Papila Leri Humaka Eka Huvo Leyi Fumaka — Watchtower LAYIBURARI YA LE KA WEB SITE

Papila Leri Humaka Eka Huvo Leyi Fumaka

HILAHA Yesu a khongeleke hakona, na hina hi khongela hi mbilu hinkwayo eka Xikwembu hi ku: “Vito ra wena a ri kwetsimisiwe.” Ku tiyimisela ka hina hi mbilu hinkwayo ku hanya hi ku pfumelelana ni xikhongelo lexi, ku vonaka eka mahanyelo ya hina tanihi Timbhoni ta Yehovha. Phela a hi fanelanga hi helela hi ku tiva ntsena vito ra Xikwembu. Hi fanele hi tirhisa nkarhi wun’wana ni wun’wana leswaku hi dzunisa vito rero. Hakunene, hinkwerhu hi fanele hi tiba xifuva leswi hi nga Timbhoni ta Yehovha.—Mat. 6:9; Esa. 43:10.

Hi ku pfumelelana na Pisalema 110:3, vanhu va Yehovha va tiyimisele ku endla ntirho lowu a va leriseke leswaku va wu endla. Ha yini vanhu lavakulu ni lavatsongo ni va mindhavuko hinkwayo va tinyiketela entirhweni wo chumayela? Xivangelo-nkulu hi leswaku va rhandza Xikwembu naswona va tinyiketele eka xona. Deteronoma 6:5, 6 yi hi lerisa leswaku hi rhandza Yehovha hi ‘mbilu ya hina hinkwayo, hi moya-xiviri wa hina hinkwawo ni hi matimba ya hina hinkwawo.’ Rirhandzu leri humaka embilwini ri hi susumetela leswaku hi tirhisa nkarhi wa hina, matimba ya hina ni rifuwo ra hina leswaku hi ndlandlamuxa ntirho wa Mfumo wa Xikwembu, lowu katsaka ku chumayela hi xitalo hilaha swiyimo swa hina swi hi pfumelelaka hakona.

Leswaku hakunene Yehovha wa va rhandza vanhu, u kale a lerisa leswaku mahungu lamanene ya Mfumo wa yena ma chumayeriwa emisaveni hinkwayo. A nga swi lavi leswaku ku lova ni un’we kambe u navela leswaku vanhu hinkwavo va hundzuka etindleleni ta vona to homboloka va ta eka Muvumbi leswaku va ta kuma vutomi. (2 Pet. 3:9) Yehovha u ri: “Ku fa ka lowo homboloka a ndzi ku tsakeli, kambe ndzi tsakela leswaku lowo homboloka a tlhela endleleni yakwe, a ya emahlweni a hanya.” (Ezek. 33:11) Loko hi hlanganyela entirhweni wo chumayela, hi swi veka erivaleni leswaku Yehovha wa va rhandza vanhu lava hi va chumayelaka. A swi kanakanisi leswaku sweswo swi endla leswaku hi tsaka ni ku eneriseka loko hi ri karhi hi endla ntirho lowu wa nkoka.

Rirhandzu ra hina leri enteke leri hi rhandzaka Yehovha ha rona ri tlhela ri vonaka eka langutelo leri hi nga na rona hi Rito ra yena leri huhuteriweke, ku nga Matsalwa yo Kwetsima. Loko Bibele a yi nga ri kona, a hi nga ta pfuka hi xi tivile Xikwembu naswona a hi nga ta tshinela eka xona, hilaha Yakobo 4:8 yi hi rhambaka leswaku hi endla tano. Nakambe a hi nga ta xi tiva lexi hi hanyelaka xona nileswi vumundzuku byi hi khomeleke swona. A hi nga ta swi tiva leswaku swiphiqo swa hina swi vangiwe hi Adamu mutswari wa hina hinkwerhu. (Rhom. 5:12) Nakambe a hi nga ta ri tiva rirhandzu lerikulu ra Xikwembu leri xi susumeteleke leswaku xi nyikela hi N’wana wa xona la tswariweke a ri swakwe leswaku a hi kutsula. Yehovha u hi nyika vutivi, vutlhari ni ku twisisa ka yena hi tindlela tin’wana to tala. Hakunene ha yi tlangela nyiko leyi a hi nyikeke yona, ku nga Rito ra yena leri huhuteriweke! Hikwalaho ka leswi hi yi tlangelaka, hi susumeteleka ku “tixavela nkarhi” wo hlaya, wo dyondza ni wo anakanyisisa hi leswi a hi byelaka swona. (Efe. 5:15, 16; Ps. 1:1-3) Hi nga tshuki hi wu rilela nkarhi lowu hi wu hetaka hi ri eku hlayeni ka Rito ra Xikwembu siku ni siku. Ku ri na sweswo, rirhandzu leri hi rhandzaka Xikwembu ha rona ri fanele ri hi susumetela ku rhandza Rito ra xona, hikuva ri hi pfuna leswaku hi xi twisisa ku antswa naswona hi xi rhandza ngopfu.

Bibele yi hi dyondzise leswaku loko Adamu a dyohela Yehovha, u onhe vumundzuku lebyinene bya vana va yena hinkwavo, ku katsa ni un’wana ni un’wana wa hina. Hambiswiritano, Xikwembu xi ni matimba yo kutsula vanhu, sweswo hi swona swi endleke leswaku xi teka goza ro tiyisekisa leswaku xikongomelo xa xona hi misava xa hetiseka.—Gen. 3:15.

A swi kanakanisi leswaku un’wana ni un’wana wa hina u swi navela hi mbilu hinkwayo ku kwetsimisa vito leri kwetsimaka ra Xikwembu. Loko hi ri karhi hi nghenisa vutivi bya ndlela leyi Yehovha Xikwembu a tlakukeke ha yona, hi susumeteleka ku endla leswi yena ni nhlengeletano ya yena va hi lerisaka swona, leswaku hi twarisa vito ra yena leri tlakukeke ni ku endla leswaku xikongomelo xa yena xi tiviwa. A hi kanakani nikatsongo leswaku u ta hi amukela ni ku hi katekisa sweswi ni hilaha ku nga heriki emisaveni leyintshwa.

Hina swirho swa Huvo leyi Fumaka, hi lava mi swi tiva leswaku ha mi rhandza n’wina vamakwerhu lava rhandzekaka. Nakambe, hi ma nkhensa hi mbilu hinkwayo matshalatshala ya lawa mi ma endlaka leswaku mi hisekela ku tirhisa nkarhi lowu saleke, leswaku mi chumayela mahungu lamanene eka vanhu vo tala hilaha mi nga kotaka hakona ‘nhlomulo lowukulu’ wu nga si fika. (Nhlav. 7:14) Hi ku endla tano, mi va pfulela lunghelo leri na n’wina mi nyikiweke rona, ra ku nghenisa vutivi bya Xikwembu ni bya Kreste, lebyi yisaka evuton’wini lebyi nga heriki.—Yoh. 17:3.

Vamakwenu,

Huvo leyi Fumaka ya Timbhoni ta Yehovha

[Xifaniso lexi nga eka tluka 4]

Carey W. Barber

[Xifaniso lexi nga eka tluka 4]

John E. Barr

[Xifaniso lexi nga eka tluka 4]

Samuel Herd

[Xifaniso lexi nga eka tluka 4]

Geoffrey Jackson