Mathwasana Ya Le Giliyadi Ma Kuma Vuleteri Lebyi Khumbaka Mbilu

HI SEPTEMBER 9, 2006, ku ve ni nkhuvo wa ku thwasa ka swichudeni swa ntlawa wa vu-121 swa Xikolo xa Bibele xa Giliyadi xa Watchtower eNtsindza wa Dyondzo wa Watchtower le Patterson, eNew York. A ku ri nongonoko lowu khutazaka swinene.

Geoffrey Jackson, xirho xa Huvo leyi Fumaka ya Timbhoni ta Yehovha, u pfule nongonoko hi ku amukela swichudeni swa 56 ni vayingiseri va 6 366 vo huma ematikweni yo hambana-hambana. U tlhuvutse Pisalema 86:11, leyi nge: “Oho Yehovha, ndzi letele hi ndlela ya wena. Ndzi ta famba entiyisweni wa wena. Endla mbilu ya mina yi va ni vun’we leswaku yi chava vito ra wena.” Makwerhu Jackson u boxe swilo swinharhu leswi kandziyisiweke endzimaneni yoleyo. U te: “Eka xivulwa xo sungula, i ndzetelo; eka xa vumbirhi i ku wu tirhisa; naswona eka xa vunharhu i nsusumeto. Swilo leswi swinharhu i swa nkoka ngopfu-ngopfu eka n’wina varhumiwa loko mi ya eswiavelweni swa n’wina.” Kutani u tivise ntlhandlamano wa tinkulumo ni mimbulavurisano leyi kandziyiseke swilo leswi swinharhu.

Marito Lama Khutazaka Yo Letela

William Malenfant, xirho xa le yindlu-nkulu, u tlhuvutse nhloko-mhaka leyi nge “Vutomi Lebyinene Ngopfu.” U vulavule hi xikombiso xa Mariya, makwavo wa Marta. Siku rin’wana loko Yesu a va endzerile ekaya ra vona, Mariya u hlawule ku tshama hi le milengeni ya Yesu leswaku a n’wi yingisela, a nga lavi ku kavanyetiwa hi nchumu. Yesu u byele Marta a ku: “Mariya, u hlawule xiavelo lexinene, naswona a nge tekeriwi xona.” (Luka 10:38-42) Xivulavuri xi te: “Anakanya hi mhaka leyi. Mariya u ta swi tsundzuka hi masiku leswaku u tshama a yingisela Yesu a tshame hi le milengeni yakwe va langutanile loko a n’wi hlamusela tidyondzo ta swilo swa moya—hikwalaho ka leswi a endleke xiboho lexinene.” Endzhaku ko bumabumela swichudeni hikwalaho ko endla swiboho leswinene swa moya, xivulavuri xi te: “Swiboho swa n’wina swi mi yise eka vutomi lebyinene ngopfu.”

Ku landzele Anthony Morris, xirho xa Huvo leyi Fumaka, loyi a ndlandlamuxeke nhloko-mhaka leyi nge, “Ambalani Hosi Yesu Kreste,” leyi sekeriweke eka Varhoma 13:14. Hi nga swi endla njhani sweswo? ‘Ku ambala Hosi Yesu Kreste’ swi vula ku tekelela mahanyelo ya Hosi. Kutani sweswo swi vula ku tekelela xikombiso xa Yesu ni vonelo ra yena. Xivulavuri xi te: “Yesu a a ngheneka hikuva a a khathala hi vanhu, naswona a va swi vona sweswo.” Nakambe xivulavuri xi kombise ndlela leyi swichudeni swi kumeke vutivi byo tala ha yona eka xikolo xa swona xa Giliyadi, leswaku swi “twisisa hi mianakanyo . . . ku anama ni ku leha ni ku tlakuka ni ku enta” ka ntiyiso, hilaha Vaefesa 3:18 yi vulaka hakona. Kambe xivulavuri xi tsundzuxe swichudeni hi ndzimana ya 19, leyi yaka emahlweni yi ku: “Ni ku tiva rirhandzu ra Kreste leri tlulaka vutivi.” Makwerhu Morris u khutaze swichudeni a ku: “Loko mi hambeta mi va ni dyondzo ya munhu hi yexe, ehleketani hi ndlela leyi mi nga tekelelaka ntwela-vusiwana wa rirhandzu wa Kreste ha yona kutani mi ‘ambala Hosi Yesu Kreste.’”

Switsundzuxo Swo Hetelela Swa Valeteri Va Le Giliyadi

Nkulumo leyi landzeleke yi nyikeriwe hi Wallace Liverance, muleteri wa le Giliyadi, loyi nhloko-mhaka yakwe a yi sekeriwe eka Swivuriso 4:7. U vule leswaku hambileswi vutlhari bya Xikwembu byi nga bya nkoka swinene, nakambe hi fanele hi “kuma ku twisisa,” leswi katsaka ku hlanganisa timhaka to karhi kutani u vona ndlela leyi ti twananaka ha yona leswaku u kuma mongo wa mhaka. Xivulavuri xi kombise leswaku ku twisisa mhaka swi tisa ntsako. Hi xikombiso, enkarhini wa Nehemiya, Valevhi “a va hlamusela nawu” ni ku “endla leswaku [wu] twisisiwa.” Endzhaku ka sweswo, vanhu va hambete va “tsaka ngopfu, hikuva va twisise marito lawa va byeriweke wona.” (Nehemiya 8:7, 8, 12) Makwerhu Liverance u gimete hi ku: “Ntsako wu tisiwa hi ku twisisa Rito ra Xikwembu leri huhuteriweke hi moya.”

“Kahle-kahle I Mani Nala Wa Wena?” a ku ri nhloko-mhaka leyi nyikeriweke hi Mark Noumair, muleteri un’wana wa le Giliyadi. Enyimpini, masocha yo hlayanyana ma dlayiwa hi swibamu swa masocha ya ka vona. U vutisile a ku: “Ku vuriwa yini hi nyimpi ya moya leyi hi nga eka yona? Loko hi nga vi na vukheta, hi ta pfilunganyeka hi tsandzeka ku vona leswaku kahle-kahle hi wihi nala kutani hi vavisa masocha ya hina.” Mavondzo ma nga pfilunganya van’wana. Ma endle leswaku Hosi Sawulo a ringeta ku dlaya Davhida, loyi a a ri mugandzeri-kulobye, kasi Vafilista a ku ri vona nala wa yena. (1 Samuwele 18:7-9; 23:27, 28) Kutani xivulavuri xi ye emahlweni xi ku: “Ku vuriwa yini loko mi tirha ni murhumiwa loyi a nga ni vuswikoti eka swilo swo tala? Xana mi ta vavisa socha-kuloni hi ku sola-sola, kumbe, xana mi ta pfumela hi mbilu yo basa leswaku van’wana va mi tlula eka swilo swo hambana-hambana? Ku dzika ngopfu eka swihoxo swa van’wana swi nga hi pfilunganya hi nga voni leswaku kahle-kahle nala i mani. Lwana ni loyi a nga nala hakunene, Sathana.”

Mintokoto Yo Tsakisa Ni Mimbulavurisano Leyi Dyondzisaka

Nkulumo leyi landzelaka leyi nge, “Endla Ntirho Wa Muevhangeli,” yi nyikeriwe hi muleteri wa le Giliyadi, Lawrence Bowen, naswona a yi ri ni mimbulavurisano ni mintokoto. U te: “Ntirho lowukulu wa murhumiwa loyi a leteriweke eGiliyadi i wa ku hangalasa mahungu lamanene, naswona ntlawa lowu wu endle tano kwihi ni kwihi laha wu kumeke vanhu.” Ku endliwe minkombiso ya mintokoto yin’wana leyi tsakisaka.

Tinkulumo timbirhi leti landzeleke ta nongonoko lowu ti nyikeriwe hi Michael Burnett na Scott Shoffner, lava havumbirhi ka vona va nga swirho swa ndyangu wa Bethele. Va vulavurisane ni swirho swa Tikomiti ta Marhavi leswi humaka eAustralia, Barbados, Korea ni le Uganda. Tinhlamuselo ta swirho leswi swa tikomiti ti paluxe matshalatshala lama endliwaka leswaku ku khathaleriwa swilaveko swa varhumiwa, ku katsa ni ku va lunghiselela ndhawu leyinene yo tshama eka yona ni ku khathalela rihanyo ra vona. Swirho swa tikomiti swi kandziyise leswaku varhumiwa lava humelelaka va tsakela ku fambisana ni swiyimo swa ndhawu leyi va tshamaka eka yona.

Mahetelelo Lama Tsakisaka Ni Lama Khutazaka

Nkulumo-nkulu ya nongonoko leyi a yi ku “Chavani Xikwembu Mi Xi Vangamisa,” yi nyikeriwe hi John E. Barr, loyi ku nga khale a ri xirho xa Huvo leyi Fumaka. U tlhuvutse Nhlavutelo 14:6, 7, leyi nge: “Kavaloko ndzi vona ntsumi yin’wana yi haha empfhukeni, yi ri ni mahungu lamanene lama nga heriki leswaku yi ma vula tanihi marungula lama tsakisaka eka lava tshamaka emisaveni, ni le ka matiko hinkwawo ni tinyimba hinkwato ni tindzimi hinkwato ni vanhu hinkwavo, yi vula hi rito lerikulu yi ku: ‘Chavani Xikwembu mi xi vangamisa, hikuva nkarhi wa ku avanyisiwa hi xona wu fikile.’”

Makwerhu Barr u khutaze swichudeni leswaku swi tsundzuka swilo swinharhu malunghana ni ntsumi yoleyo. Xo sungula, a yi fanele yi twarisa mahungu lamanene lama nga heriki ya leswaku sweswi Kreste wa fuma naswona u ni vulawuri hinkwabyo eMfun’weni. Xivulavuri xi te: “Ha tiyiseka hakunene leswaku u vekiwe exiluvelweni hi 1914. Kutani marungula lama tsakisaka ma fanele ma twarisiwa emisaveni hinkwayo.” Xa vumbirhi, ntsumi yi te: “Chavani Xikwembu.” Xivulavuri xi hlamusele leswaku mathwasana ma fanele ma pfuna swichudeni swa wona swa Bibele leswaku swi hlakulela moya wa ku chava Xikwembu leswaku swi nga endli nchumu lowu xi hlundzukisaka. Xa vunharhu, ntsumi yi lerisile: ‘Vangamisani Xikwembu.’ Swichudeni swi khutaziwile: “Mi nga rivali leswaku hi tirhela ku vangamisa Xikwembu ku nga ri hina vini.” Kutani loko Makwerhu Barr a vulavula hi “nkarhi wa ku avanyisiwa,” u te: “Nkarhi wa leswaku ku twarisiwa ku avanyisiwa ko hetelela wu tshinele. Vanhu vo tala emasin’wini ya hina va ha fanele va twa rungula ra mahungu lamanene va nga si peleriwa hi dyambu.”

Loko swichudeni swa 56 swa ha ehleketa hi marito lawa, swi nyikiwe tidiploma kutani swi rhumiwa etindhawini to hambana ta misava. Swichudeni swin’we ni hinkwavo lava a va ri kona va khumbeke ngopfu hi switsundzuxo leswi khutazaka leswi va swi kumeke hi siku rero leri tsakisaka.

[Bokisi leri nga eka tluka 17]

TINHLAYO TA NTLAWA

Nhlayo ya matiko lama yimeriweke: 6

Nhlayo ya matiko lawa va averiweke eka wona: 25

Nhlayo ya swichudeni: 56

Avhareji ya malembe: 35,1

Avhareji ya malembe entiyisweni: 18,3

Avhareji ya malembe evutirhelini bya nkarhi hinkwawo: 13,9

[Xifaniso lexi nga eka tluka 18]

Ntlawa Wa Vu-121 Lowu Thwasaka Wa Xikolo Xa Bibele Xa Giliyadi Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Fox, Y.; Kunicki, D.; Wilkinson, S.; Kawamoto, S.; Consolandi, G.; Mayen, C. (2) Santiago, N.; Clancy, R.; Fischer, M.; de Abreu, L.; Davis, E. (3) Hwang, J.; Hoffman, D.; Wridgway, L.; Ibrahim, J.; Dabelstein, A.; Bakabak, M. (4) Peters, M.; Jones, C.; Ford, S.; Parra, S.; Rothrock, D.; Tatlot, M.; Perez, E. (5) de Abreu, F.; Kawamoto, S.; Ives, S.; Burdo, J.; Hwang, J.; Wilkinson, D. (6) Fox, A.; Bakabak, J.; Cichowski, P.; Forier, C.; Mayen, S.; Consolandi, E.; Wridgway, W. (7) Parra, B.; Perez, B.; Tatlot, P.; Santiago, M.; Ibrahim, Y.; Kunicki, C. (8) Burdo, C.; Cichowski, B.; Ives, K.; Ford, A.; Rothrock, J.; Hoffman, D.; Davis, M. (9) Peters, C.; Dabelstein, C.; Jones, K.; Clancy, S.; Fischer, J.; Forier, S.