“Tshamani Mi Rindzile”

“Hikokwalaho tshamani mi rindzile, hikuva a mi ri tivi siku leri Hosi ya n’wina yi nga ta ta ha rona.”—MATEWU 24:42.

 1. Xana lava va nga ni malembe va ri malandza ya Yehovha va titwa njhani hi ntirho lowu va tinyiketeleke ku wu endla hi malembe yo tala? Tshaha xikombiso.

VO TALA lava va nga ni malembe va ri malandza ya Yehovha va dyondze ntiyiso loko va ha ri majaha kumbe vanhwana. Ku fana ni muxavisi la kumeke perela ya risima lerikulu, kutani a xavisa swa yena hinkwaswo leswaku a kuma mali yo xava perela leyi, swichudeni sweswo swa Bibele leswi hisekaka swi titshikile swi nyiketela vutomi bya swona eka Yehovha. (Matewu 13:45, 46; Marka 8:34) Xana swi titwa njhani leswi swi bohekeke ku rindza nkarhi wo leha ku tlula lowu kumbexana a swi langutele wona, swi nga si vona ku hetiseka ka swikongomelo swa Xikwembu hi misava? A swi tisoli! Swi titwa ku fana na Makwerhu A. H. Macmillan, loyi, loko a ri ni malembe ya kwalomu ka 60 a tinyiketele ku tirhela Xikwembu, a nga te: “Ndzi tiyimisele swinene ku tlula eku sunguleni ku hlayisa ripfumelo ra mina. Ri endle leswaku ndzi nga tisoli hi vutomi bya mina. Ni sweswi ri ndzi pfuna ku ka ndzi nga chavi nchumu loko ndzi anakanya hi swa nkarhi lowu taka.”

 2. (a) Hi yihi ndzayo leyi Yesu a yi nyikeke valandzeri vakwe hi nkarhi lowu faneleke? (b) I swivutiso swihi leswi hi nga ta swi kambisisa exihlokweni lexi?

² Ku vuriwa yini hi wena? Ku nga khathariseki malembe ya wena, xiya marito ya Yesu lama nge: “Hikokwalaho tshamani mi rindzile, hikuva a mi ri tivi siku leri Hosi ya n’wina yi nga ta ta ha rona.” (Matewu 24:42) Marito wolawo lama kongomeke ma ni ntiyiso lowu dzikeke. A hi ri tivi siku leri Hosi yi nga ta ta ha rona yi ta avanyisa mafambiselo lawa yo homboloka, naswona a hi swa nkoka leswaku hi ri tiva. Kambe hi fanele hi hanya hi ndlela leyi hi nga ta ka hi nga tisoli loko yi ta. Emhakeni leyi, i swikombiso swihi leswi hi swi kumaka eBibeleni, leswi nga ta hi pfuna ku tshama hi rindzile? Yesu u xi kombise njhani xilaveko lexi? Naswona hi ni vumbhoni byihi namuntlha lebyi kombaka leswaku hi hanya emasikwini ya makumu ya misava leyi yi nga chaviki Xikwembu?

Xikombiso Lexi Lemukisaka

 3. Xana vanhu vo tala namuntlha va fana njhani ni lava hanyeke enkarhini wa Nowa?

³ Hi ku angarhela, vanhu namuntlha va fana ni vavanuna ni vavasati lava hanyeke enkarhini wa Nowa. Enkarhini wolowo, misava a yi tele madzolonga, naswona mbilu ya munhu a yi voyamele ‘evubihini ntsena nkarhi hinkwawo.’ (Genesa 6:5) Vo tala a va tipete hi ku helela etimhakeni ta vutomi bya siku na siku. Kambe loko Yehovha a nga si tisa Ndhambi leyikulu u nyike vanhu nkarhi wa ku hundzuka. U lerise Nowa leswaku a chumayela, ivi Nowa a endla tano—a va “muchumayeri wa leswo lulama,” kumbexana ku ringana malembe ya 40 kumbe 50 kumbe ku tlula. (2 Petro 2:5) Hambiswiritano, vanhu va honise rungula ra Nowa ra xilemukiso. A va nga xalamukanga. Kutani eku heteleleni, i Nowa ni ndyangu wakwe ntsena lava poneke loko Yehovha a tisa vuavanyisi.—Matewu 24:37-39.

 4. Ha yini ku nga vuriwaka leswaku vutirheli bya Nowa byi humelerile, naswona sweswo swi nga vurisiwa ku yini hi ntirho wa wena wa ku chumayela?

⁴ Xana vutirheli bya Nowa byi humelerile? U nga yi hi nhlayo leyitsongo ya vanhu lava anguleke kahle. Entiyisweni, ku chumayela ka Nowa ku hetisise xikongomelo xa kona, ku nga khathariseki ndlela leyi vanhu va anguleke ha yona. Ha yini? Hikuva ku nyike vanhu nkarhi lowu eneleke wa ku hlawula loko va ta tirhela Yehovha kumbe e-e. Ku vuriwa yini hi nsimu leyi wena u chumayelaka eka yona? Hambiloko va nga ri vangani lava angulaka kahle, u endla ntirho lowu humelelaka swinene. Ha yini? Hikuva loko u chumayela, u twarisa xilemukiso xa Xikwembu, xisweswo u hetisisa ntirho lowu Yesu a wu nyikeke valandzeri vakwe.—Matewu 24:14; 28:19, 20.

Ku Honisa Vaprofeta Va Xikwembu

 5. (a) I swiyimo swihi leswi a swi tolovelekile eYuda hi nkarhi wa Habakuku, naswona vanhu va angurise ku yini eka rungula rakwe ra vuprofeta? (b) Xana Vayuda va ri kombise njhani rivengo ra vona eka vaprofeta va Yehovha?

⁵ Malembe-xidzana yo tala endzhaku ka Ndhambi, mfumo wa Yuda wu langutane ni xiyimo xo tika. Vugandzeri bya swikwembu swa hava, vuhomboloki, ku tshikilela van’wana ni ku dlaya a ku ri swilo leswi tolovelekeke. Yehovha u rhume Habakuku leswaku a ya tsundzuxa vanhu leswaku loko va nga hundzuki, Vakalidiya kumbe Vababilona va ta va komba xa ncila wa bulubulu. (Habakuku 1:5-7) Kambe vanhu va tipfale tindleve. Kumbexana a va tibyela va ku, ‘Se ho mamisiwa tintiho, hikuva malembe yo tlula dzana lama hundzeke, muprofeta Esaya u humese xilemukiso lexi fanaka, kambe a hi vonanga nhlanga yi baleka ngati!’ (Esaya 39:6, 7) Varhangeri vo tala va Vayuda a va kolwanga hi ku bakanya rungula leri ntsena, kambe va tlhele va kombisa rivengo ra vona eka varhumiwa. Siku rin’wana va ringete ku dlaya muprofeta Yeremiya, naswona a hi ta hlaya swin’wana loko Ahikama a a nga n’wi lamulelanga. Hi ku hlundzukisiwa hi rungula rin’wanyana ra vuprofeta, Hosi Yoyakimi u humese rito ra leswaku muprofeta Yuriya a dlawa.—Yeremiya 26:21-24.

 6. Yehovha u n’wi tiyise njhani Habakuku?

⁶ Rungula ra Habakuku na rona a ri nga tsetseleli naswona a ri nga nandzihi etindleveni, ku fana ni ra Yeremiya, loyi Xikwembu xi n’wi huhuteleke ku profeta leswaku tiko ra Yuda a ri ta sala ri ri rhumbi ku ringana 70 wa malembe. (Yeremiya 25:8-11) Hikwalaho, hi nga twisisa ku karhateka loku Habakuku a a ri na kona loko a huwelela a ku: “Oho Yehovha, xana ndzi ta kombela ku pfuniwa ku fikela rini, kambe u nga yingisi? Xana ndzi ta kombela leswaku u ndzi pfuna emadzolongeni ku fikela rini, kambe u nga ndzi ponisi?” (Habakuku 1:2) Yehovha u hlamule Habakuku hi ndlela leyi rheletaka mbilu, hi marito lawa ma tiyisaka ripfumelo: “Xivono xa ha ri xa nkarhi lowu vekiweke, naswona xi hatlisela emakumu, a xi nge hembi. Hambiloko xo hlwela, tshama u xi languterile; hikuva xi ta hetiseka hakunene. A xi nge hlweli.” (Habakuku 2:3) Kutani Yehovha a a ri ni “nkarhi lowu vekiweke” wa ku herisa vuhomboloki ni ntshikilelo. Loko swi tikomba wu hlwela, Habakuku a a nga fanelanga a hela mongo, naswona a a nga fanelanga a sungula ku tigedlha. Ematshan’weni ya sweswo, a a fanele a “tshama [a wu] languterile,” siku na siku a tshama a khomekile. Siku ra Yehovha a ri nga ta hlwela!

 7. Ha yini Yerusalema wu tlhele wu avanyiseriwa ku lovisiwa eka lembe-xidzana ro sungula C.E.?

⁷ Kwalomu ka malembe ya 20 endzhaku ka loko Yehovha a vulavule na Habakuku, ntsindza wa Yuda, ku nga Yerusalema, wu lovisiwile. Endzhaku wu pfuxiwile, kutani ku lulamisiwa vuhomboloki byo tala lebyi dyiseke Habakuku mbitsi. Hambiswiritano, hi lembe-xidzana ro sungula C.E., muti lowu wu tlhele wu avanyiseriwa ku lovisiwa hileswi vaaki va wona a va nga tshembekanga. Hi musa, Yehovha u endle malunghiselelo ya ku ponisa lava nga ni timbilu letinene. Hi nkarhi wolowo u tirhise muprofeta lonkulu, Yesu Kreste, leswaku a twarisa rungula rero. Hi 33 C.E., Yesu u byele valandzeri vakwe a ku: “Loko mi vona Yerusalema wu rhendzeriwa hi mavuthu lama goveke, swi tiveni leswaku ku lovisiwa ka wona ku tshinele. Kutani lava nga eYudiya a va balekele etintshaveni.”—Luka 21:20, 21.

 8. (a) Ku nga va ku humelele yini eka Vakreste van’wana hi ku famba ka nkarhi, endzhaku ka rifu ra Yesu? (b) Marito ya Yesu ya vuprofeta malunghana na Yerusalema ma hetiseke njhani?

⁸ Endzhaku ka malembe, Vakreste van’wana va le Yerusalema va nga ha va va tivutisile malunghana ni nkarhi lowu vuprofeta bya Yesu a byi ta hetiseka ha wona. Phela, anakanya hi swilo leswi handle ko kanakana van’wana va vona va titsoneke swona. Kumbexana va ale ku nghenela mabindzu lama nghenisaka mali yo tala hileswi a va tiyimisele ku tshama va rindzile. Xana va we mapa hi ku famba ka nkarhi? Xana va vone onge a va tlanga hi nkarhi wa vona, va anakanya leswaku marito ya Yesu a ma kongomisiwe eka xitukulwana lexi landzelaka, hayi xa vona? Hi 66 C.E., vuprofeta bya Yesu byi sungule ku hetiseka loko masocha ya Rhoma ma rhendzela Yerusalema. Lava a va tshame va rindzile va lemuke xikombiso lexi, va baleka emutini lowu, kutani va pona loko ku lovisiwa Yerusalema.

Ku Kombisa Xilaveko Xa Ku Rindza

9, 10. (a) U nga xi katsakanya njhani xifaniso xa Yesu xa mahlonga lama rindzeleke ku vuya ka n’wini wa wona enkhubyeni wa yena wa vukati? (b) Ha yini a ku nga ri matlangwana ku va mahlonga ma rindzela n’wini wa wona? (c) Ha yini a swi pfuna ku va mahlonga ma lehisa mbilu?

⁹ Loko a kandziyisa xilaveko xa ku rindza, Yesu u fanise vadyondzisiwa va yena na mahlonga lama rindzeleke n’wini wa wona leswaku a vuya enkhubyeni wakwe wa vukati. A ma swi tiva leswaku u ta vuya hi vusiku byo karhi—kambe xana a a ta vuya nkarhi muni? Xana a a ta fika hi nkarhi wa ku rindza ko sungula? Ka vumbirhi? Ka vunharhu? A ma nga swi tivi. Yesu u te: “Loko [n’wini] a fika hi ku rindza ka vumbirhi, hambi ku ri ka vunharhu, ivi a ma [kuma ma rindzile], ma tsaka!” (Luka 12:35-38) Anakanya hi ku langutela loku mahlonga lawa a ma ri na kona. Mpfumawulo wun’wana ni wun’wana, ndzhuti wun’wana ni wun’wana, entiyisweni a wu ta ma xalamukisa swinene: ‘Xana swi nga endleka ku ri n’wini wa hina?’

¹⁰ Ku vuriwa yini hi loko n’wini a vuya hi nkarhi wa ku rindza ka vumbirhi nivusiku, lowu a wu sungula kwalomu ka awara ya kaye nimadyambu wu ya hela exikarhi ka vusiku? Xana mahlonga hinkwawo, ku katsa ni lawa ma kululeke ma n’watseka ku sukela nimixo swinene, a ma ta va ma lunghekele ku n’wi amukela, kumbe, xana man’wanyana a ma ta va ma etlele ke? Ku vuriwa yini hi loko n’wini a vuya hi nkarhi wa ku rindza ka vunharhu—ku sukela exikarhi ka vusiku ku ya fika kwalomu ka awara ya nharhu nimixo? Xana mahlonga man’wana a ma ta hela matimba, kumbexana ma sungula ni ku rhwala nomu loko ma vona n’wini wa wona a hlwela?a Hi lawa ma kumiweke ma rindzile ntsena loko n’wini a vuya, lawa a ma ta vuriwa lama tsakeke. Eka wona, entiyisweni a ku ta tirha marito ya Swivuriso 13:12, lama nge: “Ku langutela loku tlheriseriwaka endzhaku ku vabyisa mbilu, kambe xilo lexi naveriwaka i murhi wa vutomi loko xi kumeka.”

11. Xikhongelo xi nga hi pfuna njhani leswaku hi tshama hi rindzile?

¹¹ I yini leswi a swi ta pfuna valandzeri va Yesu leswaku va tshama va rindzile, loko nkarhi wu vonaka wu hlwela? Loko a ri entangeni wa Getsemani emahlweninyana ka ku khomiwa ka yena, Yesu u byele vaapostola vakwe vanharhu a ku: “Tshamani mi rindzile naswona mi hambeta mi khongela, leswaku mi nga ngheni endzingweni.” (Matewu 26:41) Endzhaku ka malembe, Petro loyi a a ri kona loko ku vuriwa marito wolawo, u nyike Vakreste-kulobye xitsundzuxo lexi fanaka. U tsarile a ku: “Makumu ya swilo hinkwaswo ma tshinele. Hikokwalaho, hlutekani emianakanyweni, naswona mi xalamuka eswikhongelweni.” (1 Petro 4:7) Swi le rivaleni leswaku ku khongela swi suka embilwini ku fanele ku va nchumu lowu hi hanyaka ha wona tanihi Vakreste. Ina, hi fanele hi hambeta hi kombela Yehovha leswaku a hi pfuna ku tshama hi xalamukile.—Varhoma 12:12; 1 Vatesalonika 5:17.

12. Ku mbambela ni ku tshama u xalamukile swi hambana njhani?

¹² Xiya leswaku Petro u tlhele a ku: “Makumu ya swilo hinkwaswo ma tshinele.” Ma tshinele ku fika kwihi? Vanhu a va nge swi koti ku tiva siku ni nkarhi wa kona. (Matewu 24:36) Kambe ku ni ku hambana exikarhi ka ku mbambela-mbambela, leswi Bibele yi nga swi khutaziki, ni ku tshama u langutele makumu, ku nga leswi yi swi khutazaka. (Ringanisa 2 Timotiya 4:3, 4; Tito 3:9.) Hi yihi ndlela yin’wana leyi ha yona hi nga tshamaka hi langutele makumu? I ku dzikisa mianakanyo swinene eka vumbhoni bya leswaku makumu ma tshinele. Kutani a hi kambisiseni tinhla ta tsevu leti nyikaka vumbhoni bya leswaku hi hanya emasikwini ya makumu ya misava leyi yi nga chaviki Xikwembu.

Swilo Swa Tsevu Leswi Nyikaka Vumbhoni Lebyi Tiyeke

13. Vuprofeta bya Pawulo lebyi tsariweke eka 2 Timotiya ndzima 3, byi ku khorwisa njhani leswaku hi hanya “emasikwini yo hetelela”?

¹³ Xo sungula, hi ku vona kahle ku hetiseka ka vuprofeta bya muapostola Pawulo mayelana ni ‘masiku yo hetelela.’ Pawulo u tsarile a ku: “Emasikwini yo hetelela ku ta fika minkarhi ya mangava leyi swi nonon’hwaka ku langutana na yona. Hikuva vanhu va ta va lava tirhandzaka, varhandzi va mali, lava titivaka, lava titlakusaka, vasandzi, lava nga yingisiki vatswari, lava nga nkhensiki, lava nga tshembekiki, lava nga riki na xinakulobye xa ntumbuluko, lava nga laviki ntwanano hambi wu ri wihi, valumbeti, lava nga tikhomiki, lava nga ni tihanyi, lava nga rhandziki vunene, vaxengi, lava omeke tinhloko, lava tikukumuxaka hi ku tinyungubyisa, lava rhandzaka mintsako ku ri ni ku rhandza Xikwembu, va ri ni xivumbeko xa ku tinyiketela loku nga ni vukwembu kambe va tikomba va nga tshembeki eka matimba ya kona; kutani lava u va fularhela. Kambe vanhu vo homboloka ni vaxisi va ta ya emahlweni va nyanya evubihini bya vona, va hambukisa, na vona va hambukisiwa.” (2 Timotiya 3:1-5, 13) Xana hi vona vuprofeta byo tano byi hetiseka enkarhini wa hina? Hi lava va tiomisaka nhloko ntsena lava nga alaka mhaka leyi!b

14. Marito ya Nhlavutelo 12:9 mayelana na Diyavulosi ma hetiseka njhani namuntlha, naswona ku ta endleka yini hi yena ku nga ri khale?

¹⁴ Xa vumbirhi, hi vona vuyelo bya ku hlongoriwa ka Sathana ni madimona yakwe etilweni, hi ku ya hi Nhlavutelo 12:9. Yona yi ri: “Hiloko dragona leyikulu yi lahleriwa ehansi, nyoka ya khale, leyi vuriwaka Diyavulosi na Sathana, leyi xisaka misava hinkwayo leyi akiweke; yi lahleriwa ehansi emisaveni, ni tintsumi ta yona ti lahleriwa ehansi na yona.” Sweswo swi vange maxangu lamakulu emisaveni. Ina, vanhu va vone maxangu lamakulu, ngopfu-ngopfu ku sukela hi 1914. Kambe vuprofeta bya Nhlavutelo byi ya emahlweni byi vula leswaku loko Diyavulosi a lahleriwe emisaveni, a a ta swi tiva leswaku “u ni nkarhi wo koma.” (Nhlavutelo 12:12) Hi nkarhi wolowo, Sathana u dumela valandzeri va Kreste lava totiweke. (Nhlavutelo 12:17) Kunene hi byi vonile vuyelo bya nhlaselo wakwe enkarhini wa hina.c Hambiswiritano, ku nga ri khale Sathana u ta pfaleriwa ekheleni leswaku “a nga ha tshuki a hambukisa matiko.”—Nhlavutelo 20:1-3.

15. Nhlavutelo 17:9-11 yi byi tiyisa njhani vumbhoni bya leswaku hi hanya enkarhini wa makumu?

¹⁵ Xa vunharhu, hi hanya enkarhini wa “hosi” ya vunhungu ni yo hetelela leyi boxiweke evuprofeteni lebyi tsariweke eka Nhlavutelo 17:9-11. Kwalaho, muapostola Yohane u vulavula hi tihosi ta nkombo, leti yimelaka mimfumo ya misava ya nkombo—Egipta, Asiriya, Babilona, Meda-Peresiya, Grikiya, Rhoma ni mfumo wa misava lowu hlanganeke wa Anglo-Amerika. Nakambe u vona “hosi ya vunhungu” yi “huma eka leta nkombo.” Hosi leyi ya vunhungu—yo hetelela eka leti Yohane a ti voneke exivonweni—sweswi yi yimela Nhlangano wa Matiko. Yohane u vula leswaku hosi leyi ya vunhungu yi “ya eku lovisiweni,” laha endzhaku ka yona ku nga ha vulavuriwiki hi tihosi tin’wana ta misava.d

16. Timhaka ta ku hetiseka ka xifaniso lexi Nebukadnetsara a xi voneke enorhweni ti swi kombisa njhani leswaku hi hanya emasikwini ya makumu?

¹⁶ Xa vumune, hi hanya enkarhini lowu fanekiseriwaka hi milenge ya xifaniso lexi Nebukadnetsara a xi voneke enorhweni. Muprofeta Daniyele u hlamusele norho lowu wo hlamarisa wa xifaniso lexikulu xa munhu. (Daniyele 2:36-43) Swiphemu swa mune swa nsimbhi swa xifaniso lexi swi yimela mimfumo ya misava yo hambana-hambana, ku sungula hi nhloko ya kona (Mfumo wa Babilona) ku ya emilengeni ni le swikunwanini (mimfumo leyi lawulaka namuntlha). Mimfumo hinkwayo ya misava leyi yimeriwaka hi xifaniso xexo yi ve kona. Hina hi hanya enkarhini lowu fanekiseriwaka hi milenge ya xifaniso xexo. A ka ha vulavuriwi hi mimfumo yin’wana leyi nga ta ta endzhaku ka yoleyo.e

17. Ntirho wa hina wo chumayela hi ta Mfumo wu byi nyikela njhani vumbhoni lebyi engetelekeke bya leswaku hi hanya enkarhini wa makumu?

¹⁷ Xa vuntlhanu, hi vona ku hetisisiwa ka ntirho wo chumayela emisaveni hinkwayo, leswi Yesu a vuleke leswaku swi ta endleka emahlweninyana ka makumu ya mafambiselo lawa. Yesu u te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” (Matewu 24:14) Namuntlha vuprofeta byebyo byi hetiseka hi ndlela yo hlawuleka. Kunene, ma ha ri kona masimu lama nga si tirhiwaka, naswona swi nga endleka leswaku hi nkarhi wa Yehovha lowu faneleke, ku pfuleka nyangwa leyikulu ya ku endla ntirho lowukulu kwalaho. (1 Vakorinto 16:9) Hambiswiritano, Bibele a yi vuli leswaku Yehovha u ta rindza ku fikela loko munhu un’wana ni un’wana emisaveni a nyikeriwe vumbhoni hi ku kongoma. Ematshan’weni ya sweswo, mahungu lamanene ma fanele ma chumayeriwa hi ndlela leyi nga ta enerisa Yehovha. Kutani hi kona makumu ma nga ta fika.—Ringanisa Matewu 10:23.

18. Swi tikomba onge i yini leswi nga ta va ntiyiso hi van’wana va vatotiwa loko ku sungula nhlomulo lowukulu, naswona leswi swi nga tiyisekisiwa ku yini?

¹⁸ Xa vutsevu, nhlayo ya vadyondzisiwa va Kreste lava totiweke hakunene ya hunguteka, hambileswi swi tikombaka onge van’wana va ta va va ha ri kona emisaveni loko ku sungula nhlomulo lowukulu. Vo tala eka masalela va dyuharile swinene, naswona nhlayo ya lava va totiweke hakunene yi tshame yi ri karhi yi hunguteka emalembeni lama hundzeke. Kambe mayelana ni nhlomulo lowukulu, Yesu u te: “Loko masiku wolawo a ma nga hungutiwanga, ku hava nyama leyi a yi ta ponisiwa; kambe hikwalaho ka vahlawuriwa, masiku wolawo ma ta hungutiwa.” (Matewu 24:21, 22) Kutani swi tikomba onge van’wana va “vahlawuriwa” va Kreste va ta va va ha ri kona emisaveni loko nhlomulo lowukulu wu sungula.f

Ka Ha Ta Humelela Yini Xana?

19, 20. Ha yini swi ri swa nkoka swinene sweswi leswaku hi tshama hi xalamukile naswona hi rindzile ku tlula rini na rini?

¹⁹ Xana vumundzuku byi hi khomele yini? Minkarhi leyi tsakisaka ya ha ta. Pawulo u lemukise leswaku “siku ra Yehovha ri ta kukotisa khamba nivusiku.” Loko a vulavula hi vanhu lava vonakaka va tlharihile eka swilo swa misava, u ri: “Loko va ku: ‘Ku rhula ni nsirhelelo,’ kutani ndzoviso wa xitshuketa wu ta va wela hi xihatla.” Kutani Pawulo u khutaza vahlayi vakwe a ku: “Hi nga etleli ku fana ni lavan’wana hinkwavo lava etlelaka, kambe a hi hitekeni hi hlayisa mianakanyo ya hina leyi hlutekeke.” (1 Vatesalonika 5:2, 3, 6) Ina, lava va tshembaka minhlangano ya vanhu leswaku yi va tisela ku rhula ni nsirhelelo va honisa mhaka yoleyo. Vanhu vo tano va le vurhongweni lebyikulu!

²⁰ Ndzoviso wa mafambiselo lawa ya swilo wu ta fika hi ku copeta ka tihlo. Hikwalaho, tshama u langutele siku ra Yehovha. Xikwembu xi byele Habakuku xi ku: “A [ri] nge hlweli”! Kunene, sweswi i swa nkoka swinene leswaku hi tshama hi rindzile.

[Tinhlamuselo ta le hansi]

Wa Tsundzuka Xana?

• I swikombiso swihi swa Matsalwa leswi nga hi pfunaka ku tshama hi rindzile?

• Yesu u xi kombise njhani xilaveko xa ku tshama hi rindzile?

• Hi tihi tinhla ta ntsevu leti nyikaka vumbhoni bya leswaku hi hanya emasikwini ya makumu?

[Swifaniso leswi nga eka tluka 9]

A. H. Macmillan u tirhele Yehovha hi ku tshembeka ku ringana malembe ya kwalomu ka ntlhanu wa makume na rin’we

[Xifaniso lexi nga eka tluka 10]

Yesu u fanise vadyondzisiwa vakwe ni mahlonga lama tshamaka ma rindzile