“Ndza N’wi Rhandza Tatana”

1, 2. I yini leswi muapostola Yohane a swi vuleke hi ta vusiku byo hetelela loko Yesu a ri ni vaapostola va yena?

MUKHALABYE un’wana u nghenise risiva ra yena endzeni ka inki a ri karhi a tsundzuka timhaka to tsakisa. Vito ra yena i Yohane naswona hi yena la hanyeke nkarhi wo leha eka vaapostola va Yesu Kreste. Loko se a ri ni malembe ya kwalomu ka dzana, u tsundzuke leswi endlekeke eka malembe ya 70 naswona ku ni vusiku byo karhi lebyi a nga byi rivalangiki—a ku ri vusiku byo hetelela loko yena ni vaapostola-kulobye va ri swin’we na Yesu a nga si fa. Moya lowo kwetsima wa Xikwembu wu kongomise Yohane leswaku a kota ku tsundzuka leswi endlekeke vusiku byebyo kutani a swi tsala hinkwaswo a nga siyi nchumu.

² Evusikwini byebyo, Yesu u vule hi ku kongoma leswaku u ta dlayiwa ku nga ri khale. I Yohane ntsena la vuleke xivangelo xa ku va Yesu a vule leswaku u ta pfumela ku dlayiwa hi ndlela yoleyo ya tihanyi, u te: “Leswaku misava yi swi tiva leswaku ndza n’wi rhandza Tatana, ndzi endla hilaha Tatana a ndzi leriseke ku endla hakona. Tlakukani, a hi sukeni laha.”—Yohane 14:31.

 3. Xana Yesu u swi kombise njhani leswaku wa n’wi rhandza Tata wakwe?

³ “Ndza n’wi rhandza Tatana.” Yesu a a rhandza Tatana ku tlula swilo hinkwaswo. Leswi a swi vuli leswaku marito lawa a ma ri risimu ra chela eka yena. Entiyisweni, eBibeleni, hi le ka Yohane 14:31 ntsena laha Yesu a vulaka hi ku kongoma leswaku wa n’wi rhandza Tata wakwe. Hambiswiritano, rirhandzu rero Yesu u ri kombise hi swiendlo. Rirhandzu leri a rhandzaka Yehovha ha rona a ri vonaka siku ni siku. Xivindzi xa Yesu, ku yingisa ka yena ni ku tiyisela ka yena swi swi veke erivaleni leswaku wa xi rhandza Xikwembu. Hinkwaswo leswi a swi endleke u swi endle hikwalaho ka rirhandzu rero.

4, 5. Hi rihi rirhandzu leri Bibele yi ri khutazaka naswona ku nga vuriwa yini hi rirhandzu leri Yesu a rhandzaka Yehovha ha rona?

⁴ Namuntlha van’wana va nga n’wi langutela ehansi munhu la nga ni rirhandzu. Va nga ha anakanya hi swiphato swa rirhandzu ni tinsimu leti vulavulaka hi rirhandzu, kumbexana ni hi switori swa rirhandzu leri nga kona exikarhi ka wanuna ni wansati. Bibele ya vulavula hi timhaka leti khumbaka rirhandzu exikarhi ka wanuna ni wansati kambe yi vulavula hi tona hi ndlela leyi xiximekaka ngopfu ku tlula leswi vanhu va endlisaka xiswona namuntlha. (Swivuriso 5:15-21) Hambiswiritano, Rito ra Xikwembu ri vulavula ngopfu hi muxaka wun’wana wa rirhandzu. Rirhandzu leri a hi ku navela ntsena kumbe ku titwa hi ndlela yo karhi swa xinkarhana; naswona a hi ndlela yo karhi leyi tolovelekeke yo hanyisana ni vanhu. Ri khumba mbilu ni mianakanyo. Rirhandzu leri ri huma embilwini, ri lawuriwa hi misinya ya milawu leyi tlakukeke naswona ri kombisiwa hi swiendlo leswinene. Swi le rivaleni leswaku a hi xitori xa rirhandzu. Rito ra Xikwembu ri ri: “Rirhandzu a ri heli.”—1 Vakorinto 13:8.

⁵ Eka vanhu hinkwavo lava tshameke va hanya, a nga kona la rhandzeke Yehovha ku fana na Yesu. A nga kona loyi a hanyeke hi ku pfumelelana ni marito lawa Yesu hi byakwe a nga ma tshaha, a vula leswaku hi wona nawu lowukulu eka milawu ya Xikwembu, lama nge: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo ni hi ntamu wa wena hinkwawo.” (Marka 12:30) Xana Yesu u swi kotise ku yini ku va ni rirhandzu ro tano? Xana u swi endlise ku yini leswaku a aka vuxaka lebyikulu swonghasi ni Xikwembu loko a ha ri laha misaveni? Kutani hi nga n’wi tekelela njhani?

6, 7. Hi swi tivisa ku yini leswaku Swivuriso 8:22-31 a yi vulavuli hi vutlhari bya xiviri kambe yi vulavula hi N’wana wa Xikwembu?

⁶ Xana u tshama u endla ntirho wo karhi ni munghana wa wena, kutani u kuma leswaku vuxaka bya n’wina byi ya byi tiya hikwalaho ko tirha swin’we? Vuxaka byo tano byi nga hi pfuna ku twisisa rirhandzu leri nga kona exikarhi ka Yehovha ni N’wana wa yena la nga swakwe. Se hi vulavule ko hlayanyana hi buku ya Swivuriso 8:30, kambe a hi wu kambisiseni kahle mongo wa ndzimana leyi. Ku sukela eka ndzimana 22 ku ya fika eka 31, vutlhari byi hlamuseriwa onge hiloko byi ri munhu. Hi swi tivisa ku yini leswaku marito lawa ma tirha eka N’wana wa Xikwembu?

⁷ Eka ndzimana 22, vutlhari byi ri: “Yehovha u ndzi humesile ndzi ri masungulo ya ndlela yakwe, masungulo ya mintirho yakwe ya khale swinene.” Marito lawa a ma nge tirhi eka vutlhari hi ku kongoma hikuva a byi si tshama byi ‘humesiwa.’ A byi na masungulo hikuva Yehovha a nga na masungulo naswona u tshama a ri la tlhariheke. (Pisalema 90:2) Hambiswiritano, N’wana wa Xikwembu u ve “mativula ya ntumbuluko hinkwawo.” U vumbiwile; hi yena wo sungula eka swivumbiwa swa Yehovha. (Vakolosa 1:15) N’wana u ve kona matilo ni misava swi nga si va kona, hilaha buku ya Swivuriso yi vulaka hakona. Nakambe, leswi a nga Rito, leswi vulaka Muvulavuleri wa Xikwembu, u ve xikombiso lexi heleleke xa vutlhari bya Yehovha.—Yohane 1:1.

 8. Xana N’wana a a endla yini loko a nga si va munhu wa nyama, naswona i mani loyi hi faneleke hi n’wi dzunisa loko hi vona vuxongi bya ntumbuluko?

⁸ Xana N’wana a a endla yini nkarhi wolowo hinkwawo loko a nga si ta laha misaveni? Ndzimana 30 yi hi byela leswaku a a ri etlhelo ka Xikwembu a ri “mutirhi la nga ni vuswikoti.” Xana sweswo swi vula yini? Vakolosa 1:16 yi ri: “Hikuva ha yena swilo hinkwaswo swi tumbuluxiwile ematilweni ni le henhla ka misava . . . Swilo leswin’wana hinkwaswo swi tumbuluxiwe ha yena naswona swi tumbuluxeriwe yena.” Leswi vulaka leswaku Yehovha, Muvumbi, u tirhise N’wana wa yena, la nga Mutirhi la nga ni Vuswikoti, leswaku a tumbuluxa swilo leswin’wana hinkwaswo—ku sukela eka swivumbiwa swa moya etilweni ku ya eka vuako hinkwabyo lebyikulu ngopfu ni misava swin’we ni swimilana swa yona swo hambana-hambana leswo xonga ku katsa ni swiharhi swin’we ni xivumbiwa xa nkoka eka hinkwaswo emisaveni: ku nga munhu. Ntirhisano lowu N’wana a nga na wona ni Tata wakwe hi nga wu fanisa ni mumpfampfarhuti wa swiyimo swa miako la tirhaka ni muaki, loyi a akaka muako hi ndlela leyi mumpfampfarhuti a wu mpfampfarhuteke ha yona. Xin’wana ni xin’wana lexi hi tsakisaka eka ntumbuluko xi yisa ku dzuneka eka Mumpfampfarhuti Lonkulu. (Pisalema 19:1) Hambiswiritano, hi fanele hi tsundzuka ntirhisano ni ntsako lowu Muvumbi a veke na wona nkarhi wolowo hinkwawo ni ‘mutirhi loyi la nga ni vuswikoti.’

9, 10. (a) I yini lexi tiyiseke vuxaka lebyi a byi ri kona exikarhi ka Yehovha ni N’wana wakwe? (b) I yini lexi nga tiyisaka vuxaka bya wena ni Tata wa wena la nge matilweni?

⁹ Loko vanhu vambirhi lava nga hetisekangiki va ri karhi va tirha swin’we, va pfa va tlulana milenge. Kambe a swi tano hi Yehovha ni N’wana wa yena! N’wana u hete malembe ya ntsandza-vahlayi a ri karhi a tirha ni Tata wakwe naswona a a ‘tsakile emahlweni ka yena nkarhi hinkwawo.’ (Swivuriso 8:30) Ina, a a tsakela ku tirha ni Tata wakwe naswona a va ri vanghana. Swi le rivaleni leswaku N’wana u fane ni Tata wakwe naswona u ti tekelele hinkwato timfanelo ta Xikwembu. Hi swona leswi endleke leswaku va va vanghana lavakulu ngopfu! Swi fanerile ku vula leswaku vunghana bya vona i bya khale swinene naswona a byi kona lebyi fanaka na byona evuakweni hinkwabyo.

¹⁰ Kambe, xana sweswo swi hi dyondzisa yini? U nga ha vona onge u nge swi koti ku va ni vuxaka byo tano na Yehovha. I ntiyiso leswaku a nga kona la nga vaka ni xikhundlha lexi tlakukeke ku fana ni xa N’wana. Hambiswiritano, hi ni lunghelo lerikulu ngopfu. Tsundzuka leswaku Yesu u ve munghana wa Tata wakwe hikwalaho ko tirha na yena. Yehovha wa hi rhandza kutani u hi nyika lunghelo ro va “vatirhi-kulobye” na yena. (1 Vakorinto 3:9) Loko hi ri karhi hi tekelela xikombiso xa Yesu entirhweni wo chumayela, hi fanele ku tshama hi ri karhi hi tsundzuka leswaku hi vatirhi-kulobye ni Xikwembu. Xisweswo, xiboho xa rirhandzu lexi hi nga na xona na Yehovha xi ya xi tiya. Hakunene a ri kona lunghelo leri nga pimanisiwaka ni rero!

11-13. (a) Ha yini swi pfuna ku teka rirhandzu ri ri ra xiviri naswona loko Yesu a ha ri xifanyetana u endle njhani leswaku rirhandzu ra yena eka Yehovha ri tshama ri tiyile? (b) Xana N’wana wa Xikwembu u swi kombise njhani leswaku u tiyimisele ku dyondza eka Yehovha loko a nga si ta laha misaveni niloko se a ri munhu wa nyama?

¹¹ Rirhandzu leri hi nga na rona etimbilwini ta hina hi fanele hi ri teka ri ri ra xiviri hi tindlela to tala. Leswaku rirhandzu ri kula, ri fanele ku hlakuleriwa ni ku khathaleriwa ku fana ni ximilana xa swiluva swo saseka entangeni wa wena lexi lavaka ku cheletiwa ni ku hlakuleriwa. Loko ro honisiwa, ra tsana ivi ri fa. Yesu a nga si tshama a ri tekela ehansi rirhandzu leri a rhandzaka Yehovha ha rona. U endle leswaku ri tshama ri tiyile loko a ha ri laha misaveni. A hi voneni leswaku u swi endlise ku yini.

¹² Tlhela u anakanya hi mhaka ya Yesu loyi a a ha ri jaha loko a vulavula hi vuxaka bya yena na Yehovha a ri etempeleni eYerusalema. Wa ha tsundzuka leswaku u byele vatswari va yena lava a va karhatekile a ku: “Ha yini mi boheke ku famba mi ndzi lava? Xana a mi nga swi tivi leswaku ndzi fanele ku va endlwini ya Tatana?” (Luka 2:49) Loko Yesu a ha ri xifanyetana, swi le rivaleni leswaku a a nga si byi tsundzuka vutomi bya yena bya le tilweni. Kambe rirhandzu ra yena eka Tata wakwe Yehovha, a ri ri rikulu. A a swi tiva leswaku rirhandzu ro tano ri vonaka evugandzerini. Kutani a ku nga ri na xivandla lexi Yesu a a xi rhandza laha misaveni ku fana ni yindlu ya Tata wakwe ya vugandzeri lebyi tengeke. A a navela ku va kwale naswona a a nga swi lavi ku famba. Tlhandlakambirhi, a a nga heleketanga lava yeke kwale. Na yena hi yexe a a tiyimisele ku nghenisa vutivi bya Yehovha ni ku vula leswi a swi tivaka. A nga sungulanga ku titwa hi ndlela yoleyo loko a ri ni malembe ya 12 hi vukhale ivi swi helela kwalaho.

¹³ Loko N’wana a nga si va munhu wa nyama, u tiyimisele ku dyondza eka Tata wa yena. Vuprofeta lebyi tsariweke eka Esaya 50:4-6 byi kombisa leswaku Yehovha u dyondzise N’wana wa yena dyondzo yo hlawuleka leyi khumbaka ntirho wa yena tanihi Mesiya. Hambileswi dyondzo yoleyo a yi katsa ni ku dyondza hi man’wana ya maxangu lawa a a ta langutana na wona tanihi Mutotiwa wa Yehovha, N’wana a nga yi bakanyelanga etlhelo. Hi ku famba ka nkarhi loko Yesu se a kurile laha misaveni, rirhandzu leri a a ri na rona hi yindlu ya Tata wakwe a ri nga si cinca naswona a a tiyimisele ku ya gandzela kona ni ku dyondzisa leswi Yehovha a a lava leswaku swi dyondzisiwa kwalaho. Kutani Bibele yi hi byela leswaku Yesu a a nga xwi etempeleni ni le sinagogeni. (Luka 4:16; 19:47) Loko hi lava leswaku rirhandzu ra hina eka Yehovha ri tshama ri tiyile, hi fanele hi hisekela ku va kona eminhlanganweni ya Vukreste, laha hi dyondzisiwaka ku gandzela Yehovha ni ku dzikisa vutivi bya hina ni ndlela leyi hi n’wi tlangelaka ha yona.

14, 15. (a) Ha yini Yesu a a lava ku va yexe? (b) Xana swikhongelo swa Yesu loko a khongela Tata wakwe swi byi kombise njhani vunghana ni xichavo xa yena?

¹⁴ Nakambe Yesu u endle leswaku rirhandzu ra yena eka Yehovha ri tshama ri tiyile hi ku tshama a ri karhi a khongela. Hambileswi a a rhandza vanhu, swa tsakisa ku xiya leswaku a a pfa a lava ku va yexe. Hi xikombiso, Luka 5:16 yi ri: “A hambeta a tshama a ri yexe emakwandzasini, a khongela.” Nakambe Matewu 14:23 yi ri: “Eku heteleleni, loko a tlherise mintshungu, a tlhandlukela entshaveni a ri yexe a ya khongela. Hambileswi nkarhi a wu fambile, a a ri swakwe endhawini yoleyo.” Yesu u lave ku va yexe loko a khongela ni hi minkarhi yin’wana, ku nga ri leswaku a a nga swi rhandzi ku tshama ni vanhu kambe hikwalaho ka leswi a a lava ku va swin’we na Yehovha, a vulavula a ntshunxekile ni Tata wakwe hi xikhongelo.

¹⁵ Minkarhi yin’wana loko Yesu a khongela, a a tirhisa rito leri nge “Abba, Tatana.” (Marka 14:36) Enkarhini wa Yesu, loko vana va ku “Abba” a va kombisa vunghana lebyikulu lebyi va nga na byona na “tatana.” Rito leri a ri ri rin’wana ra marito yo sungula lama dyondziwaka hi xihlangi. Hambiswiritano, a ri xiximeka. Hambileswi a ri kombisa vunghana lebyi N’wana a nga na byona ni Tata wakwe la rhandzekaka, kambe a ri tlhela ri kombisa xichavo lexikulu eka vulawuri bya Yehovha. Vunghana byolebyo ni xichavo swi vonaka eka swikhongelo hinkwaswo swa Yesu. Hi xikombiso, eka Yohane ndzima 17, muapostola Yohane u tsale xikhongelo xo leha xa Yesu lexi humaka embilwini loko a khongela evusikwini byakwe byo hetelela. Hakunene hi ta khutazeka loko ho dyondza xikhongelo xexo naswona i swa nkoka leswaku hi xi tekelela—ku nga ri hi ku phindha marito ya Yesu, kambe hi ku kuma tindlela to khongela Tata wa hina wa le matilweni swi huma embilwini, minkarhi yo tala hilaha hi nga kotaka hakona. Loko hi endla tano, hi ta tshama hi ri karhi hi n’wi rhandza naswona rirhandzu ra hina ri ta tiya.

16, 17. (a) Xana Yesu u swi hlamusele njhani leswaku wa n’wi rhandza Tata wakwe? (b) Xana Yesu u ku kombise njhani ku hanana ka Tata wakwe?

¹⁶ Hilaha hi swi voneke hakona eku sunguleni, Yesu a nga phindha-phindhanga marito lama nge “Ndza n’wi rhandza Tatana.” Hambiswiritano, u vule ko tala leswaku wa n’wi rhandza Tata wakwe. Njhani? Yesu hi byakwe u te: “Tatana, ndza ku dzunisa erivaleni, Hosi ya tilo ni misava.” (Matewu 11:25) Loko hi dyondza Xiyenge 2 xa buku leyi, hi swi vonile leswaku Yesu wa swi rhandza ku dzunisa Tata wakwe hi ku pfuna vanhu leswaku va N’wi tiva. Hi xikombiso, u fanise Yehovha ni tatana la tiyimiseleke ku rivalela n’wana wa yena la xandzukeke lerova u yimele ku vuya ka n’wana wa yena la hundzukeke kutani loko a n’wi vona a ha ri ekulenyana, a tsutsuma a n’wi hlanganisa kutani a n’wi tswontswa hi rirhandzu. (Luka 15:20) Hakunene, mani na mani la hlayaka rungula leri u khumbiwa hi ndlela leyi Yesu a ri kombisaka ha yona rirhandzu ra Yehovha ni ku rivalela ka yena!

¹⁷ Yesu u dzunise Tata wakwe ko tala hi ndlela leyi a hananaka ha yona. U tirhise xikombiso xa vatswari lava nga hetisekangiki lava kombisaka leswaku hakunene Tata wa hina u ta hi nyika moya lowo kwetsima lowu hi wu pfumalaka. (Luka 11:13) Yesu u tlhele a vulavula hi ntshembo lowu Tatana a wu tshembisaka mani na mani. Yesu u hlamusele ntshembo lowu a wu languteleke wo vuyela exikhundleni xa yena xo va ekusuhi ni Tata wakwe etilweni. (Yohane 14:28; 17:5) U byele valandzeri va yena hi ta ntshembo lowu Yehovha a wu tshembisaka “ntlhambinyana” wa Kreste—ku nga ku hanya etilweni ni ku fuma na yena tanihi Hosi ya mfumo wa Mesiya. (Luka 12:32; Yohane 14:2) Nakambe u chavelele mudyohi loyi a a ri eku feni hi ku n’wi tshembisa leswaku u ta hanya eParadeyisini. (Luka 23:43) A swi kanakanisi leswaku ku vulavula ka Yesu hi ku hanana lokukulu ka Tata wa yena hi tindlela leti a n’wi bumeke ha tona, swi n’wi pfune leswaku rirhandzu leri a rhandzaka Yehovha ha rona ri tshama ri tiyile. Valandzeri vo tala va Kreste va kume leswaku nchumu lowukulu lowu tiyisaka rirhandzu kumbe ripfumelo ra vona eka Yehovha i ku tshama va ri karhi va vulavula hi yena ni hi ntshembo lowu a wu tshembisaka lava n’wi rhandzaka.

18. Hi yihi ndlela ya nkoka swinene leyi hi faneleke hi landzela Yesu ha yona naswona ha yini?

¹⁸ Eka tindlela hinkwato leti hi faneleke hi landzela Yesu ha tona, a yi kona ya nkoka ku fana ni leyi: Hi fanele hi rhandza Yehovha hi timbilu ta hina hinkwato ni hi moya-xiviri wa hina hinkwawo ni hi mianakanyo ya hina hinkwayo ni hi ntamu wa hina hinkwawo. (Luka 10:27) Rirhandzu ro tano a hi nge ri kombisi hi ku ya hi ndlela leyi hi titwaka ha yona kambe hi ta ri kombisa ni hi swiendlo. Yesu a nga enerisiwanga ntsena hi ku titwa a rhandza Tata wa yena kumbe hi ku vula ntsena leswaku “Ndza n’wi rhandza Tatana.” U te: “Ku endlela leswaku misava yi swi tiva leswaku ndza n’wi rhandza Tatana, ndzi endla hilaha Tatana a ndzi leriseke ku endla hakona.” (Yohane 14:31) Sathana u vule leswaku vanhu hinkwavo va ta tirhela Yehovha hi ku va va langutele leswaku a va endlela swo karhi. (Yobo 2:4, 5) Leswaku Yesu a swi veka erivaleni leswaku swihehlo hinkwaswo swa Sathana i mavunwa ya rihlaza, u teke goza leri tiyeke a kombisa misava hinkwayo leswaku u rhandza Tata wakwe hi mbilu hinkwayo. U n’wi yingise kukondza a nyikela hi vutomi bya yena. Xana na wena u ta n’wi landzela Yesu? Xana u ta yi komba misava leswaku u rhandza Yehovha Xikwembu hi mbilu ya wena hinkwayo?

19, 20. (a) Hi swihi swivangelo swa nkoka leswi endlaka leswaku hi lava ku tshama hi ri kona eminhlanganweni ya Vukreste? (b) Hi rihi langutelo leri hi faneleke hi va na rona hi dyondzo ya hina vini, hi ku anakanyisisa ni hi xikhongelo?

¹⁹ Rirhandzu ro tano hi rona ra nkoka leswaku hi ta enerisa vumoya bya hina. Xisweswo, Yehovha u lunghiselele leswaku hi n’wi gandzela hi ndlela leyi nga ta endla leswaku rirhandzu leri hi n’wi rhandzaka ha rona ri nga cinci nileswaku rirhandzu ra hina ri ya ri tiya. Loko u ya eminhlanganweni ya Vukreste, ringeta ku tsundzuka leswaku u ye hi xikongomelo xo ya gandzela Xikwembu. Swin’wana leswi vugandzeri byebyo byi katsaka swona i ku hlanganyela exikhongelweni lexi humaka embilwini, ku yimbelela tinsimu to dzunisa, ku rhiya ndleve ni ku hlanganyela hi ku hlamula loko swi laveka. Minhlangano yo tano yi tlhela yi ku nyika nkarhi wo khutaza Vakreste-kuloni. (Vaheveru 10:24, 25) Ku hambeta u gandzela Yehovha eminhlanganweni ya Vukreste swi ta ku pfuna leswaku rirhandzu leri u rhandzaka Xikwembu ha rona ri ya ri kula.

²⁰ Swi tano ni loko u endla dyondzo ya wena n’wini, loko u anakanyisisa niloko u khongela. Tindlela toleto ti teke ti ri nkarhi wa wena na Yehovha ntsena. Loko u ri karhi u dyondza ni ku anakanyisisa hi Rito ra Xikwembu leri tsariweke, Yehovha u ku byela mianakanyo ya yena. Loko u khongela, u n’wi phofulela leswi nga embilwini ya wena. Tsundzuka leswaku a wu khongeli Yehovha loko u kombela swo karhi ntsena eka yena. U fanele u n’wi khongela leswaku u nkhensa mikateko leyi a ku katekisaka ha yona ni ku n’wi dzunisa hikwalaho ka mintirho ya yena yo hlamarisa. (Pisalema 146:1) Nakambe, ku dzunisa Yehovha erivaleni u tsakile naswona u tiyimiserile, i ndlela leyinene yo nkhensa Yehovha ni ku n’wi kombisa leswaku wa n’wi rhandza.

21. Xana ku rhandza Yehovha i swa nkoka ku fikela kwihi, naswona i yini leswi hi nga ta bula ha swona eka tindzima leti landzelaka?

²¹ Ntsako wa wena wa hilaha ku nga heriki wu titshege hi ku rhandza Xikwembu. Hi swona leswi Adamu na Evha a va fanele va swi endlile leswaku va hanya hilaha ku nga heriki—kambe a va xi rhandzanga. Rirhandzu i nchumu wa nkoka ngopfu lowu nga ta ku pfuna leswaku u hlula loko ripfumelo ra wena ri ringiwa ni ku hlula swilo swin’wana leswi ku ringaka naswona u tiyisela miringo. Hi rona ri nga ta ku susumeta ku va mulandzeri wa Yesu. Entiyisweni a hi nge xi rhandzi Xikwembu kambe hi venga vamakwerhu. (1 Yohane 4:20) Loko hi ri karhi hi ya emahlweni ni tindzima leti landzelaka, hi ta kambisisa ndlela leyi Yesu a kombiseke ha yona leswaku wa va rhandza vanhu. Eka ndzima leyi landzelaka, hi ta kambisisa lexi endleke leswaku vanhu vo tala swi va olovela ku vulavurisana na Yesu.