Nkutsulo Wu Tiyisekisa Vululami Bya Xikwembu

ENDZHAKU ka ku xandzuka ka Adamu na Evha, Yehovha u hlamusele xikongomelo xa yena xo tisa Mbewu leyi a yi ta lumiwa xirhendze. (Genesa 3:15) Sweswo swi hetiseke loko valala va Xikwembu va endle leswaku Yesu Kreste a fa emhandzini ya nxaniso. (Vagalatiya 3:13, 16) Yesu a a nga ri na xidyoho hikuva matimba ya moya lowo kwetsima ma endle leswaku a tikiwa hi ndlela ya singita embelekweni wa wanhwana. Hikwalaho, ngati yakwe leyi halatiweke a yi ta tirhisiwa tanihi nkutsulo wo ntshunxa vanhu, lava kumeke ndzhaka ya xidyoho ni rifu eka Adamu.—Varhoma 5:12, 19.

A wu kona nchumu lowu nga sivelaka Yehovha, Xikwembu xa matimba hinkwawo ku hetisisa swikongomelo swakwe. Xisweswo, endzhaku ko va munhu a dyohile, a swi fana ni loko nkutsulo ana se wu hakeriwile hi ku ya hi Yehovha, kutani a a ta tirhisana ni lava kombisaka ripfumelo eku hetisekeni ka switshembiso swa yena. Sweswo swi endle leswaku vana va Adamu lava nga ni vudyoho, vo tanihi Enoko, Nowa na Abrahama va kota ku famba ni Xikwembu va tlhela va va ni vunghana na xona, handle ko nyamisa vukwetsimi bya xona.—Genesa 5:24; 6:9; Yakobo 2:23.

Vanhu van’wana lava veke ni ripfumelo eka Yehovha va endle swidyoho leswikulu. Xikombiso xin’wana i Hosi Davhida. U nga ha vutisa: ‘Xana Yehovha u hambete a katekisa Hosi Davhida hi ndlela yihi, endzhaku ka loko Davhida a endle vuoswi na Bati-xeba a tlhela a endla leswaku nuna wa yena Uriya a dlayiwa?’ Mhaka ya nkoka i ku hundzuka ka Davhida swi huma embilwini kun’we ni ripfumelo rakwe. (2 Samuwele 11:1-17; 12:1-14) Hikwalaho ka xitlhavelo lexi Yesu Kreste a a ta xi nyikela endzhaku, Xikwembu xi rivalele Davhida la hundzukeke swidyoho swakwe, kambe xi tama xa ha namarhele vululami bya xona. (Pisalema 32:1, 2) Ku tiyisekisa mhaka yoleyo, Bibele yi hlamusela nchumu wa nkoka lowu hetisisiweke hi nkutsulo wa Yesu, ku nga “ku kombisa ku lulama ka [Xikwembu], hikuva a xi rivalela swidyoho leswi humeleleke enkarhini lowu hundzeke” ni le ‘nkarhini wa sweswi.’—Varhoma 3:25, 26.

Ina, vanhu va kuma mikateko leyikulu hikwalaho ka nkoka wa ngati ya Yesu. Hikwalaho ka nkutsulo, vadyohi lava tisolaka va nga va ni vuxaka lebyikulu ni Xikwembu. Ku engetela kwalaho, nkutsulo wu ta nyika lava feke lunghelo ro pfuxiwa va ya hanya emisaveni leyintshwa ya Xikwembu. Vona va ta katsa malandza yo tshembaka ya Xikwembu lama feke Yesu a nga si nyikela nkutsulo, kun’we ni vanhu vo tala lava feke va nga tivi nchumu, lava a va nga xi gandzeli. Bibele yi ri: “Ku ta va ni ku pfuxiwa ka lava lulameke ni ka lava nga lulamangiki.” (Mintirho 24:15) Enkarhini wolowo, Yehovha u ta nyika vanhu hinkwavo lava yingisaka vutomi lebyi nga heriki, hikwalaho ka nkutsulo. (Yohane 3:36) Yesu hi byakwe u hlamuserile: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Mikateko leyi hinkwayo yi ta kumiwa hi vanhu hikwalaho ka lunghiselelo ra Xikwembu ra gandzelo ra nkutsulo.

Hambiswiritano, nchumu wo hlawuleka malunghana ni nkutsulo a hi mikateko leyi hi yi kumaka hikwalaho ka wona. Xa nkoka swinene hi leswi nkutsulo wa Kreste wu swi endlaka malunghana ni vito ra Yehovha. Wu kombisa leswaku Yehovha i Xikwembu xa vululami lebyi hetisekeke lexi tirhisanaka ni vanhu lava dyoheke kambe xi tshama xi tengile ni ku kwetsima. Loko Xikwembu a xi nga endlanga lunghiselelo ra nkutsulo, a nga kona ntukulu wa Adamu, hambi ku ri Enoko, Nowa na Abrahama, loyi a a ta va a kote ku famba na Yehovha kumbe a va munghana wa yena. Mupisalema u swi xiyile leswi kutani a tsala a ku: “Loko a wu languta swihoxo, Wena Yah, Oho Yehovha, i mani loyi a a ta yima?” (Pisalema 130:3) Hakunene hi fanele hi nkhensa Yehovha hileswi a rhumeleke N’wana wakwe la rhandzekaka emisaveni hi tlhela hi nkhensa Yesu loyi hi ku swi rhandza a nyikeleke vutomi byakwe byi va nkutsulo eka hina!—Marka 10:45.