‘Ku Fana Ni Ribye Ra Risima Ra Muhlovo Wo Tshwuka’

MUAPOSTOLA YOHANE u vone xivono xa xiluvelo lexi vangamaka etilweni. Loyi a tshameke exiluvelweni a a languteka “ku fana ni ribye ra yaspere.” Naswona a a fana ni “ribye ra risima ra muhlovo wo tshwuka.” (Nhlavutelo 4:2, 3) A ku ri maribye ya muxaka muni lawa?

Lawa a ku nga ri maribye lama nga vonikeriki lama vangamaka hala handle. Eminkarhini ya khale, rito ra Xigriki leri hundzuluxeriweke ri va “yaspere” a ri tirhiseriwa ku vula maribye ya mivala yo hambana-hambana, ku katsa ni tindzalama ta risima leti a ti vonikela. A. T. Robertson ebukwini leyi nge Word Pictures in the New Testament, u ri: “Ribye ra yaspere” leri ku vulavuriwaka hi rona eka Nhlavutelo 4:3 “entiyisweni [a ku nga ri] yaspere yo chipa ya manguva lawa.” Ku tlula kwalaho, endzhakunyana ebukwini ya Nhlavutelo, Yohane u hlamusela muti wa le tilweni lowu vuriwaka Yerusalema, a ku: “Ku vangama ka wona a ku fana ni ribye ra risima ngopfu, kukotisa ribye ra yaspere leri hatimaka ku fana ni kristala yo tenga.” (Nhlavutelo 21:10, 11) Maribye lawa Yohane a a vulavula hi wona handle ko kanakana a ma vonikela.

Loyi ku vuriwaka leswaku u tshame exiluvelweni exivonweni xa Yohane i Munhu la kwetsimaka swinene evuakweni, ku nga Yehovha Xikwembu. U tengile a tlhela a kwetsima swinene. Hi ku pfumelelana na sweswo, muapostola Yohane u tsarile: “Xikwembu i ku vonakala, naswona munyama a wu vi kona nikatsongo loko hi ri ni vun’we na xona.” (1 Yohane 1:5) Hikwalaho, Yohane u khutaze vapfumeri-kulobye ku ‘titengisa tanihi leswi Yehovha na yena a tengeke.’—1 Yohane 3:3.

Xana hi fanele hi endla yini leswaku Xikwembu xi ta hi teka hi ri lava tengeke? Ku va ni ripfumelo eka ngati leyi halatiweke ya Kreste leswaku hi ta rivaleriwa swidyoho swa hina i swa nkoka swinene. Hi fanele hi tlhela hi hambeta hi “famba eku vonakaleni” hi ku dyondza Bibele nkarhi na nkarhi na hi ku hanya hi ku pfumelelana ni tidyondzo ta yona.—1 Yohane 1:7.