Tshinela Eka Xikwembu
Xikwembu Lexi Hi Tekaka Hi Ri Va Risima
“TIMBILU ta hina ti nga hi [sola].” Hi marito wolawo, Bibele yi vula leswaku minkarhi yin’wana timbilu ta hina ti nga hi endla leswaku hi tivona hi ri swikangalafula. Hakunene, timbilu ta hina ti nga hi endla leswaku minkarhi hinkwayo hi titwa hi nga faneleki ku rhandziwa hi Xikwembu ni ku khathaleriwa hi xona. Hambiswiritano, Bibele ya hi tiyisekisa: “Xikwembu i xikulu eka timbilu ta hina naswona xi tiva swilo hinkwaswo.” (1 Yohane 3:19, 20) Xikwembu xi hi tiva ku tlula leswi hina hi titivisaka xiswona. Ndlela leyi xi hi langutaka ha yona yi nga ha hambana ngopfu ni ndlela leyi hina hi tilangutaka ha yona. Kutani, xana Yehovha Xikwembu—loyi ndlela leyi yena a hi langutaka ha yona yi nga ya nkoka swinene—u hi teka hi ri va risima? Nhlamulo yi nga kumeka eka xifaniso lexi khumbaka mbilu lexi Yesu a xi tirhiseke eka swiendlakalo swimbirhi swo hambana.
Eka xiendlakalo xin’wana, Yesu u vule leswaku ‘swindzingiri swimbirhi swi xavisiwa hi mali ya nsimbi ya risima leritsongo.’ (Matewu 10:29, 31) Hi ku ya hi Luka 12:6, 7 Yesu u tlhele a ku: “Ntlhanu wa swindzingiri swi xavisiwa hi timali timbirhi ta nsimbi ta risima leritsongo, a hi swona ke? Kambe ku hava ni xin’we xa swona lexi rivalekaka emahlweni ka Xikwembu. . . . Mi nga chavi; mi ni risima ro tlula swindzingiri swo tala.” Xifaniso lexi xo olova kambe lexi nga ni matimba xi hi dyondzisa ndlela leyi Yehovha a n’wi langutaka ha yona mugandzeri un’wana ni un’wana wakwe.
Swindzingiri a ku ri swin’wana swa swinyenyana swo chipa swinene eka swinyenyana hinkwaswo leswi a swi dyiwa. Swi nga ha endleka leswaku Yesu u vone vavasati lava nga swisiwana—kumbexana hambi ku ri mana wakwe—va ri karhi va xava swinyenyana leswitsongo endhawini ya ku xavisela leswaku va ya swekela mindyangu ya vona. Hi mali ya nsimbi ya assarion, leyi nga ehansi ka 35 wa tisente hi ku ya hi mali ya manguva lawa, muxavi a a kota ku xava swindzingiri swimbirhi. Swinyenyana sweswo a swi chipe ngopfu lerova hi timali timbirhi ta nsimbi, muxavi a a nga kumi mune wa swona kambe a a kuma ntlhanu wa swona, laha lexi xa vuntlhanu a a nyikiwa xona mahala.
Yesu u vule leswaku ku hava xindzingiri ni xin’we “lexi rivalekaka emahlweni ka Xikwembu” kumbe xi wa “ehansi” Tatana a nga swi tivi. (Matewu 10:29) Nkarhi wun’wana ni wun’wana Yehovha wa xi vona loko xi wela ehansi emisaveni kumbexana hileswi xi vavisekeke kumbe hileswi xi lavaka swakudya. Hambileswi swinyenyana swoleswo swi tekiwaka swi ri leswi nga pfuniki nchumu, eka Yehovha loyi a swi tumbuluxeke i swa nkoka swinene lerova wa swi tsundzuka. Kahle-kahle, u swi teka swi ri swa nkoka, hikuva i swivumbiwa swa risima leswi hanyaka. Xana wa yi kuma yinhla ya xifaniso xa Yesu?
Loko Yesu a dyondzisa, a a tala ku pimanisa swilo, a hlamusela nkoka wa dyondzo ya swilo leswitsongo ivi a vula ndlela leyi dyondzo yoleyo yi nga tirhisiwaka ha yona eka swilo leswikulu. Hi xikombiso, Yesu u tlhele a ku: “Mawukuwuku . . . a ma byali mbewu kumbe ku tshovela, naswona a ma na dulu kumbe xitlati, kambe Xikwembu xa ma wundla. Xana n’wina a mi va risima ngopfu ku tlula tinyenyana?” (Luka 12:24) Sweswi yinhla ya marito ya Yesu malunghana ni swindzingiri yi va erivaleni: Loko Yehovha a khathalela swinyenyana leswi leswitsongo, ku vuriwa yini hi vanhu lava n’wi rhandzaka ni ku n’wi gandzela!
Hi ku ya hi marito ya Yesu, a hi fanelanga hi titwa hi nga pfuni nchumu lerova hi ehleketa leswaku Xikwembu lexi nga “xikulu eka timbilu ta hina” a xi na mhaka na hina naswona a xi hi khathaleli. Xana a swi hi chaveleli ku tiva leswaku Muvumbi wa hina u vona leswinene eka hina leswi hina hi tsandzekaka ku swi vona?
[Mfungho wa Vini va Xifaniso eka tluka 9]
Sparrows: © ARCO/D. Usher/age fotostock