Ha Tsaka Leswi Hi Tinyiketeleke eNtirhweni Wa Yehovha!
1 Muapostola Pawulo a a tsakile leswi a a “tirhisiwa hi ku helela” leswaku a hetisisa ntirho wakwe wo chumayela. (2 Kor. 12:15) Hilaha ku fanaka, ninamuntlha Vakreste vo tala i maphayona lama gingiritekaka. Van’wana lava nga ni vutihlamuleri byo tika bya ndyangu va hlela nkarhi wo ya ensin’wini vhiki ni vhiki hambileswi va tshamaka va khomekile. Van’wana lava tshamelaka ku vabya va tirhisa matimbanyana lama va nga na wona leswaku va chumayela rungula ra Mfumo. Hakunene swa khutaza ku vona vanhu va Yehovha va tinyiketela entirhweni wa Yena ku nga khathariseki malembe lawa va nga na wona kumbe swiyimo swa vona!
2 Ku Rhandza Muakelani: Leswi hi endlaka hinkwaswo leswi hi nga swi kotaka leswaku hi tirhela Yehovha, hi kombisa leswaku ha n’wi rhandza naswona hi rhandza ni muakelani, kutani sweswo swi hi endla hi va ni ripfalo leri baseke. Leswi Pawulo a nyiketeleke moya-xiviri wakwe eku chumayeleni ka mahungu lamanene, u vule hi ntsako a ku: “Ndza mi rhamba leswaku mi tivonela esikwini leri leswaku ndzi basile engatini ya vanhu hinkwavo.” (Mint. 20:24, 26; 1 Tes. 2:8) Loko hi tirha nsimu hilaha swiyimo swa hina swi hi pfumelelaka hakona, a hi nge vi ni nandzu wa ngati.—Ezek. 3:18-21.
3 Ha tsaka loko hi tinyiketela ku pfuna van’wana. (Mint. 20:35) Makwerhu un’wana u te: “I ntiyiso leswaku ndzi va ndzi karhele loko ndzi muka nimadyambu endzhaku ka loko ndzi hete siku ndzi ri entirhweni wa Yehovha. Kambe ndza tsaka naswona ndzi nkhensa Yehovha leswi a ndzi nyikeke ntsako lowu ku nga riki na munhu loyi a nga ndzi tekelaka wona.”
4 Ku Rhandza Xikwembu: Xivangelo xa nkoka swinene xa leswaku hi tinyiketela entirhweni wa Yehovha hileswi swi tsakisaka Tata hina wa le tilweni. Ku rhandza Xikwembu swi hi susumetela ku yingisa swileriso swa xona, leswi katsaka ku chumayela ni ku endla vadyondzisiwa. (1 Yoh. 5:3) Hambiloko vanhu va nga tsakeli kumbe va hi kaneta, hi hambeta hi tikarhatela ku tirhela Yehovha hi ntsako.
5 Sweswi a hi nkarhi wo koka milenge. Hi hanya enkarhini wa ntshovelo. (Mat. 9:37) Hakanyingi, hi nkarhi wa ntshovelo murimi u tirha tiawara to tala hikuva u ni nkarhi wutsongo wo hlengeleta ntshovelo wu nga si sungula ku onhaka. Nkarhi wa ntirho wa ntshovelo wa moya na wona wu pimiwile. Onge hinkwerhu hi nga hambeta hi tikarhata swinene ensin’wini, hi ri karhi hi wu tekela enhlokweni nkarhi lowu hi hanyaka eka wona.—Luka 13:24; 1 Kor. 7:29-31.