Lava Faneriwaka Hi Ku Amukela Mfumo
“Lexi i xitiyisekiso xa vuavanyisi byo lulama bya Xikwembu, lexi endlaka leswaku mi hlayiwa mi ri lava faneriwaka hi mfumo wa Xikwembu.”—2 TES. 1:5.
1, 2. Hi xihi xikongomelo xa Xikwembu xo avanyisa, naswona i mani la nga ta avanyisa?
KWALOMU ka lembe ra 50 C.E., muapostola Pawulo a a ri eAtena. Leswi a a nyangatsiwa hileswi vanhu vo tala a va gandzela swifaniso swa hava, u susumeteleke ku nyikela vumbhoni lebyinene. U gimete hi marito lawa ma faneleke ma khumbe timbilu ta vayingiseri vakwe va vahedeni. U te: “Sweswi [Xikwembu] xi byela vanhu hinkwako-nkwako leswaku va fanele va hundzuka. Hikuva xi veke siku leri xi nga ni xikongomelo xo avanyisa misava leyi akiweke hi ku lulama hi wanuna loyi xi n’wi vekeke, naswona xi nyike xitiyisekiso eka vanhu hinkwavo hi ku n’wi pfuxa eka lava feke.”—Mint. 17:30, 31.
2 I swa nkoka ku anakanya hi mhaka ya leswaku Xikwembu xi veke siku leri xi nga ta avanyisa vanhu ha rona. Muavanyisi wa kona ku ta va ku ri munhu loyi Pawulo a nga n’wi boxangiki hi vito enkulumeni ya yena le Atena, kambe loyi hi swi tivaka leswaku i Yesu Kreste la pfuxiweke eku feni. Ku avanyisiwa hi Yesu swi ta vula vutomi kumbe rifu.
3. Ha yini Yehovha a endle ntwanano na Abrahama, naswona i mani la endlaka ntirho wa nkoka eku hetisekeni ka wona?
3 Siku rero ra Vuavanyisi ri ta va ri lehe malembe ya 1 000. Yesu hi yena a nga ta avanyisa naswona u vekiwe hi Yehovha leswaku a va Hosi eMfun’weni wa Xikwembu, kambe a nge avanyisi a ri yexe. Yehovha u hlawule van’wana exikarhi ka vanhu leswaku va ya fuma na Yesu ni ku avanyisa swin’we na yena hi siku leri leheke gidi ra malembe. (Ringanisa Luka 22:29, 30.) Kwalomu ka malembe ya 4 000 lama hundzeke, Yehovha u veke xisekelo xa Siku ra Vuavanyisi loko a endla ntwanano na Abrahama nandza wakwe wo tshembeka. (Hlaya Genesa 22:17, 18.) Entiyisweni, ntwanano wolowo wu sungule ku tirha hi 1943 B.C.E. Kahle-kahle, Abrahama a nga yi twisisanga hi vuenti ndlela leyi ntwanano a wu ta va khumba ha yona vanhu. Kambe, namuntlha hina ha swi vona leswi ntwanano lowu wu vulaka swona, hikuva mbewu ya Abrahama yi endla ntirho wa nkoka eku hetisekeni ka xikongomelo xa Xikwembu xo avanyisa vanhu.
4, 5. (a) I mani lonkulu eka mbewu ya Abrahama naswona u vule yini hi Mfumo? (b) Xana lava a va ta va swirho eka lunghiselelo ra Mfumo va wu kume rini ntshembo wa kona?
4 Lonkulu eka mbewu yoleyo ya Abrahama ku ve Yesu, loyi a totiweke hi moya lowo kwetsima hi 29 C.E., kutani a va Mesiya la tshembisiweke kumbe Kreste. (Gal. 3:16) Yesu a a ta heta malembe manharhu ni hafu lama landzelaka a ri karhi a chumayela mahungu lamanene ya Mfumo erixakeni ra Vayuda. Endzhaku ka ku khomiwa ka Yohane Mukhuvuri, Yesu u kombise leswaku van’wana a va ta va ni ntshembo wo va swirho swa Mfumo wolowo loko a ku: “Ku sukela emasikwini ya Yohane Mukhuvuri ku fikela sweswi mfumo wa matilo i pakani leyi vanhu va lwelaka ku yi fikelela, naswona lava va lwelaka ku yi fikelela va yi kuma.”—Mat. 11:12.
5 Lexi tsakisaka, loko a nga si vulavula hi lava a va ta “kuma” Mfumo wa le matilweni, Yesu u te: “Ndzi tiyisile ndzi ri eka n’wina, Exikarhi ka lava velekiweke hi vavasati a ku si humelela lonkulu eka Yohane Mukhuvuri; kambe munhu lontsongo emfun’weni wa matilo u nkulu eka yena.” (Mat. 11:11) Ha yini a vule sweswo? Hikuva vanhu lavo tshembeka a va nga nyikiwanga ntshembo wo va swirho eka lunghiselelo ra Mfumo kukondza va chululeriwa moya lowo kwetsima hi Pentekosta ya 33 C.E. Enkarhini wolowo, Yohane Mukhuvuri se a a file.—Mint. 2:1-4.
Mbewu Ya Abrahama Yi Vuriwe Leyi Lulameke
6, 7. (a) Mbewu ya Abrahama a yi ta “fana ni tinyeleti ta matilo” hi ndlela yihi? (b) Abrahama u katekisiwe hi yini, naswona mbewu ya yena yi kuma nkateko lowu fanaka na wolowo hi ndlela yihi?
6 Abrahama u byeriwe leswaku mbewu yakwe a yi ta andza kutani yi “fana ni tinyeleti ta matilo” ni sava ra le ribuweni ra lwandle. (Gen. 13:16; 22:17) Hi marito man’wana, enkarhini wa Abrahama vanhu a va nga ta swi tiva leswaku i vanhu vangani lava a va ta vumba mbewu ya kona. Hambiswiritano, nhlayo leyi heleleke ya mbewu ya yena ya moya yi hetelele yi paluxiwile. A ku ta va Yesu ni lava 144 000.—Nhlav. 7:4; 14:1.
7 Rito ra Xikwembu ri vula leswi landzelaka malunghana ni ripfumelo ra Abrahama: “[Abrahama] a va ni ripfumelo eka Yehovha; a swi hlaya eka yena leswaku i ku lulama.” (Gen. 15:5, 6) I ntiyiso leswaku a nga kona munhu la lulameke hi ku hetiseka. (Yak. 3:2) Nilokoswiritano, hikwalaho ka ripfumelo ra Abrahama lerikulu, Yehovha u tirhisane na yena ku fana ni munhu loyi a lulameke hakunene naswona u tlhele a n’wi vitana munghana wa yena. (Esa. 41:8) Lava va vumbaka mbewu ya Abrahama ya moya swin’we na Yesu na vona va vuriwe lava lulameke, naswona va kuma mikateko leyikulu ku tlula ya Abrahama.
8. Hi yihi mikateko leyi kumiwaka hi swirho swa mbewu ya Abrahama?
8 Vakreste lava totiweke va vuriwa lava lulameke hileswi va kombisaka ripfumelo egandzelweni ra nkutsulo ra Yesu. (Rhom. 3:24, 28) Emahlweni ka Yehovha a va ha ri na xidyoho naswona va nga totiwa hi moya lowo kwetsima leswaku va va vana va moya va Xikwembu, vamakwavo va Yesu Kreste. (Yoh. 1:12, 13) Va nghena entwananweni lowuntshwa naswona va vumba tiko lerintshwa, “Israyele wa Xikwembu.” (Gal. 6:16; Luka 22:20) Rolero i lunghelo lerikulu! Hikwalaho ka leswi Xikwembu xi va endleleke swona, Vakreste lava totiweke a va na ntshembo wo hanya emisaveni hilaha ku nga heriki. Va swi amukela hi mbilu hinkwayo ku hundziwa hi lunghelo rero, hikwalaho ka ntshembo wa vona lowu tsakisaka ngopfu wa ku va swin’we na Yesu hi Siku ra Vuavanyisi va fuma na yena ematilweni.—Hlaya Varhoma 8:17.
9, 10. (a) Vakreste va totiwe rini ro sungula hi moya lowo kwetsima, naswona a va ha ta langutana na yini? (b) Hi xihi xikhutazo lexi va xi kumeke?
9 Hi Pentekosta ya 33 C.E., ntlawa wa vanhu lava tshembekaka wu nyikiwe lunghelo ro va van’wana lava nga ta fuma na Yesu hi Siku ra Vuavanyisi. Vadyondzisiwa va Yesu va kwalomu ka 120 va khuvuriwe hi moya lowo kwetsima kutani va va Vakreste vo sungula lava totiweke. Hambiswiritano, wolawo a ko va masungulo ntsena. Ku sukela kwalaho a va fanele va kombisa vutshembeki bya vona eka Yehovha hambileswi a va ta langutana ni miringo leyi Sathana a a ta va ringa ha yona. A va fanele va tshembeka kukondza va fa leswaku va ta kuma harhi ya vutomi bya le tilweni.—Nhlav. 2:10.
10 Hikwalaho ka sweswo, Yehovha u nyike Vakreste lava totiweke xikhutazo lexi a va xi lava hi ku tirhisa vandlha ra Vukreste ni Rito rakwe. Hi xikombiso, muapostola Pawulo u tsalele Vakreste lava totiweke va le Tesalonika a ku: ‘Hilaha tatana a va endlelaka hakona vana va yena, hi hambete hi khongotela un’wana ni un’wana wa n’wina, hi mi chavelela ni ku mi nyikela vumbhoni, leswaku eku heteleleni mi ta hambeta mi famba hi mukhuva lowu fanelaka Xikwembu lexi xi mi vitanelaka emfun’weni wa xona ni le ku vangameni ka xona.’—1 Tes. 2:11, 12.
11. Hi wahi matsalwa lawa Yehovha a ma endleleke swirho swa “Israyele wa Xikwembu”?
11 Endzhaku ka makume ya malembe loko swirho swo sungula swa vandlha ra Vakreste lava totiweke swi hlawuriwile, Yehovha u vone swi fanerile leswaku ku tsariwa matimu ya vutirheli bya Yesu bya laha misaveni, swin’we ni ndlela leyi A hanyisaneke ha yona ni Vakreste lava totiweke va lembe-xidzana ro sungula ni ndzayo leyi a va nyikeke yona. Xisweswo Yehovha u engetele Matsalwa ya Vukreste ya Xigriki eka Matsalwa ya Xiheveru lama huhuteriweke lawa se a ma ri kona. Eku sunguleni Matsalwa ya Xiheveru a ma tsaleriwe Vaisrayele va nyama hi nkarhi lowu a a va ha ri ni vuxaka byo hlawuleka ni Xikwembu. Matsalwa ya Vukreste ya Xigriki eku sunguleni a ma tsaleriwe swirho leswi nga “Israyele wa Xikwembu,” leswi totiweke tanihi vamakwavo va Kreste ni vana va Xikwembu va moya. Sweswo a swi nga vuli swona leswaku lava nga riki Vaisrayele a va nga ta vuyeriwa hi ku hlaya Matsalwa ya Xiheveru. Hilaha ku fanaka, Vakreste lava nga totiwangiki hi moya lowo kwetsima va kuma mikateko yonghasi hi ku va va dyondza ni ku hanya hi ku pfumelelana ni ndzayo leyi nga eka Matsalwa ya Vukreste ya Xigriki.—Hlaya 2 Timotiya 3:15-17.
12. Pawulo u va tsundzuxe yini Vakreste lava totiweke?
12 Vakreste va lembe-xidzana ro sungula va vuriwe lava lulameke naswona va totiwe hi moya lowo kwetsima leswaku va kota ku kuma ndzhaka ya vona etilweni. Ku totiwa ka vona hi koxe a ku va endlanga tihosi ehenhla ka Vakreste-kulobye lava totiweke loko va ha ri emisaveni. Kambe Vakreste van’wana va khale va honise mhaka leyi kutani va sungula ku tilavela xikhundlha lexi nga fanelangiki exikarhi ka vamakwavo evandlheni. Hikwalaho, Pawulo u kale a va vutisa a ku: “Ana se mi enerisekile, a hi swona ke? Ana se mi fuwile, a hi swona ke? Mi sungule ku va tihosi hi nga ri kona, a hi swona ke? Hakunene a ndzi navela leswaku mi va mi sungule ku va tihosi, leswaku na hina hi ta va tihosi swin’we na n’wina.” (1 Kor. 4:8) Hikwalaho, Pawulo u tsundzuxe vatotiwa va le nkarhini wa yena a ku: “Ku nga ri swona leswaku hi valawuri va ripfumelo ra n’wina, kambe hi vatirhi-kuloni entsakweni wa n’wina.”—2 Kor. 1:24.
Ku Hlanganisiwa Ka Nhlayo Leyi Profetiweke
13. Xana ku hlawuriwa ka vatotiwa ku fambe njhani endzhaku ka 33 C.E.?
13 A hi Vakreste hinkwavo lava totiweke va 144 000 lava hlawuriweke eka lembe-xidzana ro sungula. Ku hlawuriwa ka vona ku hambetile enkarhini wa vaapostola kutani hi ku famba ka nkarhi a va nga ha talanga lava hlawuriwaka. Hambiswiritano, ku hlawuriwa ka vona ku hambetile eka malembe-xidzana lama landzeleke ku ta fikela enkarhini wa hina. (Mat. 28:20) Eku heteleleni, endzhaku ka loko Yesu a sungule ku fuma hi 1914, ku ve ni swiendlakalo swo tala.
14, 15. I yini lexi humeleleke enkarhini wa hina malunghana ni ku hlawuriwa ka vatotiwa?
14 Xo sungula, Yesu u basise matilo a susa xin’wana ni xin’wana lexi a xi ta lwisana ni Mfumo wa Xikwembu. (Hlaya Nhlavutelo 12:10, 12.) Kutani u tlhele a ya emahlweni ni ku hlengeleta masalela ya swirho swa Mfumo wakwe leswaku ku hlanganisiwa nhlayo ya 144 000. Exikarhi ka va-1930, a swi ri erivaleni leswaku ntirho wolowo wu le kusuhi ni ku hela naswona vo tala lava amukelaka ntiyiso a va nga swi naveli ku ya hanya etilweni. Moya a wu nga nyikeli vumbhoni swin’we na vona leswaku i vana va Xikwembu. (Ringanisa Varhoma 8:16.) Ku ri na sweswo, a va swi xiya leswaku a va ri “tinyimpfu tin’wana,” leti nga ni ntshembo wo hanya hilaha ku nga heriki emisaveni leyi nga paradeyisi. (Yoh. 10:16) Hikwalaho, endzhaku ka 1935 ntirho wo chumayela a wu endliwa hi xikongomelo xo hlengeleta “ntshungu lowukulu,” lowu voniweke hi muapostola Yohane exivonweni xakwe, lowu nga ta pona ‘nhlomulo lowukulu.’—Nhlav. 7:9, 10, 14.
15 Hambiswiritano, endzhaku ka va-1930, vanhu va nga ri vangani va hlawuriwile leswaku va va ni ntshembo wo ya hanya etilweni. Ha yini? Minkarhi yin’wana a va siva vanhu lava a va hlawuriwile eku sunguleni kambe va nga tshembekangiki. (Ringanisa Nhlavutelo 3:16.) Pawulo u vulavule hi vanhu van’wana lava a a va tiva lava a va tshike ntiyiso. (Filp. 3:17-19) Xana Yehovha a a ta hlawula vamani leswaku va siva vanhu volavo? Xiboho xexo xi ta endliwa hi yena. Hambiswiritano, swi le rivaleni leswaku a a nga ta hlawula lava ha ku hundzukaka, kambe a a ta hlawula vanhu lava ana se a va kombise vutshembeki bya vona ku fana ni vadyondzisiwa lava Yesu a vulavuleke na vona loko a endla Xitsundzuxo xo sungula.a—Luka 22:28.
16. I yini leswi hi swi tlangelaka malunghana ni vatotiwa, naswona i yini lexi hi nga tiyisekaka ha xona?
16 Kambe swi tikomba onge a hi hinkwavo lava kumeke ntshembo wa ku ya hanya etilweni ku sukela hi va-1930 lava hlawuleriwaka ku siva lava xandzukeke. Yehovha u tiyisekise leswaku Vakreste lava totiweke va ta va va ha ri kona laha misaveni emasikwini ya makumu ya mafambiselo lawa ya swilo, lawa hi nga eka wona, kukondza ku lovisiwa “Babilona Lonkulu.”b (Nhlav. 17:5) Hi nga tiyiseka leswaku nhlayo leyi heleleke ya swirho swa 144 000 yi ta helela hi nkarhi wa Yehovha lowu vekiweke ni leswaku hinkwavo va ta va valawuri eMfun’weni. Nakambe hi nga tshemba Rito ra vuprofeta leri vuleke leswaku ntshungu lowukulu lowu yaka wu andza wu ta hambeta wu tikombisa wu ri lowu tshembekaka. Ku nga ri khale wu ta ‘huma enhlomulweni lowukulu’ lowu tisiweke emisaveni ya Sathana kutani wu ta nghena emisaveni leyintshwa ya Xikwembu wu tsakile.
Swirho Swa Hulumendhe Ya Xikwembu Swi Le Kusuhi Ni Ku Helela!
17. Hi ku ya hi 1 Vatesalonika 4:15-17 na Nhlavutelo 6:9-11, ku humelele yini hi Vakreste lava totiweke lava feke va tshembekile?
17 Ku sukela hi 33 C.E., makume ya magidi ya Vakreste lava totiweke va kombise ripfumelo leri tiyeke naswona va tshame va tshembekile kukondza va fa. Ana se va voniwe va ri lava faneriwaka hi ku amukela Mfumo naswona va kume hakelo ya vona ya le tilweni, ku sukela loko Kreste a sungula ku fuma.—Hlaya 1 Vatesalonika 4:15-17; Nhlavutelo 6:9-11.
18. (a) I yini lexi vatotiwa lava ha saleke laha misaveni va tiyisekaka ha xona? (b) Xana lava tinyimpfu tin’wana va titwa njhani hi vamakwavo lava totiweke?
18 Vatotiwa lava ha riki misaveni va tiyiseka leswaku loko vo tshama va tshembekile, ku nga ri khale va ta kuma hakelo ya vona ya le tilweni. Tinyimpfu tin’wana ta timiliyoni, loko ti anakanyisisa hi ripfumelo ra vamakwavo va tona lava totiweke, ti yima ni marito ya muapostola Pawulo, la vuleke leswi hi vamakwavo lava totiweke va le Tesalonika: “Hina ha tinyungubyisa ha n’wina exikarhi ka mavandlha ya Xikwembu hikwalaho ka ku tiyisela ka n’wina ni ripfumelo ra n’wina leri mi xanisekaka hikwalaho ka rona ni mahlomulo lawa mi ma tiyiselaka. Lexi i xitiyisekiso xa vuavanyisi byo lulama bya Xikwembu, lexi endlaka leswaku mi hlayiwa mi ri lava faneriwaka hi mfumo wa Xikwembu, lowu hakunene mi xanisekaka ha wona.” (2 Tes 1:3-5) Hulumendhe ya Xikwembu ya le tilweni yi ta va yi helerile loko ku fa xirho xo hetelela xa lava totiweke emisaveni. Hakunene ku ta va ni ntsako lowukulu etilweni ni le misaveni!
[Tinhlamuselo ta le hansi]
b Vona “Swivutiso Swa Vahlayi” eka Xihondzo xo Rindza xa May 1, 2007.
Xana U Nga Hlamusela?
• I yini leswi Xikwembu xi swi paluxeleke Abrahama leswi fambelanaka ni Siku ra Vuavanyisi?
• Ha yini Abrahama a vuriwe la lulameke?
• Lava mbewu ya Abrahama va kuma mikateko yihi hileswi va vuriweke lavo lulama?
• I yini lexi Vakreste hinkwavo va tiyisekaka ha xona?
[Xifaniso eka tluka 20]
Yesu u khutaze valandzeri vakwe leswaku va fanelekela Mfumo
[Xifaniso eka tluka 21]
Hi Pentekosta ya 33 C.E., Yehovha u sungule ku hlawula swirho leswin’wana swa mbewu ya Abrahama
[Swifaniso eka tluka 23]
Tinyimpfu tin’wana ta tsaka leswi Vakreste lava totiweke va ha riki na tona emasikwini lawa ya makumu