Swivutiso Swa Vahlayi

Anakanya hi xiyimo lexi Yesu a vuleke marito ya yena malunghana ni ku nga ngheneli vukati. Loko Vafarisi va te eka yena kutani va fika va vulavula hi mhaka ya ku dlaya vukati, Yesu u wu veke erivaleni nawu wa Yehovha hi vukati. Hambileswi Nawu a wu n’wi pfumelela wanuna ku tsalela nsati wa yena papila ra ku dlaya vukati loko a kuma “nchumu wo karhi lowu nga tengangiki” eka yena, xiyimo a xi nga ri tano eku sunguleni. (Det. 24:1, 2) Kutani Yesu u te: “Mani na mani la tshikaka nsati wakwe, a teka un’wana, ku nga ri hi xivangelo xa vumbhisa, u endla vuoswi.”—Mat. 19:3-9.

Loko vadyondzisiwa va twa marito lawa, va te: “Loko swi ri tano hi wanuna eka nsati wakwe, a hi vutlhari ku teka.” Loko Yesu a va hlamula u te: “A hi vanhu hinkwavo lava kotaka ku amukela marito lawa, kambe ma amukeriwa hi lava nga ni nyiko ya kona ntsena. Hikuva ku ni vatsheniwa lava nga velekiwa va ri tano ku suka embelekweni wa vamana wa vona, nakambe ku ni vatsheniwa lava nga endliwa vatsheniwa hi vanhu, naswona ku ni vatsheniwa lava nga tiendla vatsheniwa hikwalaho ka mfumo wa matilo. Loyi a nga swi amukelaka a a swi amukele.”—Mat. 19:10-12.

Vatsheniwa va xiviri a ku ri vanhu lava a va velekiwe va ri tano hikwalaho ka ku lamala kumbe lava va endliweke vatsheniwa hikwalaho ka mhangu kumbe va nga lo tsemiwa. Hambiswiritano, a ku ri ni lava a va tihlawulele ku va vatsheniwa hambileswi a va nga ri vatsheniwa va xiviri. Hambileswi a va swi fanelekela ku nghenela vukati, va tikhomile kutani va nga byi ngheneli “hikwalaho ka mfumo wa matilo.” Ku fana na Yesu, va hlawule ku nga ngheneli vukati leswaku va ta tinyiketela entirhweni wa Mfumo. A va velekiwanga va ri ni nyiko ya ku nga ngheneli vukati naswona a va nyikiwanga nyiko yoleyo. Va swi amukerile. Hileswaku va hlakulele nyiko yoleyo hi ku tirhandzela.

Loko a tiyisekisa leswi Yesu a swi vuleke, muapostola Pawulo u hlamusele leswaku hambileswi Vakreste hinkwavo—lava nga byi nghenelangiki vukati ni lava byi ngheneleke—va nga tirhelaka Xikwembu hi ndlela leyi amukelekaka, lava nga byi nghenelangiki lava ‘tiyeke etimbilwini ta vona’ malunghana ni xiyimo xa vona va “endla kahle ngopfu.” Njhani? Vanhu lava ngheneleke vukati va fanele va tirhisa nkarhi ni matimba ya vona eka vona vini ni le ka vanghana va vona va vukati va tlhela va va khathalela. Hi hala tlhelo, Vakreste lava nga byi nghenelangiki vukati va nga endla ntirho wa Hosi handle ka vutihlamuleri byolebyo. Va teka xiyimo xa vona tanihi “nyiko” leyi humaka eka Xikwembu.—1 Kor. 7:7, 32-38.

Hikwalaho, Matsalwa ma hi byela leswaku Mukreste a nga kumi nyiko ya ku nga ngheneli vukati hi ndlela yo karhi leyi nga hlamuselekiki. Ku ri na sweswo, wa yi hlakulela hi ku nga ngheneli vukati leswaku a ta yisa timhaka ta Mfumo emahlweni handle ko kavanyetiwa. Vo tala namuntlha va tiyimisele ku nga byi ngheneli vukati hikwalaho ka xivangelo xolexo, naswona van’wana va fanele va va khutaza.