U Nga Swi Kota Ku Hlula Bubutsa Ra Maxangu

EMINKARHINI leyi ya mangava, vo tala va langutana ni bubutsa ra maxangu. Kambe eka Vakreste, ku rhandza Xikwembu ni ku namarhela misinya ya milawu ya xona swa va pfuna leswaku va hlula. Njhani? Nhlamulo yi nga kumiwa eka xifaniso lexi Yesu Kreste a nga xi hlamusela. U fanise vadyondzisiwa va yena vo tshembeka ni “wanuna wo tlhariha, la akeke yindlu ya yena ehenhla ka ribye lerikulu.” Yesu u te: “Mpfula yi halaka ni tindhambi ti ta ni timheho ti hunga ti ba yindlu yoleyo, kambe yi nga wi, hikuva yi akiwe ehenhla ka ribye lerikulu.”—Matewu 7:24, 25.

Xiya leswaku, hambileswi wanuna loyi ku vulavuriwaka ha yena exifanisweni lexi a a tlharihile, kambe a a langutana ni maxangu—lama kombisiwaka hi ku halaka ka mpfula, tindhambi ni timheho ta matimba. Hikwalaho, Yesu a a nga vuli swona leswaku vadyondzisiwa vakwe a va ta balekela maxangu hinkwawo kutani va hanya hi ku rhula ntsena. (Pisalema 34:19; Yakobo 4:13-15) Kambe u vule leswaku malandza yo tshembeka ya Xikwembu ma nga langutela maxangu ni ku tilunghiselela ku hlangavetana na wona.

Yesu u sungule xifaniso hi ku vula leswi: “Un’wana ni un’wana la twaka leswi ndzi swi vulaka kutani a swi endla u ta fanisiwa ni wanuna wo tlhariha, la akeke yindlu ya yena ehenhla ka ribye lerikulu.” I ntiyiso leswaku Yesu a a nga vulavuli hi ku akiwa ka tiyindlu ta xiviri, kambe a a vulavula hi ku aka vutomi. Lava va yingisaka marito ya Kreste va tlharihile naswona va ni mianakanyo leyi hlutekeke. Va sekela minsusumeto ni swiendlo swa vona eka ribye lerikulu ra tidyondzo ta Kreste hi ku tirhisa leswi va dyondzisiweke swona. Ribye leri ro fanekisela ri funengetiwe hi misava. Wanuna loyi ku vulavuriwaka ha yena exifanisweni a a fanele a cela “ehansi swinene” leswaku a ri kuma. (Luka 6:48) Hilaha ku fanaka, vadyondzisiwa va Yesu a va tshama va ri eku tirheni hi matimba leswaku va hlakulela timfanelo ta risima leti nga ta va endla va tshinela ekusuhi ni Xikwembu.—Matewu 5:5-7; 6:33.

Ku humelela yini loko bubutsa ra maxangu ri ringa masungulo ya Vukreste ya valandzeri va Yesu ku vona loko ma tiyile? Ku tiyimisela ka vona ku yingisa tidyondzo ta Kreste swin’we ni timfanelo ta vona ta Vukreste, swi va nyika matimba loko va langutane ni swiphiqo swo tano, naswona leswi swi ta va pfuna swinene loko ku fika bubutsa leri tshinelaka ra Armagedoni. (Matewu 5:10-12; Nhlavutelo 16:15, 16) Ina, hi ku landzela tidyondzo ta Kreste, vo tala va kota ku hlula miringo yo fana ni mabubutsa. Na wena u nga swi kota ku endla leswi fanaka.—1 Petro 2:21-23.