Yesu

“A ku na munhu la tshameke a vona Xikwembu.”—Yohane 1:18.

LESWI VANHU VA SWI VULAKA

Vanhu vo tala va pfumela leswaku Yesu a hi Xikwembu. Kasi van’wana va vulavula hi tindzimana ta le Bibeleni leti va anakanyaka leswaku ti kombisa leswaku Yesu u ringana ni Xikwembu.

LESWI BIBELE YI SWI VULAKA

Bibele a yi vuli leswaku Yesu i Xikwembu xa Matimba Hinkwawo kumbe u ringana ni Xikwembu. Ku ri na sweswo, yi dyondzisa leswaku Yesu u ntsongo eka Xikwembu. Hi xikombiso, Bibele yi ni marito lama vuriweke hi Yesu lama nge: “Tatana u nkulu eka mina.” (Yohane 14:28) Bibele yi tlhela yi ku: “A ku na munhu la tshameke a vona Xikwembu.” (Yohane 1:18) Yesu a nge vi Xikwembu hikuva vanhu vo tala va n’wi vonile.

Valandzeri va Yesu vo sungula a va vulanga leswaku a a ri Xikwembu. Hi xikombiso, Yohane mutsari wa Evhangeli u vule leswi malunghana ni swilo leswi a swi tsaleke: “Leswi swi tsaleriwe leswaku mi kholwa leswaku Yesu i Kreste N’wana wa Xikwembu.”—Yohane 20:31.a

“A ku ri ni varisi lava a va tshama ehandle ka muti, va rindza mintlhambi ya vona nivusiku.”—Luka 2:8.

LESWI VANHU VA SWI VULAKA

Vanhu van’wana va tlangela Khisimusi hi ti-25 ta December, ku nga siku leri van’wana va anakanyaka leswaku Yesu u velekiwe ha rona. Vanhu van’wana va tlangela siku ra ku velekiwa ka Yesu eku sunguleni ka January.

LESWI BIBELE YI SWI VULAKA

Bibele a yi ri boxi siku leri Yesu a velekiweke ha rona. Hambiswiritano, yi vula leswaku hi nkarhi lowu Yesu a velekiweke ha wona, “a ku ri ni varisi lava a va tshama ehandle ka muti, va rindza mintlhambi ya vona nivusiku.” (Luka 2:8) Varisi a va nga ta tshama ni mintlhambi ya vona enhoveni nivusiku hi December na hi January. Ha yini?

Ndhawu leyi Yesu a velekeriweke eka yona yi titimela swinene hi December na hi January. Malunghana ni nkarhi wolowo elembeni, Bibele yi vula leswaku vanhu a va “rhurhumela . . . hikwalaho ka mpfula.” (Ezra 10:9, 13; Yeremiya 36:22) Wolowo a wu nga ta va nkarhi wa leswaku varisi va “tshama ehandle ka muti” ni mintlhambi ya vona.

“Xikwembu xi [pfuxe Yesu] eka lava feke.”—Mintirho 3:15.

LESWI VANHU VA SWI VULAKA

Vanhu van’wana va anakanya leswaku a ku na munhu la tshameke a pfuxiwa eku feni, ku katsa na Yesu.

LESWI BIBELE YI SWI VULAKA

Yesu u byele valandzeri vakwe leswaku a a ta “xanisiwa swinene . . . ivi a dlayiwa, kutani a pfuxiwa hi siku ra vunharhu.” (Matewu 16:21) Bibele yi vula leswaku endzhaku ka loko Yesu a dlayiwile a tlhela a pfuxiwa eku feni, u humelele eka vanhu lava tlulaka 500. (1 Vakorinto 15:6) Vanhu volavo lava swi voneke hi mahlo a va khorwiseka hi ku helela leswaku u pfuxiwile eku feni. A va tiyimiserile hambi ku ri ku dlayiwa hikwalaho ka leswi a va pfumela eka dyondzo yoleyo.—Mintirho 7:51-60; 12:1, 2.

LEXI ENDLAKA MHAKA LEYI YI VA YA NKOKA

Bibele yi dyondzisa leswaku ku fa ni ku pfuxiwa ka Yesu swi endle leswaku vanhu hinkwavo va vuyeriwa eka Paradeyisi leyi nga ta va laha misaveni leyi tshembisiweke eBibeleni. (Pisalema 37:11, 29; Nhlavutelo 21:3, 4) Hi ni ntshembo wo tiphina hi vutomi lebyi nga heriki lebyi tsakisaka eParadeyisini yoleyo leyi nga ta va laha misaveni hikwalaho ka rirhandzu leri kombisiweke hi Yesu na Yehovha, Tata wakwe, Xikwembu xa Matimba Hinkwawo.—Yohane 3:16; Varhoma 6:23.