Xixima Lava Nga Ni Vulawuri Ehenhla Ka Wena
“Xiximani vanhu va mixaka hinkwayo, rhandzani nhlengeletano ya vamakwenu hinkwayo, chavani Xikwembu, mi xixima hosi.”—1 PETRO 2:17.
1, 2. Xana vanhu va byi languta njhani vulawuri namuntlha? Ha yini?
MANANA un’wana la karhatekeke u te: “Vana va ni timfanelo hinkwato. A va xiximi vatswari.” “Tlhontlha Vulawuri” ku vula xiphephana xin’wana lexi namekiwaka emovheni. Sweswo ko va swikombiso swimbirhi swa swiyimo leswi nga kona namuntlha, hilaha u swi tivaka hakona. Ku nga xiximi vatswari, vadyondzisi, vathori ni vatirhela-mfumo swi tolovelekile emisaveni hinkwayo.
2 Van’wana va nga ha ala ivi va ku, ‘Valawuri a va faneriwi hi ku xiximiwa hi mina.’ Minkarhi yin’wana swi nga ha tika ku kaneta marito wolawo. Hi kuma marungula lama ngo na kunene lama vulavulaka hi vatirhela-mfumo lava nga tshembekiki, vathori lava nga ni makwanga, vadyondzisi lava nga swi kotiki ku dyondzisa ni vatswari lava nga ni tihanyi eka vana va vona. Lexi tsakisaka, i Vakreste va nga ri vangani lava nga va xiximiki vanhu lava nga ni vulawuri evandlheni.—Matewu 24:45-47.
3, 4. Ha yini Vakreste va fanele va xixima valawuri?
3 Leswi hi nga Vakreste, hi ni ‘xivangelo lexi hi susumetelaka’ ku xixima valawuri va tiko. Muapostola Pawulo u tsundzuxe Vakreste ku “tivek[a] ehansi ka valawuri lava tlakukeke, hikuva a ku na vulawuri lebyi nga humiki eka Xikwembu; valawuri lava nga kona va vekiwe hi Xikwembu eswiyin’weni swa vona leswi hikiweke.” (Varhoma 13:1, 2, 5; 1 Petro 2:13-15) Pawulo u tlhele a kombisa xivangelo xa nkoka xo xixima vulawuri bya le ndyangwini, a ku: “N’wina vavasati lava tekiweke, tivekeni ehansi ka vanuna va n’wina, tanihi leswi swi fanelaka eHosini. N’wina vana, yingisani vatswari va n’wina eka xin’wana ni xin’wana, hikuva leswi swa tsakisa swinene eHosini.” (Vakolosa 3:18, 20) Swa fanela leswaku hi xixima vakulu va vandlha hikuva ‘moya lowo kwetsima wu va hlawurile leswaku va va valanguteri, leswaku va risa vandlha ra Xikwembu.’ (Mintirho 20:28) Loko hi xixima valawuri lava nga vanhu hi kombisa leswaku hi xixima Yehovha. Hi ntolovelo, ku xixima vulawuri bya Yehovha minkarhi hinkwayo hi kona ku rhangaka emahlweni evuton’wini bya hina.—Mintirho 5:29.
4 Loko hi ri karhi hi anakanya hi vulawuri lebyi tlakukeke bya Yehovha, a hi kambisiseni swikombiso swa vanhu van’wana lava a va nga xiximi valawuri swin’we ni swa lava a va va xixima.
Ku Delela Swi Endla Leswaku U Nga Amukeriwi
5. I langutelo rihi ro delela leri Mikala a veke na rona eka Davhida, naswona sweswo swi n’wi vangele yini?
5 Eka matimu ya Hosi Davhida, hi nga vona ndlela leyi Yehovha a va langutaka ha yona lava va byi langutelaka ehansi vulawuri lebyi humaka eka Xikwembu. Loko Davhida a tisa areka ya ntwanano eYerusalema, nsati wa yena Mikala “[u vone] Hosi Davhida a tlula ni ku chanchula emahlweni ka Yehovha; hiloko a sungula ku n’wi langutela ehansi embilwini yakwe.” Mikala a a fanele a xixime Davhida hayi hi leswi a a ri nhloko ya ndyangu ntsena kambe ni hi leswi a a ri hosi ya tiko. Hambiswiritano, u sapaterile a ku: “Hosi ya Israyele yi tivangamisile namuntlha loko yi tifunungula namuntlha ematihlweni ya mahlonga ya xisati ya malandza ya yona, hilaha un’wana wa vavanuna lava kalaka dzano a tifunungulaka hakona erivaleni!” Mikala a nga ha kumanga vana hikwalaho ka sweswo.—2 Samuwele 6:14-23.
6. Xana Yehovha u ku langute njhani ku deleriwa ka vatotiwa va Yena hi Kora?
6 Xikombiso xo biha ngopfu xa ku delela lava nga valawuri eka swilo swa moya lava hlawuriweke hi Xikwembu, a ku ri lexiya xa Kora. Leswi a ri Mukohata, a a ri ni lunghelo ro tirhela Yehovha etabernakeleni! Hambiswiritano, u xopaxope Muxe na Aroni, varhangeri va Vaisrayele lava totiweke hi Xikwembu. Kora u hlengelete tindhuna tin’wana ta le Israyele ivi hi ku delela va byela Muxe na Aroni va ku: “Ntshungu hinkwawo ka wona wa kwetsima naswona Yehovha u le xikarhi ka wona. Kutani, ha yini mi titlakusa ehenhla ka nhlengeletano ya Yehovha?” Xana Yehovha u ri langute njhani langutelo ra Kora ni vaseketeri va yena? Xikwembu xi langute xiendlo xa vona xi ri xa ku delela Yehovha hi yexe. Endzhaku ka ku vona hinkwavo lava a va yima na vona va mitiwe hi misava, Kora ni tindhuna leta 250 va herisiwe hi ndzilo lowu humaka eka Yehovha.—Tinhlayo 16:1-3, 28-35.
7. Xana ‘vaapostola lavanene’ a va ri ni xivangelo xo karhi xo sola vulawuri bya Pawulo?
7 Evandlheni ra Vukreste ra lembe-xidzana ro sungula, a ku ri ni lava a va delela lava nga ni vulawuri eka swilo swa moya. ‘Vaapostola lavanene ngopfu’ va le vandlheni ra le Korinto a va delela Pawulo. A va sola mavulavulelo ya yena, va ku: “Loko a ri kona hi xiviri u tsanile naswona mhaka yakwe ya soleka.” (2 Vakorinto 10:10; 11:5) Ku nga khathariseki leswaku Pawulo a a ri xivulavuri lexinene kumbe a nga ri xona, a a fanele a xiximiwa tanihi muapostola. Kambe xana mhaka ya Pawulo a yi soleka hakunene? Tinkulumo ta yena ta le rivaleni leti tsariweke eBibeleni ti nyikela vumbhoni bya ndlela leyi a a ri xivulavuri lexi khorwisaka ha yona. Phela, hikwalaho ko burisana katsongo na Heroda Agripa wa Vumbirhi, loyi a ‘yi tiva khwatsi minjhekanjhekisano hinkwayo leyi nga kona exikarhi ka Vayuda,’ Pawulo u susumetele hosi ku vula leswaku: “Hi nkarhi wo koma a wu ta ndzi kucetela leswaku ndzi va Mukreste”! (Mintirho 13:15-43; 17:22-34; 26:1-28) Kambe, vaapostola lavanene ngopfu va le Korinto va n’wi hehle hi leswaku wa soleka loko a vulavula! Xana Yehovha u ri langute njhani langutelo ra vona? Eka rungula leri yaka eka valanguteri va vandlha ra le Efesa, Yesu Kreste u vulavula kahle hi vanhu lava va nga pfumelangiki ku hambukisiwa hi lava ‘a va tivula vaapostola, kambe va nga ri vona.’—Nhlavutelo 2:2.
Va Xixime Hambileswi Va Nga Hetisekangiki
8. Xana Davhida u swi kombise njhani leswaku u xixima vulawuri lebyi Yehovha a byi nyikeke Sawulo?
8 Ku ni swikombiso swo tala eBibeleni swa vanhu lava xiximeke valawuri, hambiloko va tirhisa vulawuri bya vona hi ndlela yo biha. Davhida a ri un’wana wa vanhu volavo lava nga swikombiso leswinene. Hosi Sawulo, loyi a tirheriwa hi Davhida u sungule ku va ni mavondzo hikwalaho ka ku humelela ka yena ivi a lava ku n’wi dlaya. (1 Samuwele 18:8-12; 19:9-11; 23:26) Nilokoswiritano, hambileswi Davhida a kumeke minkarhi leyi a a ta swi kota ku dlaya Sawulo ha yona, u te: “A hi swinene eka mina hi ku ya hi langutelo ra Yehovha leswaku ndzi tshambuluta voko ra mina ndzi lwa ni mutotiwa wa Yehovha!” (1 Samuwele 24:3-6; 26:7-13) Davhida a a swi tiva leswaku Sawulo u hoxisile, kambe u swi tshikele Yehovha leswaku a n’wi avanyisa. (1 Samuwele 24:12, 15; 26:22-24) A nga n’wi tseketselanga Sawulo.
9. (a) Xana Davhida u titwe njhani loko a ri karhi a xanisiwa hi Sawulo? (b) Hi nga swi vonisa ku yini leswaku xichavo xa Davhida eka Sawulo a xi ri xa xiviri?
9 Xana Davhida u tshikilelekile loko a ri karhi a xanisiwa? Davhida u rilele Yehovha a ku: “Ku ni . . . vaxanisi lava lavaka moya-xiviri wa mina.” (Pisalema 54:3) U chululele xifuva xa yena eka Yehovha a ku: “Oho Xikwembu, ndzi kutsule eka valala va mina . . . Lava tiyeke va ndzi hlasela, kasi a ndzi pfukeli munhu, a ndzi na xidyoho, Oho Yehovha. Hambileswi ndzi nga riki na xidyoho, va tsutsuma va lungheka. Pfuka u languta loko ndzi vitaniwa.” (Pisalema 59:1-4) Xana u tshame u titwa hi ndlela leyi—hikwalaho ko tshamela ku karhatiwa hi munhu la nga ni vulawuri, kambe u nga n’wi dyelanga nchumu? Davhida a nga tsandzekanga ku xixima Sawulo. Loko Sawulo a file, ematshan’weni yo khana, Davhida u qambhe risimu a ku: “Sawulo na Yonathani, vanhu lava rhandzekaka ni vanhu vo saseka hi nkarhi wa vutomi bya vona . . . A va ri ni rivilo ku tlula magama, a va ri ni matimba ku tlula tinghala. N’wina vana va Israyele va vanhwanyana, rilelani Sawulo.” (2 Samuwele 1:23, 24) Mawaku xikombiso lexinene xa ku xixima vatotiwa va Yehovha hi xiviri, hambileswi Davhida a hoxeriwile hi Sawulo!
10. Pawulo u veke xikombiso xihi lexinene malunghana ni ku xixima valawuri lava vekiweke hi Xikwembu va huvo leyi fumaka, naswona sweswo swi yise eka yini?
10 Ni le nkarhini wa Vukreste hi kuma swikombiso leswi hlamarisaka swa lava xiximeke vanhu lava nyikiweke vulawuri hi Xikwembu. Hi xikombiso, anakanya hi Pawulo. U xixime swiboho swa huvo leyi fumaka ya lembe-xidzana ro sungula ya vandlha ra Vukreste. Loko Pawulo a endzele eYerusalema ro hetelela, huvo leyi fumaka yi n’wi tsundzuxile leswaku a tibasisa hi ku landza mukhuva wa kona a kombisa leswaku a nga fukamelanga rivengo eka Nawu wa Muxe. Pawulo a a ta va a anakanyile a ku: ‘Vamakwerhu volavo va ndzi lerise ku suka eYerusalema enkarhini lowu hundzeke loko vutomi bya mina byi ri ekhombyeni. Sweswi va lava ndzi swi kombisa erivaleni leswaku ndzi xixima Nawu wa Muxe. Ana se ndzi tsalele Vagalatiya papila leri va tsundzuxaka ku tshika ku hlayisa Nawu wolowo. Loko ndzo ya etempeleni, van’wana va nga ha teka xiendlo xa mina hi ndlela yin’wana, va ehleketa leswaku ndzi pfumelelana ni ntlawa lowu yimbisiweke.’ Hambiswiritano, Pawulo a nga anakanyanga hi ndlela yoleyo. Tanihi leswi a ku nga ri na misinya ya milawu ya Vukreste leyi a yi tluriwa, u va xiximile a tlhela a fambisana ni ndzayo ya huvo leyi fumaka ya lembe-xidzana ro sungula. Vuyelo bya nkarhi wolowo hi leswaku Pawulo a fanele a kutsuriwa eka ntshungu wa vapfukeri wa Vayuda, kutani u hete malembe mambirhi a ri ekhotsweni. Eku heteleleni, ku rhandza ka Xikwembu ku endliwile. Pawulo u nyikele vumbhoni emahlweni ka vatirhela-mfumo lava tlakukeke eKhezariya ivi hulumendhe yi n’wi yisa eRhoma leswaku a ya nyikela vumbhoni emahlweni ka Khezari hi xiviri.—Mintirho 9:26-30; 21:20-26; 23:11; 24:27; Vagalatiya 2:12; 4:9, 10.
Xana U Kombisa Xichavo?
11. Xana hi nga va xixima njhani valawuri va tiko?
11 Xana u kombisa xichavo lexi faneleke eka valawuri? Vakreste va lerisiwa ku ‘nyika hinkwavo timfanelo ta vona, loyi a lavaka ku xiximiwa va fanele va n’wi xixima.’ Kunene, ku titsongahatela “valawuri lava tlakukeke” a swi katsi ku hakela swibalo swa hina ntsena kambe swi katsa ni ku xixima valawuri hi ndlela leyi hi tikhomaka hi yona ni ndlela leyi hi vulavulaka ha yona. (Varhoma 13:1-7) Loko vatirhela-mfumo va hi khoma hi tihanyi, xana hi angurisa ku yini? Le Xifundzeni xa Chiapas, eMexico, valawuri va ximutana xin’wana a va teke mapurasi lawa a ma ri ya mindyangu ya 57 ya Timbhoni ta Yehovha hikwalaho ka leswi Vakreste lava a va nga hlanganyeli eka minkhuvo yo karhi ya vukhongeri. Eminhlanganweni leyi khomiweke leswaku ku ta tlhantlhiwa mhaka leyi, Timbhoni, leti a ti ambale swiambalo leswi baseke ni leswi langutekaka, minkarhi hinkwayo ti vulavule hi ndlela leyi kombisaka xichavo. Endzhaku ka lembe, ku tekiwe xiboho xa leswaku va tlheriseriwa mapurasi ya vona. Langutelo ra vona ri endle leswaku va xiximiwa hi vanhu van’wana lava va swi voneke lerova na vona va lave ku va Timbhoni ta Yehovha!
12. Ha yini swi ri swa nkoka ku va ni “xichavo lexi enteke” eka wanuna la nga riki mupfumeri?
12 Xana u nga byi xixima njhani vulawuri lebyi vekiweke hi Xikwembu endyangwini? Endzhaku ko hlamusela xikombiso xa Yesu xo xanisiwa hi ndlela yo biha, muapostola Petro u te: “Hi mukhuva lowu fanaka, n’wina vavasati lava tekiweke, tivekeni ehansi ka vanuna va n’wina, leswaku, loko ku ri ni lava nga yingisiki rito, va ta kokiwa handle ka rito hi ku tikhoma ka vasati va vona, hikwalaho ka leswi va veke timbhoni leti ti ku voneke hi mahlo ku tikhoma ka n’wina loku tengeke swin’we ni xichavo lexi enteke.” (1 Petro 3:1, 2; Vaefesa 5:22-24) Laha Petro a a kandziyisa nkoka wa ku titsongahata ka wansati eka nuna wa yena hi “xichavo lexi enteke,” hambileswi vavanuna van’wana va nga tikarhateliki ku faneriwa hi xichavo xo tano. Wansati la nga ni xichavo a nga ha koka mbilu ya nuna wa yena la nga riki mupfumeri.
13. Xana vavasati va nga xixima vanuna va vona hi ndlela yihi?
13 Eka mongo wa matsalwa lawa, Petro u kokela nyingiso wa hina eka xikombiso xa Sara, loyi nuna wakwe, ku nga Abrahama, a a ri xikombiso lexinene xa ripfumelo. (Varhoma 4:16, 17; Vagalatiya 3:6-9; 1 Petro 3:6) Xana vavasati lava vanuna va vona va nga riki vapfumeri va fanele va nga va xiximi ngopfu vanuna va vona, ku tlula vavasati lava vanuna va vona va nga vapfumeri? Ku vuriwa yini loko u nga pfumelelani ni nuna wa wena emhakeni yo karhi? Yesu u nyikele xitsundzuxo lexi nga tirhisiwaka hi ku angarhela laha: “Loko un’wana loyi a nga ni vulawuri a ku sindzisa ku endla ntirho wo famba khilomitara yin’we, famba na yena tikhilomitara timbirhi.” (Matewu 5:41) Xana u xixima nuna wa wena hi ku pfumelelana ni ku navela ka yena? Loko ku navela ka yena ku vonaka ku nga tsakisi, n’wi hlamusele ndlela leyi u titwaka ha yona hi mhaka yoleyo. U nga ehleketi leswaku wa yi tiva ndlela leyi u titwaka ha yona. Kambe loko u n’wi hlamusela ku navela ka wena, n’wi hlamusele hi ndlela ya xichavo. Bibele ya hi tsundzuxa: “Marito ya n’wina a ma ve ni nsovo nkarhi hinkwawo, ma lungiwe hi munyu, leswaku mi tiva ndlela leyi mi faneleke ku hlamula un’wana ni un’wana ha yona.”—Vakolosa 4:6.
14. Xana ku xixima vatswari swi katsa yini?
14 Ku vuriwa yini hi n’wina vana? Rito ra Xikwembu ra lerisa: “Vana, yingisani vatswari va n’wina evun’weni ni Hosi, hikuva leswi swi lulamile: ‘Xixima tata wa wena ni mana wa wena’; ku nga xileriso xo sungula lexi nga ni xitshembiso.” (Vaefesa 6:1-3) Xiya leswaku ku yingisa vatswari va wena swi tekiwa swi fana ni ku ‘xixima tata wa wena ni mana wa wena.’ Rito ra Xigriki leri hundzuluxeriweke ri va “xixima” ri vula “ku veka nxavo” kumbe “ku teka nchumu wo karhi wu ri wa nkoka.” Hikwalaho, ku yingisa a ko va ku landzela milawu ya vatswari leyi nga ha vonakaka yi nga twisiseki eka wena, u ri karhi u nga swi lavi. Xikwembu xi lava leswaku u xixima vatswari va wena swinene u tlhela u teka nkongomiso wa vona wu ri wa nkoka.—Swivuriso 15:5.
15. Xana vana va nga hambeta va ri ni xichavo hi ndlela yihi, hambiloko va vona onge vatswari va vona va endle xihoxo?
15 Ku vuriwa yini hi loko vatswari va wena va endla swo karhi leswi vonakaka onge swi ta endla leswaku u nga ha va xiximi ngopfu? Ringeta ku languta timhaka hi ndlela leyi va ti langutaka ha yona. Xana a hi vona va ku “velekeke” va tlhela va ku kurisa? (Swivuriso 23:22) Xana swilo swoleswo a va swi endli hikwalaho ka ku ku rhandza? (Vaheveru 12:7-11) Vulavula hi xichavo ni vatswari va wena, u va hlamusela hi moya wo rhula ndlela leyi u titwaka ha yona. Hambiloko va angula hi ndlela leyi u nga yi rhandziki, papalata ku vulavula na vona hi ndlela yo delela. (Swivuriso 24:29) Tsundzuka ndlela leyi Davhida a xiximeke Sawulo ha yona hambiloko hosi yoleyo se yi tshikile ku landzela ndzayo ya Xikwembu. Kombela Yehovha leswaku a ku pfuna u kota ku langutana ni mintlhaveko ya wena. Davhida u te: “Chululani timbilu ta n’wina emahlweni ka xona. Xikwembu i vutumbelo bya hina.”—Pisalema 62:8; Swirilo 3:25-27.
Xixima Lava Rhangelaka
16. Xana hi nga dyondza yini eka xikombiso xa vadyondzisi va mavunwa ni xa tintsumi?
16 Vakulu va vandlha va hlawuriwa hi moya lowo kwetsima, kambe va ha ri vanhu lava nga hetisekangiki naswona va swi endla swihoxo. (Pisalema 130:3; Eklesiasta 7:20; Mintirho 20:28; Yakobo 3:2) Hikwalaho, van’wana evandlheni va nga ha titwa va nga enerisiwi hi vakulu. Xana hi fanele hi angula njhani loko hi vona onge nchumu wun’wana evandlheni a wu endliwi hi ndlela leyinene, kumbe wu vonaka wu nga endliwanga hi ndlela ya kona? Xiya ku hambana loku nga kona exikarhi ka vadyondzisi va mavunwa va lembe-xidzana ro sungula ni tintsumi: “Lava kanyaka timbilu, vo sihalala, [vadyondzisi va mavunwa] a va rhurhumeli eka lava dzunekaka kambe va vulavula ha vona hi ku va tseketsela, kasi tintsumi, hambileswi ti va tlulaka hi ntamu ni matimba, a ti va hehli hi marito ya ku tseketsela, naswona leswi a ti swi endli hikwalaho ka leswi ti nga ni xichavo eka Yehovha.” (2 Petro 2:10-13) Hambileswi vadyondzisi va mavunwa a va vulavula hi ku tseketsela eka “lava dzunekaka”—ku nga vakulu lava a va nyikiwe vulawuri eka vandlha ra Vukreste ra lembe-xidzana ro sungula—tintsumi a ti nga vulavuli hi ku tseketsela eka vadyondzisi va mavunwa lava a va holovisa vamakwavo. Hambileswi tintsumi a ti ri exiyin’weni lexi tlakukeke naswona ti kotaka ku twisisa vululami swinene ku tlula vanhu, a ti swi xiya leswi a swi humelela evandlheni. Kambe, “leswi ti nga ni xichavo eka Yehovha,” ti tshike Xikwembu leswaku xi avanyisa.—Vaheveru 2:6, 7; Yudha 9.
17. Xana ripfumelo ra wena ri khumbeka njhani loko u vona onge vakulu va hoxisile?
17 Hambiloko nchumu wun’wana wu nga fambisiwi hi ndlela leyi a wu fanele wu fambisiwa ha yona, xana a hi fanelanga hi va ni ripfumelo eka Yesu Kreste tanihi Nhloko leyi hanyaka ya vandlha ra Vukreste? Xana a nga swi voni leswi humelelaka evandlheni ra yena emisaveni hinkwayo? Xana a hi fanelanga hi xixima ndlela leyi a fambisaka swilo ha yona naswona hi xixima vuswikoti bya yena byo lawula timhaka? Kunene, ‘hi vamani hina lerova hi nga avanyisa varikwerhu?’ (Yakobo 4:12; 1 Vakorinto 11:3; Vakolosa 1:18) Ha yini u nga byeli Yehovha hi xikhongelo, malunghana ni ku karhateka ka wena?
18, 19. Xana u nga endla yini loko u vona onge nkulu u endle xihoxo?
18 Hikwalaho ka ku nga hetiseki ka vanhu, ku nga ha va ni ku karhateka kumbe swiphiqo. Nkarhi wun’wana, nkulu a nga ha endla xihoxo ivi a a khunguvanyisa van’wana. Ku va ni matlotlo ehansi ka swiyimo swo tano a swi nge hundzuli xiyimo. Swi ngo ho nyanyisa xiphiqo. Lava va nga ni ku twisisa hi tlhelo ra moya va ta yimela Yehovha leswaku a lulamisa swilo naswona a nyikela ndzayo yihi ni yihi leyi nga ha lavekaka hi nkarhi wa yena ni hi ndlela ya yena.—2 Timotiya 3:16; Vaheveru 12:7-11.
19 Ku vuriwa yini hi loko u dyiwa hi mhaka yo karhi? Ematshan’weni yo va u yi byela van’wana evandlheni, ha yini u nga yi eka vakulu hi xichavo u ya lava mpfuno? Handle ko xopaxopa, hlamusela ndlela leyi u titwaka ha yona. Minkarhi hinkwayo vana ni “ntlhaveko wa xinakulobye” eka vona, naswona u va kombisa xichavo loko u ri karhi u tiphofula eka vona. (1 Petro 3:8) U nga va sapateli, kambe va tshembe tanihi Vakreste lava wupfeke. Tlangela xikhutazo xin’wana ni xin’wana xa Matsalwa lexi va nga ha ku nyikaka xona hi tintswalo. Naswona loko ku vonaka ku laveka mindzulamiso yin’wana, tiyiseka leswaku Yehovha u ta va kongomisa vakulu leswaku va endla leswinene ni leswi lulameke.—Vagalatiya 6:10; 2 Vatesalonika 3:13.
20. Xana hi ta kambisisa yini exihlokweni lexi landzelaka?
20 Hambiswiritano, ka ha ri ni mhaka yin’wana leyi faneleke yi kambisisiwa malunghana ni ku fundzha ni ku xixima valawuri. Xana valawuri a va fanelanga va xixima vanhu lava va va khathalelaka? A hi yi kambisiseni mhaka leyi eka xihloko lexi landzelaka.
A Wu Ta Hlamurisa Ku Yini?
• Hi xihi xivangelo lexinene lexi hi nga na xona xo xixima valawuri?
• Xana Yehovha na Yesu va va languta njhani lava va nga byi xiximiki vulawuri lebyi humaka eka Xikwembu?
• Hi swihi swikombiso leswinene leswi hi nga na swona swa lava va xiximeke valawuri?
• Xana hi nga endla yini loko munhu loyi a nga ni vulawuri ehenhla ka hina a vonaka a endle xihoxo?
[Xifaniso lexi nga eka tluka 12]
Sara a a byi xixima swinene vulawuri bya Abrahama naswona a a tiphina
[Xifaniso lexi nga eka tluka 13]
Mikala u tsandzekile ku xixima vulawuri bya Davhida tanihi nhloko ya ndyangu ni hosi
[Xifaniso lexi nga eka tluka 15]
“A hi swinene eka mina . . . leswaku ndzi tshambuluta voko ra mina ndzi lwa ni mutotiwa wa Yehovha!”
[Xifaniso lexi nga eka tluka 16]
Ha yini u nga phofuli ku karhateka ka wena eka Yehovha hi xikhongelo?