Yesu—Ndlela Leyi A A Hanya Ha Yona

LESWI endleke leswaku Yesu a vula marito lama nga laha henhla swi hi komba leswi a a hanyela swona. Yesu ni vadyondzisiwa vakwe va hete mixo hinkwawo va ri eku fambeni etintshaveni ta Samariya. (Yohane 4:6) Leswi vadyondzisiwa a va ehleketa leswaku a nga va a twa ndlala, va n’wi nyike swakudya. (Yohane 4:31-33) Loko a va angula, u va katsakanyele xikongomelo xakwe hi vutomi. Eka yena, ku endla ntirho wa Xikwembu a ku ri nchumu wa nkoka ku tlula ku dya. Marito ni swiendlo swa Yesu a swi kombisa leswaku a a hanyela ku endla ku rhandza ka Xikwembu. Xana leswi a swi katsa yini?

Loko Bibele yi hlamusela ntirho wa Yesu yi ri: “A rhendzeleka ni tiko hinkwaro ra Galeliya, a dyondzisa . . . ni ku chumayela mahungu lamanene ya mfumo.” (Matewu 4:23) Yesu a a nga chumayeli ntsena hi Mfumo wa Xikwembu. U tlhele a dyondzisa vanhu hi ku va letela, a va hlamusela ni ku va khorwisa. Mfumo a ku ri nhloko-mhaka ya rungula rakwe.

Hi nkarhi wa vutirheli byakwe, Yesu u dyondzise vayingiseri vakwe leswi Mfumo wa Xikwembu wu nga swona ni leswi wu nga ta swi endla. Xiya timhaka leti landzelaka malunghana ni Mfumo swin’we ni Matsalwa lama kombisiweke lawa eka wona Yesu a hi byelaka hileswi Mfumo wu nga ta swi endla.

• Mfumo wa Xikwembu i hulumendhe ya le tilweni, naswona Yehovha u veke Yesu leswaku a va Hosi ya wona.—MATEWU 4:17; YOHANE 18:36.

• Mfumo wu ta kwetsimisa vito ra Xikwembu naswona wu ta endla leswaku ku rhandza ka xona ku endleka emisaveni hilaha ku endlekaka hakona etilweni.—MATEWU 6:9, 10.

• Ehansi ka Mfumo wa Xikwembu, misava hinkwayo yi ta hundzuriwa paradeyisi.—LUKA 23:42, 43.

• Ku nga ri khale Mfumo wa Xikwembu wu ta fika kutani wu endla leswaku ku rhandza ka Xikwembu ku endleka emisaveni.a—MATEWU 24:3, 7-12.

Yesu a a tiveka tanihi “Mudyondzisi.” (Yohane 13:13) Hambiswiritano, hi nkarhi wa vutirheli byakwe lebyi tekeke malembe manharhu ni hafu, u tlhele a endla mintirho yo hlamarisa. Mintirho leyi yi hetisise swikongomelo swimbirhi. Xo sungula, yi kombise leswaku hakunene a a rhumiwe hi Xikwembu. (Matewu 11:2-6) Xa vumbirhi, yi kombise leswi a nga ta swi endla loko a ri Hosi ya Mfumo wa Xikwembu enkarhini lowu taka. Xiya man’wana ya masingita lawa a ma endleke.

• U miyete lwandle leri kariheke ni swidzedze.—MARKA 4:39-41.

• U hanyise vanhu lava vabyaka, lava feke mahlo, lava feke tindleve ni lava lamaleke.—LUKA 7:21, 22.

• U andzise swakudya, xisweswo a phamela mintshungu leyi a yi twa ndlala.—MATEWU 14:17-21; 15:34-38.

• Eka swiendlakalo swinharhu, u pfuxe vanhu lava feke.—LUKA 7:11-15; 8:41-55; YOHANE 11:38-44.

Hi mahlo ya mianakanyo wa nga vona leswi misava yi nga ta va xiswona loko se ku fuma Hosi leyi nga ni matimba!

Loko swi ta emhakeni yo dyondzisa van’wana hi Yehovha, ku hava munhu la fanelekaka ku tlula N’wana wa Xikwembu, loyi a a tiviwa hi vito ra Yesu Kreste. Tanihi “mativula ya ntumbuluko hinkwawo,” Yesu u hanye etlhelo ka Yehovha etilweni ku tlula swivumbiwa hinkwaswo swa moya. (Vakolosa 1:15) Ehleketa hi minkarhi leyi eka yona a tekeleleke mianakanyo ya Tata wakwe, a dyondza ku rhandza kakwe, milawu yakwe ni tindlela takwe.

A swi fanerile ku va Yesu a vula a ku: “Leswaku N’wana i mani ku hava loyi a swi tivaka handle ka Tatana; ni leswaku Tatana i mani, ku hava loyi a swi tivaka handle ka N’wana, ni loyi N’wana a rhandzaka ku n’wi hlavutela eka yena.” (Luka 10:22) Loko Yesu a ri laha misaveni tanihi munhu wa nyama, hi ku tirhandzela u kombise leswi Tata wakwe a nga xiswona. Leswi Yesu a a vulavula ni ku dyondzisa ha swona a swi hlawulekile; a a dyondzisa leswi a swi dyondzeke exivandleni xa moya, laha Xikwembu lexi nga le Henhla-henhla xi tshamaka kona.—Yohane 8:28.

Leswi Yesu a swi endleke leswaku a kombisa vumunhu bya Tata wakwe swi nga fanisiwa ni leswi muchini wa gezi lowu nga ni matimba wu swi endlaka. Muchini lowu wa swi kota ku hunguta matimba ya gezi, ku endlela leswaku vanhu va kota ku ri tirhisa. Loko Yesu a ri laha misaveni u dyondzise vanhu leswi a swi dyondzeke etilweni malunghana ni Tata wakwe, lerova vanhu lava titsongahataka va swi kotile ku swi khoma ni ku swi tirhisa evuton’wini bya vona.

Xiya tindlela timbirhi leti Yesu a byi kombiseke ha tona vumunhu bya Tata wakwe.

• Loko Yesu a dyondzisa u endle leswaku vanhu va tiva ntiyiso hi Yehovha—vito rakwe, xikongomelo xakwe ni tindlela takwe.—YOHANE 3:16; 17:6, 26.

• Hi swiendlo swakwe, Yesu u kombise timfanelo to tala to saseka ta Yehovha. U byi kombise hi ku helela vumunhu bya Tata wakwe lerova a ku: ‘Loko u lava ku tiva vumunhu bya Tatana, languta mina.’—YOHANE 5:19; 14:9.

Hakunene ndlela leyi Yesu a hanyeke ha yona ya hlamarisa. Hi nga vuyeriwa swinene hi ku kambisisa xivangelo xo va a file kutani hi hanya hi ku pfumelelana ni leswi hi swi dyondzaka.