, 15) Tanihi “Mutwi wa xikhongelo” Yehovha u nyika “moya lowo kwetsima . . . eka lava n’wi kombelaka.” (Pisalema 65:2; Luka 11:13) Malunghiselelo lawa hinkwawo i swikombiso swa ‘ntwela-vusiwana lowukulu wa Xikwembu xa hina.’—Luka 1:78.

24. Xana u ta swi kombisa njhani leswaku wa ri tlangela rirhandzu ra Yehovha?

²⁴ Xana a swi tsakisi ku anakanyisisa hi rirhandzu ra Tata wa hina wa le tilweni? Eka xihloko lexi hundzeke, hi tsundzuxiwe leswaku Yehovha u tirhise matimba, vululami ni vutlhari bya yena hi tindlela ta rirhandzu leswaku a pfuna hina. Kasi eka xihloko lexi hi vone leswaku Yehovha u kombise rirhandzu ra yena eka vanhu hi ku angarhela—ni le ka un’wana ni un’wana wa hina—hi tindlela to hlawuleka swinene. Kutani un’wana ni un’wana wa hina u fanele a tivutisa xivutiso lexi nge, ‘Xana ndzi ta swi kombisa njhani leswaku ndza ri tlangela rirhandzu ra Yehovha?’ Onge u nga swi kombisa hi ku n’wi rhandza hi mbilu ya wena hinkwayo, hi mianakanyo ya wena hinkwayo, hi moya-xiviri wa wena hinkwawo ni hi ntamu wa wena hinkwawo. (Marka 12:29, 30) Onge ndlela leyi u hanyaka vutomi bya wena ha yona siku na siku yi nga kombisa leswaku u swi navela hi mbilu ya wena hinkwayo ku tshinela swinene eka Yehovha. Naswona onge Yehovha, Xikwembu lexi nga rirhandzu, xi nga tshinela swinene eka wena—hi masiku ni masiku!—Yakobo 4:8.

[Nhlamuselo ya le hansi]

Wa Tsundzuka Xana?

• Hi swi tivisa ku yini leswaku rirhandzu i mfanelo leyikulu ya Yehovha?

• Ha yini ku nga vuriwaka leswaku ku va Yehovha a rhumele N’wana wa yena leswaku a ta xaniseka ni ku hi fela i xiendlo lexikulu ngopfu xa rirhandzu?

• Yehovha u hi tiyisekisa njhani leswaku u rhandza un’wana ni un’wana wa hina?

• Bibele yi hlamusela ku rivalela ka Yehovha hi tindlela tihi to twisiseka?

[Xifaniso lexi nga eka tluka 15]

‘Xikwembu xi nyikele hi N’wana wa xona la nga swakwe’

[Xifaniso lexi nga eka tluka 16, 17]

“Mi ni risima ku tlula swindzingiri swo tala”

[Xihlovo Xa Kona]

© J. Heidecker/VIREO

[Xifaniso lexi nga eka tluka 18]

Ndlela leyi manana a titwaka ha yona hi n’wana wa yena yi nga hi dyondzisa ntwela-vusiwana wa Yehovha