‘Solomoni A Nga Ambalanga Ku Fana Ni Xin’we Xa Swona’
SWILUVA swa nhova swo fana ni leswi u swi vonaka eka tluka leri swi tolovelekile etlhelo ka patu edzongeni wa Afrika. Swi vitaniwa cosmos naswona swi kumeka etindhawini to hisa ta le Amerika. Swiluva swo xonga swonghasi swi nga ha hi tsundzuxa dyondzo leyi Yesu a yi dyondziseke. Vanhu vo tala eka vayingiseri va yena a a va ri swisiwana naswona a va karhatekile hi swilaveko swa vona swa nyama, swakudya swa vona ni swiambalo swa vona.
Yesu u vutise a ku: “Ha yini mi vilela hi swiambalo? Dyondzani eka makhon’wa ya nhova leswi ma kurisaka xiswona; a ma tirhi, a ma swuli; kambe ndza mi byela leswaku hambi ku ri Solomoni eku vangameni kakwe hinkwako a nga ambalanga ku fana ni rin’we ra wona.”—Matewu 6:28, 29.
Ku endliwe swiringanyeto swo hambana-hambana malunghana ni xiluva xa nhova lexi Yesu a a vulavula hi xona hi ku kongoma. Hambiswiritano, Yesu u ye emahlweni a xi pimanisa ni ximila xa nhova a ku: “Kutani, loko Xikwembu xi xi ambexa hi ndlela yoleyo ximila xa nhova, lexi nga kona namuntlha kasi mundzuku xi ta hoxiwa exitikweni, xana a xi nge mi ambexi ngopfu, n’wina mi nga ni ripfumelo leritsongo?”—Matewu 6:30.
Hambileswi swiluva leswi vuriwaka cosmos swi nga riki kona eIsrayele, swi seketela leswi Yesu a a vula swona eka dyondzo yakwe. Hambiloko u swi vonela ekule kumbe ekusuhi, swi saseke swinene naswona vateki va swifaniso ni vampfampfarhuti va swi rhandza. Hakunene, Yesu a a nga hundzeleti swilo loko a vula leswaku ‘Solomoni a nga ambalanga ku fana ni xin’we xa swona.’
Hi dyondza yini hina namuntlha? Lava va tirhelaka Xikwembu va nga tiyiseka leswaku xi ta va pfuna va kuma leswi va swi lavaka hambiloko ku ri eminkarhini yo nonon’hwa. Yesu u te: “Hambetani mi lava mfumo wa [Xikwembu], kutani swilo leswi [swo kota swakudya ni swiambalo leswi mi swi pfumalaka] mi ta engeteleriwa swona.” (Luka 12:31) Ina, hi ta kuma vuyelo bya xiviri loko hi lava Mfumo wa Xikwembu. Kambe, xana wa swi tiva leswaku Mfumo wa Xikwembu i yini, nileswaku wu ta va endlela yini vanhu? Timbhoni ta Yehovha ti ta tsakela ku ku pfuna leswaku u kuma tinhlamulo leti humaka eBibeleni.