Xana Diyavulosi I Munhu Wa Xiviri?

XANA hi rihi vonelo ra wena hi Diyavulosi? Xana u n’wi teka a ri munhu wa xiviri la ringaka vanhu leswaku va endla swilo swo biha, kumbexana wo va nsinya wa nawu wa vubihi ntsena? Xana Diyavulosi i munhu loyi hi faneleke ku n’wi chava, kumbe hi fanele hi n’wi honisa kutani hi n’wi teka tanihi nchumu lowu nga riki kona kumbe munhu wa ntsheketo? Xana rito leri nge “diyavulosi” ri vula matimba yo karhi lama lovisaka ya vuako hinkwabyo? Xana rito rero i mfungho wa mikhuva yo biha ntsena eka vanhu, hilaha vativi va ta vukhongeri va manguva lawa va vulaka hakona?

A swi hlamarisi leswi vanhu va nga ni mavonelo lama hambaneke malunghana nileswaku Diyavulosi i mani. Wa nga vona ndlela leyi swi nga tikaka ha yona ku n’wi tiva kahle munhu loyi a nga ni vuswikoti byo titumbeta! Hakanyingi swi tika ngopfu loko munhu wa kona a tiyimisele ku tshama a titumbetile. Bibele yi hlamusela Diyavulosi tanihi munhu wo tano. Loko yi kombetela eka yena tanihi Sathana, yi ri: “Sathana hi byakwe u tihundzula ntsumi ya ku vonakala.” (2 Vakorinto 11:14) Hambileswi a nga lowo biha, Diyavulosi u ti vonakarisa a ri lowo lulama leswaku a kota ku hambukisa vanhu. Naswona loko a kota ku endla vanhu va pfumela leswaku a hi wa xiviri, sweswo swi n’wi endla a kota ku hetisisa xikongomelo xakwe ku antswa.

Kutani, kahle-kahle i mani Diyavulosi? U sungule rini ku va kona naswona njhani? Xana u va kucetela njhani vanhu namuntlha? Xana wu kona nchumu lowu hi nga wu endlaka leswaku hi lwisana ni nkucetelo wolowo? Bibele yi tamele matimu lama pakanisaka ya masungulo ya Diyavulosi naswona yi nyika tinhlamulo leti nga ntiyiso ta swivutiso leswi.

[Xifaniso lexi nga eka tluka 3]

Wa nga vona ndlela leyi swi nga tikaka ha yona ku vona munhu loyi a tiyimiseleke ku tshama a titumbetile!