“Moya-xiviri Wa Wena Wu Ta . . . Korhamela Ehansi Eka Mina”

KU TITSONGAHATA i mfanelo leyinene. Hakanyingi hi titwa hi rhandza vanhu lava titsongahataka. Kambe lexi twisaka ku vava hileswaku swa tika ku kuma vanhu lava titsongahataka emisaveni ya namuntlha—ngopfu-ngopfu eka vanhu lava nga ni matimba kumbe vulawuri eka van’wana. Xana ku vuriwa yini hi Yehovha Xikwembu, Loyi a nga ni matimba lamakulu evuakweni hinkwabyo? Xana wa titsongahata? A hi kambisiseni marito ya muprofeta Yeremiya lama kumekaka eka Swirilo 3:20, 21.—Yi hlaye.

Yeremiya u tsale buku ya Swirilo eminkarhini ya mangava ematin’wini ya Vaisrayele. A ha ku vona nchumu lowu n’wi karhateke swinene—ku lovisiwa ka muti lowu a a wu rhandza wa Yerusalema hi Vababilona. Muprofeta loyi, loyi a a ri ni gome a a swi tiva leswaku khombo rero a ku ri vuavanyisi bya Xikwembu eka Vaisrayele hikwalaho ka swidyoho swa vona. Kambe xana Yeremiya a nga ha ri na ntshembo? Xana a a vona onge Yehovha u le kule lerova a nga xiya vanhu lava hundzukaka kutani a va susela gome leri a va ri na rona? Yingisa loko Yeremiya a vulavulela vanhu va ka vona.

Hambileswi vanhu vo tala a va ri ni gome, Yeremiya a a ri ni ntshembo. U huwelele eka Yehovha a ku: “Kunene moya-xiviri wa wenaa [Yehovha] wu ta tsundzuka, wu korhamela ehansi, eka mina.” (Ndzimana 20) Yeremiya a a nga kanakani. A a swi tiva leswaku Yehovha a nge n’wi rivali—hambi ku ri ku rivala vanhu lava hundzukaka exikarhi ka vanhu va Yena. Kambe xana Xikwembu xa matimba hinkwawo a xi ta endla yini?—Nhlavutelo 15:3.

Yeremiya a a tiyiseka leswaku Yehovha u ta “korhamela ehansi” eka lava hundzukaka hakunene. Vuhundzuluxeri byin’wana byi ri: “Oho tsundzuka, kutani u ndzi nkhinsamela.” Marito wolawo ma hi pfuna ku languta Yehovha tanihi munhu loyi a nga ni musa. Yehovha “La nge Henhla-henhla emisaveni hinkwayo,” u ta nkhinsama leswaku a vulavula kutani a tlakusa vagandzeri vakwe a va humesa eka xiyimo xo biha lexi va nga eka xona kutani a endla leswaku va tlhela va tsakeriwa hi yena. (Pisalema 83:18) Leswi a a tiyisiwa hi ntshembo lowu, Yeremiya u kume nchavelelo wa xiviri eka ku karhateka loku a ku ri embilwini yakwe. Muprofeta wo tshembeka a a tiyimisele ku lehisa mbilu a rindza kukondza ku fika nkarhi lowu hlawuriweke hi Yehovha wo kutsula vanhu va Yena lava hundzukeke.—Ndzimana 21.

Hakunene marito lama tsariweke hi Yeremiya ma hi dyondzisa swilo swimbirhi hi Yehovha. Xo sungula, wa titsongahata. (Pisalema 18:35) Hambileswi Yehovha a ‘tlakukeke hi matimba,’ minkarhi hinkwayo u tirhisana na hina ni ku hi pfuna loko hi ri ni gome. (Yobo 37:23; Pisalema 113:5-7) Xana marito lawa a ma chaveleli hakunene? Xa vumbirhi, Yehovha u ni tintswalo; u “lunghekele ku rivalela” vadyohi lava hundzukaka kutani a tlhela a va tsakela. (Pisalema 86:5) Timfanelo teto timbirhi—ku nga ku titsongahata ni tintswalo—ta fambisana.

Ha swi tlangela swinene leswi Yehovha a nga faniki ni vafumi lava nga vanhu va nyama lava ku tikukumuxa ka vona ku va endlaka va va lava omeke tinhloko ni ku tlanyala! Endzhaku ko hlaya hi mhaka ya leswaku Yehovha i Xikwembu lexi titsongahataka lexi tiyimiseleke ku “nkhinsama” leswaku xi tlakusa vagandzeri va xona lava heleriweke hi ntshembo, xana u lava ku dyondza leswi engetelekeke hi yena?

Tindzimana ta Bibele leti u nga ti hlayaka hi June:

◼ Yeremiya 51-52; Swirilo 1-5–Ezekiyele 1-5

[Nhlamuselo ya le hansi]

[Marito lama tshahiweke exihlokweni lama nga eka tluka 14]

Minkarhi hinkwayo Yehovha u tirhisana na hina ni ku hi pfuna loko hi ri ni gome