Tirhisa Siku Rin’wana Ni Rin’wana Ku Vangamisa Xikwembu

MUPISALEMA DAVHIDA u khongele eka Yehovha a ku: “Ndzi twise musa wa wena wa rirhandzu nimixo . . . Ndzi tivise ndlela leyi ndzi faneleke ndzi famba ha yona.” (Ps. 143:8) Loko u pfuka nimixo kutani u nkhensa Yehovha hikwalaho ka siku lerintshwa, xana wa n’wi kombela leswaku a ku kongomisa loko u endla swiboho ni leswaku u endla swilo hi ndlela leyinene, ku fana na Davhida? A swi kanakanisi leswaku wa swi endla sweswo.

Tanihi malandza ya Yehovha lama tinyiketeleke, ‘hambi ha dya kumbe ha nwa kumbe hi endla yini na yini,’ hi tikarhatela ku ‘endla hinkwaswo leswaku hi vangamisa Xikwembu.’ (1 Kor. 10:31) Ha swi xiya leswaku ndlela leyi hi hanyaka ha yona siku ni siku yi nga ha dzunisa Yehovha kumbe yi n’wi sandza. Nakambe ha tsundzuka leswaku Rito ra Xikwembu ri vula leswaku Sathana u hehla vamakwavo va Kreste—entiyisweni malandza hinkwawo ya Xikwembu lama nga laha misaveni—“vusiku ni nhlikanhi.” (Nhlav. 12:10) Hikwalaho, hi tiyimiserile ku nyikela nhlamulo eka swihehlo swa Sathana naswona hi lava ku tsakisa mbilu ya Yehovha hi ku endlela Tata wa hina wa le tilweni ntirho wo kwetsima “nhlikanhi ni vusiku.”—Nhlav. 7:15; Swiv. 27:11.

Hi ku komisa, a hi kambisiseni tindlela timbirhi ta nkoka leti hi nga tirhisaka siku rin’wana ni rin’wana ra hina ha tona leswaku hi vangamisa Xikwembu. Yo sungula yi katsa ku rhangisa swilo leswi faneleke naswona ya vumbirhi yi katsa ku anakanyela van’wana.

Ku Hanya Hi Ku Pfumelelana Ni Ku Tinyiketela Ka Hina

Loko hi tinyiketela eka Yehovha, a hi kombisa leswaku hi navela ku n’wi tirhela hi mbilu hinkwayo. Hi tlhele hi tshembisa Yehovha leswaku hi ta famba etindleleni ta yena “siku ni siku”—ina, hilaha ku nga heriki. (Ps. 61:5, 8) Kutani, hi nga hanya njhani hi ku pfumelelana ni xitshembiso xexo? Hi swi kombisa njhani leswaku Yehovha hi n’wi rhandza hi mbilu hinkwayo siku ni siku?

Rito ra Xikwembu ri byi veka erivaleni vutihlamuleri lebyi Yehovha a languteleke leswaku hi byi hetisisa. (Det. 10:12, 13) Vutihlamuleri byin’wana byi xaxametiwe ebokisini leri nge “Vutihlamuleri Lebyi Hi Nyikiweke Hi Xikwembu,” eka tluka 22. Swiavelo leswi hinkwaswo swi huma eka Xikwembu naswona i swa nkoka. Xana hi xihi xiavelo lexi hi faneleke hi xi rhangisa loko swiavelo swimbirhi kumbe ku tlula swi fanele swi endliwa hi nkarhi wun’we?

Hi rhangisa ntirho wa hina wo kwetsima, lowu katsaka ku dyondza Bibele, ku khongela, minhlangano ya Vukreste ni ntirho wa nsimu. (Mat. 6:33; Yoh. 4:34; 1 Pet. 2:9) Kambe, a hi nge endli mintirho ya moya siku hinkwaro. Hi fanele hi endla ntirho wo tihanyisa, hi ya exikolweni hi tlhela hi endla ni mintirho yin’wana ya le kaya. Nilokoswiritano, hi tikarhatela ku hlela ntirho wo tihanyisa ni mintirho yin’wana leswaku yi nga kavanyeti ntirho wa hina wo kwetsima, wo tanihi ku ya eminhlanganweni ya Vukreste. Hi xikombiso, loko hi hlela ku ya eku wiseni, ha tiyiseka leswaku a hi nge hundziwi hi riendzo ra mulanguteri wa xifundzha, siku ra nhlengeletano yo hlawuleka, nhlengeletano ya xifundzha kumbe ntsombano wa muganga. Minkarhi yin’wana hi nga ha swi kota ku endla swiavelo swin’wana swa hina swo hambana-hambana hi nkarhi wun’we. Hi xikombiso, hi nga ha basisa Holo ya Mfumo hi ri ndyangu kumbe hi chumayela mutirhi-kulorhi kumbe xichudeni-kulorhi hi nkarhi wo dya swakudya swa ninhlikanhi entirhweni kumbe exikolweni. Hakunene, nkarhi wun’wana ni wun’wana loko hi lava ku endla xiboho evuton’wini—xo tanihi ku lava ntirho, ku hlawula tidyondzo leti hi nga ta ti dyondzela, kumbe ku hlawula vanghana—hi fanele hi endla leswaku eka swiboho swa hina hi rhangisa nchumu wa nkoka swinene evuton’wini, ku nga ku gandzela Yehovha, Tata wa hina la nga ni rirhandzu.—Ekl. 12:13.

Anakanyela Van’wana

Yehovha u lava leswaku hi anakanyela van’wana hi tlhela hi va endlela leswinene. Hi hala tlhelo, Sathana u hlohlotela vutianakanyi. Misava ya yena yi tele hi vanhu lava “tirhandzaka” ni “lava rhandzaka mintsako” swin’we ni lava “byalelaka nyama.” (2 Tim. 3:1-5; Gal. 6:8) Vo tala a va anakanyi hi vuyelo lebyi swiendlo swa vona swi nga ta va na byona eka van’wana. “Mintirho ya nyama” ya vonaka hinkwako.—Gal. 5:19-21.

Vanhu lava susumetiwaka hi moya lowo kwetsima wa Yehovha va kombisa langutelo leri hambaneke, va kombisa rirhandzu, musa ni vunene loko va tirhisana ni van’wana. (Gal. 5:22) Rito ra Xikwembu ri hi byela leswaku hi rhangisa swilaveko swa van’wana. Hikwalaho, hi endla swilo hi ndlela leyi kombisaka leswaku ha khathala hi vanhu van’wana, hambileswi hi faneleke hi va ni vuxiyaxiya leswaku hi nga ngheneleli timhaka ta van’wana. (1 Kor. 10:24, 33; Filp. 2:3, 4; 1 Pet. 4:15) Hi anakanyela ni vapfumeri-kulorhi. Nilokoswiritano, hi tlhela hi tikarhatela ku pfuna ni vanhu lava nga riki vapfumeri. (Gal. 6:10) Xana u nga kuma ndlela yo kombisa musa eka munhu un’wana loyi u nga ta hlangana na yena namuntlha?—Vona bokisi leri nge “Anakanyela,” eka tluka 23.

A hi fanelanga hi anakanyela vanhu hi nkarhi wo karhi wo hlawuleka kumbe exiyin’weni xo karhi. (Gal. 6:2; Efe. 5:2; 1 Tes. 4:9, 10) Ku ri na sweswo, siku ni siku hi ringeta ku xiya swiyimo swa van’wana naswona hi lunghekela ku va pfuna loko va lava ku pfuniwa hambiloko sweswo swi nga hi oloveli ku swi endla. Hi lava ku hanana hi nchumu wun’wana ni wun’wana lowu hi nga na wona—nkarhi wa hina, swilo swa hina leswi vonakaka, ntokoto wa hina ni vutlhari bya hina. Yehovha wa hi tiyisekisa leswaku loko hi nyika van’wana na yena u ta hi nyika.—Swiv. 11:25; Luka 6:38.

Ntirho Wo Kwetsima “Vusiku Ni Nhlikanhi”

Xana swa koteka ku endlela Yehovha ntirho wo kwetsima “vusiku ni nhlikanhi”? Ina, ntsena loko nkarhi na nkarhi hi endla swiyenge hinkwaswo swa vugandzeri bya hina hi tlhela hi hiseka. (Mint. 20:31) Hi nga tshama hi khomekile hi ntirho wo kwetsima hi ku hlaya ni ku anakanyisisa hi Rito ra Xikwembu siku ni siku, hi ku khongela nkarhi na nkarhi, hi ku tikarhatela ku va kona eminhlanganweni minkarhi hinkwayo ni hi ku tirhisa nkarhi wun’wana ni wun’wana lowu hi pfulekelaka leswaku hi chumayela vanhu van’wana.—Ps. 1:2; Luka 2:37; Mint. 4:20; 1 Tes. 3:10; 5:17.

Xana hi endlela Yehovha ntirho wo kwetsima? Loko swi ri tano, ku navela ka hina ku n’wi tsakisa ni ku n’wi nyika nhlamulo eka swihehlo swa Sathana ku ta vonaka eka ndlela leyi hi hanyaka ha yona siku ni siku. Hi tikarhatela ku vangamisa Yehovha eka hinkwaswo leswi hi swi endlaka ku nga khathariseki swiyimo leswi hi langutanaka na swona. Hi pfumelela milawu yakwe leswaku yi hi kongomisa eka leswi hi swi vulaka, eka ndlela leyi hi tikhomaka ha yona ni le ka swiboho leswi hi swi endlaka. Loko hi n’wi tshemba hilaha ku heleleke hi tlhela hi tirhisa leswi hi nga na swona entirhweni wakwe, hi kombisa leswaku ha tlangela hi leswi a hi khathalelaka hi rirhandzu ni leswi a hi seketelaka. Naswona ha pfumela ku tshinyiwa ni ku tsundzuxiwa loko hi tlule milawu yakwe hikwalaho ka leswi hi nga hetisekangiki.—Ps. 32:5; 119:97; Swiv. 3:25, 26; Kol. 3:17; Hev. 6:11, 12.

A hi hambeteni hi hanya hi ndlela leyi vangamisaka Xikwembu siku ni siku. Loko hi endla tano, hi ta kumela mimoya-xiviri ya hina ku phyuphya naswona hi ta tiphina hi nkhathalelo wa rirhandzu wa Tata wa hina wa le tilweni hilaha ku nga heriki.—Mat. 11:29; Nhlav. 7:16, 17.

[Bokisi/Swifaniso leswi nga eka tluka 22]

Vutihlamuleri Lebyi Hi Nyikiweke Hi Xikwembu

• Hi fanele hi khongela nkarhi na nkarhi.—Rhom. 12:12.

• Hi fanele hi dyondza Bibele hi tlhela hi tirhisa leswi hi swi dyondzeke.—Ps. 1:2; 1 Tim. 4:15.

• Hi fanele hi gandzela Yehovha evandlheni.—Ps. 35:18; Hev. 10:24, 25.

• Hi fanele hi khathalela swirho swa mindyangu ya hina hi tlhelo ra nyama, hi tlhelo ra moya ni ndlela leyi swi titwaka ha yona.—1 Tim. 5:8.

• Hi fanele hi chumayela mahungu lamanene ya Mfumo hi tlhela hi endla vadyondzisiwa.—Mat. 24:14; 28:19, 20.

• Hi fanele hi khathalela rihanyo ra hina ni vumoya bya hina, leswi katsaka ku hlela ku va ni nkarhi wa vuhungasi lebyinene.—Mar. 6:31; 2 Kor. 7:1; 1 Tim. 4:8, 16.

• Hi fanele hi hetisisa vutihlamuleri lebyi hi nga na byona evandlheni.—Mint. 20:28; 1 Tim. 3:1.

• Hi fanele hi tiyiseka leswaku makaya ya hina ni Holo ya Mfumo swi languteka hi ndlela leyinene.—1 Kor. 10:32.

[Bokisi/Xifaniso lexi nga eka tluka 23]

Anakanyela

• Makwerhu wa xinuna kumbe wa xisati la dyuhaleke.—Lev. 19:32.

• Munhu wo karhi la vabyaka kumbe la nga ni gome.—Swiv. 14:21.

• Xirho xa vandlha lexi lavaka nchumu wo karhi hi xihatla lowu u nga kotaka ku xi nyika wona.—Rhom. 12:13.

• Xirho xa ndyangu wa wena.—1 Tim. 5:4, 8.

• Mupfumeri-kuloni loyi a feriweke hi munghana wakwe wa vukati.—1 Tim. 5:9.

• Nkulu loyi a tirhaka hi matimba evandlheni ra ka n’wina.—1 Tes. 5:12, 13; 1 Tim. 5:17.