Ku Thwasa Ka Ntlawa Wa Vu-123 Wa Le Giliyadi

Mathwasana Ya Le Giliyadi Ma Khutaziwa Ku “Tirha Hi Matimba”

HI Mugqivela wa September 8, 2007, vanhu va 6 352 lava humaka ematikweni ya 41 a a va ri kona loko ku thwasa ntlawa wa vu-123 wa Xikolo xa Bibele xa Giliyadi xa Watchtower. Hi awara ya khume nimixo, mutshama-xitulu wa nongonoko, Anthony Morris wa Huvo leyi Fumaka, u nambe a amukela vayingiseri. Endzhaku ka xingheniso, u vitane xivulavuri xo sungula, Gary Breaux, wa Komiti ya Rhavi ya le United States.

Makwerhu Breaux u tiyisekise swichudeni leswaku ku nga khathariseki ndlela leyi swi langutekaka ha yona, lava va endlaka ku rhandza ka Yehovha va sasekile ematihlweni ya Yena. (Yer. 13:11) U khutaze mathwasana leswaku ma tshama ma sasekile hi ndlela yoleyo. Xivulavuri lexi landzelaka, Gerrit Lösch wa Huvo leyi Fumaka u kandziyise leswaku i swinene ku va ni ntshembo wo kuma hakelo loko hi tirhela Yehovha. (Hev. 11:6) Hambiswiritano, a hi fanelanga hi n’wi rhandza hi xikongomelo xo lava hakelo.

William Samuelson, mulanguteri wa Ndzawulo ya Swikolo swa Vutirheli bya le Tilweni u khutaze mathwasana leswaku ma tshama exiavelweni xa wona lexi xiximekaka xa ku twarisa Hosi leyi fumaka, ni ku kombisa xindzhuti xa wona hi ku tikhoma hi ndlela leyinene.a Sam Roberson, mupfuni wa mulanguteri wa Ndzawulo ya Swikolo swa Vutirheli bya le Tilweni, u khutaze mathwasana leswaku minkarhi hinkwayo ma fanele ma xiya timfanelo letinene eka van’wana. Hi ndlela yoleyo mathwasana ma ta kota ku ‘rhandza nhlengeletano ya vamakwerhu hinkwayo.’—1 Pet. 2:17.

Endzhaku ka tinkulumo leti khutazaka, Mark Noumair muleteri wa le xikolweni xa Giliyadi u burisane ni mathwasana yo hlayanyana lama runguleke mintokoto leyi ma veke na yona ensin’wini hi nkarhi wa xikolo lexi. Vayingiseri hinkwavo a va swi vona leswaku ma yi rhandza nsimu naswona ma navela ku pfuna van’wana. Endzhaku ka sweswo, Kent Fischer la tirhaka eHofisini ya le Bethele ya le Patterson u burisane ni swirho swa Komiti ya Rhavi leswi humaka ematikweni manharhu lama nga ni varhumiwa. Leswi vuriweke hi vamakwerhu lava swi tiyisekise vayingiseri, lava a va katsa ni vatswari vo tala va mathwasana, leswaku varhumiwa lavantshwa va khathaleriwa swinene eswiavelweni swa vona. Endzhaku ka sweswo, Izak Marais la tirhaka eNdzawulweni ya Mintirho ya Vuhundzuluxeri u burisane ni lava ku nga khale va ri varhumiwa, lava mintokoto ya vona yi kombeke mathwasana ntsako lowu ma nga ta wu kuma.

Nkulumo-nkulu ya nongonoko, leyi nyikeriweke hi Geoffrey Jackson wa Huvo leyi Fumaka, a yi ri ni nhloko-mhaka leyi nge, “Se Mi Swi Twile—Kutani Mi Ta Endla Yini?” Makwerhu Jackson, loyi a veke murhumiwa ku ringana malembe ya kwalomu ka 25 le Pacific Dzonga, u bule hi xiphemu xo hetelela xa Dyondzo ya le Ntshaveni. Enkulumeni yoleyo, Yesu u vulavule hi vavanuna vambirhi lava akeke tiyindlu, lowun’wana a a tlharihile kasi lowun’wanyana a a ri xiphukuphuku. Xivulavuri xi vule leswaku tiyindlu leti hatimbirhi swi nga ha endleka a ti akiwe endhawini yin’we. Hambiswiritano, wanuna wa xiphukuphuku u ake yindlu ya yena esaveni, kasi wanuna lowo tlhariha u cerile kukondza a kuma ribye leri a akeke yindlu yakwe ehenhla ka rona. Loko xidzedze xi fika, yindlu leyi akiweke eribyeni a yi wanga kasi leyi akiweke esaveni yi wile.—Mat. 7:24-27; Luka 6:48.

Yesu u vule leswaku wanuna wa xiphukuphuku a a fanekisela lava a va yingisela tidyondzo ta Yesu ivi va nga endli nchumu ha tona. Wanuna wo tlhariha a a fana ni vanhu lava yingiseke tidyondzo ta Yesu va tlhela va ti tirhisa evuton’wini bya vona. Makwerhu Jackson u byele mathwasana a ku, “Loko leswi mi swi dyondzeke eBibeleni mo ya swi tirhisa eswiavelweni swa n’wina, mi ta fana ni wanuna wo tlhariha.” Kutani loko a gimeta nkulumo yakwe, u khutaze mathwasana leswaku ma hambeta ma “tirha hi matimba” eswiavelweni swa wona.

Eku heteleleni, mathwasana ma nyikiwe tidiploma ni swiavelo swa wona, naswona Makwerhu Morris u nyikele xitsundzuxo xo gimeta. U khutaze mathwasana ku landzela Yesu minkarhi hinkwayo nileswaku ma nga tshiki ku kombela matimba eka Yehovha. Kutani nongonoko wo thwasa wu fike emakumu.

[Nhlamuselo ya le hansi]

[Bokisi eka tluka 31]

TINHLAYO TA NTLAWA

Nhlayo ya matiko lama yimeriweke: 10

Nhlayo ya matiko lawa va averiweke eka wona: 24

Nhlayo ya swichudeni: 56

Avhareji ya malembe: 33,5

Avhareji ya malembe entiyisweni: 17,9

Avhareji ya malembe evutirhelini bya nkarhi hinkwawo: 13,8

[Xifaniso eka tluka 32]

Ntlawa Wa Vu-123 Lowu Thwasaka Wa Xikolo Xa Bibele Xa Giliyadi Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.