Ku Hlomisiwa Hi Ku Helela Tanihi Vadyondzisi Va Rito Ra Xikwembu
“Xikwembu . . . xi hi [endle] hi faneleka kahle ku va vatirheli.”—2 VAKORINTO 3:5, 6.
1, 2. Hi wahi matshalatshala yo chumayela lama endliwaka minkarhi yin’wana, kambe ha yini ma nga tali ku humelela?
A WU ta titwisa ku yini loko a wu nyikiwe ntirho lowu u nga swi kotiki ku wu endla? Anakanya: Swilo leswi u nga ta swi lava swi vekiwa emahlweni ka wena, ni switirho swi kona. Kambe a wu swi tivi leswaku ntirho lowu wu endlisiwa ku yini. Khombo ra kona, ntirho lowu wu fanele wu endliwa hi xihatla. Vanhu va titshege hi wena. Sweswo swi nga ku karhata hakunene!
2 Xiphiqo xo tano a xo anakanyiwa ntsena. Xiya xikombiso lexi. Yin’wana ya tikereke ta Vujagana yi pfa yi ringeta ku hlela ni ku endla vutirheli bya yindlu ni yindlu. Hakanyingi matshalatshala wolawo ma hundzuke nyuku wa mbyana, ma xaxile ku nga si hela na mavhiki kumbe tin’hweti. Ha yini? Vujagana a byi va pfunanga vanhu va byona leswaku va wu fanelekela ntirho lowu. Hi vula ni vafundhisi a va wu fanelekeli ntirho wa ku chumayela, hambiloko hakanyingi va hete malembe yo tala va ri karhi va wu dyondzela eswikolweni. Ha yini hi vula tano?
3. Eka 2 Vakorinto 3:5, 6, hi xihi xiga lexi tirhisiwaka kanharhu, naswona xi vula yini?
3 Rito ra Xikwembu ri hlamusela lexi endlaka munhu a fanelekela ku va muchumayeri wa ntiyiso wa mahungu lamanene ya Vukreste. Muapostola Pawulo u huhuteriwe ku tsala a ku: “Ku nga ri leswaku hina hi faneleka kahle ku languta nchumu wun’wana ni wun’wana wu ri lowu humaka eka hina, kambe ku faneleka kahle ka hina ku huma eka Xikwembu, lexi xi hi endleke hi faneleka kahle ku va vatirheli.” (2 Vakorinto 3:5, 6) Xiya xiga lexi tirhisiweke kanharhu laha—ku “faneleka kahle.” Xana xi vula yini? Vine’s Expository Dictionary of Biblical Words yi ri: “Loko ku vulavuriwa hi swilo [rito ro sungula ra Xigriki] ri vula ‘ku enela’ . . . ; loko ku vulavuriwa hi vanhu, ri vula ‘ku va ni vuswikoti,’ ‘ku lulameriwa.’” Xisweswo, munhu la ‘fanelekaka kahle’ u ni vutshila naswona u faneriwa hi ku endla ntirho lowu a nyikiweke wona. Ina, vatirheli va ntiyiso va mahungu lamanene va swi fanelekela ku endla ntirho lowu. Va ni vutshila, va faneleka, kumbe va lulameriwa hi ku chumayela.
4. (a) Xikombiso xa Pawulo xi swi kombisa njhani leswaku ku fanelekela vutirheli bya Vukreste a hi swa vanhu va nga ri vangani ntsena lava hlawuriweke? (b) Hi tihi tindlela tinharhu leti Yehovha a hi endlaka ha tona leswaku hi fanelekela ku va vatirheli?
4 Kambe, xana ku faneleka loku ku huma kwihi? Xana i talenta ya vona vini? Xana ku huma eka ntlharhi leyi tlakukeke? Xana ku huma eka swikolo swo hlawuleka leswi nga ni ndhuma? Handle ko kanakana, muapostola Pawulo a a ri na swona hinkwaswo swilo sweswo. (Mintirho 22:3; Vafilipiya 3:4, 5) Kambe, hi ku titsongahata u pfumerile leswaku timfanelo takwe ta ku va mutirheli a ti nga humi eka swikolo leswi nga ni dyondzo ya le henhla, kambe a ti huma eka Yehovha Xikwembu. Xana timfanelo toleto ti kumiwa hi vanhu va nga ri vangani lava hlawuriweke? Pawulo u tsalele vandlha ra le Korinto malunghana ni “ku faneleka kahle ka hina.” Handle ko kanakana sweswo swi kombisa leswaku Yehovha wa tiyiseka leswaku malandza ya yena hinkwawo lama tshembekaka ma faneleka, ma kota ku endla ntirho lowu a ma aveleke wona. Yehovha u va endla njhani Vakreste va ntiyiso leswaku va faneleka namuntlha? A hi vulavuleni hi tindlela tinharhu leti a ti tirhisaka: (1) Rito rakwe, (2) moya wa yena lowo kwetsima ni (3) nhlengeletano ya yena ya laha misaveni.
Rito Ra Yehovha Ri Hi Endla Hi Faneleka
5, 6. Matsalwa yo Kwetsima ma ni vuyelo byihi eka Vakreste va ntiyiso?
5 Xo sungula, xana Rito ra Xikwembu ri hi pfuna njhani leswaku hi fanelekela ku va vatirheli? Pawulo u tsarile: “Matsalwa hinkwawo ma huhuteriwe hi Xikwembu naswona ma pfuna ku dyondzisa, ku tshinya, ku lulamisa swilo, ku laya eku lulameni, leswaku munhu wa Xikwembu a faneleka hi ku helela, a hlomisiwa hi ku helela eka ntirho wun’wana ni wun’wana lowunene.” (2 Timotiya 3:16, 17) Hikwalaho, Matsalwa yo Kwetsima ma hi pfuna ku “faneleka hi ku helela, [hi] hlomisiwa hi ku helela” leswaku hi ta endla ‘ntirho lowunene’ wa ku dyondzisa vanhu Rito ra Xikwembu. Kambe, ku vuriwa yini hi vanhu hinkwavo lava nghenaka tikereke ta Vujagana? Va na yona Bibele. Swi tisa ku yini leswaku buku yin’we yi kota ku pfuna vanhu van’wana leswaku va va vatirheli lava fanelekaka kambe van’wanyana yi nga va pfuni? Nhlamulo yi titshege hi langutelo leri hi nga na rona malunghana ni Bibele.
6 Lexi vavisaka, vo tala lava nghenaka kereke a va ri amukeli rungula ra Bibele “hilaha ri nga hakona hakunene, rito ra Xikwembu.” (1 Vatesalonika 2:13) Vujagana byi tiendlele vito ro biha emhakeni leyi. Endzhaku ko heta malembe va ri karhi va dyondza eswikolweni swa vukhongeri, xana vafundhisi va vuya va hlomiseriwe ku va vadyondzisi va Rito ra Xikwembu? Nikatsongo. Phela, swichudeni swin’wana swi sungula tidyondzo ta vufundhisi swi ri karhi swi pfumela eBibeleni, kambe loko swi ya thwasa swi va swi yi kanakana! Endzhaku ka sweswo, ematshan’weni yo chumayela Rito ra Xikwembu—leri vunyingi bya swona byi nga ha ri pfumeriki—swi sungula ku endla vutirheli bya swona hi tindlela tin’wana, to tanihi ku hlanganyela eka minjhekanjhekisano ya tipolitiki, swi haxa evhangeli yo hlanganisa vanhu kumbe swi ndhundhuzela tifilosofi ta vanhu etidyondzweni ta swona. (2 Timotiya 4:3) Ku hambana ni sweswo, Vakreste va xiviri va landzela xikombiso xa Yesu Kreste.
7, 8. Langutelo ra Yesu hi Rito ra Xikwembu a ri hambana njhani na leriya ra varhangeri va vukhongeri va le nkarhini wakwe?
7 Yesu a nga pfumelanga leswaku mianakanyo yakwe yi kuceteriwa hi varhangeri va vukhongeri va le nkarhini wa yena. Yesu u ma tirhise kahle matsalwa yo kwetsima hambiloko a dyondzisa ntlawa lowutsongo wo tanihi vaapostola vakwe kumbe a dyondzisa mintshungu leyikulu. (Matewu 13:10-17; 15:1-11) Ndlela yoleyo yi n’wi hambanise ni varhangeri va vukhongeri va le nkarhini wakwe. A va nga va pfumeleli nikatsongo vanhu lava tolovelekeke leswaku va kambisisa swilo leswi enteke swa Xikwembu. Kahle-kahle, a swi tolovelekile leswaku mudyondzisi wa le nkarhini wolowo a vula leswaku tindzimana tin’wana ta Bibele a ti tika swinene lerova a ta ti hlamusela xichudeni xa yena lexi a xi rhandzaka swinene—naswona loko a ti hlamusela a a ta vulavula hi rito ra le hansi a tifunengete nhloko. Varhangeri volavo va vukhongeri a va fumbarhele vukholwa-hava malunghana ni ku vulavula hi timhaka tin’wana ta Bibele, hilaha a va endla hakona malunghana ni ku vulavula hi vito ra Xikwembu!
8 Kreste a a nga ri tano. A a pfumela leswaku vanhu hinkwavo ku nga ri vanhu va nga ri vangani lava hlawuriweke, a va fanele va kambisisa “rito rin’wana ni rin’wana leri humaka enon’wini wa Yehovha.” Yesu a nga swi lavanga ku nyika ntlawa lowu tlakukeke wa vativi va matsalwa vutihlamuleri bya ku pfuna van’wana leswaku va kuma vutivi. U byele vadyondzisiwa vakwe a ku: “Leswi ndzi mi byelaka swona emunyameni, swi vuleni eku vonakaleni; naswona leswi mi swi twaka swi hleveteriwa, swi chumayeleni mi ri ehenhla ka tindlu.” (Matewu 4:4; 10:27) Yesu a a swi navela hi mbilu hinkwayo ku avela vanhu vo tala swinene vutivi bya Xikwembu.
9. Vakreste va ntiyiso va yi tirhisa njhani Bibele?
9 Rito ra Xikwembu ri fanele ri va xitirho lexikulu xa dyondzo ya hina. Hi xikombiso, loko hi nyikela nkulumo eHolweni ya Mfumo ya Timbhoni ta Yehovha, hakanyingi a swi enelanga ku hlaya ntsena tindzimana leti hlawuriweke eBibeleni. Hi nga ha boheka ku hlamusela, hi endla swikombiso hi tlhela hi kombisa ndlela leyi ndzimana ya kona yi tirhaka ha yona. Pakani ya hina i ku endla leswaku rungula ra Bibele ri hanya, hi ndlela yo fanekisela, kutani hi ri dzikisa etimbilwini ta vayingiseri va hina. (Nehemiya 8:8, 12) Bibele yi fanele yi tlhela yi tirhisiwa loko swi fanerile leswaku hi nyikela ndzayo kumbe hi tshinya. Hambileswi vanhu va Yehovha va vulavulaka tindzimi to hambana-hambana naswona va humaka eka mindhavuko yo hambana-hambana, hinkwavo ka vona va yi xixima Buku ya nkoka swinene—ku nga Bibele.
10. Rungula leri huhuteriweke ra Bibele ri nga va ni vuyelo byihi eka hina?
10 Loko ri xiximiwa hi ndlela yoleyo, rungula ra Bibele ri va ni matimba. (Vaheveru 4:12) Ri susumetela vanhu leswaku va hundzula vutomi bya vona, va tshika mikhuva leyi nga riki ya Matsalwa yo tanihi vumbhisa, vuoswi, ku gandzela swikwembu swa hava, vudakwa ni ku yiva. Ri pfune vanhu vo tala leswaku va hluvula vumunhu bya khale va ambala vumunhu lebyintshwa. (Vaefesa 4:20-24) Ina, loko hi xixima Bibele ku tlula mavonelo wahi ni wahi ya vanhu kumbe ndhavuko wa vona, hi tlhela hi yi tirhisa hi ku tshembeka, yi nga hi pfuna leswaku hi va lava fanelekaka, hi hlomisiwa hi ku helela tanihi vadyondzisi va Rito ra Xikwembu.
Moya Wa Yehovha Wu Endla Leswaku Hi Faneleka
11. Ha yini swi fanerile leswaku moya lowo kwetsima wa Yehovha wu vitaniwa “mupfuni”?
11 Xa vumbirhi, a hi buleni hi ntirho lowu endliwaka hi moya lowo kwetsima wa Yehovha, kumbe matimba lama tirhaka, eku hi endleni hi faneleka hi ku helela. A hi fanelanga hi rivala leswaku moya wa Yehovha wu ni matimba swinene. Yehovha u pfumelele N’wana wa yena la rhandzekaka leswaku a tirhisa matimba wolawo yo hlamarisa eka Vakreste hinkwavo va ntiyiso. A swi fanerile loko Yesu a vula leswaku moya lowo kwetsima i “mupfuni.” (Yohane 16:7) U khutaze valandzeri vakwe leswaku va kombela moya wolowo eka Yehovha, a va tiyisekisa leswaku Yehovha u ta va nyika wona hi xitalo.—Luka 11:10-13; Yakobo 1:17.
12, 13. (a) Ha yini swi ri swa nkoka leswaku hi khongelela moya lowo kwetsima leswaku wu hi pfuna evutirhelini bya hina? (b) Vafarisi va swi kombise njhani leswaku moya lowo kwetsima a wu nga tirhi eka vona?
12 Hi fanele hi khongelela moya lowo kwetsima siku na siku, ngopfu-ngopfu leswaku wu hi pfuna evutirhelini bya hina. Xana matimba wolawo lama tirhaka ma nga va ni vuyelo byihi eka hina? Ma nga susumeta mianakanyo ni timbilu ta hina, ma hi pfuna leswaku hi hundzuka, hi kula hi tlhelo ra moya ni ku siva vumunhu bya khale hi lebyintshwa. (Vakolosa 3:9, 10) Ma nga hi pfuna leswaku hi hlakulela timfanelo ta risima leti fanaka ni ta Kreste. Vo tala va hina hi yi tiva hi nhloko Vagalatiya 5:22, 23. Tindzimana toleto ti xaxameta mihandzu ya moya wa Xikwembu. Wo sungula i rirhandzu. Mfanelo yoleyo i ya nkoka evutirhelini bya hina. Ha yini?
13 Rirhandzu i nsusumeto lowukulu. Ku rhandza Yehovha ni vanhu-kulobye swi susumeta Vakreste va ntiyiso leswaku va vula mahungu lamanene. (Marka 12:28-31) Loko a hi nga ri na rona rirhandzu ro tano, a hi nga ta faneleka hakunene ku va vadyondzisi va Rito ra Xikwembu. Xiya ku hambana exikarhi ka Yesu ni Vafarisi. Matewu 9:36 yi vula leswi hi Yesu: “Loko a vona mintshungu a yi twela vusiwana, hikuva a yi vavisiwile ni ku tsalangana ku fana ni tinyimpfu leti nga riki na murisi.” Vafarisi a va va teka njhani vanhu lava tolovelekeke? Va te: “Ntshungu lowu wu nga wu tiviki Nawu i vanhu lava rhukaniweke.” (Yohane 7:49) Vafarisi volavo a va nga va rhandzi vanhu kambe a va rhandza ku sandza. Swi le rivaleni leswaku moya wa Yehovha a wu nga tirhi eka vona.
14. Xana xikombiso xa Yesu xa ku kombisa rirhandzu evutirhelini byakwe xi fanele xi hi susumeta njhani?
14 Yesu a a va twela vanhu. A a ma vona maxangu ya vona. A a swi tiva leswaku a va khomiwe hi ndlela yo biha, a va vavisiwile ni ku tsalangana, ku fana ni tinyimpfu leti nga riki na murisi. Yohane 2:25 yi hi byela leswaku Yesu “a a swi tiva leswi nga emunhwini.” Leswi a a ri Mutirhi wa Yehovha la nga ni Vuswikoti hi nkarhi wo tumbuluxa, Yesu a yi twisisa kahle ndlela leyi vanhu va vumbiweke ha yona. (Swivuriso 8:30, 31) Ku twisisa koloko ku kurise rirhandzu rakwe. Onge rirhandzu ro tano ri nga va rona leri hi susumetaka minkarhi hinkwayo entirhweni wa hina wo chumayela! Loko hi vona onge hi nga antswisa emhakeni leyi, a hi khongeleleni moya lowo kwetsima wa Yehovha kutani hi tirha hi ku pfumelelana ni swikhongelo swa hina. Yehovha u ta hi hlamula. U ta rhumela matimba lawa lama nga tsandziwiki hi nchumu leswaku ma hi pfuna leswaku hi fana swinene na Kreste, loyi a a swi fanelekela swinene ku chumayela mahungu lamanene.
15. Marito ya Esaya 61:1-3 ma tirha njhani eka Yesu, naswona ma va paluxa njhani vatsari ni Vafarisi?
15 Xana Yesu a a hlawuriwe hi mani? U te: “Moya wa Yehovha wu le henhla ka mina.” (Luka 4:17-21) Ina, Yehovha hi yena a hlawuleke Yesu hi ku tirhisa moya lowo kwetsima. Yesu a a nga ha lavi swibumabumelo swin’wana. Xana varhangeri va vukhongeri va le nkarhini wakwe a va hlawuriwe hi moya lowo kwetsima? E-e. Naswona a va nga hlomiseriwanga ku hetisisa Esaya 61:1-3, leyi Yesu a yi hlayeke hi rito ra le henhla kutani a vula leswaku yi tirha eka yena. Hi kombela u tihlayela tindzimana toleto kutani u tivonela leswaku vatsari va vukanganyisi ni Vafarisi a va nga faneleki. A va nga ri na mahungu lamanene lawa a va ta ma twarisa eka swisiwana. Naswona xana a va ta chumayela njhani hi ta ku ntshunxiwa ka mahlonga ni ku pfuriwa ka mahlo ya mabofu? Vona a va ri mabofu hi tlhelo ra moya naswona a va ri mahlonga ya mindhavuko leyi endliweke hi vanhu! Ku hambana ni vanhu volavo, xana ha faneleka leswaku hi dyondzisa vanhu?
16. Hi kwihi ku tiyiseka loku vanhu va Yehovha namuntlha va nga na kona malunghana ni ku faneleka ka vona tanihi varhumiwa?
16 Ina, a hi dyondzanga eswikolweni swa Vujagana leswi tlakukeke. A hi hlawuriwanga leswaku hi va vadyondzisi eswikolweni swa vukhongeri. Kutani, xana timfanelo ta hina ta kayivela? Doo! Hi hlawuriwe hi Yehovha leswaku hi va Timbhoni ta yena. (Esaya 43:10-12) Loko hi khongelela moya wa yena kutani hi tirha hi ku pfumelelana ni xikhongelo xa hina, hi va ni timfanelo ta le henhla swinene. Ina, a hi hetisekanga naswona a hi xi fikeleli xikombiso lexi vekiweke hi Mudyondzisi Lonkulu, Yesu. Nilokoswiritano, xana a hi tsaki hileswi Yehovha a tirhisaka moya wa yena leswaku a hi endla hi faneleka ni ku hi hlomisela ku va vadyondzisi va Rito ra yena?
Nhlengeletano Ya Yehovha Yi Hi Endla Hi Faneleka
17-19. Xana minhlangano ya ntlhanu ya vhiki na vhiki leyi lunghiseleriweke hi nhlengeletano ya Yehovha yi hi pfuna njhani leswaku hi fanelekela ku va vatirheli?
17 Sweswi a hi kambisiseni ndlela ya vunharhu leyi Yehovha a hi hlomisaka ha yona tanihi vadyondzisi va Rito ra yena—vandlha ra yena ra laha misaveni kumbe nhlengeletano leyi hi letelaka leswaku hi va vatirheli. Njhani? Anakanya hi nongonoko wa ndzetelo lowu hi wu kumaka! Hi vhiki, hi va ni minhlangano ya Vukreste ya ntlhanu. (Vaheveru 10:24, 25) Hi hlangana hi ri mintlawa leyitsongo eDyondzweni ya Buku ya Vandlha leswaku hi tiphina hi dyondzo ya Bibele leyi enteke hi ku tirhisa buku leyi lunghiseleriweke hi nhlengeletano ya Yehovha. Loko hi yingisela hi tlhela hi hlamula, hi dyondza swo karhi eka van’wana hi tlhela hi khutazana. Nakambe un’wana ni un’wana wa hina wa leteriwa ni ku khathaleriwa hi mulanguteri wa dyondzo ya buku. ENhlanganweni wa le Rivaleni ni le ka Dyondzo ya Xihondzo xo Rindza, hi tlhela hi dya swakudya leswi fuweke swa moya.
18 Xikolo xa hina xa Vutirheli bya le Tilweni xi hleleriwe ku hi letela ndlela leyi hi faneleke hi dyondzisa ha yona. Loko hi lunghiselela tinkulumo ta swichudeni, hi dyondza ndlela yo tirhisa Rito ra Xikwembu leswaku hi dyondzisa tidyondzo to hambana-hambana. (1 Petro 3:15) Xana u tshame u averiwa ku nyikela nkulumo leyi vulavulaka hi mhaka leyi vonakaka yi tolovelekile, kutani u kuma leswaku u dyondza swilo swo karhi leswintshwa eka yona? Sweswo swi tolovelekile. Loko hi dyondzisa van’wana hi antswisa vutivi bya hina bya mhaka yo karhi. Hambiloko hi nga averiwanga nkulumo, na hina hi nga dyondza ku va vadyondzisi vo antswa. Eka xichudeni xin’wana ni xin’wana, hi xiya timfanelo letinene naswona hi nga anakanya hi ndlela leyi hi nga ti tekelelaka ha yona timfanelo toleto.
19 Nhlangano wa Ntirho na wona wu hleleriwe ku hi hlomisela ku va vadyondzisi va Rito ra Xikwembu. Vhiki na vhiki hi tiphina hi tinkulumo leti hanyaka, mimbulavurisano ni minkombiso leyi fambisanaka ni vutirheli bya hina. Hi ta tirhisa xingheniso xihi? Hi nga langutana njhani ni mintlhontlho yo karhi evutirhelini bya hina bya le rivaleni? Hi tihi tindlela tin’wana to chumayela leti hi pfulekeleke leti hi nga ha bohekaka ku ti kambisisa swinene? I yini leswi nga ta hi pfuna ku va vadyondzisi lava humelelaka swinene loko hi endla maendzo yo vuyela ni loko hi fambisa tidyondzo ta Bibele? (1 Vakorinto 9:19-22) Swivutiso swo tano swi hlamuseriwa hi vuenti eNhlanganweni wa Ntirho. Tinkulumo to tala ta nhlangano lowu ti sekeriwe eka swihloko leswi nga eka Vutirheli Bya Hina Bya Mfumo, ku nga nkandziyiso wun’wana lowu hleleriweke ku hi hlomisela ntirho wa hina wa nkoka.
20. Hi nga vuyeriwa njhani hi xitalo eka minhlangano ni le tinhlengeletanweni?
20 Loko hi lunghiselela hi tlhela hi va kona eminhlanganweni ya hina kutani hi tirhisa leswi hi swi dyondzeke loko hi ri entirhweni wa hina tanihi vadyondzisi, hi kuma ndzetelo lowukulu. Kambe a swi heleli kwalaho. Hi ni minhlangano yin’wana leyikulu—tinhlengeletano ni mintsombano—leyi hleleriweke ku hi hlomisela ku va vadyondzisi va Rito ra Xikwembu. Kutani hi tshama hi swi langutele hi mahlo-ngati ku yingiserisisa ni ku tirhisa ndzayo leyi hi nga ta yi kuma!—Luka 8:18.
21. Hi byihi vumbhoni lebyi kombisaka leswaku ku leteriwa ka hina ku humelerile, naswona ku dzuneka ku ya eka mani?
21 Xana ndzetelo lowu Yehovha a wu lunghiseleleke wu humelerile? A hi kambisiseni vumbhoni bya kona. Lembe na lembe vanhu va madzana ya magidi va pfuniwa leswaku va dyondza tidyondzo ta xisekelo ta Bibele ni ku hanya hi ku pfumelelana ni leswi Xikwembu xi swi languteleke eka vona. Nhlayo ya hina ya kula, kambe ku hava ni un’we wa hina loyi a nga tidzunisaka hi mhaka yoleyo. Hi fanele hi languta timhaka hilaha Yesu a ti languteke hakona. U te: “Ku hava munhu loyi a nga taka eka mina handle ka loko Tatana, loyi a ndzi rhumeke, a n’wi koka.” Ku fana ni vaapostola va khale, vunyingi bya hina a hi dyondzekanga naswona hi vanhu ntsena. (Yohane 6:44; Mintirho 4:13) Ku humelela ka hina ku titshege hi Yehovha, loyi a kokaka vanhu va timbilu leti tshembekaka leswaku va ta entiyisweni. Pawulo u swi veke kahle a ku: “Mina ndzi byarile, Apolosi a cheleta, kambe Xikwembu hi xona lexi hambeteke xi swi kurisa.”—1 Vakorinto 3:6.
22. Ha yini hi nga fanelanga hi hela matimba ku tlula mpimo loko hi nga swi koti hi xitalo ku hlanganyela evutirhelini bya Vukreste?
22 Ina, Yehovha Xikwembu u katseka swinene entirhweni wa hina wa ku va vadyondzisi va Rito ra yena. Minkarhi yin’wana hi nga titwa hi nga faneleki tanihi vadyondzisi. Kambe, tsundzuka leswaku i Yehovha loyi a kokaka vanhu va ta eka yena ni le ka N’wana wa yena. I Yehovha loyi a hi endlaka hi fanelekela ku pfuna vanhu volavo lavantshwa hi ku tirhisa Rito ra yena, moya wa yena lowo kwetsima ni nhlengeletano ya yena ya laha misaveni. A hi amukeleni ndzetelo wa Yehovha hi ku tirhisa swilo leswinene leswi a hi nyikaka swona sweswi leswaku a hi endla hi hlomisiwa hi ku helela tanihi vadyondzisi va Rito ra Xikwembu!
A Wu Ta Hlamurisa Ku Yini?
• Bibele yi hi hlomisa njhani entirhweni wo chumayela?
• Moya lowo kwetsima wu hi pfuna njhani leswaku hi fanelekela ku va vatirheli?
• Nhlengeletano ya Yehovha ya laha misaveni yi ku pfune hi tindlela tihi leswaku u fanelekela ku va muchumayeri wa mahungu lamanene?
• Ha yini hi fanele hi tiyiseka loko hi ri evutirhelini?
[Xifaniso lexi nga eka tluka 25]
Yesu u kombise rirhandzu eka vanhu tanihi mudyondzisi wa Rito ra Xikwembu