Kongomisa Swibakela Swa Wena Hi Vutlhari
1. Xana 1 Vakorinto 9:26 yi tirha njhani ensin’wini?
1 Muapostola Pawulo u tsale a ku: “Ndlela leyi ndzi tsutsumaka ha yona a yi kanakanisi; swibakela swa mina ndzi swi kongomisa hi ndlela leyi nga ta endla leswaku ndzi nga bi moya.” (1 Kor. 9:26) Pawulo a a vulavula hi tipakani leti a ti vekeleke tona to tirhela Yehovha hilaha ku engetelekeke. Hambiswiritano, marito lawa ma nga tirha ni le nsin’wini. Hi lava ku kongomisa “swibakela” kumbe matshalatshala ya hina hi vutlhari leswaku ku ta va ni vuyelo lebyinene. Njhani?
2. Xana hi nga n’wi tekelela njhani Pawulo ni vavuri van’wana va evhangeli va lembe-xidzana ro sungula hi ku hlawula nkarhi ni ndhawu yo chumayela eka yona?
2 Yanani Laha Vanhu Va Kumekaka Kona: Pawulo ni vavuri va evhangeli va lembe-xidzana ro sungula a va chumayela laha vanhu va kumekaka kona. (Mint. 5:42; 16:13; 17:17) Kutani loko vanhu vo tala ensin’wini ya hina va kumeka emakaya nimadyambu, lowu ku nga ha va nkarhi lowunene wo chumayela hi yindlu ni yindlu. Xana xitichi xa mabazi kumbe switimela xa le ndhawini ya ka n’wina xi va bizi nimixo kumbe nindzhenga loko vanhu va ya emintirhweni kumbe loko va vuya emakaya? Hi rini laha tindhawu ta mabindzu ti vaka ti tele hi vanhu? Ku chumayela exitarateni swi nga ha va leswi vuyerisaka swinene hi minkarhi yoleyo.
3. Xana hi nga swi kongomisa njhani swibakela swa hina eka ndlela leyi hi tirhaka nsimu ya hina ha yona?
3 Tirha Nsimu Hi Vutlhari: Nakambe hi fanele hi va ni nkhathalelo leswaku hi kongomisa swibakela swa hina hi vutlhari eka ndlela leyi hi tirhaka nsimu ya hina ha yona. Hi xikombiso, ematshan’weni yo famba ni ntlawa lowukulu endhawini leyi fanaka, laha ku lavekaka nkarhi ni matshalatshala yo endla leswaku ntlawa wolowo wu va lowu hlelekeke ni ku wu endla wu va bizi, swi nga va swinene ku wu ava hi le xikarhi. Hilaha ku fanaka, loko hi tirha nsimu ya le makaya, hi ta hlanganisa nsimu hi ku hatlisa ni ku va ni nkarhi wo tala wo vulavula ni vanhu loko mintlawa leyi fambaka hi timovha yi nga ri yikulu swinene. Xana hi nga kombela nsimu ya hina leyi nga ekusuhi ni le makaya ya hina, leswi nga ta endla leswaku hi hunguta nkarhi lowu lavekaka leswaku hi famba mpfhuka wo leha?
4. I yini leswi nga ta hi pfuna leswaku hi va “vaphasi va vanhu” lava humelelaka?
4 Yesu u fanise vavuri va evhangeli ni “vaphasi va vanhu.” (Mar. 1:17) Muphasi wa tinhlampfi a ngo veka rikoka ematini ntsena kambe u phasa tinhlampfi. Hikokwalaho, vaphasi va tinhlampfi lava humelelaka va ya laha ku nga ni tinhlampfi hi nkarhi lowu ti kumekaka ha wona kutani va sungula ku ti phasa handle ko dya nkarhi. Hakunene va kongomisa matshalatshala ya vona hi vutlhari. Onge hi nga kombisa ku chivirika loku fanaka ensin’wini ya hina!—Hev. 6:11.