‘Ku Kamberiwa Loko U Faneleka’—Njhani?

¹ Leswi nhlengeletano ya Yehovha yi yaka yi kula, ku ni xilaveko lexikulu xa vamakwerhu lava fanelekaka leswaku va va malandza ya vutirheli. Vamakwerhu vo tala lava nga siki hlawuriwaka, ku katsa ni vana va kondlo-a-ndzi-dyi, va swi navela ku tirhela vandlha. Loko va averiwa ntirho lowu engetelekeke, va titwa va pfuna naswona va lava ku wu endla. Ku ya emahlweni ka vona ku titshege hi ku ‘kamberiwa loko va faneleka.’ (1 Tim. 3:10) Xana leswi swi endlisiwa ku yini?

² Ntirho Wa Vakulu: Tanihi xiyenge xa ntirho wo kambela makwerhu hi ku ya hi timfanelo ta Matsalwa leti kumekaka eka 1 Timotiya 3:8-13 leswaku a va nandza wa vutirheli, vakulu va fanele va tlhela va kambisisa loko makwerhu a fanelekela ku byarha vutihlamuleri. Va nga ha n’wi avela ku endla mintirho leyi pfunaka swinene leyi fambisanaka ni ku hlela timagazini ni tibuku, ku lunghisa swikurisa-marito, ku khathalela Holo ya Mfumo ni swin’wana. Vakulu va ta xiya ndlela leyi a angulaka ha yona ni ndlela leyi a swi endlaka ha yona swiavelo swa yena. Va ta xiyisisa loko a ri na tona timfanelo leti fambisanaka ni ku byarha vutihlamuleri, ku hlayisa nkarhi, ku hiseka, ku titsongahata, moya wa ku tiyimisela ni vuswikoti byo hanyisana ni van’wana. (Filp. 2:20) Xana u veka xikombiso lexinene hi ndlela leyi a ambalaka ni ku tilunghisa ha yona? Xana wa swi kota ku byarha vutihlamuleri? ‘Eka ku tikhoma kakwe lokunene’ va rindzele leswaku ‘a kombisa mintirho yakwe hi ku rhula loku fambisanaka ni vutlhari.’ (Yak. 3:13) Xana hakunene u tikarhatela ku va la pfunaka evandlheni? Xana wa xi yingisa xileriso xa Yesu xo ‘endla vanhu vadyondzisiwa’ hi ku hlanganyela hi ku hiseka evutirhelini bya nsimu?—Mat. 28:19; vona Xihondzo xo Rindza xa September 1, 1990, matluka 18-28.

³ Hambileswi Bibele yi nga vekangiki malembe yo karhi lawa munhu a faneleke a fika eka wona a nga si hlawuriwa ku va nandza wa vutirheli, yi vulavula hi vamakwerhu volavo tanihi “vavanuna lava tirhelaka.” A hi nge languteli leswaku va va va ha ri emalembeni ya kondlo-a-ndzi-dyi, ngopfu-ngopfu leswi ku boxiwaka mhaka ya ku va ni nsati ni vana. (1 Tim. 3:12, 13) Vavanuna vo tano a va fanelanga va tinyiketela eka “ku navela loku fambisanaka ni vuntshwa” kambe va fanele va tikhoma hi ndlela ya ku tiyimisela, va ri ni xiyimo lexinene ni ripfalo leri baseke emahlweni ka Xikwembu ni vanhu.—2 Tim. 2:22.

⁴ Hambileswi vuswikoti bya ntumbuluko byi pfunaka ngopfu, langutelo ni nsusumeto wa munhu hi swona swi nga swa nkoka. Xana makwerhu u navela ku dzunisa Xikwembu hi ku titsongahata ni ku pfuna vamakwavo? Loko swi ri tano, Yehovha u ta katekisa matshalatshala ya yena yo endla nhluvuko evandlheni.