4 Tshika Ku Kanakana

“Wena wa ripfumelo leritsongo, ha yini u kanakana?”—Matewu 14:31.

HA YINI SWI TIKA? Hambi ku ri vadyondzisiwa va Yesu a va kanakana minkarhi yin’wana. (Matewu 14:30; Luka 24:36-39; Yohane 20:24, 25) Entiyisweni, Bibele yi vula leswaku ku pfumala ripfumelo i “xidyoho lexi hi phasaka hi ku olova.” (Vaheveru 12:1) Muapostola Pawulo u tsale a ku: “Ripfumelo a hi ra vanhu hinkwavo.” (2 Vatesalonika 3:2) Sweswo a swi vuli swona leswaku van’wana va nga tsandzeka ku va ni ripfumelo. Kambe vo tala a va tikarhati leswaku va va na rona. Xikwembu xi ta ma katekisa matshalatshala ya lava tikarhatelaka ku va na rona.

U NGA XI HLULA NJHANI XIHINGA XEXO? Kumisisa leswaku hi swihi swilo leswi ku endlaka u va ni ku kanakana. Hi xikombiso, mudyondzisiwa Tomasi a a nga tshembi leswaku Yesu u pfuxiwile eku feni hambileswi vadyondzisiwa van’wana va vuleke leswaku va n’wi vonile. Tomasi a a lava vumbhoni. Xana ku humelele yini? Yesu u n’wi nyike vumbhoni lebyi a a byi lava leswaku a va ni ripfumelo leri tiyeke.—Yohane 20:24-29.

Yehovha Xikwembu u tirhisa Bibele leswaku a hi nyika tinhlamulo leti hi ti lavaka leswaku hi tshika ku kanakana. Hi xikombiso, vanhu vo tala va tshika ku va ni ripfumelo eka Xikwembu hileswi hi ku kongoma kumbe hi ndlela leyi nga kongomangiki va xi solaka hikwalaho ka tinyimpi, madzolonga ni maxangu lama kayakayisaka vanhu. Xana Bibele yi ri yini hi mhaka leyi?

Xikwembu a xi fumi vanhu hi ku tirhisa tihulumendhe ta vanhu. Yesu u vule leswaku xivumbiwa xa moya lexi vuriwaka Sathana i “mufumi wa misava.” (Yohane 14:30) Sathana u tshembise Yesu leswaku u ta n’wi nyika vulawuri bya mimfumo hinkwayo ya misava ntsena loko o n’wi gandzela. U te: “Ndzi ta ku nyika vulawuri lebyi hinkwabyo ni ku vangama ka byona, hikuva byi nyikiwe mina, naswona ndzi byi nyika hambi ku ri mani loyi ndzi rhandzaka ku n’wi nyika byona.” Yesu a nga kanetanga leswaku Sathana a a ri ni vulawuri byolebyo. Ematshan’weni ya sweswo U te: “Ku tsariwile, ‘U fanele ku gandzela Yehovha Xikwembu xa wena, naswona u fanele ku endlela yena ntsena ntirho wo kwetsima.’” (Luka 4:5-8) Sathana ni tihulumendhe ta vanhu hi vona lava faneleke va soriwa hileswi vanhu va xanisekaka, ku nga ri Xikwembu.—Nhlavutelo 12:9, 12.

Ku nga ri khale Yehovha Xikwembu u ta herisa swilo hinkwaswo leswi vangaka ku xaniseka ka vanhu. Ana se u hlele Mfumo kumbe hulumendhe leyi nga ta fuma misava, leyi hosi ya yona ku nga N’wana wakwe Kreste Yesu. (Matewu 6:9, 10; 1 Vakorinto 15:20-28) Mahungu lamanene malunghana ni Mfumo wolowo ma karhi ma chumayeriwa emisaveni hinkwayo leswaku ku hetiseka vuprofeta bya le Bibeleni. (Matewu 24:14) Ku nga ri khale Mfumo wolowo wu ta lovisa vanhu hinkwavo lava wu kanetaka naswona wu ta herisa leswi vangelaka vanhu maxangu.—Daniyele 2:44; Matewu 25:31-33, 46; Nhlavutelo 21:3, 4.

HI BYIHI VUYELO BYA KONA? Lava kanakanaka va fana ni magandlati lama yingayingisiwaka “hi mheho yin’wana ni yin’wana ya ku dyondzisa hi mano ya vanhu.” (Vaefesa 4:14; 2 Petro 2:1) Ku hambana ni sweswo, lava kumaka tinhlamulo leti khorwisaka ta swivutiso leswi va nga na swona va kota ku ‘yima va tiyile eripfumelweni.’—1 Vakorinto 16:13.

Timbhoni ta Yehovha leti nga vagandlisi va magazini lowu, ti nga swi tsakela ku ku pfuna leswaku u kuma tinhlamulo ta swivutiso leswi ku endlaka u kanakana. Ta ku rhamba leswaku u hlanganyela na tona kutani u kambisisa tidyondzo ta tona hi wexe. Sweswo swi ta endla leswaku u va ni ripfumelo leri tiyeke eka Xikwembu.

Leswaku u kuma rungula leri engetelekeke, vona ndzima 8 leyi nge, “Mfumo Wa Xikwembu I Yini?,” ni ndzima 11 leyi nge “Ha Yini Xikwembu Xi Pfumelela Leswaku Ku Va Ni Ku Xaniseka?,” ebukwini leyi nge Xana Bibele Yi Dyondzisa Yini Hakunene?a

[Nhlamuselo ya le hansi]

[Xifaniso lexi nga eka tluka 9]

Lava kumaka tinhlamulo leti khorwisaka ta swivutiso leswi va nga na swona va va ni masungulo lama tiyeke laha va nga akaka kona ripfumelo ra vona