Xana I Yini Siku Ra Vuavanyisi?

KU TA yini emianakanyweni ya wena loko u anakanya hi Siku ra Vuavanyisi? Van’wana va anakanya leswaku vanhu va tibiliyoni va ta fola layini exiluvelweni xa Xikwembu. Kutani un’wana ni un’wana a avanyisiwa. Van’wana va nyikiwa vutomi bya le tilweni kutani van’wana va avanyiseriwa ku ya xanisiwa hilaha ku nga heriki. Kambe, Bibele a yi pfumelelani na swona sweswo. Rito ra Xikwembu a ri hlamuseli nkarhi lowu wu ri lowu chavisaka kambe ri wu hlamusela wu ri nkarhi lowu tiyisaka nhlana ni lowu swilo swi nga ta tlhela swi va exiyin’weni lexinene.

Eka Nhlavutelo 20:11, 12, muapostola Yohane u hi byela nhlamuselo ya yena ya Siku ra Vuavanyisi, u ri: “Kavaloko ndzi vona xiluvelo lexikulu xo basa ni loyi a tshameke eka xona. Misava ni tilo swi nyamalala emahlweni ka yena, kutani ndhawu ya swona a ya ha kumekanga. Kavaloko ndzi vona vafi, lavakulu ni lavatsongo, va yime emahlweni ka xiluvelo, kutani ku pfuriwa tibuku-nsongwa. Kambe ku pfuriwa buku-nsongwa yin’wanyana; i buku-nsongwa ya vutomi. Vafi va avanyisiwa hi ku landza swilo leswi tsariweke eka tibuku-nsongwa hi ku ya hi swiendlo swa vona.” I mani Muavanyisi loyi ku vulavuriwaka ha yena laha?

Yehovha Xikwembu hi yena Muavanyisi-nkulu wa vanhu hinkwavo. Kambe u nyike un’wana ntirho lowu wa ku avanyisa. Hi ku ya hi Mintirho 17:31, muapostola Pawulo u vule leswaku Xikwembu “xi veke siku leri xi nga ni xikongomelo xo avanyisa misava leyi akiweke hi ku lulama hi wanuna loyi xi n’wi vekeke.” Muavanyisi loyi a vekiweke i Yesu Kreste la pfuxiweke. (Yohane 5:22) Kambe, ri sungula rini Siku ra Vuavanyisi? Ri ta teka nkarhi wo tanihi kwihi?

Buku ya Nhlavutelo yi kombisa leswaku Siku ra Vuavanyisi ri ta sungula loko ku hela nyimpi ya Armagedoni loko mafambiselo ya Sathana ma herisiwile.a (Nhlavutelo 16:14, 16; 19:19–20:3) Endzhaku ka Armagedoni, Sathana ni madimona ya yena va ta pfaleriwa gidi ra malembe ekheleni ro enta. Hi nkarhi wolowo, lava 144 000, va ta va vaavanyisi naswona va ta sungula ku fuma etilweni va ri “tihosi na Kreste ku ringana malembe ya 1 000.” (Nhlavutelo 14:1-3; 20:1-4; Varhoma 8:17) Siku ra Vuavanyisi a hi nkarhi wa tiawara ta 24 lowu nga ta hundza hi ku hatlisa. I nkarhi lowu nga ta teka malembe ya 1 000.

Hi nkarhi wolowo wa malembe ya 1 000, Yesu Kreste u ta “avanyisa lava hanyaka ni lava feke.” (2 Timotiya 4:1) “Lava hanyaka” ku ta va ku ri “ntshungu lowukulu” lowu nga ta va wu pone Armagedoni. (Nhlavutelo 7:9-17) Muapostola Yohane u tlhele a vona “lava feke . . . va yime emahlweni ka xiluvelo” xa vuavanyisi. Hilaha Yesu a tshembiseke hakona, ‘lava nga eka masirha-bako ya xitsundzuxo va ta twa rito ra yena Kreste kutani va huma,’ hi ku va va pfuxiwa eku feni. (Yohane 5:28, 29; Mintirho 24:15) Kambe, ku avanyisiwa ka vona ku ta va ku sekeriwe eka yini?

Hi ku ya hi xivono xa muapostola Yohane, ku ‘pfuriwe tibuku-nsongwa’ kutani “vafi va avanyisiwa hi ku landza swilo leswi tsariweke eka tibuku-nsongwa hi ku ya hi swiendlo swa vona.” Xana tibuku-nsongwa leti ti tamele swiendlo swa vanhu swa nkarhi lowu hundzeke? Doo, vanhu a va nge avanyisiwi hi swiendlo leswi va swi endleke va nga si fa. Hi swi tivisa ku yini sweswo? Bibele yi ri: “Loyi a feke, xidyoho xa yena xi hlanguriwile.” (Varhoma 6:7) Xisweswo, lava pfuxiwaka va ta va va rivaleriwe swidyoho swa vona hinkwaswo leswi va swi endleke va nga si fa. Hikwalaho, tibuku-nsongwa ti fanele ti yimela swilaveko swin’wana swa Xikwembu. Leswaku lava poneke Armagedoni ni lava pfuxiweke va kota ku hanya hilaha ku nga heriki, va fanele va yingisa swileriso swa Xikwembu, ku katsa ni swileriso swin’wana ni swin’wana leswi Yehovha a nga ta swi paluxa hi nkarhi wa malembe ya gidi. Xisweswo vanhu va ta avanyisiwa hikwalaho ka leswi va swi endleke hi nkarhi wa Siku ra Vuavanyisi.

Siku ra Vuavanyisi ri ta endla leswaku vanhu va timiliyoni va pfulekeriwa ro sungula hi lunghelo ro dyondza hi ku rhandza ka Xikwembu ni ku hanya hi ku pfumelelana na kona. Leswi vulaka leswaku ku ta va ni ntirho lowukulu wo dyondzisa vanhu. Hakunene, “vaaki va tiko leri noneke va ta dyondza ku lulama.” (Esaya 26:9) Hambiswiritano, van’wana a va nge swi lavi ku hanya hi ku pfumelelana ni ku rhandza ka Xikwembu. Esaya 26:10 yi ri: “Hambiloko lowo homboloka o kombiwa tintswalo, a nga ka a nga ku dyondzi ku lulama. Etikweni ro lulama u ta endla hilaha ku hombolokeke naswona a nge byi voni vukulu bya Yehovha.” Vanhu volavo vo homboloka va ta dlayiwa va nga ha pfuxiwi hi nkarhi wa Siku ra Vuavanyisi.—Esaya 65:20.

Loko Siku ra Vuavanyisi ri hela, lava va poneke va ta ‘hanya’ hilaha ku heleleke, va va vanhu lava hetisekeke. (Nhlavutelo 20:5) Xisweswo, Siku ra Vuavanyisi ri ta endla leswaku vanhu va tlhelela eka xiyimo lexi a va fanele va va eka xona ku sukela eku sunguleni, ku nga xiyimo xa ku va lava hetisekeke. (1 Vakorinto 15:24-28) Kutani va ta langutana ni ndzingo wo hetelela. Sathana u ta ntshunxiwa ekhotsweni kutani a tshikiwa leswaku a ringeta ku hambukisa vanhu ro hetelela. (Nhlavutelo 20:3, 7-10) Lava va nga ta n’wi hlula hi tindlela hinkwato va ta vona ku hetiseka ka xitshembiso xa Bibele lexi nge: “Lavo lulama va ta dya ndzhaka ya misava, va ta tshama eka yona hi masiku.” (Pisalema 37:29) Ina, Siku ra Vuavanyisi ri ta va nkateko eka vanhu hinkwavo lava tshembekaka!