Ndlela Yo Kuma Ntsako

HINKWERHU ha swi lava ku tshama hi tsakile, a swi tano ke?— Kambe vanhu vo tala a va tsakanga. Xana wa swi tiva leswaku hikwalaho ka yini?— Hikuva a va xi tivi xihundla xa ntsako. Va ehleketa leswaku loko vo kuma swilo swo tala va ta tsaka. Kambe, loko se va swi kumile, a va tsaki nkarhi wo leha.

Hi lexi xihundla xa ntsako. Mudyondzisi Lonkulu u te: “Ku nyika swi tisa ntsako lowukulu ku tlula ku amukela.” (Mintirho 20:35) Kutani hi yihi ndlela yo kuma ntsako?— Ina, i ku nyika ni ku endlela van’wana swilo swo karhi. Xana a wu swi tiva sweswo?—

A hi tlhele hi anakanyisisa hi mhaka leyi. Xana Yesu a a vula leswaku munhu loyi a amukelaka nyiko a nge wu kumi ntsako?— Doo! Wa swi lava ku kuma tinyiko, a swi tano ke?— Munhu un’wana ni un’wana wa swi lava. Ha tsaka loko hi nyikiwa swilo leswinene.

Kambe Yesu u vule leswaku loko hi nyika, hi va ni ntsako lowu engetelekeke. Xana u ehleketa leswaku i mani munhu loyi a nyikeke vanhu swilo swo tala ku tlula vanhu hinkwavo?— Ina, i Yehovha Xikwembu.

Bibele yi vula leswaku Xikwembu “xi nyika vanhu hinkwavo vutomi ni ku hefemula ni swilo hinkwaswo.” Xi hi nyika timpfula leti humaka ematilweni xi tlhela xi hi nyika masana ya dyambu leswaku swimilana swi ta kula kutani hi kuma swakudya eka swona. (Mintirho 14:17; 17:25) A swi hlamarisi leswi Bibele yi vulaka leswaku Yehovha i “Xikwembu lexi tsakeke”! (1 Timotiya 1:11) Ku nyika vanhu i xin’wana xa swilo leswi endlaka leswaku Xikwembu xi tshama xi tsakile. Na hina hi ta tsaka loko hi nyika van’wana.

Xana hi swihi swilo leswi hi nga swi nyikaka vanhu van’wana? Xana u nga ku yini?— Minkarhi yin’wana nyiko yi lava mali. Loko ku ri nyiko leyi kumekaka exitolo, u fanele u yi xava. Kutani, loko u lava ku nyika munhu nyiko leyi xaviwaka kunene, u fanele u veka mali kukondza yi ringana ku xava nyiko yoleyo.

Kambe a hi tinyiko hinkwato ti xaviwaka. Hi xikombiso, loko dyambu ri hisa, mati yo titimela ma phyuphyisa swinene. Kutani loko wo ma nyika munhu la khomiweke hi torha, sweswo swi ta endla leswaku u kuma ntsako.

Kumbexana siku rin’wana wena ni mana wa wena mi nga baka makokisi. Sweswo swi ta va leswi tsakisaka. Kambe u nga endla yini hi man’wana ya makokisi wolawo, lexi nga ku endlaka u tsaka swinene, ku tlula ku ma dya hinkwawo u ri wexe?— Man’wana u nga ha ma nyika un’wana wa vanghana va wena. Xana u nga swi tsakela ku endla leswi siku rin’wana?—

Mudyondzisi Lonkulu swin’we ni vaapostola va yena hinkwavo, a va wu tiva ntsako lowu tisiwaka hi ku nyika. Xana wa swi tiva leswaku va va nyike yini vanhu van’wana?— Va va nyike nchumu wa nkoka swinene emisaveni! A va tiva ntiyiso mayelana ni Xikwembu, naswona va swi tsakerile ku byela vanhu van’wana mahungu lawa lamanene. Naswona a va nga hakerisi munhu.

Siku rin’wana muapostola Pawulo swin’we ni munghana wa yena lonene, ku nga mudyondzisiwa Luka, va hlangane ni wansati loyi na yena a a lava ku kuma ntsako lowu tisiwaka hi ku nyika. Va hlangane na yena enambyeni. Pawulo na Luka va ye enambyeni wolowo hikwalaho ka leswi va tweke leswaku ku khongeriwa kona. Hakunene a swi ri tano, loko va fika, va kume vavasati van’wana va ri karhi va khongela.

Pawulo u sungule ku byela vavasati lava hi mahungu lamanene ya Yehovha Xikwembu ni Mfumo wa yena. Un’wana wa vavasati lava a ku ri Lidiya naswona a a rhiye ndleve. Endzhaku ka sweswo, Lidiya u lave ku endla xo karhi ku kombisa leswaku hakunene a a ma rhandza mahungu lamanene lawa a ma tweke. Hiloko a kombela Pawulo na Luka a ku: “Loko n’wina mi ndzi avanyise leswaku ndzi tshembekile eka Yehovha, nghenani endlwini ya mina mi tshama.” Hiloko a va sindzisa leswaku va ya ekaya rakwe.—Mintirho 16:13-15.

Lidiya a a tsakile hi leswi a a endzeriwe hi malandza lawa ya Xikwembu ekaya rakwe. A a ma rhandza hikwalaho ka leswi ma n’wi pfuneke leswaku a tiva Yehovha na Yesu ni ku tiva leswi vanhu va nga swi endlaka leswaku va hanya hilaha ku nga heriki. Swi n’wi tsakisile swinene ku nyika Pawulo na Luka swakudya ni ndhawu ya ku wisa. Ku nyika swi endle Lidiya a tsaka hikuva u swi endle swi huma embilwini. Lowu i nchumu lowu hi faneleke hi wu tsundzuka. Munhu un’wana a nga hi byela leswaku hi humesa nyiko yo karhi. Kambe loko swi nga humi embilwini, a hi nge tsaki hambiloko hi yi humesile.

Hi xikombiso, a hi nge u ni swiwitsi leswi a wu lava ku swi dya? Loko ndzo ku byela leswaku u pambulela n’wana un’wana, xana u nga tsaka?— Kambe ku vuriwa yini hi loko u ri ni swiwitsi loko u hlangana ni munghana loyi u n’wi rhandzaka swinene? Loko wo nyika munghana wa wena swiwitsi hikwalaho ko susumetiwa hi mbilu ya wena, u nga kombelanga hi munhu, xana sweswo a swi nga ta ku tsakisa?—

Minkarhi yin’wana hi rhandza munhu swinene lerova hi navela ku n’wi nyika swilo hinkwaswo, hina hi nga sali na nchumu. Loko hi ya hi rhandza Xikwembu, hi fanele hi titwa hi ndlela yoleyo ha xona.

Mudyondzisi Lonkulu a a tiva wansati la nga xisiwana, loyi a a titwa hi ndlela yoleyo. U n’wi vone etempeleni le Yerusalema. Wansati loyi, a a ri ni swimalana swimbirhi ntsena swa nsimbi. Kambe havumbirhi bya swona u nyikele ha swona hi ku swi hoxa ebokisini ra munyikelo wa tempele. A nga sindzisiwanga hi munhu ku nyikela ha swona. Vanhu vo tala lava a va ri kwalaho, a va nga swi tivi ni leswaku u nyikerile. A a swi endla swi huma embilwini hikuva a a rhandza Yehovha. Swi n’wi tsakisile ku va a kote ku nyikela.—Luka 21:1-4.

Ku ni tindlela to tala leti hi nga nyikaka ha tona. Xana ti kona tin’wana leti u ti ehleketaka?— Loko hi nyika swi huma embilwini, hi ta tsaka. Hi yona mhaka leyi Mudyondzisi Lonkulu a hi byelaka a ku: “Hanyani hi ku nyika.” (Luka 6:38) Loko hi nyika, hi ta endla leswaku vanhu van’wana va tsaka. Kambe hi hina hi nga ta tsaka ku va tlula!