Xana Ku Laveka Vutivi Leswaku Munhu A Va ni Ripfumelo?

Nhloko ya xikolo xo dyondzela vufundhisi xa le United States, yi ri: “Ku ni vanhu vo tala swinene lava tivulaka ‘vapfumeri’ lava hundzukaka vapfumeri hi leswi va nga laviki ku anakanyisisa.” Ya engetela: “Va lava ku amukela xin’wana ni xin’wana ‘handle ko lava vumbhoni.’”

LESWI swi vula leswaku vanhu vo tala lava vulaka leswaku va ni ripfumelo, a va tali ku tivutisa leswaku ha yini va pfumela leswi va pfumelaka eka swona kumbe ku lava ku tiva loko ku ri ni xisekelo lexi twalaka malunghana ni leswi va pfumelaka eka swona. A swi hlamarisi leswi vo tala va nga ha swi laviki ku vulavula hi vukhongeri.

Lexi vavisaka, mikhuva yo tanihi ku tirhisa swifaniso swa vukhongeri ni ku phindha-phindha swikhongelo leswi nhlokohatiweke, na yona yi endla leswaku vanhu va nga anakanyi. Mikhuva leyi swin’we ni miako leyi akiweke hi vutshila lebyi hlamarisaka, mafasitere lamakulu lama sasekisiweke ni vuyimbeleri lebyi nyanyulaka, hi leswi vanhu va timiliyoni va tivaka swona hi vukhongeri. Hambileswi tikereke tin’wana ti vulaka leswaku ripfumelo ra tona ri sekeriwe eBibeleni, rungula ra tona leri nge ‘pfumela eka Yesu kutani u ta ponisiwa’ ri endla leswaku vanhu va nga tikarhati hi ku dyondza Bibele. Van’wana va chumayela hi timhaka ta ntshamisano ni ta tipolitiki. Hi byihi vuyelo bya swilo leswi hinkwaswo?

Mutsari un’wana wa vukhongeri wa le Amerika N’walungu u vule leswi malunghana ni xiyimo lexi: “Vukreste . . . a bya ha ri na ntikelo, [naswona] valandzeri va byona a va dyondzisiwi nchumu hi ta ripfumelo.” Munhu un’wana la fambisaka nhlawulo u kale a vula leswaku United States i “tiko ra vanhu lava nga tiviki nchumu hi Bibele.” Entiyisweni, marito lawa ma tirha ni le matikweni man’wana laha ku nga tala vanhu lava tivulaka Vakreste. Vukhongeri byo tala lebyi nga riki bya Vukreste na byona a byi swi khutazi ku anakanyisisa, ku ri na sweswo byi kandziyisa ku yimbelela, ku landzelela mukhuva wo karhi wo endla swikhongelo ni mikhuva yin’wana leyi katsaka tidyondzo leti nga riki na xisekelo, ematshan’weni yo va ni tidyondzo leti twisisekaka.

Kambe, eka vutomi bya vona bya siku na siku, vanhu volavo lava nga anakanyisisiki hi ku pakanisa kumbe ku tshembeka ka tidyondzo ta vukhongeri bya vona, hakanyingi va anakanyisisa hi vukheta eka timhaka tin’wana. Xana a swi nga ta ku hlamarisa loko munhu loyi a endlaka ndzavisiso lowukulu loko a lava ku xava movha—lowu siku rin’wana wu nga ta helela etaleni—a vula leswi landzelaka malunghana ni vukhongeri, ‘Loko byi va enerisile vatswari va mina, na mina byi ta ndzi enerisa’?

Loko hi swi tsakela hakunene ku tsakisa Xikwembu, xana a hi nga ta lava ku tiyiseka loko swilo leswi hi swi pfumelaka malunghana na xona swi ri ntiyiso? Muapostola Pawulo u vulavule hi vanhu vo karhi va vukhongeri va le sikwini ra yena lava a “va xi hisekela Xikwembu; kambe ku nga ri hikwalaho ka vutivi lebyi kongomeke.” (Varhoma 10:2) Vanhu vo tano va nga fanisiwa ni mupendi la hirhiweke, la tirhaka hi matimba leswaku a penda yindlu kambe a tirhisa mivala leyi hoxeke, hikwalaho ka leswi a nga swi laviki ku yingisa swileriso swa n’wini wa yindlu. Mupendi a nga ha tsakisiwa hi ntirho wa yena, kambe xana n’wini wa yindlu u ta tsaka?

I yini leswi amukelekaka eka Xikwembu malunghana ni vugandzeri bya ntiyiso? Bibele ya hlamula: “Leswi i swinene naswona swa amukeleka emahlweni ka Muponisi wa hina, ku nga Xikwembu, lexi rhandzaka leswaku vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Timotiya 2:3, 4) Van’wana va nga ha anakanya leswaku a swi koteki ku kuma vutivi byo tano exikarhi ka vukhongeri byo tala lebyi nga kona namuntlha. Kambe anakanya—loko ku ri ku rhandza ka Xikwembu leswaku vanhu va fikelela vutivi lebyi kongomeke bya ntiyiso, xana xi nga va tumbetela byona? Sweswo a swi nge fambisani ni Bibele hikuva yi ri: ‘Loko u lavisisa Xikwembu, xi ta endla leswaku u xi kuma.’—1 Tikronika 28:9.

Xikwembu xi titivisa njhani eka lava va xi lavisisaka hi mbilu hinkwayo? Xihloko lexi landzelaka xi ta nyikela nhlamulo.