Ndlela Leyi Vakreste Va Lembe-xidzana Ro Sungula A Va Hanya Ha Yona

“Muvatli”

“Xana loyi a hi n’wana wa muvatli?”—MATEWU 13:55.

YESU a nga tiviwi tanihi “n’wana wa muvatli” ntsena, kambe a a tiviwa tanihi “muvatli.” (Marka 6:3) Swi nga ha endleka leswaku ntirho lowu u wu dyondze eka tata wakwe wa muwundli, ku nga Yosefa.

Hi wahi mathulusi ni vuswikoti lebyi Yesu a a byi tirhisa loko a tirha tanihi muvatli? Hi yihi mintirho leyi a nga ha vaka a yi endlele vaaki va le Nazareta? Ntirho lowu a nga dyondzisiwa wona wo vatla wu n’wi pfune njhani evuton’wini byakwe?

Bindzu Ra Ndyangu Xifaniso lexi nga laha hansi xi kombisa tatana la nga eku dyondziseni ka n’wana wakwe wa mativula ndlela leyinene yo tirhisa muchini wo borha. N’wana la nga endzhaku kakwe na yena u langutile a tlhela a rhiya ndleve.

Minkarhi yo tala vana va vafana va sungula ku dyondza mintirho loko va ri ni malembe ya 12 ku ya eka 15. Minkarhi yo tala vatata wa vona hi vona lava va dyondzisaka mintirho yoleyo. A swi va tekela malembe ku dyondza ntirho wa kona naswona a va fanele va tikarhata loko va lava ku va vavatli lava nga ni vutshila. Ehleketa hi nkarhi wo tsakisa lowu Yosefa a nga ha vaka a wu hetile na Yesu, va tirha swin’we ni ku tibulela swin’we loko a ri karhi a n’wi dyondzisa ntirho. Anakanya ndlela leyi Yosefa a a tsake ha yona loko a vona Yesu a kota ku endla ntirho lowu a n’wi dyondziseke wona!

Vutivi, Matimba Ni Vuswikoti I Swa Nkoka Muvatli a a fanele a yi tiva kahle misinya leyi a nga ta yi tirhisa. A a fanele a hlawula leyi nga kona endhawini ya ka vona yo tanihi muphayini, oak, mukedari, nkuwa ni mutlhwari. Hambiswiritano, hi lembe-xidzana ro sungula a ku nga ri na ndhawu kumbe xitolo lexi muvatli a a ta ya eka xona leswaku a ya kuma timhandzi leti a ti lavaka. Kambe a a boheka ku ya enhoveni a ya lava misinya leyi faneleke, a yi tsema kutani a yi rhwala a famba na yona ekaya.

I yini leswi muvatli a a ta swi endla hi misinya yoleyo? Phela swi nga ha endleka leswaku a a heta tiawara to tala a ri karhi a pfuneta eku fuleleni ka tindlu. A a tsema timhandzi to fulela ha tona, to endla switepisi swo khandziya ha swona endlwini ya le henhla, minyangwa, mafasitere ni marimba.

A a ta tlhela a endla fanichara. Swikombiso leswi nga laha hansi swi kombisa swin’wana swa leswi a a swi endla, swo tanihi tikhabodo to hlayisa swilo leti nga ni tidirowara, maxelufu kumbe minyangwa (1); mabence (2), switulu (3) ni matafula (4) yo hambana-hambana; swin’we ni mibedo ya vana yo tlangela eka yona ninhlikanhi. Leswaku a sasekisa fanichara yin’wana, a a yi endla hi ndlela yo hambana ni leyi a a tolovele ku yi endla ha yona. Leswaku yi nga hatli yi onhaka nileswaku a yi sasekisa, a a yi tota mhula wa tinyoxi, vhanichi kumbe mafurha.

A a endlela ni varimi va laha a tshamaka kona switirho swo tanihi majoko (5), tiforoko, tihariki ni mafoxolo (6). Mapuluhu (7) lawa a ma endla a ma fanele ma va ma tiyile swinene tanihi leswi a ma ta rima ni le misaveni leyi nga ni maribye. A a endla ni makalichi, (8) a tlhela a ma endlela ni mavhilwa. Ntirho wakwe a wu katsa ni ku lunghisa fanichara, switirho ni makalichi lawa a ma endleke.

Hi mahlo ya mianakanyo, xana u nga swi kota ku vona ndlela leyi ntirho wo vatla lowu Yesu a a wu endla a wu n’wi siya a languteka ha yona? Ehleketa hi nhlonge yakwe yi hisiwe hi dyambu ra le Vuxa Xikarhi naswona mavoko yakwe ma gwanyile hikwalaho ko tlakula timhandzi ni ku tirhisa mabanga, tihamula ni tisaha.

A A Endla Swikombiso Hi Ntirho Lowu A A Wu Endla Yesu u tirhise swikombiso swo olova ni leswi tolovelekeke leswaku a dyondzisa vanhu ntiyiso. Xana ntirho wo vatla lowu a wu endleke loko a ha kula u wu tirhisile ku endla swikombiso? Xiya swikombiso swin’wana. U byele ntshungu a ku: “Kutani, ha yini u languta xilavi lexi nga etihlweni ra makwenu, kambe u nga lemuki ntsandza lowu nga etihlweni ra wena?” Muvatli u swi tiva kahle leswaku ntsandza wu fika kwihi. (Matewu 7:3) Endzhakunyana, u tlhele a byela ntlawa wun’wana a ku: “A ku na munhu la vekaka voko ra yena eka puluho kutani a languta swilo swa le ndzhaku loyi a fanelekaka kahle emfun’weni wa Xikwembu.” Swi nga ha endleka leswaku Yesu na yena u endle mapuluhu yo tala. (Luka 9:62) Xin’wana xa swirhambo swakwe leswinene ngopfu xi vulavula hi xitirho lexi nga endliwa hi muvatli. U te: “Tlhandlekani joko ra mina ehenhla ka n’wina mi tlhela mi dyondza eka mina. . . . Joko ra mina ra olova ni ndzhwalo wa mina wa vevuka.” (Matewu 11:29, 30) A swi kanakanisi leswaku Yesu a a swi tiva ku endla joko lerinene naswona a ri “olova” ri tlhela ri xi ringana kahle xifuwo.

Swi nga ha endleka leswaku loko valala va Yesu va n’wi vitana “n’wana wa muvatli,” a vo n’wi hlekula. Nilokoswiritano, hilaha a swi ri hakona hi lembe-xidzana ro sungula, Vakreste va namuntlha va swi teka ku ri lunghelo ku landzela khale ka muvatli loyi a a titsongahata.

[Bokisi/Swifaniso leswi nga eka tluka 26]

Bokisi Leri A Ri Tshama Ni Mathulusi Ya Muvatli

Muvatli wa lembe-xidzana ro sungula la fanaka na Yesu a a ta swi tiva kahle ku tirhisa mathulusi lama kombisiweke laha hansi. Saha (1) leyi a a tsema timhandzi ha yona a yi ri ni xikhomo xa pulanga. A a tirhela endhawini leyi nga ni matlhelo lama ringanaka (2) leswaku a dirowa nchumu lowu a nga ta wu vatla ni ku pima (3) loko ndhawu ya kona yi ri yinene. Nchumu wun’wana lowu a wu ri ebokisini rakwe ra mathulusi a ku ri (4) thepi (5), banga leri nga loteka, feyila (6) ni xihloka (7) lexi a a wisa misinya ha xona.

Muchini wo tsema mapulanga ni tinsimbi (8) ni muchini wo borha (9) a yi tirhisiwa ku tsema ni ku sasekisa. Eka xipfalo xa bokisi ra mathulusi ku ni hamele leyi nga ni xikhomo xa pulanga (10) leyi a yi tirhiseriwa ku belela tichizele ni swin’wana. Swin’wana leswi nga laha i saha yo khoma hi voko rin’we (11), mukwana (12) lowu a wu tirhiseriwa ku sasekisa swin’we ni swipikiri (13). Emahlweni ka bokisi rakwe ku ni hamele ya nsimbi (14) ni xihloka (15) lexi a xi tirhiseriwa ku vatla. Swin’wana leswi nga laha i mukwana (16) ni tichizele (17) leti nga ringaniki hi ku leha. Lexi nga etlhelo ka bokisi i (18) borho.