Ku Thwasa Ka Ntlawa Wa Vu-126 Wa Le Giliyadi

Ku Va Murhumiwa Loyi Swilo Swi N’wi Fambelaka Kahle eNtirhweni Wakwe

NTSHUNGU lowu tsakeke a wu hlengeletanile eNtsindza wa Dyondzo wa Watchtower le Patterson, New York eka xiendlakalo xa nkoka. Hi Mugqivela wa ti 14 March 2009, a ku ri siku ra ku thwasa ka swichudeni swa ntlawa wa vu-126 wa Xikolo xa Bibele xa Giliyadi xa Watchtower. Mathwasana ya kona a ma ta rhumeriwa eka 22 wa matiko leswaku ma ya chumayela mahungu lamanene ya Mfumo wa Xikwembu.—Matewu 24:14.

Swichudeni swa ha ku heta khoso ya swona ya Bibele ya tin’hweti ta ntlhanu leyi endleriweke ku swi pfuna leswaku swi va varhumiwa va Vakreste lava swilo swi va fambelaka kahle. Siku ra ku thwasa ka swona ri swi nyike nkarhi tanihi ntlawa leswaku swi yingisa ndzayo ya vutlhari leyi nga ta endla leswaku swi wu hetisisa kahle ntirho wolowo.

Anthony Morris xirho xa Huvo leyi Fumaka ya Timbhoni ta Yehovha loyi a a ri mutshama-xitulu wa nongonoko wolowo u te: “Xikolo xa Giliyadi xi sungule ku letela varhumiwa hi 1943.” Ku sukela kwalaho mathwasana ma kote ku hetisisa ntirho lowukulu eka ntirho wo chumayela wa misava hinkwayo.

Hambileswi vatsari ni Vafarisi a va va tekela hansi vaapostola va Yesu tanihi “vanhu lava nga dyondzekangiki va ri vanhu ntsena,” xivulavuri xi ye emahlweni xi vula leswaku vakaneti volavo va boheke ku xiya leswaku vaapostola a va vulavula hi ndlela yoleyo hikwalaho ka leswi a va tshama va ri na Yesu. (Mintirho 4:13, Bibele Ya Xitsonga) Ndzetelo lowu swichudeni swi wu kumeke wu swi pfunile leswaku swi vulavula hi ku ntshunxeka.

Nkulumo leyi nge: ‘Mi Nga Yi Hi Nghohe’ yi nyikeriwe hi Robert Ciranko loyi a nga mupfuni wa Komiti ya Vutsari ya Huvo leyi Fumaka. U kombise leswaku swichudeni a swi ta hlangana ni vanhu va mindhavuko ni mikhuva yo hambana-hambana. Hambiswiritano, ku va chumayela a swi nge vi xiphiqo loko swichudeni swi tekelela langutelo ra Yehovha. Hi ku ya hi Mintirho 10:34 “Xikwembu a xi yi hi nghohe,” leswi vulaka leswaku a xi hlawuli ndluwa xi si ya hove. (Mintirho 10:35) Makwerhu Ciranko u te: “Loko u tekelela langutelo ra Xikwembu hi ku languta vanhu hinkwavo lava u va chumayelaka tanihi lava va amukelekaka eka Xikwembu, swilo swi ta ku fambela kahle tanihi murhumiwa wa xona.”

“Mi Na Swilo Hinkwaswo Leswi Nga Ta Mi Pfuna”

Samuel Herd loyi a nga xirho xa Huvo leyi Fumaka u sungule nkulumo yakwe hi ku vula leswi: “Vanhu van’wana va teka kamela yi bihile, hambiswiritano yi kota ku hanya emananga.” Hilaha ku fanaka varhumiwa va ni swilo hinkwaswo leswi nga ta va pfuna leswaku swi va fambela kahle entirhweni wa vona wo chumayela. Va nga pfuniwa hi swilo swa ntlhanu leswi landzelaka.

1. Ku rhandza Yehovha. (Matewu 22:37, 38) Swichudeni ana se swi kombise ku tiyimisela ka swona ku tirhela Yehovha.

2. Vutivi lebyi hlayisiweke bya Rito ra Xikwembu. Kamela yi hlayisa swakudya eka mafurha ya lunda ra yona. Hambiswiritano a yi nge tshiki ku dya yi tshembela eka swakudya leswi yi swi hlayiseke eka lunda ra yona. Hilaha ku fanaka, varhumiwa na vona a va fanelanga va tshembela ntsena eka swilo leswi va swi dyondzeke loko va ha ri eXikolweni xa Giliyadi, va fanele va ya emahlweni va tiwundla hi swakudya swa moya.

3. Ku rhandza vanhu. (Matewu 22:39) Swichudeni swi ni ntwela-vusiwana eka vanhu.

4. Ku va ni moya wa ku tinyiketela. (Pisalema 110:3) Loko murhumiwa a hela matimba, Yehovha u ta n’wi nyika matimba lama engetelekeke.—Esaya 40:29.

5. Matimba ya vuntshwa. Tanihi leswi kamela yi rhwalaka munhu yi tsemakanya mananga na yena, murhumiwa na yena u fanele a rhwala Mukreste-kuloni loyi vuxaka bya yena na Yehovha byi tsaneke. Sweswo swi lava matimba lamakulu, kambe varhumiwa va ha ri ni matimba ya vuntshwa.

Swin’wana Leswi A Swi Katseka Eka Nongonoko Wolowo

Michael Burnett loyi a nga muleteri wa le Giliyadi, u vule leswaku mihandzu ya almondi a yi ri exikarhi ka swilo swa risima leswi Yakobe a swi rhumeleke tanihi nyiko eka mufumi wa Muegipta. (Genesa 43:11) Tialmondi a ti ri ni tivhithamini leti akaka miri. Swichudeni swi dye tialmondi to tala ta moya loko swi ri karhi swi endla khoso. Swin’wana leswi swi swi dyondzeke i nkoka wa ku eneriseka hi leswi Yehovha a swi nyikaka swona swin’we ni ku dyondza ku hanya endhawini leyintshwa.

Mark Noumair loyi na yena a nga muleteri wa Giliyadi u hlamusele leswaku Rito ra Xikwembu ri fana ni “nkwama lowu teleke hi vutlhari.” (Yobo 28:18) Hi fanele hi pfula nkwama hi tirhisa leswi nga endzeni ka wona. Loko ntirho wa vurhumiwa wu nga vi hi ndlela leyi swichudeni a swi yi languterile, swi nga ha ehleketa hi muapostola Pawulo. Vadyondzisiwa va Yesu va n’wi rhumele endhawini ya ka vona ku ringana malembe ya kaye leswaku a ya chumayela. Ematshan’weni yo vula leswaku u fanele a ya tirhela endhawini yin’wana hi leswi a nga “xibya lexi hlawuriweke,” Pawulo u tirhe hi matimba laha a a ri kona. (Mintirho 9:15, 28-30) A swi olovi ku hanya hi leswi Yehovha a swi lavaka. Un’wana loyi a endleke hi ndlela yoleyo i Yonathani. Leswi Yonathani a swi xiyeke leswaku Davhida a a ri hosi leyi hlawuriweke hi Yehovha, a a ti yimisele ku n’wi seketela.

Eka xiyenge lexi nge: “Malandza Ya Xikwembu Ma Vulavula Hi Xivindzi,” swichudeni swi rungule mintokoto leyi swi veke na yona eku chumayeleni hi nkarhi wa khoso. Swo tala swa swona swi sungule tidyondzo ta Bibele. Ku landzele nkulumo leyi nge: “Ku Hlomisiwa Hi Nhlengeletano Ya Yehovha” leyi eka yona ku veke na mbulavurisano ni varhumiwa lava se va nga ni malembe va ri varhumiwa. Un’wana ni un’wana wa vona u hlamusele ndlela leyi a leteriweke ha yona leswaku a tirhisana ni nhlengeletano ya Xikwembu.

“Vana Murhumiwa La Tsakeke”

Gerrit Lösch, loyi a nga xirho xin’wana xa Huvo leyi Fumaka, u nyikele nkulumo-nkulu ya nongonoko wolowo leyi nge: “Vana Murhumiwa La Tsakeke.” U vule leswaku swilo leswi vanhu va vulaka leswaku swa tsakisa a swi tisi ntsako wa xiviri. (Swivuriso 14:13; Eklesiasta 2:10, 11) Ntsako wa hilaha ku nga heriki wu va kona loko u endla ku rhandza ka Xikwembu, hambileswi ku endla sweswo swi nga oloviki minkarhi yin’wana. Khoso ya Giliyadi a ku nga ri matlangwana kambe yi tise ku eneriseka lokukulu.

I swilo swo hlayanyana leswi nga endlaka leswaku Vakreste va ntiyiso va tsaka. (Pisalema 33:12; 1 Timotiya 1:11) Va hanya eparadeyisini ya moya naswona Bibele yi tshembisa leswaku ku nga ri khale misava yi ta va paradeyisi ya xiviri. Va kume xikongomelo xa vutomi ku nga ku tirhela Yehovha ni ku n’wi dzunisa. Ku engetela kwalaho va rhandziwa hi Yehovha na Yesu.

Xivulavuri xi ye emahlweni xi ku: “U ta va murhumiwa la tsakeke loko u dyondza ku eneriseka.” Ku rhandza vanhu ni ku va u rhandziwa i swin’wana leswi endlaka u tsaka. Rivalela vanhu lava ku dyoheleke ematshan’weni yo dzika eka swihoxo sweswo. Endlela vanhu van’wana leswinene, u pfuna lava tsaneke ni ku va rungulela mintokoto leyi tsakisaka. (Pisalema 41:1, 2; Mintirho 20:35) Ntsako wu kumeka loko munhu a tinyiketela entirhweni wo chumayela.—Luka 11:28.

Makwerhu Lösch u gimete hi ku vula a ku: “Yanani emahlweni tanihi varhumiwa lava tsakeke, naswona mi va ni ntsako lowu ringaniseriweke kambe mi dzika eku dzuniseni Xikwembu xa hina lexi tsakeke Yehovha swin’we ni ku endla van’wana leswaku va tsaka.”

Endzhaku ko hundzisa marungula lama sukaka ematikweni yo hambana-hambana, makwerhu Anthony Morris u nyike swichudeni tidiploma ta swona. Muyimeri wa ntlawa wa vu-126 u hlaye papila leri kongomisiweke eka Huvo leyi Fumaka. Eka rona swichudeni swi phofule ndlela leyi swi tlangelaka ha yona ku va swi ve kona eXikolweni xa Giliyadi.

Loko mutshama-xitulu a gimeta, u vulavule hi “misiha yo hlanganisa marhambu” leyi hlanganisaka miri, tanihi leyi fanekiselaka matshalatshala ni malunghiselelo lawa “hlonga ro tshembeka ni ro tlhariha” ri ma endlaka leswaku ri phamela vanhu va Yehovha swakudya leswi akaka miri ni ku tlhela ri va kongomisa. (Vakolosa 2:18, 19; Matewu 24:45) Loko mathwasana ya Giliyadi ma tirhisana hilaha ku heleleke ni vayimeri va Xikwembu, ma ta humelela eku hetisiseni ka ntirho wa wona hi xitalo.—2 Timotiya 4:5.

[Bokisi leri nga eka tluka 30]

TINHLAYO TA NTLAWA

Nhlayo ya matiko lama yimeriweke: 6

Nhlayo ya matiko lawa va averiweke eka wona: 22

Nhlayo ya swichudeni: 56

Nhlayo ya mimpatswa: 28

Xiringaniso xa malembe: 32.8 Xiringaniso xa malembe entiyisweni: 17.9

Xiringaniso xa malembe evutirhelini bya nkarhi hinkwawo: 13.5

LAHA SWICHUDENI SWI AVERIWEKE KONA

Swichudeni swi averiwe eAfrika Dzonga, Benin, Bolivia, Bulgaria, Burkina Faso, Cameroon, Costa Rica, Ghana, Guatemala, Honduras, Kenya, Liberia, Madagascar, Mozambique, Nicaragua, Panama, Paraguay, Peru, Romania, Sierra Leone, Togo na Uganda.

[Xifaniso lexi nga eka tluka 31]

Ntlawa Wa Vu-126 Lowu Thwasaka Wa Xikolo Xa Bibele Xa Giliyadi Xa Watchtower

Tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Kirchhoff, K.; Nichols, C.; Guzmán, Y.; Coil, H.; Becker, O.; De Simone, A. (2) Manzanares, A.; Bouvier, E.; Peddle, J.; Mason, H.; Braz, J. (3) Lee, J.; Forte, A.; Boucher, T.; Marsh, A.; Leighton, S.; Glover, M. (4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. (5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. (6) Leighton, G.; Pacho, A.; Van Campen, B.; Manzanares, A.; Rivard, A.; Lee, Y.; Titmas, L. (7) Boucher, M.; Coil, K.; Marsh, C.; Guzmán, J.; Jones, W.; Kambach, J. (8) Glover, A.; Ferreira, G.; Mason, E.; Forte, D.; Davis, N.; Chicas, O.; Rivard, Y. (9) Braz, D.; Van Campen, D.; Morales, A.; De Simone, M.; Becker, M.; Peddle, D.