Ntshembo Wa Ku Pfuxiwa Ka Vafi Wu Ni Matimba
“Ndzi pfumele ku lahlekeriwa hi swilo hinkwaswo . . . leswaku ndzi tiva [Yesu Kreste] ni matimba ya ku pfuka ka yena eka lava feke.”—VAFILIPIYA 3:8-10.
1, 2. (a) Emalembeni lama hundzeke, xana mufundhisi un’wana u ku hlamusele njhani ku pfuxiwa ka vafi? (b) Xana ku pfuxiwa ka vafi ku ta humelela hi ndlela yihi?
EKU sunguleni ka va-1890, phepha-hungu rin’wana ri vulavule hi dyondzo yo hlamarisa leyi vuriweke hi mufundhisi un’wana le Brooklyn, New York, eU.S.A. U vule leswaku ku pfuxiwa ka vafi ku ta va ku hlengeletiwa ni ku nyikiwa ka vutomi lebyintshwa eka marhambu ni nyama hinkwayo leyi tshameke yi va emirini wa munhu, ku nga khathariseki leswaku vutomi bya kona byi herisiwe hi ndzilo kumbe hi khombo, ni leswaku byi dyiwe hi xivandzana kumbe byi hundzuke manyoro. Mufundhisi loyi u vule leswaku hi siku ro karhi, moya wu ta va ni munyama hikwalaho ka swandla, mavoko, milenge, tintiho, marhambu, misiha ni tinyama ta vanhu va magidi ya timiliyoni lava feke. Swirho leswi swi ta va swi ri karhi swi lava swiyenge leswin’wana swa miri. Kutani mimoya-xiviri yi ta ta hi le tilweni ni le tiheleni leswaku yi ta nghena emimirini leyi pfuxiweke eku feni.
2 Ku pfuxiwa ka vafi hi ku tlhela ku hlanganisiwa tiatomo to sungula a swi twali, naswona vanhu a va na moya-xiviri lowu nga fiki. (Eklesiasta 9:5, 10; Ezekiyele 18:4) Yehovha, Xikwembu xa ku pfuxiwa ka vafi, a xi boheki ku tlhela xi hlengeleta tiatomo leti a ti vumba miri wa munhu khale. A nga endlela vanhu lava pfuxiweke mimiri leyintshwa. Yehovha u nyike N’wana wa yena, Yesu Kreste matimba yo pfuxa lava feke, leswaku va ta hanya hilaha ku nga heriki. (Yohane 5:26) Kutani Yesu u te: “Hi mina ku pfuka ni vutomi. Loyi a kombisaka ripfumelo eka mina, hambiloko a fa, u ta hanya.” (Yohane 11:25, 26) Mawaku xitshembiso lexi khutazaka swonghasi! Xa hi tiyisa leswaku hi tiyisela miringo hi tlhela hi langutana ni rifu tanihi Timbhoni ta Yehovha leti tshembekaka.
3. Ha yini Pawulo a boheke ku lwela dyondzo ya ku pfuxiwa ka vafi?
3 Ku pfuxiwa ka vafi a ku fambisani ni dyondzo ya leswaku vanhu va ni moya-xiviri lowu nga fiki—ku nga dyondzo leyi Mugriki la vuriwaka Plato, loyi a a ri mutivi wa filosofi a a pfumela eka yona. Kutani, ku humelele yini loko muapostola Pawulo a nyikele vumbhoni eka Magriki lama nga ni ndhuma le Areyopago eAtena, lama pfumeleke eka Yesu ma tlhela ma vula leswaku Xikwembu xi n’wi pfuxile? Mhaka ya kona yi ri: “Kutani, loko va twa hi ta ku pfuka ka lava feke, van’wana va sungula ku vungunya.” (Mintirho 17:29-34) Vo tala lava voneke Yesu Kreste la pfuxiweke a va ha hanya, naswona va nyikele vumbhoni bya leswaku u pfuxiwile eka lava feke, ku nga khathariseki leswi a va hlekuriwa. Kambe vadyondzisi va mavunwa hinkwavo lava a va hlanganyela ni vandlha ra le Korinto va yi arile mhaka ya ku pfuxiwa ka vafi. Hikwalaho Pawulo u yi lwele hi matimba dyondzo leyi ya Vukreste eka 1 Vakorinto ndzima 15. Ku ti dyondza hi vukheta timhaka ta yena swi nyikela vumbhoni lebyi nga kanakanisiki bya ku tiya ni matimba ya ntshembo wa ku pfuxiwa ka vafi.
Vumbhoni Lebyi Tiyeke Bya Ku Pfuxiwa Ka Yesu Eka Lava Feke
4. Hi byihi vumbhoni bya lava swi voneke hi mahlo bya ku pfuxiwa ka Yesu eku feni lebyi Pawulo a byi nyikelaka?
4 Xiya ndlela leyi Pawulo a yi sungulaka ha yona mhaka ya yena. (1 Vakorinto 15:1-11) Vakorinto va ta namarhela mahungu lamanene ya ku ponisiwa loko vo kala va nga vi vapfumeri lava nga riki na xikongomelo. Kreste u fele swidyoho swa hina, a lahliwa ivi a pfuxiwa. Entiyisweni, Yesu la pfuxiweke u humelele eka Khefasi (Petro), “ivi a humelela eka lava 12.” (Yohane 20:19-23) U voniwe hi vanhu va kwalomu ka 500, kumbexana loko a lerisa a ku: ‘Fambani, mi ya endla vadyondzisiwa.’ (Matewu 28:19, 20) Yakobo u n’wi vonile, swin’we ni vaapostola hinkwavo vo tshembeka. (Mintirho 1:6-11) Yesu u humelele eka Sawulo ekusuhi ni le Damaska “tanihi le ka munhu la velekiweke ku nga si fika nkarhi wa kona”—onge hiloko se a pfuxeriwe evuton’wini bya moya. (Mintirho 9:1-9) Vakorinto va hundzuke vapfumeri hikuva Pawulo u va chumayerile, naswona va amukele mahungu lamanene.
5. Xana Pawulo u yi andlale njhani mhaka leyi hilaha swi tsariweke hakona eka 1 Vakorinto 15:12-19?
5 Xiya ndlela leyi Pawulo a yi andlalaka ha yona mhaka leyi. (1 Vakorinto 15:12-19) Tanihi leswi timbhoni leti swi voneke hi mahlo ti chumayelaka leswaku Kreste u pfuxiwile eku feni, ku nga vurisiwa ku yini leswaku a ku na ku pfuxiwa ka vafi? Loko Yesu a nga pfuxiwanga eka lava feke, ku chumayela ka hina ni ripfumelo ra hina i swa hava, naswona hi vahembi lava nyikelaka vumbhoni lebyi lwisanaka ni Xikwembu hi ku vula leswaku xi pfuxe Kreste. Loko vafi va nga pfuxiwi, ‘ha ha ri eswidyohweni swa hina,’ naswona lava feke va ri evun’weni na Kreste va fele makumu. Ku tlula kwalaho, “loko hi ve ni ntshembo eka Kreste evuton’wini lebyi ntsena, hi hina hi faneleke ku tweriwa vusiwana ngopfu ku tlula vanhu hinkwavo.”
6. (a) Xana Pawulo u vule yini loko a tiyisekisa ku pfuxiwa ka Yesu eku feni? (b) Xana “nala wo hetelela” i yini, naswona u ta herisiwa njhani?
6 Pawulo u tiyisekisa mhaka ya ku pfuxiwa ka Yesu eku feni. (1 Vakorinto 15:20-28) Tanihi leswi Kreste a nga “xirhangana” xa lava feke, ni van’wana va ta pfuxiwa. Leswi rifu ri veke kona hikwalaho ka ku nga yingisi ka Adamu, ku pfuka ka vafi na kona ku ve kona hikwalaho ka Yesu. Lava nga va yena a va ta pfuxiwa hi nkarhi wa vukona bya yena. Kreste u “[herisa] hulumendhe hinkwayo ni vulawuri ni vuhosi hinkwabyo” lebyi lwisanaka ni vuhosi bya Xikwembu ivi a va Hosi kukondza Yehovha a veka valala hinkwavo ehansi ka milenge ya yena. Hambi ku ri “nala wo hetelela”—rifu leri kumiweke tanihi ndzhaka eka Adamu—ri ta herisiwa hi gandzelo leri nga ra risima ra Yesu. Kutani Kreste u ta nyiketa Mfumo eka Xikwembu tlhelo Tatana wa yena, a titsongahatela “[loyi a] vekeke swilo hinkwaswo ehansi ka yena, leswaku Xikwembu xi va swilo hinkwaswo eka vanhu hinkwavo.”
Xana Va Khuvuleriwa Lava Feke?
7. I vamani lava “khuvuriwaka hi xikongomelo xa ku va lava feke,” naswona leswi swi vula yini eka vona?
7 Vanhu lava kanetaka mhaka ya ku pfuxiwa ka vafi va vutisiwa: “Va ta endla yini lava va khuvuriwaka hi xikongomelo xa ku va lava feke?” (1 Vakorinto 15:29) Pawulo a a nga vuli swona leswaku lava hanyaka va fanele va khuvuleriwa lava feke, hikuva vadyondzisiwa va Yesu va fanele va dyondza, va pfumela ivi va khuvuriwa hi voxe. (Matewu 28:19, 20; Mintirho 2:41) Vakreste lava totiweke va “[khuvuriwa] hi xikongomelo xa ku va lava feke” hi ku va lava dzikisaka vutomi bya vona endleleni leyi yisaka eku feni ni le ku pfuxiweni. Muxaka lowu wa nkhuvulo wu sungula loko moya wa Xikwembu wu nghenisa ntshembo wa le tilweni eka vona naswona wu hela loko va pfuxiwa eku feni leswaku va ya hanya vutomi bya moya va nga ha fi etilweni.—Varhoma 6:3-5; 8:16, 17; 1 Vakorinto 6:14.
8. Vakreste va nga tiyiseka hi yini hambiloko Sathana ni malandza ya yena vo va dlaya?
8 Hilaha marito ya Pawulo ma kombisaka hakona, ntshembo wa ku pfuxiwa ka vafi wu endla leswaku Vakreste va kota ku yimelana ni khombo nkarhi wun’wana ni wun’wana ni ku langutana ni rifu nkarhi wun’wana ni wun’wana hikwalaho ko endla ntirho wo chumayela hi Mfumo. (1 Vakorinto 15:30, 31) Va swi tiva leswaku Yehovha u ta va pfuxa loko a pfumelela Sathana ni malandza ya yena leswaku va va dlaya. I Xikwembu ntsena lexi nga herisaka mimoya-xiviri, kumbe vutomi bya vona eGehena, leyi fanekiselaka ku loviseriwa makumu.—Luka 12:5.
Xilaveko Xo Tshama Hi Xalamukile
9. Loko ntshembo wa ku pfuxiwa ka vafi wu ta va ni matimba lama tiyisaka evuton’wini bya hina, hi fanele hi papalata yini?
9 Ntshembo wa ku pfuxiwa ka vafi wu tiyise Pawulo. Loko a ri aEfesa, valala va yena va nga ha va va n’wi lahlele endhawini ya mintlango leswaku a lwa ni swivandzana. (1 Vakorinto 15:32) Loko sweswo swi humelerile, u kutsuriwile, hilaha Daniyele a ponisiweke hakona eka tinghala. (Daniyele 6:16-22; Vaheveru 11:32, 33) Tanihi leswi a a tshembela eku pfuxiweni ka vafi, Pawulo a a nga ri na langutelo leri a ri ri ni vagwinehi va le Yuda va le nkarhini wa Esaya. Va te: “A hi dyeni hi nwa, hikuva mundzuku ha fa.” (Esaya 22:13, Septuagint) Loko ntshembo wa ku pfuxiwa ka vafi wu ta va ni matimba lama tiyisaka evuton’wini bya hina hilaha wu endleke hakona eka Pawulo, hi fanele hi papalata lava va nga ni moya wo tano wo biha. Pawulo u tsundzuxile: “Mi nga xisiwi. Vunakulobye byo biha byi onha mikhuva leyi pfunaka.” (1 Vakorinto 15:33) Ina, nsinya lowu wa nawu wu tirha eka swivumbeko swo hambana-hambana swa vutomi.
10. Xana ntshembo wa hina wa ku pfuxiwa ka vafi wu nga tshama wu ri karhi wu hanya hi ndlela yihi?
10 Pawulo u byele lava va kanakanaka mhaka ya ku pfuxiwa ka vafi, a ku: “Xalamukani mi va ni mianakanyo leyi hlutekeke hi ku landza ku lulama, naswona mi nga hanyi hi xidyoho, hikuva van’wana a va xi tivi Xikwembu. Leswi ndzi swi vulela ku mi khomisa tingana.” (1 Vakorinto 15:34) ‘Enkarhini lowu wa makumu’ hi fanele hi endla hi ku pfumelelana ni vutivi lebyi kongomeke bya Xikwembu na Kreste. (Daniyele 12:4; Yohane 17:3) Leswi swi ta endla leswaku ntshembo wa hina wa ku pfuxiwa ka vafi wu tshama wu ri karhi wu hanya.
Va Pfuxiwa Hi Miri Wa Muxaka Muni?
11. Xana Pawulo u ku kombise njhani ku pfuxiwa ka Vakreste lava totiweke?
11 Endzhakunyana Pawulo u vulavule hi swivutiso swin’wana. (1 Vakorinto 15:35-41) Kumbexana hi matshalatshala yo lava ku pfuxa ku kanakana hi mhaka ya ku pfuxiwa ka vafi, munhu a nga ha vutisa: “Lava feke va ta pfuxiwa njhani? Ina, xana va ta huma hi miri wa muxaka muni?” Hilaha Pawulo a kombiseke hakona, mbewu leyi byariweke emisaveni ya fa loko yi hundzuka yi va ximilana. Hilaha ku fanaka, munhu la tswariweke hi moya u fanele a fa. Tanihi leswi ximilana lexi nga ni miri lowuntshwa xi humaka eka mbewu, kutani miri lowu pfuxiweke eku feni wa Vakreste lava totiweke wu hambanile ni miri wa nyama. Hambileswi a nga ta va ni mahanyelo lama fanaka ni lawa a a ri na wona loko a nga si fa, u pfuxiwa a ri xivumbiwa lexintshwa lexi nga ni miri wa moya lexi kotaka ku hanya etilweni. Hi ntumbuluko, lava pfuxeriwaka ku hanya emisaveni va ta pfuxiwa va ri ni mimiri ya nyama.
12. Xana marito lama nge “mimiri ya le tilweni” ni lama nge “mimiri ya le misaveni” ma vula yini?
12 Hilaha Pawulo a vuleke hakona, nyama ya munhu ya hambana ni ya swiharhi. Hambi ku ri nyama ya swiharhi ya hambana hi mixaka ya yona. (Genesa 1:20-25) “Mimiri ya le tilweni” ya swivumbiwa swa moya ya hambana hi ku vangama eka “mimiri ya le misaveni” ya nyama. Nakambe ku ni ku hambana eka ku vangama ka dyambu, n’weti ni tinyeleti. Kambe vatotiwa lava pfuxiweke eku feni va ni ku vangama lokukulu.
13. Hi ku ya hi 1 Vakorinto 15:42-44, i yini lexi byariwaka naswona i yini lexi pfuxiwaka?
13 Loko a vule ku hambana loku nga kona, Pawulo u engeterile: “Ni ku pfuka ka vafi ku tano.” (1 Vakorinto 15:42-44) U tlhele a ku: “Wu byariwa wu ri lowu onhakaka, wu pfuxiwa wu ri lowu nga onhakiki.” Laha Pawulo a nga ha va a vula vatotiwa va ri ntlawa. Leswi wu byariwaka wu ri lowu onhakaka loko wu fa, wu pfuxiwa wu ri lowu nga onhakiki, wu nga ha ri na xidyoho. Hambileswi wu sandziwaka hi misava, wu pfuxeriwa evuton’wini bya le tilweni naswona wu kombisiwa hi ku kwetsima ka Kreste. (Mintirho 5:41; Vakolosa 3:4) Loko wu fa wu byariwa wu ri “miri wa nyama” naswona wu pfuxiwa wu ri “miri wa moya.” Tanihi leswi leswi swi kotekaka eka Vakreste lava tswariweke hi moya, hi nga tiyiseka leswaku vanhu van’wana va nga pfuxeriwa ku hanya emisaveni.
14. Xana Pawulo u ku kombise njhani ku hambana exikarhi ka Kreste na Adamu?
14 Sweswi Pawulo u kombisa ku hambana eka Kreste na Adamu. (1 Vakorinto 15:45-49) Adamu, wanuna wo sungula, “[u ve] moya-xiviri lowu hanyaka.” (Genesa 2:7) “Adamu lowo hetelela”—Yesu—“u ve moya lowu nyikaka vutomi.” U nyikele vutomi bya yena tanihi gandzelo ra nkutsulo, ro sungula hikwalaho ka valandzeri va yena lava totiweke. (Marka 10:45) Loko va ha ri vanhu va nyama, va ‘ambala xifaniso xa loyi a endliweke hi ntshuri,’ kambe loko se va pfuxiwile va fana na Adamu wo hetelela. Ina, gandzelo ra Yesu ri ta vuyerisa vanhu hinkwavo lava yingisaka, ku katsa ni lava nga ta pfuxeriwa emisaveni.—1 Yohane 2:1, 2.
15. Ha yini Vakreste lava totiweke va nga pfuxiwi hi miri wa nyama, naswona va pfuxiwa hi ndlela yihi hi nkarhi wa vukona bya Yesu?
15 Loko Vakreste lava totiweke va fa, a va pfuxiwi hi miri wa nyama. (1 Vakorinto 15:50-53) Miri lowu onhakaka wa nyama ni ngati a wu nge yi dyi ndzhaka ya ku nga onhaki ni Mfumo wa le tilweni. Vatotiwa van’wana a va nge boheki ku fa nkarhi wo leha. Loko va heta pfhumba ra vona ra laha misaveni hi ku tshembeka hi nkarhi wa vukona bya Yesu, va ta “hundzuriwa, hi nkarhinyana, hi ku tsopeta ka tihlo.” Va ta pfuxiwa hi nkarhinyana wolowo va ya evuton’wini bya moya lebyi nga onhakiki ni lebyi kwetsimaka. Loko “mutekiwa” wa Kreste wa le tilweni a helerile u ta va 144 000.—Nhlavutelo 14:1; 19:7-9; 21:9; 1 Vatesalonika 4:15-17.
Ku Hlula Rifu!
16. Hi ku ya hi Pawulo ni vaprofeta va khale, ku ta humelela yini hi rifu leri kumiweke tanihi ndzhaka eka Adamu la dyoheke?
16 Pawulo u vule hi ndlela yo hlula leswaku rifu ri ta miteriwa makumu. (1 Vakorinto 15:54-57) Loko ku onhaka ni ku fa swi ambala ku nga onhaki ni ku nga fi, marito lawa ma ta hetiseka: “Rifu ri miteriwa makumu.” “Rifu, ku hlula ka wena ku kwihi ke? Rifu, ndzhombo wa wena wu kwihi ke?” (Esaya 25:8; Hosiya 13:14) Ndzhombo lowu humesaka rifu i xidyoho, naswona matimba ya xidyoho a ku ri Nawu, lowu wu va gweveleke rifu vadyohi. Kambe hikwalaho ka gandzelo ra Yesu ni ku pfuxiwa ka yena, rifu leri kumiweke tanihi ndzhaka eka Adamu la dyoheke a ri nge he hluli.—Varhoma 5:12; 6:23.
17. Xana marito ya 1 Vakorinto 15:58 ma tirha njhani namuntlha?
17 Pawulo u te: “Hikwalaho, vamakwerhu lava rhandzekaka, tserhamani, mi nga tsekatsekisiwi, nkarhi hinkwawo mi va ni swo tala swo swi endla entirhweni wa Hosi, mi ri karhi mi tiva leswaku ntirho wa n’wina a hi wa hava eHosini.” (1 Vakorinto 15:58) Marito wolawo ma tirha eka masalela lama totiweke ya namuntlha ni le ka “tinyimpfu tin’wana” ta Yesu hambiloko ti fa emasikwini lawa yo hetelela. (Yohane 10:16) Ntirho wa vona wa ku va vahuweleri va Mfumo a hi wa hava, hikuva va ta pfuxiwa eku feni. Kutani, tanihi malandza ya Yehovha, a hi tshameni hi khomekile entirhweni wa Hosi loko ha ha rindzele siku leri hi nga ta huwelela hi ntsako hi ku: “Rifu, ku hlula ka wena ku kwihi ke?”
Ku Hetisisiwa Ka Ntshembo Wa Ku Pfuxiwa Ka Vafi!
18. Xana ntshembo wa ku pfuxiwa ka vafi wa Pawulo a wu tiye ku fikela kwihi?
18 Marito ya Pawulo lama tsariweke eka 1 Vakorinto ndzima 15 ma swi veka erivaleni leswaku ntshembo wa ku pfuxiwa ka vafi a wu ri ni matimba evuton’wini bya yena. A a tiyiseka hakunene leswaku Yesu u pfuxiwile eku feni ni leswaku van’wana na vona va ta humesiwa esirheni ra vanhu leri tolovelekeke. Xana u na wona ntshembo wolowo lowu tiyeke? Pawulo u teke mintirho ya vutianakanyi tanihi “nhulu ya thyaka” naswona ‘u pfumele ku lahlekeriwa hi swilo hinkwaswo’ leswaku a ta ‘tiva Kreste ni matimba ya ku pfuxiwa ka yena.’ Muapostola a a swi rhandza ku titsongahatela rifu ro fana ni leriya ra Kreste a ri ni ntshembo wo kuma “ku pfuxiwa ko sungula.” “Ku pfuxiwa ko sungula” ku kumiwa hi valandzeri lava totiweke va Yesu va 144 000. Ina, va pfuxeriwa evuton’wini bya moya bya le tilweni, kasi “vafi lavan’wana hinkwavo” va ta pfuxeriwa emisaveni.—Vafilipiya 3:8-11; Nhlavutelo 7:4; 20:5, 6.
19, 20. (a) Hi vahi vanhu lava tsariweke eBibeleni lava nga ta pfuxeriwa ku hanya emisaveni? (b) Xana u langutele ku pfuxiwa ka mani hi mahlo-ngati?
19 Ntshembo wa ku pfuxiwa ka vafi wu hundzuke nchumu wa xiviri lowu vangamaka eka vatotiwa lava tshembekeke ku yisa eku feni. (Varhoma 8:18; 1 Vatesalonika 4:15-18; Nhlavutelo 2:10) Lava poneke ‘nhlomulo lowukulu’ va ta vona ntshembo wa ku pfuxiwa ka vafi wu hetiseka emisaveni loko ‘lwandle ri humesa lava feleke eka rona, ni rifu ni Hayidesi swi humesa lava feleke eka swona.’ (Nhlavutelo 7:9, 13, 14; 20:13) Un’wana wa lava nga ta pfuxeriwa ku hanya emisaveni ku ta va Yobo, loyi a feriweke hi vana va majaha va nkombo ni vanhwanyana vanharhu. Anakanya ndlela leyi a nga ta va a tsake ha yona loko a hoyozela—naswona va ta tsaka swinene ku va ni vamakwavo van’wana va nkombo va xinuna swin’we ni van’wana vanharhu va xisati, vo saseka!—Yobo 1:1, 2, 18, 19; 42:12-15.
20 Mawaku nkateko wa kona loko Abrahama na Sara, Isaka na Raveka—ina, ni van’wana vo tala, ku katsa ni “vaprofeta hinkwavo”—va pfuxeriwa ku hanya emisaveni! (Luka 13:28) Un’wana wa vaprofeta volavo a ku ri Daniyele, loyi a tshembisiweke ku pfuxeriwa emfun’weni wa Vumesiya. Daniyele u etlele esirheni ra yena ku ringana malembe ya kwalomu ka 2 500, kambe hi matimba ya ku pfuxiwa ka vafi, ku nga ri khale u ta ‘yima a kuma xiavelo xa yena,’ kukota un’wana wa “tihosana emisaveni hinkwayo.” (Daniyele 12:13; Pisalema 45:16) Mawaku nyanyuko lowu nga ta va kona wo amukela vanhu lava feke va tshembekile swin’we ni tata wa wena, mana wa wena, n’wana wa wena wa jaha, ni wa nhwana, kumbe van’wana lava rhandzekaka lava dlayiweke hi nala rifu!
21. Ha yini hi nga fanelanga hi hlwela ku endlela van’wana swilo leswinene?
21 Van’wana va vanghana va hina ni lava hi va rhandzaka va nga ha va va tirhele Xikwembu malembe yo tala naswona se va dyuharile. Ku dyuhala ku nga ha endla swi va tikela ku langutana ni mintlhontlho ya vutomi. Hi ta va hi kombisa rirhandzu hakunene loko hi va pfuna hi xin’wana ni xin’wana lexi hi nga xi kotaka sweswi! Kutani a hi nge tisoli hi ku va hi tsandzekile hi ndlela yo karhi loko rifu ro va dlaya. (Eklesiasta 9:11; 12:1-7; 1 Timotiya 5:3, 8) Hi nga tiyiseka leswaku Yehovha a nge swi rivali swilo leswinene leswi hi swi endlelaka van’wana, ku nga khathariseki malembe ya vona kumbe swiyimo swa vona. Pawulo u tsarile: “Loko ntsena hi ri ni nkarhi lowunene wa swona, a hi endleleni hinkwavo leswi nga swinene, kambe ngopfu-ngopfu lava nga swin’we na hina eripfumelweni.”—Vagalatiya 6:10; Vaheveru 6:10.
22. Kukondza ku hetiseka ntshembo wa ku pfuxiwa ka vafi, hi fanele hi tiyimisela ku endla yini?
22 Yehovha i “Tatana la nga ni tintswalo letikulu tlhelo Xikwembu xa nchavelelo hinkwawo.” (2 Vakorinto 1:3, 4) Rito ra yena ra hi chavelela ri tlhela ri hi pfuna ku chavelela van’wana hi ntshembo wa ku pfuxiwa ka vafi lowu nga ni matimba. Kukondza loko hi ta vona ku hetiseka ka ntshembo wolowo hi ku pfuxiwa ka vafi va ta hanya emisaveni, a hi faneni na Pawulo, loyi a a ri ni ripfumelo eku pfuxiweni ka vafi. Onge hi nga tekelela Yesu swinene, loyi ku tshemba ka yena matimba ya Xikwembu yo n’wi pfuxa ku hetisekeke. Lava nga le masirheni ya switsundzuxo ku nga ri khale va ta twa rito ra Kreste ivi va huma. Onge leswi swi nga hi chavelela ni ku hi tsakisa. Kambe ku tlula hinkwaswo, onge hi nga nkhensa Yehovha, loyi a endleke leswaku swi koteka ku hlula rifu hi ku tirhisa Hosi ya hina Yesu Kreste!
U Nga Hlamurisa Ku Yini?
• Hi byihi vumbhoni bya ku tivonela hi mahlo bya ku pfuxiwa ka Yesu lebyi Pawulo a byi nyikelaka?
• “Nala wo hetelela” i yini, naswona u ta herisiwa hi ndlela yihi?
• Malunghana ni Vakreste lava totiweke, i yini lexi byariwaka naswona i yini lexi pfuxiwaka?
• Hi vahi vanhu lava tsariweke eBibeleni lava u nga ta tsakela ku hlangana na vona loko va pfuxeriwa ku hanya emisaveni?
[Xifaniso lexi nga eka tluka 16]
Muapostola Pawulo u ku lwele hi matimba ku pfuxiwa ka vafi
[Swifaniso leswi nga eka tluka 20]
Ku pfuxiwa ka Yobo, ndyangu wa yena ni van’wana vo tala ku ta tisa ntsako lowukulu swinene