Tsundzuka Ku Nkhensa!

XANA u hetelele rini ku nyikiwa xiphephana lexi tsariweke leswaku ndza nkhensa? U hetelele rini ku xi rhumela eka munhu un’wana?

Leswi masiku lawa vanhu va vulavurisanaka hi ku tirhisa Internet, ku tsalela munhu rungula hi voko se i nchumu lowu nga ha tolovelekangiki. Kambe ku byela munhu leswaku wa nkhensa hi ku n’wi tsalela, i ndlela yo hlawuleka yo kombisa ku tlangela ka wena. Hi leswi swiringanyeto swin’wana leswi u nga swi endlaka ha yona sweswo.

 1. Tsala hi voko ematshan’wini yo thayipa eka khompyuta.

 2. Tsala vito ra munhu loyi u n’wi tsalelaka.

 3. Loko munhu wa kona a ku nyike nyiko, tsala ha yona u tlhela u vula ni ndlela leyi u nga ta yi tirhisa ha yona.

 4. Tlhela u n’wi nkhensa eka marito yo gimeta.

Loko u tsalela munhu u n’wi nkhensa, wa tsaka swinene.

Loko siku rin’wana munhu un’wana o ku komba malwandla, musa kumbe a ku nyika nyiko, kombisa leswaku wa tlangela. Tsundzuka ku nkhensa!

[Bokisi/Swifaniso leswi nga eka matluka 28, 29]

Eka Hahani Tintswalo, (2)

Ndza nkhensa swinene hi ku va u ndzi xavele (3) wachi leyi nga ni alamu. Leswi ndzi nga ni xiphiqo xo etlela ngopfu ya ndzi pfuna swinene. Ndzi tsakele ku ku vona vhiki leri nga hundza naswona ndza tshemba leswaku u fambe kahle loko u tlhelela ekaya. Ndzi swi langutele hi mahlo-ngati ku tlhela ndzi ku vona.

Ndza yi tlangela swinene nyiko leyi u ndzi nyikeke yona (4)

Ntukulu wa wena,

Fumani

[Xifaniso]

(1)

[Bokisi leri nga eka tluka 29]

SWITSUNDZUXO

● Leswi u nga swi endlaka loko nyiko ya kona ku ri mali. Hi xikombiso, ematshan’weni yo vula mali leyi u nyikiweke yona, u nga ha ku: “Ndza yi nkhensa swinene nyiko ya wena. Ndzi lava ku yi tirhisela ku . . . ”

● Tsala ntsena rungula leri yelanaka ni nyiko ni ku yi tlangela ka wena. U nga tsali vuxokoxoko bya leswi u nga ta swi endla loko u ya eku wiseni hi ximumu kumbe leswi nga endleka loko u ye exibedlhele sweswinyana.

● U nga tsali swiphiqo leswi u nga va na swona hi nyiko yoleyo. Hi xikombiso, a swi nge kombisi leswaku wa tlangela loko wo tsala u ku, “Ndza nkhensa swinene hi nchumu wo chela xinkwa, kambe a ku na laha ndzi nga wu vekaka kona!”

[Bokisi leri nga eka tluka 29]

Bibele yi hi khutaza leswaku hi nkhensa. (Luka 17:11-19) Yi ri: “Khongelani minkarhi hinkwayo” eka Xikwembu, yi tlhela yi ku: “Nkhensani mayelana ni hinkwaswo.”—1 Vatesalonika 5:17, 18.