Ku Nkhensa Yehovha Tanihi Muvumbi Wa Hina

 1. Ha yini Yehovha a ri Muvumbi lonkulu?

HI November 2010, ku xaviwe xibya xa vumba xo hoxa swiluva xa le Chayina hi mali ya kwalomu ka tidolara ta 70 wa timiliyoni eNghilandhi. Swa hlamarisa leswi muvumbi a nga tirhisaka vumba lebyi nga durhiki leswaku a vumba xibya xo saseka swinene xi tlhela xi durha. Yehovha Muvumbi wa hina u va tlula ekule vanhu lava kotaka ku vumba. Bibele yi vula leswaku Yehovha u endle munhu la hetisekeke “hi ntshuri wa misava” leswi vulaka leswaku u n’wi endle hi vumba. (Genesa 2:7) Munhu yoloye Adamu a a ri “n’wana wa Xikwembu” naswona a a vumbiwe a kota ku tekelela timfanelo ta Xikwembu.—Luka 3:38.

2, 3. Hi nga ri tekelela njhani langutelo ra Vaisrayele lava hundzukeke?

² Loko Adamu a xandzukela Muvumbi wakwe, a nga ha vanga n’wana wa Xikwembu. Kambe vatukulu vo tala va Adamu va hlawule Yehovha tanihi Mufumi wa vona. (Vaheveru 12:1) Hi ku yingisa Muvumbi wa vona, va kombise leswaku va lava a va Tatana ni Muvumbi wa vona ku nga ri Sathana. (Yohane 8:44) Ku tshembeka ka vona eka Xikwembu ku hi tsundzuxa leswi Vaisrayele lava hundzukeke va swi vuleke loko va ku: “Wena Yehovha, u Tata wa hina. Hina hi vumba, wena u Muvumbi; hina hinkwerhu hi endliwe hi mavoko ya wena.”—Esaya 64:8.

³ Hilaha ku fanaka, namuntlha vagandzeri va Yehovha va ntiyiso va tikarhatela ku titsongahata ni ku yingisa. Va swi teka ku ri lunghelo lerikulu ku va Yehovha a ri Tata wa vona naswona va lava leswaku a va Muvumbi wa vona. Xana hi lava ku fana ni vumba byo olova lebyi Xikwembu xi nga vumbaka xibya xa risima hi byona? Xana hi teka vamakwerhu tanihi lava nga eku vumbiweni hi Xikwembu? Leswaku hi kota ku va ni langutelo lerinene, hi ta kambisisa ndlela leyi Yehovha a hlawulaka lava a va vumbaka, lexi endlaka a va vumba ni ndlela leyi a va vumbaka ha yona.

 4. Yehovha u va hlawula njhani lava a nga ta va kokela eka yena? Vula swikombiso.

⁴ Yehovha a nga teki vanhu hi ndlela leyi hi va tekaka ha yona. Ku ri na sweswo, u kambisisa mbilu kutani a vona leswi ha un’we wa hina a nga swona. (Hlaya 1 Samuwele 16:7b.) Yehovha u kombise leswi loko a vumba vandlha ra Vukreste. U hlawule vanhu vo tala leswaku va va ni vuxaka na yena ni N’wana wakwe lava van’wana va vona va nga ha tekiwaka va nga faneleki. (Yohane 6:44) Hi xikombiso, un’wana wa vanhu volavo a ku ri Mufarisi loyi a vuriwaka Sawulo, “musandzi ni muxanisi ni murhukani.” (1 Timotiya 1:13) Kambe Yehovha u kambisise mbilu ya Sawulo naswona a nga n’wi vonanga a ri vumba lebyi nga pfuniki nchumu. (Swivuriso 17:3) Ku ri na sweswo, Yehovha u vone leswaku Sawulo a nga vumbiwa a va “xibya lexi hlawuriweke” ivi a chumayela “matiko swin’we ni le ka tihosi ni le ka vana va Israyele.” (Mintirho 9:15) Yehovha u tlhele a hlawula van’wana lava nga ta vumbiwa leswaku va “tirhiseriwa leswi xiximekaka,” ku katsa ni khale ka swilovekelo, vanhu lava tikhomaka hi ndlela yo biha ni makhamba. (Varhoma 9:21; 1 Vakorinto 6:9-11) Loko va ri karhi va dyondza Matsalwa, va tiyise ripfumelo ra vona eka Yehovha ni ku n’wi pfumelela leswaku a va vumba.

5, 6. Ndlela leyi hi tshembaka Yehovha ha yona tanihi Muvumbi yi fanele yi ri khumba njhani langutelo ra hina hi (a) vanhu va le nsin’wini ya hina? (b) vamakwerhu?

⁵ Ha tshemba leswaku Yehovha u kota ku hlawula ni ku koka vanhu lavanene. Hi yona mhaka hi nga fanelangiki hi avanyisa vanhu va le nsin’wini ya hina kumbe va le vandlheni. Hi xikombiso, anakanya hi ndlela leyi wanuna loyi a vuriwaka Michael a hlamuleke ha yona loko Timbhoni ta Yehovha ti n’wi endzerile. U ri: “Loko ndzi pfula rivanti kutani ndzi kuma leswaku i Timbhoni ti gongondzaka a ndzo famba ndzi ti honisa onge hiloko ti nga ri kona. A ndzi nga ri na xinghana! Hi ku famba ka nkarhi, ndzi hlangane ni ndyangu lowu a ndzi wu xixima hikwalaho ka ndlela leyi a wu tikhoma ha yona. Kutani siku rin’wana ndzi hlamarile loko ndzi kuma leswaku i Timbhoni ta Yehovha! Ndlela leyi a wu tikhome ha yona yi endle leswaku ndzi kambisisa lexi endlaka ndzi ti venga. Ndzi xiye leswaku a ndzi ti venga hileswi ndzi tweke mavarivari ku nga ri ntiyiso.” Michael a a lava ku dyondza swo tala naswona u pfumele ku dyondzeriwa Bibele. Hi ku famba ka nkarhi u khuvuriwile naswona u nghenele ntirho wa nkarhi hinkwawo.

⁶ Loko hi teka Yehovha tanihi Muvumbi wa hina, langutelo ra hina hi vamakwerhu ri ta cinca. Hi ta swi tekela enhlokweni leswaku va ha ri eku vumbiweni. Yehovha u va teka tano. U vona timbilu ta vona naswona wa swi tiva leswaku ku nga hetiseki ka vona i ka xinkarhana. Nakambe wa swi tiva leswaku va ta va vanhu va njhani. (Pisalema 130:3) Hi nga tekelela Yehovha loko hi ri ni langutelo lerinene ro fana ni ra yena hi vamakwerhu. Hi nga tlhela hi tirha ni Muvumbi wa hina ku pfuna vamakwerhu leswaku va endla nhluvuko. (1 Vatesalonika 5:14, 15) Vakulu evandlheni va fanele va veka xikombiso lexinene loko swi ta emhakeni leyi.​—Vaefesa 4:8, 11-13.

 7. Ha yini u tlangela ndzayo ya Yehovha?

⁷ Vanhu van’wana va nga ha vula leswi: ‘A ndzi nga wu voni nkoka wa ndzayo leyi a ndzi yi kuma eka vatswari va mina ku fikela loko ndzi va ni vana.’ Loko hi kula hi nga ha sungula ku tlangela ndzayo hikuva ha swi xiya leswaku yi kombisa rirhandzu. (Hlaya Vaheveru 12:5, 6, 11.) I ntiyiso leswaku Yehovha u hi rhandza tanihi vana vakwe, hi yona mhaka a hi lehiselaka mbilu loko a hi nyika ndzayo kumbe ku hi vumba. U lava leswaku hi tlhariha hi tlhela hi tsaka ni ku n’wi rhandza tanihi Tata wa hina. (Swivuriso 23:15) A nga tsaki loko a hi vona hi xaniseka naswona a nga lavi leswaku hi fa hi ri vadyohi lava nga hundzukangiki.​—Vaefesa 2:2, 3.

8, 9. Yehovha u hi dyondzisa njhani namuntlha, naswona u ta hi dyondzisa njhani enkarhini lowu taka?

⁸ Loko hi nga si tiva Yehovha, kumbexana a hi ri ni mikhuva yo biha. Kambe Yehovha u hi vumbile ni ku hi pfuna leswaku hi cinca, kutani sweswi hi ni timfanelo letinene. (Esaya 11:6-8; Vakolosa 3:9, 10) Hi hanya eparadeyisini ya moya. Leyi i ndhawu yo hlawuleka leyi Yehovha a hi lunghiselelaka yona namuntlha leswaku a hi vumba. Loko hi ri eka yona, hi titwa hi sirhelelekile hambileswi misava yi biheke namuntlha. Van’wana lava kuleke va nga kombiwi rirhandzu emindyangwini ya vona, sweswi va kombisiwa rirhandzu ra xiviri hi vamakwerhu eparadeyisini ya moya. (Yohane 13:35) Nakambe hi dyondze ku komba van’wana rirhandzu. Kambe xa nkoka swinene, hi tiva Yehovha ni ku vona rirhandzu leri a hi kombaka rona tanihi tatana.​—Yakobo 4:8.

⁹ Emisaveni leyintshwa, hi ta vuyeriwa swinene eka paradeyisi ya moya. Hi ta tlhela hi tsakela vutomi eparadeyisini ya xiviri leyi nga ta lawuriwa hi Mfumo wa Xikwembu. Enkarhini wolowo, Yehovha u ta ya emahlweni a hi vumba ni ku hi dyondzisa hi ndlela leyikulu leyi swi tikaka ku yi twisisa sweswi. (Esaya 11:9) Yehovha u ta tlhela a endla leswaku miehleketo ni mimiri ya hina swi hetiseka. Leswi swi ta endla leswaku swi hi olovela ku twisisa ni ku yingisa swileriso swakwe hi ku helela. Kutani a hi yeni emahlweni hi pfumelela Yehovha leswaku a hi vumba, ni ku n’wi komba leswaku ha ri tlangela rirhandzu leri a hi kombaka rona.​—Swivuriso 3:11, 12.

10. Yesu u ku kombise njhani ku lehisa mbilu ni vutshila bya Muvumbi Lonkulu?

¹⁰ Ku fana ni muvumbi la nga ni vutshila loyi a tivaka muxaka wa vumba lebyi a nga le ku byi vumbeni, Yehovha Muvumbi wa hina u hi tiva kahle. U tiva ku tsana ka hina, leswi hi nga kotiki ku swi endla ni nhluvuko lowu hi wu endleke naswona u hi vumba hi ku ya hi swilo leswi. (Hlaya Pisalema 103:10-14.) Hi nga dyondza ndlela leyi Yehovha a hi tekaka ha yona hi ku xiya leswi Yesu a swi endleke loko vaapostola vakwe va endla swihoxo. Minkarhi yin’wana vaapostola vakwe va phikizane hi leswaku i mani lonkulu. Loko a wu ri kwalaho, a wu ta va u va teke njhani vaapostola lava? Kumbexana a wu ta va u vone onge a va nga ri vumba byo olova. Hambiswiritano, Yesu a a swi tiva leswaku va nga vumbiwa loko va yingisa ndzayo yakwe ni loko va tekelela ku titsongahata kakwe. (Marka 9:33-37; 10:37, 41-45; Luka 22:24-27) Endzhaku ka loko Yesu a pfuxiwile, vaapostola vakwe va amukele moya wa Xikwembu naswona a va ha phikizananga hi leswaku i mani lonkulu. Ku ri na sweswo, va dzike eka ntirho lowu Yesu a va nyikeke wona.​—Mintirho 5:42.

11. Davhida u swi kombise hi ndlela yihi leswaku u fana ni vumba byo olova naswona hi nga n’wi tekelela njhani?

¹¹ Namuntlha, Yehovha u tirhisa Bibele, moya lowo kwetsima ni vandlha leswaku a hi vumba. Xana Bibele yi nga hi vumba njhani? Hi fanele hi yi hlaya, hi anakanyisisa hi leswi hi swi hlayaka ni ku kombela Yehovha leswaku a hi pfuna ku tirhisa leswi hi swi dyondzeke. Hosi Davhida u tsale a ku: “Loko ndzi ku tsundzuka ndzi ri ehenhla ka xilawu xa mina, ndzi anakanyisisa ha wena exikarhi ka ku rindza ka nivusiku.” (Pisalema 63:6) U tlhele a tsala a ku: “Ndzi ta nkhensa Yehovha, la ndzi nyikeke xitsundzuxo. Kunene, nivusiku tinso ta mina ti ndzi lulamisile.” (Pisalema 16:7) Davhida u anakanyisise hi ndzayo ya Yehovha ni ku yi pfumelela leswaku yi vumba mianakanyo ni ndlela leyi a titwaka ha yona hambiloko swi tika ku yi amukela. (2 Samuwele 12:1-13) Davhida u hi vekele xikombiso lexinene xo titsongahata ni ku yingisa. Kutani tivutise: ‘Loko ndzi hlaya Bibele, xana ndzi anakanyisisa hi leswi ndzi swi hlayaka ni ku pfumelela ndzayo ya Xikwembu leswaku yi khumba mianakanyo ya mina ni ndlela leyi ndzi titwaka ha yona? Xana ndzi nga antswisa?’​—Pisalema 1:2, 3.

12, 13. Xana Yehovha u hi vumba njhani hi ku tirhisa moya lowo kwetsima ni vandlha ra Vukreste?

¹² Moya lowo kwetsima wu nga hi vumba hi tindlela to hambanahambana. Hi xikombiso, wu nga hi pfuna leswaku hi dyondza ku tekelela vumunhu bya Yesu ni ku kombisa timfanelo to hambanahambana ta mihandzu ya moya. (Vagalatiya 5:22, 23) Yin’wana ya mihandzu ya moya i rirhandzu. Hi rhandza Xikwembu naswona hi lava ku xi yingisa ni ku vumbiwa hi xona hikuva ha swi tiva leswaku swileriso swa xona swi vuyerisa hina. Nakambe moya lowo kwetsima wu nga hi nyika matimba yo papalata ku vumbiwa hi misava leyi yo homboloka. (Vaefesa 2:2) Loko muapostola Pawulo a ha ri muntshwa, a a kuceteriwa hi varhangeri va vukhongeri va Vayuda lava tikukumuxaka. Kambe moya lowo kwetsima wu n’wi pfune leswaku a cinca. Endzhaku u tsale a ku: “Eka swilo hinkwaswo ndzi ni ntamu hikwalaho ka loyi a ndzi nyikaka matimba.” (Vafilipiya 4:13) Na hina hi fanele hi kombela moya lowo kwetsima, hi ri karhi hi tiva leswaku Yehovha u ta hlamula swikhongelo swa hina leswi humaka mbilwini.​—Pisalema 10:17.

¹³ Nakambe Yehovha u tirhisa vandlha ni vakulu leswaku a hi vumba. Hi xikombiso, loko vakulu va xiya leswaku hi ni ku tsana ko karhi va ringeta ku hi pfuna. Hambiswiritano, a va hi nyiki ndzayo hi ku ya hi vonelo ra vona. (Vagalatiya 6:1) Ku ri na sweswo, va khongela eka Yehovha hi ku titsongahata va kombela ku twisisa ni vutlhari. Kutani va endla ndzavisiso hi ku tirhisa Bibele ni minkandziyiso ya hina leswaku va kuma rungula leri nga ta hi pfuna. Loko vakulu va ta eka wena leswaku va ku nyika ndzayo hi ndlela ya musa ni rirhandzu, ku nga ha va ya ndlela leyi u ambalaka ha yona, tsundzuka leswaku Xikwembu xa ku rhandza. Loko u tirhisa ndzayo yoleyo, u ta fana ni vumba byo olova lebyi Yehovha a kotaka ku byi vumba naswona u ta vuyeriwa.

14. Yehovha u swi kombisa njhani leswaku u xixima ntshunxeko wa hina wa ku tihlawulela hambileswi a nga ni mfanelo yo hi lawula?

¹⁴ Loko hi twisisa ndlela leyi Yehovha a hi vumbaka ha yona, swi ta hi pfuna leswaku hi va ni vuxaka lebyinene ni vamakwerhu. Nakambe, hi ta tlhela hi va ni langutelo lerinene hi vanhu va le nsin’wini ya hina ku katsa ni swichudeni swa hina swa Bibele. Enkarhini wa ku tsariwa ka Bibele, loko muvumbi a nga si vumba, a a fanele a rhanga a basisa vumba ni ku byi susa maribye ni swin’wana leswi nga lavekiki. Muvumbi Lonkulu Yehovha, u pfuna vanhu lava lavaka ku vumbiwa. A nga va sindzisi leswaku va hundzuka, kambe ku ri na sweswo u va dyondzisa milawu yakwe leyi baseke. Kutani vona va fanele va hlawula loko va lava ku hundzuka.

15, 16. Swichudeni swa Bibele swi swi kombisa njhani leswaku swi lava ku vumbiwa hi Yehovha? Kombisa.

¹⁵ Xiya leswi humeleleke Tessie, makwerhu wa xisati wa le Australia. Swi n’wi oloverile swinene ku dyondza leswi Bibele yi swi vulaka. Kambe, nhluvuko lowu a wu endleke a wu nga nyawuli naswona a a nga yi eminhlanganweni. Makwerhu wa xisati loyi a a dyondza na yena u khongele eka Yehovha naswona a a endle xiboho xo tshika ku dyondza na yena. Kambe ku humelele nchumu wo hlamarisa. Loko va ri karhi va dyondza, Tessie u byele makwerhu loyi a a n’wi dyondzela leswaku ha yini a nga endli nhluvuko. U vule leswaku a a titwa a ri mukanganyisi hikuva a a rhandza ku gembula. Kambe sweswi u endle xiboho xo tshika ku gembula.

¹⁶ Hi ku hatlisa, Tessie u sungule ku ya eminhlanganweni ni ku kombisa timfanelo ta Vakreste hambileswi vanghana vakwe va khale a va n’wi hleka. Hi ku famba ka nkarhi, Tessie u khuvuriwile naswona u ve phayona ra nkarhi hinkwawo, hambileswi a ri ni vana lavatsongo. Swi le rivaleni leswaku loko swichudeni swa Bibele swi sungula ku cinca leswaku swi tsakisa Xikwembu, xi ta tshinela eka swona kutani xi swi vumba swi va swibye swa risima.

17. (a) I yini leswi ku tsakisaka hi ku va Yehovha a ri Muvumbi wa wena? (b) I swivutiso swihi leswi hi nga ta swi kambisisa exihlokweni lexi landzelaka?

¹⁷ Namuntlha, ka ha ri ni vavumbi va vutshila lava vumbaka swibya swo saseka. Hi ndlela leyi fanaka, Yehovha u hi lehisela mbilu a hi vumba hi ku tirhisa ndzayo yakwe naswona u xiya ndlela leyi hi nga ta angula ha yona. (Hlaya Pisalema 32:8.) Xana wa swi vona leswaku Yehovha wa ku rhandza? Xana wa swi xiya leswaku Yehovha u le ku ku vumbeni hi vukheta? Loko swi ri tano, hi tihi timfanelo leti nga ta ku pfuna leswaku u tshama u ri vumba byo olova lebyi Yehovha a nga byi vumbaka? I mikhuva yihi leyi u faneleke u yi papalata leswaku u nga vi vumba byo nonon’hwa lebyi nga vumbekiki? Naswona vatswari va nga tirhisana njhani na Yehovha leswaku va letela vana va vona? Swivutiso leswi swi ta hlamuriwa exihlokweni lexi landzelaka.