Swivutiso Swa Vahlayi

Xana ku nga hetiseki ka wanhwana Mariya ku n’wi khumbile Yesu loko a ha ri ekhwirini ra mana wakwe?

Malunghana ni “ku velekiwa ka Yesu,” rungula leri huhuteriweke ri ri: “Hi nkarhi lowu mana wakwe Mariya a a tshembisane ku tekana na Yosefa, u kumeke a ri ni khwiri leri vangiweke hi moya lowo kwetsima va nga si hlangana.” (Matewu 1:18) Hakunene, moya wo kwetsima wa Xikwembu wu tirhile swinene eku tikeni ka Mariya.

Kambe ku humelele yini hi Mariya? Xana tandza ra yena ri pfunetile eku tikeni ka yena? Hikwalaho ka switshembiso swa Xikwembu eka Abrahama, Isaka, Yakobe, Yuda na Hosi Davhida—lava nga vakokwa wa Mariya—n’wana loyi a ta velekiwa a a ta va ntukulu wa vona wa xiviri. (Genesa 22:18; 26:24; 28:10-14; 49:10; 2 Samuwele 7:16) A swi ta endlekisa ku yini leswaku n’wana loyi a velekiweke hi Mariya a va mudyandzhaka la faneleke wa switshembiso sweswo swa Xikwembu? A a fanele a va n’wana wa yena wa xiviri.—Luka 3:23-34.

Ntsumi ya Yehovha yi humelele eka wanhwana Mariya, yi ku: “U nga chavi, Mariya, hikuva Xikwembu xi ku tsakerile; kutani waswivo, u ta tika embelekweni wa wena, u ta veleka n’wana wa jaha, vito ra yena u ta n’wi thya Yesu.” (Luka 1:30, 31) Wansati u tika loko tandza ri nonisiwile. Swi le rivaleni leswaku Yehovha Xikwembu u endle leswaku tandza ra le mbelekweni wa Mariya ri nona, a endla sweswo hi ku hundzisela vutomi bya N’wana wa yena la tswariweke a ri swakwe byi suka exivandleni xa moya byi ta emisaveni.—Vagalatiya 4:4.

Xana n’wana la tikiweke hi ndlela leyi hi wansati la nga hetisekangiki a nga va la hetisekeke naswona a pfumala xidyoho emirini wa yena? Xana milawu yo tekelela yi tirha njhani, loko ku hetiseka ku hlangana ni ku nga hetiseki? Tsundzuka leswaku ku tirhisiwe moya lowo kwetsima ku hundzisela vutomi lebyi hetisekeke bya N’wana wa Xikwembu kutani a tikiwa. Sweswo swi dlaye ku nga hetiseki kwihi ni kwihi loku a ku ri kona etandzeni ra Mariya, leswi endleke leswaku n’wana a va ni masungulo lama hetisekeke.

Ntsena mhaka ya xiheri hileswaku matimba ya moya wo kwetsima wa Xikwembu ma hetisise xikongomelo xa Xikwembu. Ntsumi Gabriyele yi byele Mariya yi ku: “Moya lowo kwetsima wu ta ta ehenhla ka wena, naswona matimba ya La nge Henhla-henhla ma ta ku funengeta. Hikwalaho ka sweswo lexi nga ta velekiwa na xona xi ta vuriwa lexo kwetsima, N’wana wa Xikwembu.” (Luka 1:35) Ina, moya wo kwetsima wa Xikwembu wu ake rirhangu hi ndlela yo fanekisela leswaku xiyimo xa ku nga hetiseki kumbe vuyelo byo biha byi nga tluleli n’wana la nga si velekiwaka.

Swi le rivaleni leswaku Yesu u hiwe vutomi bya yena byo hetiseka hi Tata wa yena wa le tilweni, ku nga ri munhu wa laha misaveni. Yehovha u “lunghiselele miri” wa yena, naswona Yesu—ku sukela eku tikiweni ka yena ku ya emahlweni—hakunene “a nga nyamanga, u hambanile ni vadyohi.”—Vaheveru 7:26; 10:5.

[Xifaniso lexi nga eka tluka 19]

“U ta tika embelekweni wa wena, u ta veleka n’wana wa jaha”