Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? Loko swi ri tano, vona loko u nga hlamula swivutiso leswi landzelaka:

• Ha yini hi nga tiyisekaka leswaku ku hetiseka ka vuprofeta bya “matilo lamantshwa ni misava leyintshwa” eka Esaya 65:17-19 a ku nga katsi ku vuya ka Vayuda ntsena hi le vukhumbini?

Hikuva muapostola Petro na Yohane loko va tsala hi lembe-xidzana ro sungula C.E., va kombetele eku hetisekeni ka nkarhi lowu taka, loku katsaka mikateko leyi ya ha taka. (2 Petro 3:13; Nhlavutelo 21:1-4)—4/15, matluka 10-12.

• Xana xi nga va xi ri xihi xisekelo xa mintsheketo ya khale ya le Grikiya malunghana ni swikwembu-vanhu swa madzolonga?

Ku nga ha va ku ri ku sasekisiwa ni ku soholotiwa ka ntiyiso wa leswaku loko Ndhambi yi nga si endleka, tintsumi tin’wana ti tiambexe mimiri ya vanhu kutani ti va ni vukarhi ti tlhela ti tikhoma hi ndlela yo biha emisaveni. (Genesa 6:1, 2)—4/15, tluka 27.

• Hi wahi makhombo man’wana lawa Vakreste lava wupfeke va nga ma papalataka emicatweni?

I swa nkoka ku papalata minkhuvo ya huwa, leyi vaka kona loko byala byi kumiwa hi ku olova naswona ku ri ni vuyimbeleri lebyi nga ni pongo ni ku cina loku nga lawulekiki. Loko ku nga vuriwanga leswaku munhu un’wana ni un’wana u amukelekile ku ya enkhubyeni, lava va nga rhambiwangiki a va fanelanga va ya. Muteki u fanele a tiyiseka leswaku Vakreste lava nga ni vutihlamuleri va ta va kona ku fikela loko nkhuvo wu hela hi nkarhi lowu faneleke.—5/1, matluka 19-22.

• Xana xi nga va xihi xivangelo xa ku boxiwa ka vana vo “fana ni marhavi ya murhi wa mutlhwari” ematlhelo ka tafula ra munhu, eka Pisalema 128:3?

Hi xitalo swihluke swi huma etshakwini ra nsinya wa murhi wa mutlhwari. Loko nsinya wa murhi lowu dyuhaleke wu nga ha swi koti ku veka mihandzu yo tala, swihluke leswintshwa swi hundzuka misinya leyi tiyeke leyi wu rhendzelaka. Hilaha ku fanaka, vatswari va nga tsaka hi ku va ni vana lava tswalaka mihandzu, lava tirhelaka Yehovha swin’we na vona.—5/15, tluka 27.

• Hi byihi vuyelo byin’wana lebyi vana va byi kumaka endyangwini lowu nga ni mahanyelo lamanene?

Ma veka xisekelo lexinene xo va ni langutelo lerinene hi vulawuri, ku tlangela mimpimanyeto ya nkoka ni ku va ni vuxaka lebyinene ni van’wana. Xiyimo xo tano xi nga tlhela xi va pfuna ku hlakulela vunghana ni Xikwembu.—6/1, tluka 18.

• Etikweni rin’wana ra le Vuxa Mpfungwe, ku endliwe yini leswaku ku tiyisiwa mhaka ya leswaku Vakreste hinkwavo i va makwavo?

Mavandlha hinkwawo ma khutaziwe ku nga vitani van’wana hi mavito lama kombisaka leswaku u wa xiyimo xa le henhla. Ematshan’weni ya sweswo, hinkwavo va fanele ku vitaniwa hi ndlela leyi fanaka tanihi vamakwavo.—6/15, matluka 21, 22.

• Xana Timbhoni ta Yehovha ta yi amukela mirhi leyi pfanganisiweke ni swiaki swin’wana swa ngati loko yi endliwa?

Hi pfumela leswaku xileriso xa Bibele xa leswaku hi ‘papalata ngati’ xi sivela mpompelo wa ngati kumbe swiaki swa yona leswikulu (plasma, tisele to tshwuka, tisele to basa ni ti-platelet). (Mintirho 15:28, 29) Malunghana ni swiphemu swin’wana leswi tekiwaka eka swiaki-nkulu swa ngati, Mukreste ha un’we wa tihlawulela hi byakwe, a ri karhi a tsundzuka leswi Bibele yi swi vulaka ni vuxaka bya yena ni Xikwembu.—6/15, matluka 29-31.

• Xana swa koteka ku kuma ku rhula ka mianakanyo namuntlha?

Ina. Hi ku tirhisa Bibele, Yesu Kreste u kongomisa vanhu endleleni ya vugandzeri byo tenga ni le ku rhuleni loku hlamuseriwaka eka Esaya 32:18. Ku tlula kwalaho, lava va kumaka ku rhula ka muxaka lowu va ni ntshembo wo tiphina hi ku rhula loku nga ta tshama hi masiku emisaveni loko ku hetiseka Pisalema 37:11, 29.—7/1, tluka 7.

• Xana George Young u na xiphemu xihi ematin’wini ya swa le tilweni swa manguva lawa?

Ku sukela hi 1917, u tikombise a ri mubyarhi wa ku vonakala wa mahungu lamanene ya Mfumo ematikweni yo tala. U endle vutirheli bya yena eCanada hinkwaro, eswihlaleni swa Kharibiya, eBrazil ni le matikweni man’wana ya Amerika Dzonga, eAmerika Xikarhi, eSpaniya, ePortugal, ni le khale ka Soviet Union ni le United States.—7/1, matluka 22-7.

• Xana 1 Vakorinto 15:29 yi vula yini loko yi vulavula hi van’wana lava “khuvuriwaka hi xikongomelo xa ku va lava feke”?

Yinhla hi leswaku loko Vakreste va totiwa hi moya lowo kwetsima, va nyuperisiwa endleleni ya vutomi leyi va yisaka eku feni ka vona naswona endzhaku va pfuxeriwa evuton’wini bya le tilweni.—7/15, tluka 17.

• Xana muapostola Pawulo a a endla yini hi nkarhi lowu hlamuseriwaka tanihi malembe ya yena lama nga tiviwiki?

Swi nga ha endleka leswaku a a pfuneta ku simeka kumbe ku tiyisa mavandlha le Siriya ni le Kilikiya. Maxangu yo tala lama boxiwaka eka 2 Vakorinto 11:23-27 ma fanele ma humelele enkarhini lowu, leswi kombisaka leswaku a a gingiriteka evutirhelini.—7/15, matluka 26, 27.

• I yini leswi nga hi pfunaka leswaku hi ringanisela eka leswi hi swi langutelaka?

Tsundzuka leswaku Yehovha wa twisisa. Loko hi khongela eka yena swi nga hi pfuna leswaku mianakanyo ya hina yi va leyinene, naswona swi komba ku titsongahata. Mpfuno wun’wana i ku kuma vonelo lerintshwa hi ku vulavula ni munghana la wupfeke.—8/1, matluka 29, 30.