Ku Tsekatseka Ka Misava, Vuprofeta Bya Bibele Na Wena

ENDZHAKU ka ku fa kakwe, Yesu u boxe swiendlakalo ni swiyimo leswi a swi ta kombisa leswaku misava yi nghene “[e]makumu ya mafambiselo ya swilo.” U vule leswaku nkarhi wolowo, a wu ta voniwa hi swilo swo kota mintungu, ku pfumaleka ka swakudya ni tinyimpi to tala. U tlhele a boxa mhaka ya ku “tsekatseka ka misava” loku a ku ta endleka “ku suka endhawini yin’wana ku ya eka yin’wanyana.” (Matewu 24:3, 7; Luka 21:10, 11) Xana Yesu a a kombetela esikwini ra hina?

Vanhu vo tala va nga ha ala. Va vula leswaku ku tsekatseka ka misava a ku engetelekanga emalembeni ya sweswinyana. Entiyisweni, Ndzawulo Ya Le United States Ya Ku Tsekatseka Ka Misava eTikweni Hinkwaro yi vika leswaku ku tsekatseka ka misava loku fikaka eka mpimo wa 7,0 ni ku ya ehenhla “a ku si cinca ngopfu” eka lembe-xidzana hinkwaro ra vu-20.a

Kambe, xiya leswaku ku hetiseka ka vuprofeta bya Yesu a ku lavi leswaku ku engeteleka ku tsekatseka ka misava, kumbe leswaku misava yi tsekatseka hi matimba ngopfu. Yesu u vule ntsena leswaku ku ta va ni ku tsekatseka lokukulu ka misava etindhawini to hambana-hambana. Tlhandlakambirhi, u vule leswaku swiendlakalo leswi swi ta va “ku sungula ka switlhavi swa maxangu.” (Matewu 24:8) Maxangu a ma pimiwi hi leswaku ku ve ni ku tsekatseka kungani ka misava kumbe hi mpimo wa xikalo xa Richter, kambe hi ndlela leyi ku khumbaka vanhu ha yona.

Kunene ku tsekatseka ka misava ku vange maxangu lamakulu esikwini ra hina. Entiyisweni, eka lembe-xidzana ra vu-20 ntsena, makhombo lawa ma dlaye vanhu va timiliyoni kumbe ma va siye va nga ri na makaya. Vativi va vula leswaku ku fa ka vanhu vo tala a ku ta va ku papalatiwile. Mahungu ya BBC ma vika leswaku “ematikweni lama hluvukaka, milawu ya ku aka a yi landzeriwi, ku laviwa ntsena tindlu to chipa, leti akiwaka hi ku hatlisa leswaku ku kumeka tindlu ta vanhu lava khitikanelaka exilungwini.” Ben Wisner, loyi a nga mutshila emakhombyeni lama humelelaka exilungwini, loko a kombetela eka makhombo mambirhi lama ha ku endlekaka, u te: “A hi ku tsekatseka ka misava loku dlayeke vanhu lava. Kambe i xihoxo lexi endliweke hi vanhu, ku nga khathali, vukanganyisi ni makwanga.”

Ina, minkarhi yin’wana nchumu lowu dlayaka vanhu vo tala loko ku ri ni ku tsekatseka ka misava i vumina ni futa. Phela, timfanelo teto ti kandziyisiwile eka vuprofeta byin’wana bya Bibele lebyi vulavulaka hi “masiku ya makumu” ya fambiselo leri. Hi nkarhi wolowo, Bibele yi vula leswaku “vanhu va ta va lava tirhandzaka, varhandzi va mali,” ni “lava nga riki na xinakulobye xa ntumbuluko.” (2 Timotiya 3:1-5) Vuprofeta lebyi swin’we ni marito ya Yesu lama vulavulaka hi ku hela ka fambiselo leri ra swilo, swi nyikela vumbhoni lebyi nga erivaleni bya leswaku hi tshinela enkarhini lowu Xikwembu xi nga ta tisa mphalalo eka vanhu lava tshikilelekeke hikwalaho ka swilo hinkwaswo leswi vangaka ku vava ni ku xaniseka—ku katsa ni ku tsekatseka lokukulu ka misava.—Pisalema 37:11.

Xana u nga swi tsakela ku dyondza swo tala hi ntshembo lowu wu seketeriweke eBibeleni? Hi kombela u tihlanganisa ni Timbhoni ta Yehovha leti tshamaka endhawini ya ka n’wina kumbe u tsalela eka adirese leyi faneleke eka leti longoloxiweke eka tluka 5.

[Nhlamuselo ya le hansi]