Xana U Tiyimisele Ku Fambisana Ni Swiyimo?

 1. Ku cinca ka swilo laha misaveni ku hi susumetela ku endla mindzulamiso yihi?

¹ Eka 1 Vakorinto 7:31, Bibele yi fanisa misava ni xiteji laha ku nga ni swivono ni vatlangi vo hambana-hambana. Nkarhi ni nkarhi ku cinca loku nga kona laha misaveni ku hi susumetela leswaku hi endla mindzulamiso eka ndlela leyi hi chumayelaka ha yona, xiyimiso xa hina ni xingheniso xa hina. Xana u tiyimisele ku fambisana ni swiyimo?

 2. Ha yini hi fanele hi fambisana ni swiyimo leswaku hi kota ku fambisana ni nhlengeletano?

² Ndlela Leyi U Chumayelaka Ha Yona: Minkarhi hinkwayo vandlha ra Vukreste ri fambisana ni swiyimo. Loko Yesu a rhuma vadyondzisiwa va yena, u va byele leswaku va nga longi nkwama wa swakudya kumbe mali evambeni ra vona. (Mat. 10:9, 10) Hambiswiritano, endzhaku ka sweswo u byele vadyondzisiwa vakwe leswaku va longa hikwalaho ka leswi a va ta vengiwa ni hi leswi a va ta chumayela ematikweni mambe. (Luka 22:36) Eka malembe lama hundzeke, nhlengeletano ya Yehovha yi tirhise tindlela to hambana-hambana to chumayela, hi xikombiso, makhadi yo nyikela vumbhoni, swiya-ni-moya ni mimovha yo haxa rungula, hi ku ya hi xilaveko xa nkarhi wolowo. Namuntlha, leswi vanhu etindhawini to tala va nga kumekiki emakaya, ku engetela eka ntirho wa hina wa yindlu ni yindlu hi khutaziwa leswaku hi chumayela etindhawini ta mani na mani ni hi xitshuketa. Hi tlhela hi khutaziwa leswaku hi chumayela hi yindlu ni yindlu nimadyambu loko vanhu va nga kumeki ninhlikanhi. Tanihi leswi kalichi ya Yehovha ya le tilweni yi cinca-cincaka ndlela leyi yi tirhaka ha yona, xana u fambisana na yona?—Ezek. 1:20, 21.

 3. Ku fambisana ni swiyimo swi hi pfuna njhani leswaku hi endla nhluvuko ensin’wini ya hina?

³ Xingheniso Xa Wena: Xana vanhu va le ndhawini ya ka n’wina va vilerisiwa hi yini sweswi? Ikhonomi, ndyangu kumbe nyimpi? Swa vuyerisa ku tiva swiphiqo ni swiyimo leswi nga kona ni leswi tolovelekeke ensin’wini ya hina leswaku hi ta kota ku lunghiselela xingheniso lexi faneleke. (1 Kor. 9:20-23) Loko vini va miti va tiphofula, ematshan’weni yo va byela nhlamulo leyi toloveleke kutani hi ya emahlweni ni xingheniso lexi hi xi lunghiseleleke, swi nga va swinene leswaku hi fambisana ni swiyimo ivi hi bula hi leswi va vilerisaka.

 4. Ha yini hi fanele hi hatlisa leswaku hi fambisana ni swiyimo?

⁴ Ku nga ri khale “xiyimo” xa misava leyi xi ta hundzuka naswona ku ta sungula nhlomulo lowukulu. “Nkarhi lowu seleke wu komile.” (1 Kor. 7:29) Mawaku ndlela leyi swi nga swa nkoka ha yona ku fambisana ni swiyimo ni ku endla tano handle ko rhotela ku endlela leswaku hi hetisisa swo tala hi nkarhi lowu saleke wo koma!