Ku Chumayela Ka Sawulo Ku Pfuxa Rivengo

VAYUDA va le Damaska a va nga swi twisisi leswaku swi tise ku yini leswaku munhu loyi a a lwela tidyondzo ta ndhavuko hi ku hiseka a va mugwinehi. Sawulo a a tiviwa tanihi wanuna loyi a a kayakayisa lava a va vitana vito ra Yesu eYerusalema. A a te eDamaska a ta xanisa vadyondzisiwa va kwalaho. Kambe sweswi se a a chumayela leswaku Yesu, loyi a a tekiwa tanihi xigevenga lexi nyenyiwaka ivi a beleriwa hikwalaho ka ku sandza a a ri Mesiya! Xana Sawulo se a a penga?—Mintirho 9:1, 2, 20-22.

Kumbexana a ku ri ni xivangelo. Van’wana lava sukeke eYerusalema va famba swin’we na Sawulo va nga ha va va vulavule hi leswi humeleleke endleleni. Loko va tshinela eDamaska, hi xitshuketa ku humelele ku vonakala lokukulu ku va rhendzela, hiloko hinkwavo ka vona va wela ehansi. Nakambe a ku ri ni mpfumawulo wa rito. Ku lo khumbeka Sawulo ntsena. A a etlele endleleni. Loko a hetelele a pfukile, lava a a famba na vona va boheke ku n’wi kongomisa eDamaska, hikuva a a nga ha voni.—Mintirho 9:3-8; 26:13, 14.

Mukaneti A Hundzuka Museketeri

Xana a ku humelele yini eka Sawulo endleleni yo ya eDamaska? Xana riendzo ro leha kumbe ku hisa ka dyambu ra nhlikanhi a swi n’wi lamatile? Hi ku lava ku kuma tinhlamuselo ta leswi nga ha vaka swi humelerile, vaxopaxopi va vukhongeri va manguva lawa va vula leswaku Sawulo a nga ha va a ve ni swilo swo kota mijamujamu, xiphiqo lexikulu emianakanyweni lexi vangiweke hi ripfalo leri a ri karhateka, ku pfilunganyeka ka mianakanyo kumbe switshetshela.

Ntiyiso wa mhaka hi leswaku Yesu Kreste u humelele eka Sawulo hi nkarhi wa ku vonakala koloko loku tlunyaka, a n’wi khorwisa leswaku A a ri Mesiya. Swifaniso swin’wana swa xiendlakalo lexi swi kombisa Sawulo a wa ehancini. Hambileswi sweswo swi nga ha vaka swi endlekile, Bibele yi vula ntsena leswaku u lo “wela ehansi.” (Mintirho 22:6-11) Ku nga khathariseki leswaku Sawulo u we njhani, ku wa koloko a ku nga ri kukulu loko ku pimanisiwa ni ku wa ka yena exikhundlheni xakwe. Sweswi a a fanele a swi xiya leswaku leswi valandzeri va Yesu a va swi chumayela a swi ri ntiyiso. Nchumu wun’we lowu Sawulo a a fanele a wu endla a ku ri ku va joyina. Sawulo u tshike ku va nala wa tihanyi wa rungula ra Yesu kutani a va un’wana wa vatwarisi va rona lavakulu. Loko a ta va se a vona nakambe naswona a khuvuriwile, “Sawulo a hambeta a kuma matimba lama engetelekeke naswona a a hlanganisa tinhloko ta Vayuda lava a va tshama eDamaska loko a kombisa hilaha ku twisisekaka leswaku loyi i Kreste.”—Mintirho 9:22.

Rhengu Ro N’wi Dlaya Ri Tsandzeka

Xana Sawulo, loyi endzhakunyana a vitaniweke Pawulo, u ye kwihi endzhaku ka ku hundzuka ka yena? Loko a tsalela Vagalatiya u te: “Ndzi ye eArabiya, kutani ndzi vuya eDamaska.” (Vagalatiya 1:17) Rito ‘Arabiya’ ri nga ha vula ku ya exiphen’wini xin’wana ni xin’wana xa Nhlonhle ya Arabiya. Swidyondzi swin’wana swi ringanyeta leswaku Pawulo a nga ha va a ye eMananga ya le Siriya kumbe kun’wana emfun’weni wa Nabataea wa Aretas wa Vumune. Swi nga ha endleka Sawulo a ye endhawini leyi rhuleke leswaku a ya anakanyisisa endzhaku ka ku khuvuriwa ka yena, tanihi leswi Yesu na yena a yeke emananga endzhaku ka ku khuvuriwa ka yena.—Luka 4:1.

Loko Sawulo a tlhelele eDamaska, “Vayuda va boh[e] makungu ya ku n’wi dlaya.” (Mintirho 9:23) Ndhuna-nkulu leyi a yi ri muyimeri wa Hosi Aretas le Damaska a yi rindze muti leswaku yi ta khoma Sawulo. (2 Vakorinto 11:32) Kambe loko valala lava va ha endla rhengu ro dlaya Sawulo, vadyondzisiwa va Yesu a va kunguhata ndlela yo n’wi balekisa.

Van’wana va lava pfuneke Sawulo leswaku a baleka a ku ri Ananiya ni vadyondzisiwa lava a va ri ni muapostola loyi endzhakunyana ka ku hundzuka ka yena.a (Mintirho 9:17-19) Van’wana lava veke vapfumeri loko Sawulo a ri karhi a chumayela eDamaska va nga ha va va pfunetile na vona, hikuva Mintirho 9:25 yi ri: “Vadyondzisiwa vakwe va n’wi teka kutani nivusiku va n’wi lengeleta embhoveni lowu nga erirhangwini, va n’wi nembeleta hi xirhundzu.” Xiga lexi nge “vadyondzisiwa vakwe” xi nga ha vula lava Sawulo a va dyondziseke. Entiyisweni, ku humelela ka vutirheli byakwe ku nga ha va ku nyanyise ndlela leyi se a a vengiwa hi yona.

Dyondzo Leyi Nga Dyondziwaka

Loko hi kambisisa swin’wana swa swiendlakalo leswi endlekeke loko Sawulo a hundzuka ni loko a khuvuriwa, hi nga swi vona kahle leswaku a a nga karhateki ngopfu hi ndlela leyi van’wana a va n’wi teka ha yona; naswona a nga tshikanga hikwalaho ka nkaneto lowukulu. Nchumu lowu a wu ri wa nkoka swinene eka Sawulo a ku ri xileriso lexi a a nyikiwe xona xa ku chumayela.—Mintirho 22:14, 15.

Xana wa ha ku khorwiseka sweswinyana malunghana ni nkoka wa ku chumayela mahungu lamanene? Loko swi ri tano, wa swi tiva leswaku Vakreste hinkwavo va ntiyiso va fanele va va vachumayeri va Mfumo. A wu fanelanga u hlamala loko minkarhi yin’wana vanhu va ku venga hikwalaho ka vutirheli bya wena. (Matewu 24:9; Luka 21:12; 1 Petro 2:20) Ndlela leyi Sawulo a anguleke ha yona loko a kanetiwa i xikombiso lexinene. Vakreste lava tiyiselaka miringo va nga lan’wi va ta amukeriwa hi Xikwembu. Yesu u byele vadyondzisiwa vakwe a ku: “Vanhu hinkwavo va ta mi venga hikwalaho ka vito ra mina.” Kambe, u va tiyisekisile a ku: “Hi ku tiyisela ka n’wina mi ta londzovota mimoya-xiviri ya n’wina.”—Luka 21:17-19.

[Nhlamuselo ya le hansi]

[Xifaniso lexi nga eka tluka 28]

Sawulo u ‘wele ehansi’ loko Yesu a humelela eka yena

[Xifaniso lexi nga eka tluka 29]

Sawulo u pone ku dlayiwa eDamaska