Ku Rindza Ka Hina Se I Mhaka Ya Xihatla Swinene
“Hikokwalaho tshamani mi rindzile, hikuva a mi ri tivi siku leri Hosi ya n’wina yi nga ta ta ha rona.”—MATEWU 24:42.
1, 2. I yini lexi kombisaka leswaku hi hanya emakumu ya mafambiselo lawa ya swilo?
MUTSARI un’wana la vuriwaka Bill Emmott u te: “Lembe-xidzana ra vumakume-mbirhi a ri mbyindliwe ngopfu hi tinyimpi.” Hambiloko a pfumela leswaku i khale vanhu va ri karhi va chachamerisiwa hi tinyimpi ni madzolonga, u ye emahlweni a ku: “Lembe-xidzana ra vumakume-mbirhi ri ve na swona swilo sweswo, kambe a swi nyanye ngopfu. I lembe-xidzana ro sungula ku va ni nyimpi leyi funengeteke misava hinkwayo . . . Ku tlula kwalaho, a ku vanga ni nyimpi yin’we ntsena ya misava kambe ti ve timbirhi.”
2 Tinyimpi leti katsaka ‘ku pfukelana ka matiko ni mimfumo’ a ti profetiwile hi Yesu Kreste. Kambe tinyimpi to va xin’wana xa swilo leswi vumbaka ‘xikombiso xa vukona bya Kreste ni xa makumu ya mafambiselo ya swilo.’ Eka vuprofeta byebyo byo hlawuleka, Yesu u tlhele a vulavula hi tindlala, mintungu ni ku tsekatseka ka misava. (Matewu 24:3, 7, 8; Luka 21:6, 7, 10, 11) Makhombo yo tano ma nyanye hi tindlela to tala. Vuhomboloki bya vanhu byi tinyike matimba, hilaha swi kombisiwaka hakona hi langutelo leri va nga na rona eka Xikwembu ni le ka vanhu-kulobye. Mahanyelo yo biha ni ku andza ka vugevenga ni madzolonga swi voniwa hi mani na mani. Vanhu va rhandza mali ku ri ni ku rhandza Xikwembu, va mbombomela va twelela eku titsakiseni. Sweswo hinkwaswo swi tiyisekisa leswaku hi hanya ‘eminkarhini ya mangava.’—2 Timotiya 3:1-5.
3. Xana “swikombiso swa minkarhi” swi fanele swi hi khumbisa ku yini?
3 Xana u anakanya yini hi xiyimo xa vanhu lexi nyanyaka ku biha? Vo tala a va toviwi helo hi swiendlakalo swa namuntlha leswi dyisaka mbitsi. Vanhu va mavito ni va vutlhari emisaveni a va yi twisisi nhlamuselo ya “swikombiso swa minkarhi”; naswona varhangeri va vukhongeri a va nyikanga nkongomiso lowu faneleke emhakeni leyi. (Matewu 16:1-3) Kambe Yesu u tsundzuxe valandzeri vakwe a ku: “Hikokwalaho tshamani mi rindzile, hikuva a mi ri tivi siku leri Hosi ya n’wina yi nga ta ta ha rona.” (Matewu 24:42) Laha Yesu a nga hi khutazi leswaku hi rindza ntsena, kambe leswaku hi ‘tshama hi rindzile.’ Leswaku hi tshama hi rindzile hi fanele hi tshama hi xalamukile hi tlhela hi hiteka. Sweswo a swi lavi ku lemuka ntsena leswaku hi hanya emasikwini yo hetelela ni le minkarhini yo nonon’hwa. Hi fanele hi tiyiseka swinene leswaku “makumu ya swilo hinkwaswo ma tshinele.” (1 Petro 4:7) Kutani hi kona ku rindza ka hina ku nga ta vonaka ku ri mhaka ya xihatla. Hikwalaho, xivutiso lexi hi faneleke hi anakanyisisa ha xona hi lexi nge: ‘I yini lexi nga ta hi tiyisekisa swinene leswaku makumu ma tshinele?’
4, 5. (a) I yini lexi nga ta hi tiyisekisa swinene leswaku makumu ya mafambiselo lawa yo homboloka ma tshinele, naswona ha yini? (b) Hi yihi mhaka yin’we leyi kombisaka ku yelana ka nkarhi wa Nowa ni vukona bya N’wana wa munhu?
4 Anakanya hi swiyimo leswi a swi ri kona emahlweni ka xiendlakalo xo hlawuleka ematin’wini ya vanhu—ku nga Ndhambi leyikulu ya le nkarhini wa Nowa. Vanhu a va homboloke ngopfu lerova Yehovha a “vaviseka embilwini yakwe.” U te: “Ndzi ta herisa vanhu lava ndzi va tumbuluxeke ehenhla ka vuandlalo bya misava.” (Genesa 6:6, 7) Kutani u endle tano. Loko a kombisa ku yelana ka minkarhi yoleyo ni ya namuntlha, Yesu u te: “Hilaha masiku ya Nowa a ma ri hakona, ni masiku ya vukona bya N’wana wa munhu ma ta va tano.”—Matewu 24:37.
5 Swa twala ku anakanya leswaku vonelo ra Yehovha hi misava ya namuntlha ra fana ni leri a a ri na rona hi misava ya le mahlweni ka Ndhambi. Tanihi leswi a heriseke misava yo homboloka ya le nkarhini wa Nowa, hakunene u ta yi lovisa misava yo homboloka ya namuntlha. Ku va ni matwisiselo lamanene ya ndlela leyi nkarhi wolowo wu yelanaka ha yona ni wa hina swi fanele swi hi tiyisekisa swinene leswaku makumu ya mafambiselo ya namuntlha ma tshinele. Kutani, xana ku yelana ka kona hi kwihi? Ku ni tindlela ta kwalomu ka ntlhanu. Yo sungula hileswaku xilemukiso xa ndzoviso lowu taka xi nyikeriwa hi ndlela leyi kongomeke.
Va Lemukisiwile Malunghana Ni “Swilo Leswi Nga Si Voniwaka”
6. Xana Yehovha a a tiyimisele ku endla yini enkarhini wa Nowa?
6 Enkarhini wa Nowa, Yehovha u te: “Moya wa mina a wu nge he tirhi hilaha ku nga heriki eka munhu hikuva na yena i nyama. Hikwalaho masiku yakwe ma ta va malembe ya 120.” (Genesa 6:3) Ku vuriwa ka xitiviso xexo xa Xikwembu hi 2490 B.C.E. ku kombise ku sungula ka makumu ya misava ya nkarhi wolowo ya vanhu lava nga chaviki Xikwembu. Anakanya leswi sweswo a swi vula swona eka vanhu lava a va hanya enkarhini wolowo! A ku sele malembe ya 120 ntsena leswaku Yehovha a tisa “ndhambi ya mati ehenhla ka misava leswaku yi lovisa nyama hinkwayo ehansi ka matilo, leyi nga ni matimba ya vutomi eka yona.”—Genesa 6:17.
7. (a) Nowa u angurise ku yini loko a kuma xilemukiso xa Ndhambi? (b) Hi fanele hi angurisa ku yini eka swilemukiso swa mayelana ni makumu ya mafambiselo lawa?
7 Nowa u kume xilemukiso xa khombo rero ka ha sele makume ya malembe, kutani a tirhisa nkarhi wolowo hi vutlhari, a endla malunghiselelo ya ku ponisa vutomi. Muapostola Pawulo u te: “Loko a nyikiwe xilemukiso xa Xikwembu xa swilo leswi nga si voniwaka, [Nowa] u kombise nchavo lowu nga ni vukwembu ivi a aka ngalava leswaku ku ponisiwa ndyangu wakwe.” (Vaheveru 11:7) Ku vuriwa yini hi hina? Se ku hundze malembe ya kwalomu ka 90 hi mpfhuka ku sungule masiku ya makumu ya mafambiselo lawa ya swilo hi 1914. Hakunene hi le “[nkarhini] wa makumu.” (Daniyele 12:4) Xana hi fanele hi angurisa ku yini mayelana ni swilemukiso leswi hi nyikiweke swona? Bibele yi ri: “Loyi a endlaka ku rhandza ka Xikwembu u tshama hi masiku.” (1 Yohane 2:17) Hikwalaho, lowu i nkarhi wa ku endla ku rhandza ka Yehovha hi mahika.
8, 9. Hi swihi swilemukiso leswi nyikeriweke enkarhini wa hina, naswona swi twarisiwa njhani?
8 Eminkarhini ya hina, swichudeni swa Bibele leswi tshembekaka swi dyondze eMatsalweni lama huhuteriweke leswaku mafambiselo lawa ma ya eku lovisiweni. Xana ha swi tshemba sweswo ke? Xiya leswi Yesu Kreste a swi vekeke erivaleni loko a ku: “Ku ta va ni nhlomulo lowukulu lowu ku nga si tshamaka ku humelela lowu fanaka na wona hi mpfhuka misava yi va kona ku fikela sweswi, e-e, naswona a wu nge he tlheli wu va kona.” (Matewu 24:21) Yesu u tlhele a vula leswaku a a ta fika a ri ni xikhundlha xa ku va Muavanyisi la vekiweke hi Xikwembu, kutani a a ta hambanisa vanhu ku fana ni murisi loko a hambanisa tinyimpfu eka timbuti. Lava va kumiwaka va nga faneleki a va ta “loviseriwa makumu, kambe lavo lulama [a] va ta ya evuton’wini lebyi nga heriki.”—Matewu 25:31-33, 46.
9 Yehovha u tshama a ri karhi a lemukisa vanhu vakwe hi timhaka leti, hi ku tirhisa switsundzuxo swa le nkarhini leswi tisiwaka hi swakudya swa moya leswi lunghiseleriweke hi “hlonga ro tshembeka ni ro tlhariha.” (Matewu 24:45-47) Ku tlula kwalaho, matiko hinkwawo, tinyimba hinkwato ni vanhu va tindzimi hinkwato va khutaziwa leswaku va ‘chava Xikwembu va xi vangamisa, hikuva nkarhi wa ku avanyisiwa hi xona wu fikile.’ (Nhlavutelo 14:6, 7) Mhaka ya nkoka ya rungula ra Mfumo leri chumayeriwaka emisaveni hinkwayo hi Timbhoni ta Yehovha i xilemukiso xa leswaku Mfumo wa Xikwembu wu ta susa vulawuri bya vanhu ku nga ri khale. (Daniyele 2:44) Xilemukiso xexo a xi fanelanga xi biwa hi makatla. Rito ra Xikwembu xa Matimba Hinkwawo a ri si tshama ri wela ehansi. (Esaya 55:10, 11) Xi ri hetisisile enkarhini wa Nowa, naswona xi ta tlhela xi ri hetisisa enkarhini wa hina.—2 Petro 3:3-7.
Vudlakuta Byi Tinyike Matimba
10. Ku nga vuriwa yini hi vudlakuta bya le nkarhini wa Nowa?
10 Nkarhi wa hina wu fana ni wa Nowa ni hi ndlela yin’wanyana. Yehovha a a lerise wanuna ni wansati wo sungula leswaku va “tata misava” hi vanhu, va tirhisa lunghiselelo leri simekiweke hi Xikwembu evukatini ra ku va ni vuxaka bya rimbewu lebyi xiximekaka. (Genesa 1:28) Enkarhini wa Nowa, tintsumi leti nga yingisiki ti onhe vanhu hi ku sungula vuxaka bya rimbewu lebyi nga riki bya ntumbuluko. Ti te emisaveni, ti va ni mimiri ya nyama kutani ti va ni vuxaka bya rimbewu ni vavasati vo saseka, hiloko va tswala vana lava nga ni miri wa munhu ni wa dimona—ku nga Manefilimi. (Genesa 6:2, 4) Xidyoho xa tintsumi leti ta madlakuta xi fanisiwa ni manyala ya le Sodoma na Gomora. (Yudha 6, 7) Hikwalaho, vudlakuta byi khupuke maganga ni minkova enkarhini wolowo.
11. Hi xihi xiyimo xa mahanyelo lexi endlaka leswaku nkarhi wa hina wu fana ni wa Nowa?
11 Ku vuriwa yini hi xiyimo xa mahanyelo namuntlha? Emasikwini lawa yo hetelela, vo tala va dzike va twelela eka vuxaka bya rimbewu. Pawulo u vule a nga jikajiki leswaku vanhu vo tano va “[heleriwe] hi ntlhaveko hinkwawo wa ku tikhoma lokunene”; vo tala va tinyiketele “eku tikhomeni ko biha leswaku [va] endla thyaka hinkwaro hi makwanga.” (Vaefesa 4:19) Swilo leswi navetisaka rimbewu, vuxaka bya rimbewu emahlweni ka vukati, ku endla vana nsele ni vusodoma i mikhuva leyi tolovelekeke. Van’wana ana se va “[kuma] hakelo leyi heleleke” ku nga mavabyi lama tluletiwaka hi vuxaka bya rimbewu, ku hohloka ka mindyangu ni swiphiqo swin’wana.—Varhoma 1:26, 27.
12. Ha yini hi fanele hi hlakulela moya wa ku venga leswo biha?
12 Enkarhini wa Nowa, Yehovha u tise Ndhambi leyikulu leswaku a lovisa misava leyi a yi hlanyisiwa hi rimbewu. Hi nga tshuki hi rivala mhaka ya leswaku nkarhi wa hina wu fana kahle ni wa Nowa. “Nhlomulo lowukulu” lowu tshinelaka wu ta basisa misava hi ku susa ‘timbhisa, vaoswi, vanhu lava hlayiseriweke swikongomelo leswi nga riki swa ntumbuluko ni vavanuna lava etlelaka ni vavanuna-kulobye.’ (Matewu 24:21; 1 Vakorinto 6:9, 10; Nhlavutelo 21:8) I swa xihatla swinene leswaku hi hlakulela moya wa ku venga leswo biha ni ku fambela ekule ni swiyimo leswi nga hi susumetelaka ku tikhoma hi ndlela yo biha!—Pisalema 97:10; 1 Vakorinto 6:18.
Misava Yi “Tala Madzolonga”
13. Enkarhini wa Nowa, ha yini misava a yi “tale madzolonga”?
13 Bibele yi vulavula ni hi xiyimo xin’wana lexi fungheke nkarhi wa Nowa, yi ku: “Misava yi onhaka emahlweni ka Xikwembu xa ntiyiso, misava yi tala madzolonga.” (Genesa 6:11) Kahle-kahle madzolonga a ma nga sunguli. Kayini lowa n’wana wa Adamu u dlaye makwavo loyi a a lulamile. (Genesa 4:8) Loko a kombisa moya wa madzolonga wa le nkarhini wakwe, Lameke u qambhe xiphato a tibuma hi ndlela leyi a dlayeke jaha rin’wana ha yona, a vula leswaku a a tisirhelela. (Genesa 4:23, 24) Nchumu lowu a wu ri wuntshwa enkarhini wa Nowa a ku ri mpimo lowu madzolonga a ma fike eka wona. Loko vana va Xikwembu lava nga tintsumi leti nga yingisiki va teke vavasati va le misaveni kutani va tswala vana—Manefilimi—madzolonga ma fike empin’weni lowu a ma nga si tshama ma fika eka wona. Swihontlovila leswi swa nsele a swi ri “Vawisi”—“lava wisaka van’wana.” (Genesa 6:4, nhlamuselo ya le hansi ya NW) Hikwalaho, misava a yi “tale madzolonga.” (Genesa 6:13) Anakanya hi swiphiqo leswi Nowa a faneleke a langutane na swona loko a ri karhi a kurisa ndyangu wakwe endhawini yo tano! Kambe Nowa u kumeke a ‘tshembekile emahlweni ka Yehovha exikarhi ka rixaka rero.’—Genesa 7:1.
14. Misava ya namuntlha yi “tale madzolonga” ku fikela kwihi?
14 Madzolonga ma sungule khale exikarhi ka vanhu. Kambe hilaha a swi ri hakona enkarhini wa Nowa, madzolonga ma nyanyile swinene enkarhini wa hina. Hakanyingi hi twa hi ta madzolonga lama khumbaka swirho swa ndyangu, vutherorisi, ku yayarhela rixaka ni ku duvuriwa ka vanhu vo tala hi munhu loyi xikongomelo xakwe xi nga tivikaniki. Ku tlhandlekela kwalaho, ku ni ngati leyi halatiwaka etinyimpini. Misava yi tlhele yi tatiwa hi madzolonga. Ha yini? Xana ma nyanyisiwe hi yini? Nhlamulo ya kona yi kombisa mhaka yin’wana leyi yelanaka ni leswi endlekeke enkarhini wa Nowa.
15. (a) I yini lexi nyanyiseke madzolonga eminkarhini leyi ya makumu? (b) Hi byihi vuyelo lebyi hi nga tiyisekaka ha byona?
15 Loko Mfumo wa Xikwembu lowu nga ehansi ka Mesiya wu tlhomiwa etilweni hi 1914, Hosi leyi vekiweke exiluvelweni, ku nga Yesu Kreste, yi teke goza ra nkoka swinene. Sathana Diyavulosi ni madimona yakwe va hlongoriwe etilweni va lahleriwa emisaveni. (Nhlavutelo 12:9-12) Emahlweni ka Ndhambi, tintsumi leti tluleke nawu ti siye ndhawu ya tona etilweni hi ku swi rhandza; kambe eminkarhini ya hina, ti lo hlongoriwa kunene. Ku tlula kwalaho, sweswi a ta ha swi koti ku tiambexa mimiri ya vanhu laha misaveni leswaku ti titsakisa hi swilo swa nyama leswi nga riki enawini. Kutani hikwalaho ka mbitsi, ku hlundzuka ni ku chava vuavanyisi lebyi tshinelaka, ti susa mavila hi ku hlohlotela vanhu ni mavandla yo karhi leswaku va endla swilo swa nsele leswi fambisanaka ni vugevenga ni madzolonga lamakulu ku tlula ya le nkarhini wa Nowa. Yehovha u herise misava ya le mahlweni ka Ndhambi endzhaku ka loko tintsumi leti nga yingisiki kun’we ni vana va tona va yi tate hi vuhomboloki. Tiyiseka leswaku u ta endla leswi fanaka enkarhini wa hina! (Pisalema 37:10) Hambiswiritano, lava va tshamaka va rindzile namuntlha va swi tiva leswaku ku kutsuriwa ka vona ku tshinele.
Ku Chumayeriwa Ka Rungula
16, 17. Hi wihi nchumu wa vumune lowu minkarhi ya Nowa yi yelanaka ha wona ni ya hina?
16 Nchumu wa vumune lowu nkarhi wa hina wu yelanaka ha wona ni wa misava ya le mahlweni ka Ndhambi wu kombisiwa hi ntirho lowu Nowa a lerisiweke ku wu endla. Nowa u ake ngalava leyikulu. Nakambe a a ri “muchumayeri.” (2 Petro 2:5) Hi rihi rungula leri a ri chumayeleke? A swi kanakanisi leswaku rungula ra Nowa a ri katsa xikhutazo xa ku hundzuka ni xilemukiso xa ndzoviso lowu a wu tshinele. Yesu u vule leswaku vanhu va le nkarhini wa Nowa “[a va lemukanga] nchumu ku fikela loko ndhambi yi fika yi va kukula hinkwavo.”—Matewu 24:38, 39.
17 Hilaha ku fanaka, loko Timbhoni ta Yehovha ti hisekela ku hetisisa ntirho lowu ti nyikiweke wona wa ku chumayela, sweswo swi endla leswaku rungula ra Mfumo wa Xikwembu ri twarisiwa emisaveni hinkwayo. Etindhawini to tala ta misava, vanhu va kota ku twa ni ku hlaya rungula ra Mfumo hi ririmi ra vona. Magazini wa Xihondzo xo Rindza lowu twarisaka Mfumo wa Yehovha, wu humesiwa hi tikopi to tlula 25 000 000 hi tindzimi to tlula 140. Kunene, mahungu lamanene ya Mfumo wa Xikwembu ma chumayeriwa “emisaveni hinkwayo leyi akiweke leswaku byi va vumbhoni ematikweni hinkwawo.” Loko ntirho wolowo wu hlanganisiwe hi ndlela leyi enerisaka Xikwembu, makumu ma ta fika hakunene.—Matewu 24:14.
18. Ndlela leyi vo tala va angulaka ha yona entirhweni wa hina wo chumayela yi yelana njhani ni leyi vo tala va anguleke ha yona enkarhini wa Nowa?
18 Loko u anakanya hi xiyimo lexi hohlokeke xa moya ni xa mahanyelo emasikwini ya le mahlweni ka Ndhambi, a swi hlamarisi leswi ndyangu wa Nowa wu hundzukeke xihlekiso ni ndzhukano eka vaakelani lava a va ala ku byeriwa. Kambe makumu wona ma fikile. Hilaha ku fanaka, “vahlekuri lava hlekulaka” va tele emasikwini lawa ya makumu. “Kambe siku ra Yehovha ri ta ta ku fana ni khamba,” ku vula Bibele. (2 Petro 3:3, 4, 10) Ri ta fika hakunene hi nkarhi wa kona. A ri nge hlweli. (Habakuku 2:3) Hi ta va hi endla hi vutlhari hakunene loko hi tshama hi rindzile!
Ku Pona Va Nga Ri Vangani Ntsena
19, 20. Hi kwihi ku yelana loku hi ku vonaka exikarhi ka Ndhambi ni ku lovisiwa ka mafambiselo ya namuntlha ya swilo?
19 Nkarhi wa Nowa ni wa hina a yi yelani hikwalaho ka vuhomboloki bya vanhu ni ku lovisiwa ka vona ntsena. Tanihi leswi va veke kona lava poneke Ndhambi, kutani va ta va kona lava nga ta pona makumu ya mafambiselo ya swilo ya namuntlha. Lava poneke Ndhambi a va ri vanhu lava titsongahataka, lava a va nga hanyi ku fana ni vanhu lavan’wana hi ku angarhela. Va yingise xilemukiso xa Xikwembu kutani va tihambanisa ni misava yo homboloka ya nkarhi wolowo. “Nowa [u kume] tintswalo ematihlweni ya Yehovha,” ku vula Bibele. “[Nowa] u tikombise a pfumala xihoxo exikarhi ka lava a a hanya swin’we na vona.” (Genesa 6:8, 9) Eka vanhu hinkwavo, i ndyangu wun’we ntsena, “vanhu va nga ri vangani, ku nga mimoya-xiviri ya nhungu, [lava ponisiweke] ematini.” (1 Petro 3:20) Kutani Yehovha Xikwembu u va lerisile a ku: “Tswalanani mi andza mi tata misava.”—Genesa 9:1.
20 Rito ra Xikwembu ra hi tiyisekisa leswaku “ntshungu lowukulu” wu ta “[huma] enhlomulweni lowukulu.” (Nhlavutelo 7:9, 14) Xana ntshungu lowukulu wu ta vumbiwa hi vanhu vangani? Yesu hi byakwe u te: “Nyangwa leyi yisaka evuton’wini yi khumile, ni gondzo ra kona ri larile, naswona a hi vangani lava ri kumaka.” (Matewu 7:13, 14) Loko va ringanisiwa ni tibiliyoni ta vanhu leti nga kona emisaveni sweswi, lava nga ta pona nhlomulo lowukulu lowu taka a hi vangani. Kambe va nga va ni lunghelo ro fana ni leri nyikiweke lava poneke Ndhambi. Lava poneke va ta nyikiwa nkarhi wo karhi wa ku va ni vana lava nga ta hanya na vona emisaveni leyintshwa.—Esaya 65:23.
“Tshamani Mi Rindzile”
21, 22. (a) Ku kambisisa rungula leri ra Ndhambi swi ku pfune njhani? (b) Yi ri yini ndzimana ya lembe ra 2004, naswona ha yini hi fanele hi yingisa xitsundzuxo xa yona?
21 Hambileswi Ndhambi yi hundzeke khale, i xilemukiso lexi hi nga fanelangiki hi xi honisa. (Varhoma 15:4) Ku yelana ka nkarhi wa Nowa ni wa hina swi fanele swi hi susumetela ku xalamukela nhlamuselo ya swiendlakalo swa namuntlha kutani hi tshama hi rindzele ku ta ka Yesu tanihi khamba a ta avanyisa lavo homboloka.
22 Namuntlha Yesu Kreste u kongomisa ntirho lowukulu wa ku aka hi tlhelo ra moya. Ku ni paradeyisi ya moya leyi fanaka ni ngalava, leyi sirhelelaka ni ku ponisa vagandzeri va ntiyiso. (2 Vakorinto 12:3, 4) Leswaku hi pona nhlomulo lowukulu, hi fanele hi tshama eparadeyisini yoleyo. Paradeyisi ya moya yi rhendzeriwe hi misava ya Sathana, leyi tshamaka yi lunghekele ku bvanganyeta mani na mani loyi a khudzehelaka emoyeni. ‘Ku tshama hi rindzile’ hi lunghekela siku ra Yehovha i mhaka ya nkoka.—Matewu 24:42, 44.
Wa Tsundzuka Xana?
• I xitsundzuxo xihi lexi Yesu a xi nyikeleke malunghana ni ku ta ka yena?
• Yesu u wu fanisa na yini nkarhi wa vukona byakwe?
• Minkarhi ya hina yi fana njhani ni masiku ya Nowa?
• Ku anakanyisisa hi ku yelana ka nkarhi wa Nowa ni wa hina swi fanele swi ku khumbisa ku yini ku hiteka ka hina?
[Marito lama tshahiweke exihlokweni lama nga eka tluka 18]
Ndzimana ya lembe ra 2004 yi ri: “Tshamani mi rindzile . . . Tshamani mi lunghekile.”—Matewu 24:42, 44.
[Xifaniso lexi nga eka tluka 15]
Nowa u yingise xilemukiso xa Xikwembu. Xana na hina ha xi yingisa?
[Swifaniso leswi nga eka tluka 16, 17]
“Hilaha masiku ya Nowa a ma ri hakona, ni masiku ya vukona bya N’wana wa munhu ma ta va tano”