Swivutiso Swa Vahlayi

Xana Ndzi Fanele Ndzi Nyikela Hi Mali Muni?

“Xikwembu xi rhandza munyiki la tsakeke.” (2 Vakorinto 9:7) Marito wolawo ma tiviwa hi vanhu va timiliyoni emisaveni hinkwayo. Hambiswiritano, vanhu lava nghenaka kereke va nga ha titwa va boheka ku nyikela ku tlula leswi nga ematimbeni ya vona. Entiyisweni, tikereke tin’wana ti lava leswaku swirho swa tona swi nyikela hi mali yo karhi leyi pimiweke. Mukhuva lowu wu vuriwa vukhume, ku nga ku nyikela hi khume ra tiphesente ta muholo wa wena ekerekeni.

Xana hakunene Bibele yi lava leswaku hi nyikela hi mali yo karhi leyi pimiweke? Tivutise leswaku xana ndzi fanele ndzi nyikela hi mali muni?

Minyikelo Leyi A Swi Boha Leswaku Munhu A Yi Nyikela Swin’we Ni Leyi Munhu A A Yi Nyikela Hi Ku Tirhandzela eMinkarhini Ya Khale

Bibele yi ni swiletelo leswi nga erivaleni leswi nyikiweke vana va Israyele malunghana ni ntsengo lowu Xikwembu a xi lava leswaku va nyikela ha wona. (Levhitika 27:30-32; Tinhlayo 18:21, 24; Deteronoma 12:4-7, 11, 17, 18; 14:22-27) Vukhume lebyi a byi nga ri ndzhwalo eka vona. Yehovha u va tshembise leswaku loko vo yingisa milawu yakwe, a a ta endla leswaku tiko ‘swi ri fambela kahle.’—Deteronoma 28:1, 2, 11, 12.

Eka swiyimo swin’wana, Vaisrayele a va ta nyikela hi ku tirhandzela hilaha va kotaka hakona. Hi xikombiso, loko Hosi Davhida a kunguhata ku akela Yehovha tempele, Vaisrayele va nyikele hi “nsuku lowu ringanaka titalenta ta 5 000.”a (1 Tikronika 29:7) Kambe mhaka leyi yi hambanile ni leswi Yesu a swi voneke loko a ri laha misaveni. U vone “noni yin’wana leyi pfumalaka yi hoxa swimalana swimbirhi swa nsimbi swa ntikelo wa le hansi swinene” emabokisini ya xuma etempeleni. Xana swimalana leswi yi nyikeleke ha swona hi nga swi ringanisa na yini? Enkarhini wolowo a swi ringana ni muholo lowutsongo swinene wa siku. Kambe Yesu u vule leswaku swimalana swoleswo a swi amukeleka.—Luka 21:1-4.

Xana Vakreste Va Languteriwe Ku Nyikela Hi Mali Yo Karhi Leyi Pimiweke?

Vakreste a va le hansi ka ntwanano wa Nawu lowu nyikiweke Vaisrayele. Xisweswo, a va vekeriwanga mpimo wa mali leyi va faneleke va yi nyikela eka Xikwembu. Hambiswiritano, evandlheni ra Vakreste va ntiyiso, ku nyikela swi tisa ntsako lowukulu. Yesu Kreste u te: “Ku nyika swi tisa ntsako lowukulu ku tlula ku amukela.”—Mintirho 20:35.

Timbhoni ta Yehovha ti seketela ntirho wa tona wo chumayela emisaveni hinkwayo hi minyikelo ya ku ti rhandzela. Minyikelo yoleyo yi tirhiseriwa ku kandziyisa tibuku, to fana ni magazini lowu u nga eku wu hlayeni, ku aka swin’we ni ku lunghisa tindhawu leti ti gandzelaka eka tona, ku nga Tiholo ta Mfumo. Ku hava mali leyi kolekiwaka leswaku yi holela vanhu vo karhi. Van’wana lava tinyiketeleke ku heta nkarhi wa vona wo tala va ri karhi va endla ntirho wo endla vadyondzisiwa va kuma swimalana leswi va pfunaka ku hakelela swo famba ni swilo swin’wana swa munhu hi yexe. Kambe ku hava munhu loyi a sindzisaka leswaku u fanele a nyikiwa mali yoleyo. Entiyisweni, vunyingi bya Timbhoni ta Yehovha a ti nyikiwi mali leyi nga ta ti seketela leswaku ti ya emahlweni ni ntirho wo chumayela. Ematshan’weni ya sweswo, to tala ta tona ta tirha leswaku ti kuma mali leswaku ti kota ku ti hanyisa, ku fana na Pawulo loyi a a ri muendli wa matende.—2 Vakorinto 11:9; 1 Vatesalonika 2:9.

Loko munhu a lava ku nyikela leswaku a seketela ntirho lowu endliwaka hi Timbhoni ta Yehovha, xana u fanele a nyikela hi mali muni? Muapostola Pawulo u te: “Un’wana ni un’wana a a endle hilaha a boheke hakona embilwini yakwe, ku nga ri hi ku vilela kumbe hi ku sindzisiwa, hikuva Xikwembu xi rhandza munyiki la tsakeke.”—2 Vakorinto 8:12; 9:7.

[Nhlamuselo ya le hansi]