Vukreste Byi Andza Exikarhi Ka Vayuda Va Lembe-Xidzana Ro Sungula

KU VE ni nhlangano wa nkoka eYerusalema kwalomu ka 49 C.E. “Lava a va vonaka va ri tiphuphu” ta vandlha ra Vukreste ra lembe-xidzana ro sungula—Yohane, Petro na Yakobo makwavo wa Yesu hi manana—a va ri kona kwalaho. Vanhu lavan’wana vambirhi lava ku vuriwaka leswaku a va ri kona eka nhlangano wolowo a ku ri muapostola Pawulo ni nakulobye wa yena Barnaba. A ku ta vulavuriwa hi ndlela yo avanyisa nsimu leyikulu leswaku ku ta chumayeriwa eka yona. Pawulo u hlamuserile: “Va nyike mina na Barnaba voko ra xinene ra ku hlangana swin’we, leswaku hi fanele ku ya ematikweni, kambe vona va ya eka lava va yimbeke.”—Vagalatiya 2:1, 9.a

Xana hi fanele hi wu twisisa njhani ntwanano lowu? Xana nsimu leyi mahungu lamanene a ma fanele ma chumayeriwa eka yona a yi fanele yi avanyisiwa eka tlhelo rin’wana ku va Vayuda ni vaproselita kasi eka tlhelo lerin’wanyana ku va Vamatiko? Kumbe, xana ku twananiwe leswaku ku avanyisiwa tindhawu? Leswaku hi kuma nhlamulo leyi twalaka, hi fanele hi kuma rungula ra matimu ya Vayuda lava a va nga tshami ePalestina.

Tiko Ra Vayuda Hi Lembe-xidzana Ro Sungula

A va ri vangani Vayuda lava a va nga tshami ePalestina hi lembe-xidzana ro sungula? Swidyondzeki swo tala swi tikomba onge swi pfumelelana ni buku leyi nge Atlas of the Jewish World: “Swa tika ku kuma nhlayo leyi kongomeke, kambe ku ringanyetiwe hi ndlela leyi twalaka leswaku emahlweninyana ka 70 [C.E.] a ku ri ni Vayuda lava endlaka timiliyoni timbirhi ni hafu eYudiya kasi lava tlulaka mune wa timiliyoni a va ri eRhoma. . . . Swi tikomba onge vaaki lava endlaka khume ra tiphesente emfun’weni wolowo a ku ri Vayuda, kasi etindhawini leti a va tele ngopfu, emadorobeni ya le swifundzheni swa le vuxeni, swi nga ha endleka a va endla kotara kumbe va tele.”

Tindhawu leti a va tele ngopfu eka tona a ku ri eSiriya, Asia Minor, Babilona na Egipta, ni le Vuxeni, kasi eYuropa a va nga talanga. Vakreste van’wana vo sungula va Vayuda lava a va tiveka ngopfu a a va nga tshami ePalestina, tanihi Barnaba loyi a a huma eKipra, Priska na Akhwila lava a va huma ePonto ivi va ya eRhoma, Apolosi loyi a a huma eAleksandriya na Pawulo loyi a a huma eTarso.—Mintirho 4:36; 18:2, 24; 22:3.

Vayuda lava a va nga tshami ePalestina a va tirhisana swinene ni vanhu va le tiko-xikaya ra vona. Ndlela yin’wana leyi a va tirhisana ha yona a ku ri hi xibalo xa lembe na lembe lexi a xi rhumeriwa etempeleni eYerusalema, ku nga ndlela yo hlanganyela etimhakeni ta le vugandzerini bya le tempeleni. Malunghana ni mhaka leyi, xidyondzeki John Barclay u ri: “Ku ni vumbhoni lebyi eneleke bya leswaku mali leyi yi hlengeletiweke, swin’we ni minyikelo leyi engetelekeke leyi humaka eka swifumi, vanhu lava a va nga tshami ePalestina a va tibohe ku yi humesa hi vukheta.”

Ndlela yin’wana leyi a va tirhisana ha yona a ku ri hi makume ya magidi ya vapfhumba lava a va ya eminkhubyeni ya le Yerusalema lembe na lembe. Xiviko lexi nga eka Mintirho 2:9-11 lexi vulavulaka hi Pentekosta ya 33 C.E. xi kombisa mhaka leyi. Vapfhumba va Vayuda lava a va ri kona enkhubyeni a va huma ePartiya, eMeda, aElami, eMesopotamiya, eKapadokiya, ePonto, eAsia, eFrigiya, ePamfiliya, aEgipta, eLibiya, eRhoma, eKreta ni le Arabiya.

Valanguteri va tempele eYerusalema a va vulavurisana ni Vayuda lava a va nga tshami ePalestina hi ku va tsalela mapapila. Swa tiveka leswaku Gamaliyele, mudyondzisi wa nawu loyi a boxiweke eka Mintirho 5:34, u rhumele mapapila eBabilona ni le swiphen’wini swin’wana swa misava. Loko muapostola Pawulo a fika a ri mubohiwa eRhoma kwalomu ka 59 C.E., “vakulukumba va Vayuda” va n’wi byele leswaku “a hi amukelanga mapapila malunghana na wena ku suka eYudiya, hambi ku ri un’wana wa vamakwerhu lava fikeke a nga vikanga kumbe ku vula xilo xo homboloka malunghana na wena.” Leswi swi kombisa leswaku a ku rhumeriwa mapapila ni swiviko nkarhi na nkarhi swi suka etiko-xikaya swi ya eRhoma.—Mintirho 28:17, 21.

Bibele ya Vayuda lava a va nga tshami ePalestina a ku ri vuhundzuluxeri bya Xigriki bya Matsalwa ya Xiheveru lebyi tiviwaka tanihi Septuagint. Buku yin’wana ya tinhlamuselo yi ri: “Swa twala ku gimeta hileswaku LXX [Septuagint] a yi hlayiwa yi tlhela yi amukeriwa tanihi Bibele ya Vayuda lava nga tshamiki ePalestina, kumbe ‘matsalwa yo kwetsima,’ etindhawini hinkwato ta le handle ka Palestina.” Vuhundzuluxeri byolebyo a byi tirhisiwa swinene hi Vakreste vo sungula loko va dyondzisa.

Swirho swa huvo leyi fumaka ya Vakreste va le Yerusalema a swi tolovelane ni swiyimo leswi. Mahungu lamanene se a ma fikile eka Vayuda lava a va tshama eSiriya ni le tindhawini ta le kule, ku katsa ni le Damaska ni le Antiyoka. (Mintirho 9:19, 20; 11:19; 15:23, 41; Vagalatiya 1:21) Enhlanganweni lowu veke kona hi 49 C.E., lava a va ri kona a va lunghiselela ntirho wa le nkarhini lowu taka. A hi kambisiseni timhaka leti ku vulavuriwaka ha tona eBibeleni malunghana ni ku andza exikarhi ka Vayuda ni vaproselita.

Maendzo Ya Pawulo Swin’we Ni Vayuda Lava A Va Nga Tshami ePalestina

Xiavelo xo sungula xa muapostola Pawulo a ku ri ku “yisa vito ra [Yesu Kreste] eka matiko swin’we ni le ka tihosi ni le ka vana va Israyele.”b (Mintirho 9:15) Endzhaku ka nhlangano wa le Yerusalema, kun’wana ni kun’wana laha a a famba kona, Pawulo u hambete a fikelela Vayuda lava a va nga tshami ePalestina. (Vona bokisi eka tluka 14.) Leswi swi kombisa leswaku ntwanano lowu nga fikeleriwa wa nsimu a ku ri wa ndhawu. Pawulo na Barnaba va endle ntirho wa vona wa vurhumiwa va ya evupela-dyambu, kasi lavan’wana a va tirha ematiko-xikaya ya Vayuda ni le tindhawini leti a ti ri ni Vayuda vo tala etindhawini ta le Vuxeni.

Tindhawu tin’wana leti a a va tele eka tona a ku ri eBabilona swin’we ni le Partiya, Meda na Elami. N’wamatimu un’wana u vula leswaku “nsimu yin’wana ni yin’wana erivaleni ra Tigri ni le Yufrata, ku suka eAmeniya ku ya ensonga-nkulu wa Peresiya, swin’we ni le n’walungu-vuxa bya Lwandle ra Khaspi ni le vuxeni bya Meda a ku ri ni Vayuda.” Encyclopaedia Judaica yi ringanyeta leswaku nhlayo ya vona a va ri 800 000 kumbe ku tlula. Josephus, n’wamatimu wa Muyuda wa lembe-xidzana ro sungula u hi byela leswaku makume ya magidi ya Vayuda va le Babilona a va ya eYerusalema eminkhubyeni ya lembe na lembe.

Xana van’wana va vapfhumba lava a va huma eBabilona va khuvuriwe hi Pentekosta ya 33 C.E.? A hi swi tivi, kambe van’wana va lava va tweke muapostola Petro hi siku rero a ku ri vanhu lava a va huma eMesopotamiya. (Mintirho 2:9) Ha swi tiva leswaku muapostola Petro a a ri eBabilona kwalomu ka 62-64 C.E. Loko a ri kwalaho u tsale papila ra yena ro sungula kumbexana ni ra vumbirhi. (1 Petro 5:13) Swi le rivaleni leswaku muti wa Babilona lowu a wu ri ni Vayuda vo tala a wu tekiwa tanihi xiphemu xa nsimu leyi averiweke Petro, Yohane na Yakobo enhlanganweni lowu ku vulavuriweke ha wona epapileni leri yaka eka Vagalatiya.