Xana Hakunene Yehovha Wa Khathala Hi Wena?

“Ku titwa ndzi ri xikangalafula i xiphiqo lexikulu lexi ndzi ringetaka ku xi hlula lexi ndzi sivelaka ku tshinela eka Xikwembu.” Marito lawa ma vuriwe hi wansati un’wana loyi a kumeke swi n’wi tikela ku kholwa leswaku Yehovha wa n’wi khathalela. Xana na wena u titwa hi ndlela yoleyo? Loko swi ri tano, u nga ha tivutisa, ‘Xana hakunene Yehovha wa khathala hi un’wana ni un’wana wa vagandzeri vakwe?’ Ina! Vumbhoni bya leswaku Xikwembu xa khathala hi un’wana ni un’wana hi byi kuma eka marito ya Yesu.—Hlaya Yohane 6:44.

Xana Yesu, loyi a tivaka vumunhu bya Yehovha ni ku rhandza kakwe ku tlula munhu un’wana ni un’wana u te yini? (Luka 10:22) Yesu u te: “Ku hava munhu loyi a nga taka eka mina handle ka loko Tatana, loyi a ndzi rhumeke, a n’wi koka.” Kutani, a hi nge vi valandzeri va Kreste—ni vagandzeri va Tata wa hina wa le tilweni, ku nga Yehovha—handle ka loko hi ku kongoma Yehovha a hi koka. (2 Vatesalonika 2:13) Loko hi twisisa leswi Yesu a a swi vula, hi ta vona vumbhoni bya matimba bya leswaku Xikwembu xa khathala hi munhu un’wana ni un’wana.

Xana swi vula yini ku va Yehovha a hi koka? Riendli ra Xigriki leri hundzuluxeriweke ri va “koka” ri tlhela ri tirhisiwa ku vula ku kukuta tinhlampfi hi rikoka. (Yohane 21:6, 11) Xana Yehovha u hi sindzisa leswaku hi n’wi tirhela handle ka ku swi rhandza? Doo! Yehovha u hi nyike ntshunxeko wo tihlawulela kutani a nga sindzisi timbilu ta hina leswaku ti endla ku rhandza kakwe. (Deteronoma 30:19, 20) Xidyondzi xin’wana xi swi veka hi ndlela leyi: “Mbilu ya munhu a yi na xikhomo. Yi fanele yi pfuriwa hi le ndzeni.” Yehovha u kambisisa vanhu va tibiliyoni lava lavaka ku n’wi tsakisa, ku nga vanhu lava nga ni langutelo lerinene eka yena. (1 Tikronika 28:9) Loko a kuma vanhu vo tano, u angula hi ndlela leyinene. Njhani?

Hakatsongo-tsongo, Yehovha u koka mbilu ya munhu loyi a nga ni “mboyamelo lowunene.” (Mintirho 13:48) Yehovha u endla leswi hi tindlela timbirhi—hi rungula ra mahungu lamanene lama nga eBibeleni, leri un’wana ni un’wana a ri kumaka ni hi ku tirhisa moya wakwe wo kwetsima. Loko Yehovha a vona mbilu leyi angulaka hi ndlela leyinene eka ntiyiso wa le Bibeleni, u tirhisa moya wakwe leswaku a pfuna munhu un’wana ni un’wana leswaku a twisisa ni ku tirhisa ntiyiso lowu evuton’wini byakwe. (1 Vakorinto 2:11, 12) Handle ko pfuniwa hi Xikwembu, a hi nge swi koti ku va valandzeri va xiviri va Yesu ni ku va vagandzeri lava tinyiketeleke va Yehovha.

Kutani, xana marito ya Yesu lama tsariweke eka Yohane 6:44 ma hi dyondzisa yini hi Yehovha Xikwembu? Yehovha u koka vanhu hi ku va a vona leswinene etimbilwini ta vona naswona wa khathala hi munhu un’wana na un’wana. Ku twisisa mhaka leyi, leyi nga ntiyiso swi chavelele wansati loyi a boxiweke eku sunguleni ka xihloko lexi. U ri: “Ku va nandza wa Yehovha i lunghelo lerikulu ku tlula hinkwawo lawa munhu a nga vaka na wona. Leswi Yehovha a ndzi hlawuleke leswaku ndzi va nandza wakwe, swi vula leswaku ndzi wa nkoka eka yena.” Ku vuriwa yini hi wena? Xana ku va u tiva leswaku Yehovha wa khathala hi un’wana ni un’wana wa vagandzeri vakwe swi ku susumetela leswaku u tshinela ekusuhi na yena?